Gen 20 | KxfSCKXF | STEP | Hǒtôplǎ dě PhaAbraha ô̌ bǎ Khûmè̤mare agûlǎ̤ nudě a cû̌ hènè pô̤̌ dǒ Khanagǎ lô̤̌kò nutôkhô dě a cû̌ô̌ bǎ Kadeshǎ shipǒ̤htò̌nu kû̌ Shǔragǎ aplǎkûnu. Nô̌kò dě a cû̌ô̌ bǎ Wî̤̌kèranu teděsǎ.

Genesis 20

PhaAbraha kû̌ Khwǐabǐmôlè̌

1 Hǒtôplǎ dě PhaAbraha ô̌ bǎ Khûmè̤mare agûlǎ̤ nudě a cû̌ hènè pô̤̌ dǒ Khanagǎ lô̤̌kò nutôkhô dě a cû̌ô̌ bǎ Kadeshǎ shipǒ̤htò̌nu kû̌ Shǔragǎ aplǎkûnu. Nô̌kò dě a cû̌ô̌ bǎ Wî̤̌kèranu teděsǎ. 2 Dě PhaAbraha hî̌ bǎ kòyò kû̌mî̌ ama Mǒ̤sara nî̌ apṳ̌ pwa̤mǒ̤ pwǎ akhû̌akhî Wî̤̌kèra akhwǐ Abǐmôlè̌ no cû̌kaǎhè Mǒ̤sara dǒ a ô̌. ^a

3 Tôsa nî̌, Cǒmaradû̌ hèô̌lṳ̌htò̌ bǎ Khwǐabǐmôlè̌ dǒ atahǎmi̤mò̤̌ akû dě a hî̌ lû̌û kû̌, “Na glè̌ si pě hǒ, ma̤titèhî̌dě pwa̤mǒ̤ dǒ na phî̌ nutôpwa̤ mî̌ awṳ̂ ô̌hto hǒ.”

4 Bǎbǎkǎlè Khwǐabǐmôlè̌ hǎmôô̌ kû̌ Mǒ̤sara khôtô̤̌ akhû̌akhî a hî̌ kû̌, “Ǒ Běcǎdû̌, he ma̤sǔ bǎ tôcǒ khôtô̤̌. Na glè̌ ma̤si bò he kû̌ heshiphû̌gǎphû̌ dǒ ata̤sǔ ô̌tô̤̌ nutokhlǒ pě ya? 5 Abraha asanǎ̤ hî̌nǎ he kû̌, ‘Mǒ̤sara mî̌ hepṳ̌ pwa̤mǒ̤ pwǎ,’ yahî̌? Htokhôtô̤̌ Mǒ̤sara gû̌ hî̌ kû̌ a mî̌ ‘hewè̤̌ pwa̤khû pwǎ,’ yahî̌? He ma̤ ta̤ khònò̤̌ hesǎphlǒ amṳ̂̌plî pwǎ, he ma̤sǔ bǎ ta̤ tôcǒ꤮ khôtô̤̌.”

6 Dě Cǒmaradû̌ hî̌shǔ lû̌û dǒ atahǎmi̤mò̤̌ akûnu kû̌, “O, a mè̤̌ kǎ. He sî̌ganǎ̤ kû̌ na ma̤ ta̤ dǒ sǎphlǒ mṳ̂̌plî akû pwǎ. Pô̤̌nudě pô̤̌khô na gǔ ma̤sǔ he tô̤̌ ayanu he ma̤dǐdò na hǒ. Ma̤hî̌nudě he no hǎmôô̌ na kû̌ a tô̤̌ pwǎ kǎnǒ̤꤮. 7 Pô̤̌nudě khònò̤̌ sûge tîkhî sô̌ a dǒ awṳ̂ ô̌nu, ma̤titèhî̌dě a mî̌ piwi̤pèsè tôpwa̤. Pô̤̌khô na gǔ si tô̤̌ ayanu, a kwi caba bǎ tûû̌ naya pě. Na kè̌ sûge tîkhî lû̌û tô̤̌ mî̌, na kû̌ nakòyò bò̌bò tokhlǒ si mè̤̌caca pě.”

