Galatians 3

Jî̌pwǐ̤ gû̌lṳ̂ma̤ kû̌ Yǔda a ta̤sû̌ta̤tòwò, tô̤̌mî̌ ô̌htûpwa̤ kû̌ ta̤yṳ̌ dǒ Khrǐ akû

1Galatǐphû̌ dǒ aǒò̌ sî꤮ pô̤̌khô sî sǎyṳ ganǎ̤de gû̌ma̤ sô̌ Khûmṳ̂shě a ta̤sû̌ta̤tòwònu, dě mò̌pè hè lô̌ǐplò̤ǐ sî ya? He shôbǐǐphlôphǎ hto sî kû̌ Yeshǔ Khrǐ tṳ̌sikhòsi anǎ̤ dǒ nò̌dò̌htǔlô̤ nuhǒ yahî̌. 2Hî̌ kè̌kè̌mò̌ bǎ he tǒ̤ nutôcǒcǒ꤮ nô̤̌ pwǎ. Dǒ sî gû̌ma̤ ta̤sû̌ta̤tòwò akò dě sî nǐ̤bǎ Yôla Plò̌shǐ Běcǎ ya? Kè̌mè̤̌tô̤̌dě dǒ sî ganǎ̤de ta̤sǎlě̤we̤kè dě sî yṳ̌nǐ̤nǎ̤nǐ̤ akhû̌akhîdě, sî nǐ̤bǎ Yôla Plò̌shǐ Běcǎ pô̤̌nu ya? 3Ma̤titè sî gènè̤phlô tîkî̌꤮ tô̤̌ ya? Bǎ sî sahtò̌ yṳ̌ǎ Khrǐ sakhû̌lû̌ akhanu, sî nǎla̤ǐ hto Yôla Plò̌shǐ Běcǎ hǒ, bǎbǎkǎlè khònò̤̌dě mî̌ sî jî̌pwǐ̤ ô̌htûpwa̤ nǎlaǐhtò̌ tûû̌ sînǎ̤ pô̤̌nu ya? 4Sî khòjî̌khòjû̌ hto ta̤pṳ̂̌cǒ dǒ ta̤sǎlě̤we̤kè aya hǒ bǎbǎkǎlè khònò̤̌ a htû tônô̤̌bòkè hǒ ya? Hî̌mè̤̌mè̤̌꤮ mî̌ sî khòjî̌khòjû̌ ta̤numî̌ abwǐsîrî ô̌ mè̤̌mî̌ca nî̌꤮. 5Pô̤̌nudě dǒ sî gû̌ma̤kû̌ ta̤sû̌ta̤tòwò akò dě Cǒmara ǐ sî Yôla Plò̌shǐ Běcǎ dě a ma̤ ta̤cô̌klǐcô̌sè dǒ sîkla pô̤̌nu ya? Pô̤̌nu mè̤̌tô̤̌. Dǒ sî ganǎ̤de ta̤sǎlě̤we̤kè dě sî yṳ̌ǎ akhû̌akhîdě, a ǐ pwǎ sî pwǎ. Dǒ sî gû̌ma̤kû̌ ta̤sû̌ta̤tòwò akhû̌khî mè̤̌tô̤̌.

6Gènè̤kè̌kè̌mò̌ lô̌khô, lî̤plò̌shǐkû hî̌ kû̌, PhaAbraha a ta̤ô̌htûpwa̤nu, “A yṳ̌ǎ Cǒmara dě dǒ a ta̤yṳ̌ta̤nǎ̤ akhû̌akhî, Cǒmara bè̌ a pô̤̌ kòyòcǒkòyòtè̤ tôpwa̤ nuhǒ.” ^a 7Ma̤pô̤̌nudě sî tô sî̌ganǎ̤ kû̌ kòyò dǒ a yṳ̌nǐ̤nǎ̤nǐ̤ Cǒmara tokhlǒ numî̌ PhaAbraha akhlialè mè̤̌mî̌ca hǒ. ^b 8Lî̤plò̌shǐ hî̌nǎ hto dǒ něhǎněnô̤̌ kû̌, Cǒmara gǔ bè̌cǒbè̌tè̤ Yǔdaphû̌ mè̤̌tô̤̌ tokhlǒnu, kû̌ asî ata̤yṳ̌ta̤nǎ̤ akhû̌khî pě, a hî̌nǎ pô̤̌nu. Cǒmara alě̤ayô̤̌ dǐsî̌ganǎ̤wǐ ta̤sǎlě̤we̤kè dǒ PhaAbraha a ô̌ dě a hî̌ kû̌, “Dǒ nakhû̌nakhî dě, he gǔ ǐshowî̤lò̤ tutṳ̌ lǒ̤꤮ bò khlilèphû̌ tokhlǒ kû̌ na pě,” ^c A hî̌ lû̌û pô̤̌nu. 9Pô̤̌ PhaAbraha yṳ̌ǎ Cǒmara dě a nǐ̤bǎ ta̤ǐshowî̤nu, lǒ̤bò kòyò dǒ a yṳ̌ǎ ta̤ tokhlǒnu a nǐ̤bǎ kû̌ ta̤ǐshowî̤ pô̤̌ a nupě.

