Gen 23 | KxfSCKXF | STEP | Mǒ̤sara aně ô̌ ně tôya̤ kû̌ ginǐ̤shi kû̌ susô̌tôně hǒ.

Genesis 23

Mǒ̤sara si dě kòyò lǔǐ lû̌û

1 Mǒ̤sara aně ô̌ ně tôya̤ kû̌ ginǐ̤shi kû̌ susô̌tôně hǒ. 2 Dě bǎ aně ô̌ pwǐnu akha a sikè bǎ Khanagǎ Wî̤̌kǐriya arabanu, khònò̤̌dě kòyò kaǎ lû̌û kû̌ Wî̤̌hebrûnu. Dě PhaAbraha hǎwô ǐ yǎ.

3 Htodě PhaAbraha ô̌ bǎ ama lṳ̌tôtṳ̂̌ kòshî̌nu dě a ihtǒcû̌ dǒ Hǐtǐ khlilèphû̌ tokhlǒ a ô̌ dě a cû̌hî̌ asî kû̌, 4 “He mî̌ shilǎ̤gǎkhlophû̌ tôpwa̤ dǒ a hèô̌ kû̌ sî, dě shaǎ pè̤̌mò̌ he sîlṳ̌khû̌ dě he lǔǐjò nô̌ hema pwǎ.” ^a

5 Dě Hǐtǐphû̌ tokhlǒ hî̌shěshǔ PhaAbraha kû̌, 6 “Ǒ phadû̌, khòsǎdô ganǎ̤de kûmṳ̂̌ pa hî̌nu, dǒ paklanu phadû̌ mî̌ ta̤siwi̤sòwò̤ dû̌khlobò pa. Phadû̌ sǎyṳ lǔǐ mǒ̤dû̌ dǒ palṳ̌khû̌nu dǒ awô̌lǒ bǎtè tôkû bǎbǎ, jû̌ tûû̌ phadû̌ sǎphlǒ pwǎ. Phadû̌ kè̌ lǔǐ mǒ̤dû̌ lṳ̌tṳ̂̌ bǎ palṳ̌khû̌ numî̌, kòyò ma̤tě̤tṳ̌ nô̌ phadû̌ tôpwa̤tô̤̌.”

7 PhaAbraha ihtǒcû̌ dě dǒ ta̤bè̌dubè̌nǎ̤ akû a cû̌ û̌lò̤ dǒ Hǐtǐ khlilèphû̌ dǒ a ô̌ bǎ gǎ nutôgǎkû nutokhlǒ alô̤mô̤̌. 8 Dě a hî̌ asî kû̌, “Sî kè̌ sǎphlǒ ô̌ mè̤̌caca kû̌ sî sǎyṳ no lǔǐ hema bǒo hî̌dě he hî̌ sî, ganǎ̤de kûmṳ̂̌ dě cû̌gwè̌ bǎ he Phasûha aphû̌ Khûěpharû nunî̌. 9 No shaǎ mò̌ he lǒ̤lṳ̌kû dǒ Mèpe̤lǎ gûlǎ̤ dǒ Khûěpharû ahǔklahtu nutôkû. Pô̤̌khô a gǔ htû helṳ̌khû̌ ayanu, a hî̌ alě̤apwî̤ pwǐ tètè̌ bǎbǎ, he gǔ ǐ tûû̌ apwî̤ dǒ sî htû pwa̤jo nutokhlǒ alô̤mô̤̌ pě.”

