Gal 6 | KxfSCKXF | STEP | Pṳ̌wè̤̌ sî, sî kè̌ kè̌shǐ kòyò tôpwa̤pwa̤ dǒ a ma̤sǔ ta̤ tôcǒcǒ hî̌nu, sî dǒ a ô̌htûpwa̤ pô̤̌ Yôla Plò̌shǐ Běcǎ nè̌klè̌nè̌klòǐ sînu tokhlǒnu, sî lǎ̤lṳ̂ cû̌ sû̌ǐtòwòǐ getîkhî yǎ. Sî bǎ ma̤lè sǎdôhôbî̌ a htodě pô̤̌khô sî gǔ gû̌cû̌ dǒ ta̤tili̤tôlô̌ akû tô̤̌nu, sè̌rè̌ lô̌khô sînǎ̤ nî̌꤮.

Galatians 6

Wǐò̌ wô̤̌wô̤̌ lû̌ tôpwa̤ kû̌ tôpwa̤ a ta̤wǐta̤ò̌

1 Pṳ̌wè̤̌ sî, sî kè̌ kè̌shǐ kòyò tôpwa̤pwa̤ dǒ a ma̤sǔ ta̤ tôcǒcǒ hî̌nu, sî dǒ a ô̌htûpwa̤ pô̤̌ Yôla Plò̌shǐ Běcǎ nè̌klè̌nè̌klòǐ sînu tokhlǒnu, sî lǎ̤lṳ̂ cû̌ sû̌ǐtòwòǐ getîkhî yǎ. Sî bǎ ma̤lè sǎdôhôbî̌ a htodě pô̤̌khô sî gǔ gû̌cû̌ dǒ ta̤tili̤tôlô̌ akû tô̤̌nu, sè̌rè̌ lô̌khô sînǎ̤ nî̌꤮. 2 Wǐò̌ wô̤̌wô̤̌ lû̌û tôpwa̤ kû̌ tôpwa̤ a ta̤wǐta̤ò̌ tokhlǒ nî̌꤮. Sî kè̌ ma̤pô̤̌ numî̌ sî ma̤ pô̤̌ Yeshǔ Khrǐ ta̤sû̌ta̤tòwò nuhǒ. 3 Kòyò tôpwa̤pwa̤ dǒ a hî̌ ǐtûû̌ anǎ̤ kû̌, he mî̌ kòyò dǒ kòyò alṳ̂dû̌shǐ tôpwa̤ a hî̌ bǎbǎkǎlè a kè̌ mè̤̌ pô̤̌nu tô̤̌ hî̌dě a lòhô lò̤tû̌ anǎ̤ pwǎ. 4 Kòyò pṳ̂̌꤮ tôpwa̤ tô gwè̌lò̤ tûû̌ anǎ̤. Dě a tôbǎ tèbǎ anǎ̤ kû̌ kòyò dǒ ashǔshawa̤ tokhlǒ tô̤̌. Ta̤ma̤ dǒ a ma̤hto tokhlǒnu, a kè̌ wô̌ hî̌dě dǒ a ta̤ma̤nu akhû̌akhî, a kè̌ sǎlě̤sǎlò̤ mî̌ anǐ̤ pwǎ. 5 Ma̤titèhî̌dě kòyò pṳ̂̌꤮ tapwa̤ bǎwǐbǎò̌ tû̌ a ta̤phǐta̤ma̤ tokhlǒ.

6 Kòyò dǒ a sû̌ǐtòwòǐ sî kû̌ Cǒmara alě̤ayô̤̌ tokhlǒ numî̌, sî tôbǎ ǐ asî ta̤wî̤ta̤wô̌ pṳ̂̌꤮ tocǒ.

7 Lô̌lò̤ǐ tûû̌ tǎ̤ sînǎ̤ tǎ̤mǎ̤ nî̌꤮. Gènè̤ tǎ̤ kû̌ na gǔ ma̤tûdû ma̤hǔma̤sè bò̌jò dǒ Cǒmara a lô̤mô̤̌ tǎ̤mǎ̤ nî̌꤮. Na shǒǎlò̤ hî̌tènu, na gǔ kǎbǎ tûû̌ sô̌ pě. 8 Ma̤titèhî̌dě kòyò dǒ a shǒǎlò̤ sǐshiphěyî̌ a ta̤sǎyṳsǎbǎ tokhlǒnu, a gǔ kǎbǎ tîkhî sô̌ tûû̌ ta̤pî̌ta̤lṳ̂̌ nutokhlǒ pě. Bǎbǎkǎlè kòyò dǒ a shǒǎlò̤ ta̤gû̌ma̤ pô̤̌ Yôla Plò̌shǐ Běcǎ a nè̌klè̌nè̌klò lû̌û tokhlǒnu, a gǔ kǎbǎ sô̌ yôla htûpwa̤ tûjû̌pwa̤ pě. 9 Ma̤ta̤ wô̌nu nî̌ sǎphlǒpî̌ lô̌khô tǎ̤mǎ̤ nî̌꤮. Pa kè̌ sǎphlǒpî̌ tô̤̌ hî̌dě, htû̌꤮ shěkhǎ bǎ pěnu, pa gǔ kǎbǎ sô̌ ta̤sǎta̤phô pě. 10 Pô̤̌nu akhû̌akhî bǎkhò̌tè꤮ bǎbǎ, bǎ pa nǐ̤bǎ ta̤shěta̤khǎ wô̌ akhanu, pa bǎ ma̤wô̌ bǎ kòyò pṳ̂̌꤮ tôpwa̤. Bǎbǎkǎlè sî ma̤ta̤ awô̌nu kè̌dû̌shǐ pû ta̤dòkûphû̌ nutokhlǒ nî̌.

