Gen 15 | KxfSCKXF | STEP | Bǎ Khûabra ma̤hǎplǎ hto Khûlòtǎ akhanu, a kè̌shǐ ta̤ tôcǒ dě Cǒmara tûjû̌pwa̤ hî̌bǎlò̤ lû̌û kû̌, “Ǒ KhûAbra, ǐsha tǎ̤ tôcǒ tǎ̤mǎ̤ nî̌. He tugǔtaka tûû̌ na pě, htokhôtô̤̌ he ǐpô̤̌ na ta̤ma̤nǐ̤ khû̌kǎ dǒ awô̌nu pě.”

Genesis 15

Cǒmara tûjû̌pwa̤ wṳ̂̌dò kû̌ Khûabra

1 Bǎ Khûabra ma̤hǎplǎ hto Khûlòtǎ akhanu, a kè̌shǐ ta̤ tôcǒ dě Cǒmara tûjû̌pwa̤ hî̌bǎlò̤ lû̌û kû̌,

“Ǒ KhûAbra, ǐsha tǎ̤ tôcǒ tǎ̤mǎ̤ nî̌.

He tugǔtaka tûû̌ na pě,

htokhôtô̤̌ he ǐpô̤̌ na ta̤ma̤nǐ̤ khû̌kǎ dǒ awô̌nu pě.”

2 Bǎbǎkǎlè Khûabra hî̌shǔ sô̌ kû̌, “Ǒ Cǒmara Běcǎ tûjû̌pwa̤, na glè̌ ǐjò he ta̤ma̤nǐ̤ khû̌kǎ dǒ awô̌lǒ mî̌ titè pě ya? Hephû̌ ô̌ tôpwa̤ tô̤̌ akhû̌akhî, pwa̤ dǒ a gǔ nǐ̤bǎ û̌tě̤û̌ca numî̌ tǒ̤pwǎ Wî̤̌damasephû̌ KhûĚlisha dǒ a htû hejû̌ nutôpwa̤ pwǎ.” 3 Dě Khûabra hî̌ kû̌, “Na ǐ he phû̌pwa̤khû tôpwa̤ tô̤̌ akhû̌akhî, hejû̌ dǒ a ô̌phijǎlò̤ dǒ hehǐphòdǒkû akla tôpwa̤ gǔ nǐ̤bǎ û̌tě̤û̌ca pě.”

4 Cǒmara tûjû̌pwa̤ wṳ̂̌dò lû̌û kû̌, “Najû̌ KhûĚlisha nî̌ a nǐ̤bǎjò nô̌ naû̌tě̤û̌ca tô̤̌, naphû̌ kû̌ nanǎ̤ tôpwa̤ nǐ̤bǎ tûû̌ naû̌cata̤bǐ pě.” 5 Cǒmara kaǎhtò̌ Khûabra dǒ hǐphû̌khlo dě a hî̌ lû̌û kû̌, “Kè̌htò̌ dǒ mǒ̤lǎ̤nu, na kè̌ dô̌bò̌pè̤̌ dě dô̌ kè̌kè̌bò shǎ nutokhlǒ.” Htodě a hî̌ lû̌û kû̌, “Naphû̌nali̤ nakhlinalè gǔ ô̌wô̤̌ô̌dû̌ sô̌sô̌kû̌ shǎ dǒ mǒlǎ̤ nutokhlǒ pě.” ^a

6 Khûabra yṳ̌ǎ Cǒmara tûjû̌pwa̤ akhû̌akhî, Cǒmara bè̌ a pô̤̌ kòyòcǒkòyòtè̤ tôpwa̤. ^b

7 Dě Cǒmara tûjû̌pwa̤ hî̌ lû̌û kû̌, “He mî̌ Cǒmara tûjû̌pwa̤ dǒ a kaǎhtò̌ na bǎ na ô̌ Babǔlûgǎ Wî̤̌ǔrakû nutôpwa̤ hǒ, dě he ǐ na hǎkhû̌ hǒtôkû pô̤̌ nagǎ kû̌ nanǎ̤ tûû̌ ayanu hǒ.” ^c

8 Bǎbǎkǎlè Khûabra gwè̌ lû̌û kû̌, “Ǒ Cǒmara Běcǎ tûjû̌pwa̤, ta̤ nutokhlǒ dě a gǔ htû heta pěnu he cû̌sî̌yajò hětè?”

9 Dě Cǒmara hî̌shǔ lû̌û kû̌, “Phî̌hè bǎ he pṳ̂̌mǒ̤ tôlô tôdo, pè̤̌mǒ̤ tôdo, sû̌phû̌pha tôdo dǒ aně ô̌ suně pṳ̂̌ tôdo nî̌. Htokhôtô̤̌ phî̌hè nṳ̌pô̤̌ htû̌lǐ̤cò̌mǒ̤ tôbǎ kû̌ htû̌lǐ̤sopha nějǎ tôbǎ nî̌.”