10 Bǎ PhaAbraha kwipwî̤ lû̌û hǔkla akhanu, Hǐtǐ khlilèphû̌ Khûěpharûnu hǎnòò̌ ô̌ dǒ akhô sîtokhlǒ akla. Pô̤̌khô lǒ̤bò akhô khlilèphû̌ dǒ a hèô̌plǒ dǒ wî̤̌takhadû̌htu nutokhlǒ gǔ ganǎ̤de ayanu, a hî̌shǔ bǎ PhaAbraha dǒ asî lô̤mô̤̌. 11 Dě a hî̌ kû̌, “Ǒ phadû̌, pô̤̌nu mè̤̌tô̤̌, khòsǎdô ganǎ̤de kûmṳ̂̌ mò̌ he hî̌nu, hǔkla bǎbǎ, lǒ̤lṳ̌kû bǎbǎ, he ǐkwe bò kû̌ na dǒ he khlilèphû̌ tokhlǒ alô̤mô̤̌ dě lǔǐ mò̌ kû̌ mǒ̤dû̌ nunî̌.”

12 Dǒ ta̤bè̌dubè̌nǎ̤ akû PhaAbraha û̌lò̤ sô̌ dǒ Hǐtǐphû̌ tokhlǒ alô̤mô̤̌. 13 Dě a hî̌ Khûěpharû dǒ kòyò pṳ̂̌tôpwa̤ alô̤mô̤̌ kû̌, “Khòsǎdô, ganǎ̤de mò̌ he hî̌ nanu. He ǐtûû̌ na hǔkla alě̤apwe̤. Pô̤̌khô he lǔǐ kû̌ hema ayanu, phî̌shǔ mò̌ he alě̤apwî̤ nunî̌.”

14 Khûěpharû hî̌shǔ PhaAbraha kû̌, 15 “Phadû̌, gènè̤kè̌mò̌, hǔkla hǒomî̌ a pwî̤ô̌ ruyî̌ shèke abǎ lǐ̤ya bǎbǎkǎlè he kû̌ na mî̌ lǎ̤hî̌ kû̌ alě̤apwe̤ tô̤̌, lǔǐ mò̌ kû̌ mǒ̤dû̌nu.”

16 Hǒtôplǎ dě PhaAbraha sǎphlǒtô kû̌ Khûěpharû hî̌ lû̌û apwî̤nu hǒ. Dě a jwè bǎ lû̌û ruyî̌ shèke abǎ lǐ̤ya. Ruyî̌ lǐ̤jwè̌ numî̌ amè̤̌kû̌ Khûěpharû hî̌lṳ̌ bǎ dǒ Hǐtǐphû̌ tokhlǒ alô̤mô̤̌ nuhǒ. A jwè ruyî̌ pô̤̌ kòyò pwî̤ǎshaǎ lû̌û dǒ klǎkû asî htukhanu.

17 PhaAbraha pwî̤kè Khûěpharû hǔkla dǒ Mèpe̤lǎ gûlǎ̤, a ô̌phǔ kû̌ Mè̤mare nutôkû. Dě a ô̌pa bò kû̌ lǒ̤lṳ̌kû kû̌ lǒ̤bò sǒmṳ̌wû̌bô ô̌ bǎ hǔklahtu nutokhlǒ. 18 Pô̤̌nudě hǔkla nî̌ a htûhtò̌ kèbò PhaAbraha ata hǒ. Dě Hǐtǐphû̌ lǒ̤bò dǒ a hè ô̌plǒ bò bǎ wî̤̌takhadû̌htu nutokhlǒ sî̌ganǎ̤ to̤mǎǐbò kû̌ PhaAbraha pwî̤ htokèhǒ. 19 PhaAbraha pwî̤ htodě a lǔǐ nṳ̌kè kû̌ ama Mǒ̤sara bǎ Khanagǎ Mèpe̤lǎ lǒ̤lṳ̌kû dǒ a ô̌phǔ kû̌ Mè̤mare nutôkû. Khònò̤̌dě Mè̤mare agûlǎ̤ mî̌ amè̤̌kû̌ Wî̤̌hebrûnu hǒ. 20 Pô̤̌nudě Hǐtǐphû̌ ahǔkla kû̌ lǒ̤lṳ̌kûnu a htûhtò̌kè PhaAbraha ata dǒ alǎ̤lǔǐnṳ̌ kû̌ lṳ̌ gûlǎ̤ hǒ.