8 Nô̌kò tôwô̤ lṳmṳ̌wî̤sò akhanu, Khwǐabǐmôlè̌ no kaǎhè apwa̤ma̤ta̤phû̌ lǒ̤꤮ bò dě bǎ a hî̌lṳ̌ bǎ bò asî kû̌ lǒ̤bò ta̤htûhtò̌ dǒ atahǎmi̤mò̤̌ akû nutokhlǒ akhanu, asî ǐsha jòjî̌꤮ tô̤̌. 9 Hǒtôplǎ dě Khwǐabǐmôlè̌ kaǎhèsô̌ PhaAbraha dě a hî̌ lû̌û kû̌, “Na cû̌ma̤tǒ̤ pa pô̤̌o mî̌ ama̤titè? He cû̌ma̤sǔ bǎ kwè̌ na titèya? Na cû̌ noma̤ tǒ̤ he kû̌ heshiphû̌gǎphû̌ tokhlǒ kû̌ ta̤sǔ dû̌ tôcǒ mî̌ ama̤titè? Ta̤ dǒ na ma̤ he tokhlǒnu mî̌ na tô ma̤ tô̤̌.” 10 Htodě Khwǐabǐmôlè̌ gwè̌ pô̤̌ lû̌û kû̌, “Dǒ mǐtitè akhû̌akhî dě na cû̌ma̤tǒ̤ he pô̤̌o ya?”

11 Dě PhaAbraha hî̌ geshî̌shǔ sô̌ lû̌û kû̌, “He gènè̤ kû̌ gûlǎ̤ bǒo tôkû mî̌, kòyò dǒ a ǐsha bè̌dubè̌nǎ̤ Cǒmaradû̌nu a ô̌ bǎ tôpwǎ̤꤮ tô̤̌. Dǒ he ma akhû̌akhî dě hî̌pěmî̌ kòyò ma̤si he pě dě kòyòphî̌sigwǐkè he ma hè̌ he cû̌ shò̌tò̤̌ pô̤̌nu dě he ma̤ pô̤̌o pwǎ. 12 Hî̌tě̤tě̤ mò̌ mî̌ a mî̌ hepṳ̌ pwa̤mǒ̤ mî̌ amè̤̌mè̤̌. Paphacu lû̌û pamǒ̤ khô̌ lû̌û dě he phî̌ sô̌ lû̌û pwǎ. 13 Dě bǎ Cǒmaradû̌ kaǎhtò̌kè he dǒ hephahǐ dě a no hǎhtò̌cû̌gǎ he tôkû hto tôkû akhanu, he hî̌ lû̌û kû̌, ‘pa cû̌tǒ̤ gûlǎ̤ bǎtè tôkû bǎbǎ, tûlû̌ hî̌ bǎ kòyò kû̌ he mî̌ nawè̤̌, pô̤̌nu pě nî̌꤮. Na kè̌ hî̌ pô̤̌numî̌ na dǔlṳ̌ kû̌ na mô̤ǐ he hǒ.’”

14 Khwǐabǐmôlè̌ phî̌hè sû̌phû̌ kû̌ pè̤̌, pṳ̂̌panǎ̤, jû̌pwa̤mǒ̤ kû̌ jû̌pwa̤khû tokhlǒ dě a hèǐ kû̌ PhaAbraha. Dě a ǐtîkhî sô̌ ama Mǒ̤sara. 15 Dě Khwǐabǐmôlè̌ hî̌ kû̌, “Kè̌mò̌ lǒ̤bò hǎkhû̌ dǒ he pǒǐ nutokhlǒ, na sǎyṳ ô̌ bǎtè tôkû̌꤮ bǎbǎ tûlû̌ ô̌ tûû̌ nî̌꤮.”

16 Dě a hî̌ Mǒ̤sara kû̌, “He ǐ hto nawè̤̌ pwa̤khû ruyî̌ abǎ tirǐ hǒ. Ru dǒ he ǐ tokhlǒ numî̌ a khòlṳ̌ bǎ kòyò dǒ a ô̌plǒ kû̌ na tokhlǒ sî̌ganǎ̤ kû̌ na ta̤sǔ ô̌ tôcǒ꤮ tô̤̌ nuhǒ. Hǒnumî̌ a dǔlṳ̌ lîtîklǐ bǎ bò dǒ kòyò pṳ̂̌꤮ tôpwa̤ alô̤mô̤̌ kû̌ na ma̤ bǎ ta̤sǔ tocǒ꤮ tô̤̌ nuhǒ.”

17 – 18 Dǒ PhaAbraha ama Mǒ̤sara akhû̌akhî, Cǒmara tûjû̌pwa̤ ma̤bǐ kèbò Khwǐabǐmôlè̌ akhlialè pwa̤mǒ̤ tokhlǒ aphû̌ lǎ̤ô̌ gûlǎ̤. Dě pô̤̌khô Khwǐabǐmôlè̌ ama kû̌ ajû̌mǒ̤ tokhlǒ gǔ phû̌ô̌ sô̌ aya PhaAbraha kwicabahtò̌ Cǒmaradû̌ dě Cǒmaradû̌ ma̤hǎmǎ bǎkè Khwǐabǐmôlè̌ ta̤sha, htodě a ma̤hǎmǎ bǎpô̤̌ Khwǐabǐmôlè̌ ama kû̌ ajû̌mǒ̤ tokhlǒ ata̤sha dě asî phû̌ô̌bò sô̌ lô̌khô.