10 Khûabra phî̌hè bǎ ta̤phû̌ta̤wè̤ nutokhlǒ dǒ Cǒmara alô̤mô̤̌ dě a ma̤si bò lû̌û dě a pě̤phò̌ klama ta̤phû̌ta̤wè̤nu tokhlǒ ginǐ̤khô, dě a bè̌ shěshǔ lû̌û ginǐ̤plô̤̌, taklama dě a bè̌ dǒ cǔtômû tôkhô, taklama dě a bè̌ dǒ cǔcôcî̌ tôkhô. Bǎbǎkǎlè htû̌patǐ tokhlǒ dě a pě̤phò̌ kô̌ke bǎ lû̌û tô̤̌. ^{▼▼Hǒo mî̌ ta̤wṳ̂̌dò yô̤̌ khěkhô̌ dǒ alǎ̤klôma̤ tôcǒ.} 11 Htodě lě̤tò̌ tokhlǒ hèlò̤ dě glè̌ lò̤ǎ ta̤yî̌ tokhlǒ dě Khûabra wǎ̤cû̌ tephekè kèbò asî.

12 Bǎ lṳmṳ̌nṳ̌ akhanu, Khûabra hǎmôô̌nṳ̌ shôpe̤ dě ta̤khǐsiwi̤ ô̌te̤we̤ bò lû̌û akhû̌akhî a ǐsha mî̌caca. ^e 13 Dě Cǒmara hî̌bǎhtò̌ lû̌û dǒ ta̤hǎmimò̤̌ akûnu kû̌, “Sî̌ganǎ̤ tě̤tě̤mè̤̌mè̤̌ nakhlinalè tokhlǒnu, a gǔ cû̌htû shǐtèmè̤ dǒ kòyòshi kòyògǎkû pě. Asî gǔ cû̌htû kòjû̌ bǎnu pě, dě kòyò gǔ ma̤jî̌ma̤jû̌ asî aně lǐ̤ya̤ pě. ^f 14 Bǎbǎkǎlè he cî̌htò̌ shigǎ dǒ a nohtû asî pô̤̌ jû̌nu tôgǎ pě, dě bǎ asî hǎhtò̌ge dǒ shigǎ nutôgǎ akha pěnu, a phî̌genṳ̌ dû̌wî̤ mî̌ca ta̤dû̌yò̤̌htò̌sa pě. ^g 15 Hî̌tètè̌ bǎbǎ, na dě na ô̌htûpwa̤ nědû̌lahtû pě dě na simô̤siwô̌ pě dě kòyò gǔ lǔǐwô̌ na kû̌ naphinaphu sîtokhlǒ pě. ^h 16 Bǎbǎkǎlè nakhlinalè lò̤tutṳ̌ lǐ̤htu tôhtu pě nî̌ a getǒ̤sô̌ lô̌khô bǎ gǎkûnu pě. Ma̤titèhî̌dě he ô̌pǒ̤ tǒ̤dǒ Amò̤̌rǐ khlilèphû̌ nutokhlǒ a ma̤ dû̌ma̤ti̤ lô̌khô ta̤sǔta̤plě pě dě he gǔ cî̌htò̌ wṳ̂̌hǎhtò̌kè nô̌ asî pě.” ⁱ

17 Bǎ lṳmṳ̌lò̤tě̤ dě lṳmṳ̌khǐ akhanu, Khûabra kè̌shǐ sumṳ̌ mî̌khǔ toǒhtò̌ dǒ kûphǎkûnu mî̌shǎ gè̌htò̌ dě a cû̌ bǎ kòyò lǎ̤ pě̤phò̌ kô̌ke ta̤yî̌ nuginǐ̤plô̤̌ aplǎkûnu. 18 Bǎnu tôni̤dě Cǒmara tûjû̌pwa̤ wṳ̂̌dò ayô̤̌ kû̌ Khûabra dě a hî̌ lû̌û kû̌, “Sahtò̌ dǒ Ijî̌gǎkû lô̤̌mǒ̤ nudě a tǒ̤dǒ Yupharǎ lô̤̌mǒ̤dû̌nu, he olò̤ kû̌ gǎnu he ǐ kû̌ nakhlinalè lò̤ tokhlǒ hǒ. ^j 19 Kǎtô̤̌ a pa tǒ̤ pô̤̌ kû̌ gǎ dǒ Kena khlilèphû̌, Keněse khlilèphû̌, Kedamûnǐ khlilèphû̌, 20 Hǐtǐ khlilèphû̌, Peresǐ khlilèphû̌, Rephai khlilèphû̌, 21 Amò̤̌rǐ khlilèphû̌, Khana khlilèphû̌, Gǐrakashǐ khlilèphû̌, kû̌ Yebǔsǐ khlilèphû̌ nutokhlǒ ô̌ǐ gǎ nutokhlǒ hǒ.”