10Bǎbǎkǎlè kòyò dǒ a nǎlaǐhtò̌ tûû̌ ta̤sû̌ta̤tòwò dǒ a gǔ nǐ̤bǎ ta̤tě̤ta̤mè̤̌ aya tokhlǒnu, Cǒmara cî̌htò̌ asî pě. Ma̤titèmî̌ lî̤plò̌shǐkû hî̌ kû̌, “Kòyò tôpwa̤pwa̤ dǒ a ô̌htûpwa̤ gû̌ma̤ kû̌ ta̤sû̌ta̤tòwò akò pṳ̂̌tôcǒ tô̤̌ tôpwa̤nu, Cǒmara cî̌htò̌ a pě,” ^dA hî̌ pô̤̌nu. 11Pa sî̌ganǎ̤ lîphlô kû̌ kòyò dǒ a jî̌pwǐ̤ gû̌ma̤ kû̌ ta̤sû̌ta̤tòwò akò tokhlǒnu, Cǒmara bè̌cǒbè̌tè̤ asî tôpwǎ̤꤮ tô̤̌. Ma̤titèmî̌ lî̤plò̌shǐkû hî̌ kû̌, “Kòyòcǒkòyòtè̤ tôpwa̤ dǒ a nǐ̤bǎ ta̤htûpwa̤ numî̌ a ta̤yṳ̌ta̤nǎ̤ akhû̌akhî pwǎ.” ^e 12Bǎbǎkǎlè kòyò dǒ a nǎlaǐhtò̌ tûû̌ dě a gû̌ ma̤bò̌ ta̤sû̌ta̤tòwò akò tokhlǒnu, a nǎlaǐ nǐ̤jò dǒ ta̤yṳ̌ alô̤ tô̤̌. A yṳ̌ǎ ǐbò pwǎ lǒ̤bò a ma̤bò̌ nutokhlǒ pwǎ. Lî̤plò̌shǐkû hî̌ kû̌, “Kòyò tôpwa̤pwa̤ dǒ a gû̌ma̤ lǒ̤꤮ bò ta̤sû̌ta̤tòwò ô̌ tokhlǒnu, a htûpwa̤ mè̤̌mî̌ca pě,” A hî̌ pô̤̌nu. ^f 13Lǒ̤꤮ bò ta̤sû̌ta̤tòwò tokhlǒnu, kòyò gû̌lṳ̂ma̤bò̌ tôpwǎ̤꤮ tô̤̌ akhû̌akhî, Cǒmara cî̌htò̌ bò kòyò pṳ̂̌꤮ tôpwa̤ pě, bǎbǎkǎlè Khrǐ ma̤hǎplǎge pa hǒ. Dǒ a khòbǎ pa ta̤cî̌htò̌ dǒ nò̌dò̌htǔlô̤ akhû̌akhîdě, a hènṳ̌ khòbǎhto pa ta̤cî̌htò̌ dǒ a gǔ hèbǎ pa pěnu agûlǎ̤ hǒ. Ma̤titèhî̌dě lî̤plò̌shǐkû hî̌ kû̌, “Kòyò tôpwa̤pwa̤ dǒ kòyò ma̤sihtò̌ a dǒ nò̌dò̌htǔ alô̤nu, ta̤cî̌htò̌ bǎ a hǒ,” A hî̌ pô̤̌nu. ^g 14Pô̤̌khô Yǔdaphû̌ mè̤̌tô̤̌ tokhlǒ gǔ nǐ̤bǎ ta̤shôwî̤shôwô̌ nudě, Yeshǔ Khrǐ hèma̤hǎplǎge hto bò bǎ pa hǒ. Ta̤ǐshowî̤nu, a sô̌sô̌ kû̌ Cǒmara olò̤kè PhaAbraha dǒwǐkhanu hǒ. Htokhôtô̤̌ Cǒmara olò̤ hto kû̌ a ǐlò̤ pa Yôla Plò̌shǐ Běcǎ pě. Pô̤̌khô kòyò dǒ a yṳ̌ǎ Yeshǔ tokhlǒ gǔ nǐ̤bǎ Yôla Plò̌shǐ Běcǎ pěnudě, Yeshǔ hèma̤hǎplǎge pa pwǎ.