Ta̤dǐsè̌rè̌ kû̌ ta̤hî̌mô̤hî̌wô̌ dǒ gutṳ̌kò

11 Khònò̤̌, kè̌ lô̌khô mò̌! lî̤phlǒdû̌ tokhlǒ numî̌ he wě̤ kû̌ henǎ̤ pwǎ.

12 Kòyò dǒ a noshû̌ sî kû̌ bǎ dǔtṳ̌bě nutokhlǒ mî̌ a sǎyṳ nohtû̌sò̌htò̌ kòyò kû̌ anǎ̤ pwǎ. Ma̤titèhî̌dě kòyò nutokhlǒ mî̌ a kè̌ shôbǐǐlṳ̌ pwǎtǒ̤ Khrǐ ata̤si dǒ nò̌dò̌htǔlô̤ pwǎ kè̌hî̌dě a ǐsha kòyò ma̤jî̌ma̤jû̌ lû̌û no̤꤮. 13 Asî dǒ a dǔtṳ̌phě nutokhlǒ dě a jûǎ gû̌ kòyò ta̤sû̌ta̤tòwò tô̤̌. Bǎbǎkǎlè pô̤̌khô asî gǔ bè̌htò̌mǒ lô̌khô asǎphlǒ kû̌ sî gû̌ dǔtṳ̌ bǎ lû̌û běnu akò nudě, asî sǎyṳ nodǔtṳ̌ sîphě pwǎ. 14 He kè̌ hî̌bǎhtò̌yô̤̌ pô̤̌ asînu kè̌hî̌dě, he gǔ hî̌bǎhtò̌yô̤̌ pwǎ dǒ he shôbǐǐ pa Běcǎ Yeshǔ Khrǐ a nò̌dò̌htǔ awe̤akènu nô̤̌pwǎ. Yeshǔ si dǒ nò̌dò̌htǔlô̤ akhû̌akhî, ta̤pṳ̂̌꤮ tocǒ dǒ a icu kû̌ hǎkhû̌ tokhlǒnu, a sikè hto bǎbò dǒ heya hǒ. Pô̤̌nudě, he dě he sikè bǎbòhto ta̤dǒ a icu kû̌ hǎkhû̌ nutokhlǒ hǒhǒ. ^{▼▼yô̤̌mûyô̤̌sǎ mî̌ a sǎyṳ hî̌ pô̤̌o: Yeshǔ si dǒ nò̌dò̌htǔlô̤ akhû̌akhî, ta̤ dǒ hǎkhû̌phû̌ sǎlě̤sǎyṳ tokhlǒnu, he bè̌dû̌ pe tôcǒ꤮ tô̤̌ hǒ. Dě hǎkhû̌phû̌ dǒ ashǔshawa̤ tokhlǒnu, a gènè̤dû̌ pe he tôpwǎ̤꤮ tô̤̌ hǒ.} 15 Kòyò dǔtṳ̌bě tokhlǒ bǎbǎ, a dǔtṳ̌ gû̌ kòyò tô̤̌ tokhlǒ bǎbǎ, a lṳ̂dû̌ nô̌ tôcǒ꤮ tô̤̌. Ta̤dǒ a lṳ̂dû̌lǒ numî̌ htûhtò̌ Cǒmara a kòyò nupwǎ. 16 Cǒmara a ta̤pè̤̌ta̤dû kû̌ a ta̤sǎyṳgwèbǎǐ ô̌ kû̌ pû kòyò dǒ a jûǎ ta̤sû̌ǐtòwòǐnu tokhlǒ alô̤ kû̌ Cǒmara a kòyò mè̤̌mî̌ca nutokhlǒ alô̤ nî̌꤮.

17 Tǒ̤hènè khònò̤̌nu, no ma̤shû̌shushû̌shǎ pe tǎ̤ he sǎphlǒ kû̌ kòyò tôpwǎ̤ tǎ̤mǎ̤ nî̌꤮, ma̤titèhî̌dě ta̤acè dǒ a ô̌ dǒ henǎ̤lô̤ tokhlǒ numî̌, a dǔlè̌lṳ̌ kû̌ he mî̌ Yeshǔ Khrǐ ajû̌ tôpwa̤ mè̤̌mî̌canu.

18 Pṳ̌wè̤̌ sî, Běcǎ Yeshǔ Khrǐ shû̌nṳ̌ pû abwǐsîrî dǒ sî lǒ̤bò a sǎphlǒkû nî̌꤮. Ame̤.