Ta̤sû̌ta̤tòwò kû̌ ta̤olò̤wǎ̤lò̤

15Pṳ̌wè̤̌ sî꤮, he gǔ shôbǐǐlṳ̌ bǎ sî kû̌ ta̤ dǒ kòyò lǎ̤klô ma̤ ǐtûû̌ a lṳmṳ̌khilṳmṳ̌lî tôcǒ. Bǎ kòyò sò̌ginǐ̤ ǎmě hto lû̌shǎ akhanu, mòpèpè̌ bǎbǎ, a kè̌ hè ma̤pî̌kè tô̤̌mî̌ a kè̌ hè ma̤khô̌kè hî̌nu, anǐ̤ pe tô̤̌ hǒ. 16Pô̤̌nudě Cǒmara ǐlò̤ a ta̤olò̤ kû̌ PhaAbraha kû̌ akhlialè akla tôpwa̤ pwǎ. “Dǒ akhlialè tokhlǒ,” Cǒmara hî̌ pô̤̌nu mè̤̌tô̤̌. Yô̤̌mûyô̤̌sǎ mî̌ kòyò ô̌wô̤̌ mè̤̌tô̤̌. Mè̤̌mè̤̌tôkhônu, a hî̌ kû̌, “dǒ nakhlinalè aklatôpwa̤,” ^h a hî̌ pô̤̌nu akhû̌khî, yô̤̌mûyô̤̌sǎ mî̌ a hî̌lṳ̌ pwǎ tǒ̤ tôpwa̤ nô̤̌ pwǎ. A sǎyṳ hî̌ numî̌ Khrǐ pwǎ. 17Ta̤dǒ he sǎyṳ hî̌ nî̌ hî̌tè numî̌, Cǒmara olò̤ hto kû̌ PhaAbraha dě dǒ nô̌kò aně lǐ̤ya̤ kû̌ sushinu a ǐlò̤nô̌ pwǎ ta̤sû̌ta̤tòwò dǒ Khûmṳ̂shě a ô̌ pwǎ. Ta̤sû̌ta̤tòwò numî̌, a ma̤pè̤̌kèjò kû̌ Cǒmara a ta̤olò̤ tô̤̌. ⁱ 18Dǒ pa gû̌ ma̤ ta̤sû̌ta̤tòwò akhû̌akhî, pa kè̌ nǐ̤bǎjò Cǒmara a ta̤ǐshowî̤ û̌tě̤û̌ca kè̌hî̌dě ta̤ǐshowî̤ hǒtokhlǒ numî̌ a hè mè̤̌mî̌ca dǒ Cǒmara a ta̤olò̤ ô̌nu amè̤̌tô̤̌. Bǎbǎkǎlè Cǒmara olò̤ hto ta̤ǐshowî̤ û̌tě̤û̌canu kû̌ PhaAbraha akhû̌akhî, a ǐ hto ta̤ǐshowî̤ û̌tě̤û̌canu kû̌ lû̌û hǒ. ^j

19Cǒmara cû̌ǐlò̤ tǒ̤ pa ta̤sû̌ta̤tòwò ma̤titè? Kòyò ma̤ta̤sǔ akhû̌akhî, a ǐlò̤ pa pwǎ. Ta̤sû̌ta̤tòwònu, a ô̌měô̌gle yî̤ tǒ̤dǒ PhaAbraha akhlialè hètǒ̤nu. PhaAbraha akhlialè dǒ Cǒmara olò̤ nutôpwa̤ mî̌ Yeshǔ Khrǐ nuhǒ. Cǒmara ǐlò̤ ta̤sû̌ta̤tòwò dǒ mǒkhû̌ tanaphû̌ a cǔdekû. Dě mǒkhû̌ tanaphû̌ ǐlò̤ tutṳ̌ dǒ Khûmṳ̂shě dě Khûmṳ̂shě ǐlò̤ tutṳ̌ dǒ kòyò a ô̌. Khûmṳ̂shě mî̌ pwa̤ma̤ta̤ dǒ aklǎmakû tôpwa̤ pwǎ. 20Pwa̤ma̤ta̤ dǒ aklǎmakû tôpwa̤mî̌ a ô̌ icu bò ginǐ̤khôginǐ̤gî̌. Cǒmara ǐlò̤ a ta̤olò̤ dǒ PhaAbraha a ô̌nu, a lǎ̤lṳ̂ kû̌ pwa̤ma̤ta̤ dǒ aklǎmakû tôpwǎ̤꤮ tô̤̌. Cǒmara olò̤ tû̌ tôpwa̤ nô̤̌ pwǎ.

Ta̤sû̌ta̤tòwò a ta̤yè̤lò̤nǎ

21Ma̤pô̤̌nudě ta̤sû̌ta̤tòwònu a ma̤tûkhû̌takǎ shěshu Cǒmara a ta̤olò̤ tokhlǒnu ya? A ma̤tûkhû̌takǎ shěshu tôcǒ꤮ tô̤̌. Ma̤titèhî̌dě ta̤sû̌ta̤tòwò hǒo, a kè̌ dǐô̌htò̌jò pa ta̤ô̌htûpwa̤ asa kè̌hî̌dě Cǒmara bè̌cǒbè̌tè̤ pa kû̌ pa jûlě̤phî̌yô̤̌ kû̌ ta̤sû̌ta̤tòwò tokhlǒ akhû̌khî pwǎ. 22Bǎbǎkǎlè lî̤plò̌shǐkû hî̌ kû̌, hǎkhû̌ hǒtôbǎ lǒ̤bònu, a ô̌ bò dǒ ta̤sǔta̤plě ata̤pǒalǎ̤ pwǎ. Pô̤̌nu akhû̌akhî, Cǒmara a ta̤ǐshowî̤nu nî̌ a olò̤ kû̌ pa kè̌ yṳ̌ǎ Yeshǔ mî̌ a ǐ pa pě pwǎ. Ta̤htûpwa̤ tûjû̌pwa̤nu a ǐpwǎtǒ̤ kòyò dǒ a yṳ̌ǎ Yeshǔ Khrǐ nutokhlǒ pwǎ.

23Bǎ ta̤yṳ̌ta̤nǎ̤nu hètǒ̤ nò̌khôtô̤̌ akhanu, ta̤sû̌ta̤tòwò dǒô̌mě kudǔdǔ pa sô̌sô̌kû̌ kòyò ô̌ dǒ apô̤kû nutokhlǒ hǒ. Pa ô̌ gutṳ̌ bǎ a pô̤kûnu tǒ̤dǒ Cǒmara dǔlè̌lṳ̌htò̌ ta̤yṳ̌ta̤nǎ̤ tôplǎ pě. 24Pô̤̌nu akhû̌akhî, ta̤sû̌ta̤tòwònu asô̌sô̌kû̌ pwa̤ ô̌pǒ̤ pa tôpwa̤nu hǒ. Htodě pô̤̌khô Cǒmara gǔ jî̌cǒjî̌tè̤ pa kû̌ pa ta̤yṳ̌ta̤nǎ̤ Khrǐ akhû̌khînu dě ta̤sû̌ta̤tòwònu a sûcû̌hto pa dǒ Khrǐ a ô̌ hǒ. 25Khònò̤̌dě pa bè̌ pa ta̤yṳ̌ta̤nǎ̤ dǒ Yeshǔ Khrǐ akû akhû̌akhî, ta̤mǎlò̤nu a ô̌pǒ̤ pe pa tô̤̌, htokhôtô̤̌ a nè̌klè̌nè̌klò pe pa tô̤̌ hǒ.

26Dǒ ta̤yṳ̌ta̤nǎ̤ akhû̌akhî, sî lǒ̤bò htûbò kû̌ Khrǐ ta̤tôcǒ nô̤̌ hǒ dě sî htûbò Cǒmara aphû̌ali̤ tokhlǒ hǒ. 27Ma̤titèhî̌dě kòyò dǒ a ju anǎ̤ kû̌ shi tokhlǒnu, a htûhtò̌kè kû̌ Khrǐ ta̤tôcǒ nô̤̌ tokhlǒ numî̌ a kûhtò̌sô̌htò̌ Khrǐ sô̌sô̌kû̌ a kûhtò̌sô̌htò̌ jejû dǒ asa nutokhlǒ hǒ. 28Yǔdaphû̌ kû̌ khlilèphû̌ ashǔshawa̤ Grěphû̌ tokhlǒ, jû̌ kû̌ pwa̤ nǐ̤bǎ ta̤piliphû̌ tokhlǒ, pwa̤khû kû̌ pwa̤mǒ̤, lǒ̤bò ta̤ nutokhlǒ numî̌ akhô̌ nô̌ lû̌û tô̤̌, ma̤titèhî̌dě lǒ̤bò sî nutokhlǒ numî̌ sî htûhtò̌ bò kû̌ Khrǐ tôcǒ nô̤̌ hǒ. 29Sî kè̌ htûhto Khrǐ ata hî̌dě sî htû mè̤mè̤̌ PhaAbraha akhlialè tokhlǒhǒ. Dě sî gǔ nǐ̤bǎ ta̤ǐshowî̤ tokhlǒ dǒ Cǒmara olò̤ PhaAbraha nutokhlǒ pě. ^k