Genesis 24

KhûIsè̌ kû̌ Mǒ̤ribè̌kha

1Khònò̤̌dě, PhaAbraha mǒ̤pwǎ̤ nědû̌lahtû hǒ dě Cǒmara tûjû̌pwa̤ ǐshowî̤bò lû̌ pṳ̂̌꤮ tocǒ. 2Tôni̤kha, PhaAbraha hî̌ apwa̤ma̤ta̤phû̌ ikǒdû̌lǒ dǒ a phî̌bòpè̤̌ bǎlû̌ ta̤ma̤ pṳ̂̌tocǒ dǒ ahǐdǒkû tôpwa̤nu kû̌, “Bè̌ nacǔde dǒ hekhò̌lǎ̤nu dě ǐsholò̤ mò̌ nayô̤̌ kû̌ he. 3Dǒ he phû̌ aya, pô̤̌khô na gǔ rû̌phî̌htò̌ tǎ̤ ama kû̌ Khanakhlilèmǒ̤ bǎ Khanagǎkû tǎ̤mǎ̤nu, he sǎyṳ no ǐsholò̤ nayô̤̌ kû̌ Cǒmara tûjû̌pwa̤, amè̤̌kû̌ Cǒmaradû̌ dǒ a pǒǐ mǒkhû̌ kû̌ hǎkhû̌ nutôpwa̤. 4Pô̤̌nudě gemò̌ dǒ he ô̌phijǎlò̤ agûlǎ̤, dǒ hekhlihelè ô̌ nutôgǎ dě ge kè̌lǎ kaage bǎ hephû̌pwa̤khû KhûIsè̌ ama nî̌.”

5Apwa̤ma̤ta̤phû̌ gwè̌ lû̌ kû̌, “Běcǎdû̌, hî̌kû̌lǎmò̌, pwa̤mǒ̤ nî̌ a kè̌ sǎyṳ gû̌ ge bǎ pagǎkûnu tô̤̌ hî̌dě he tô ma̤ hětè? He tô kaǎcû̌nṳ̌ naphû̌pwa̤khû gekû̌ he dǒ nakhlinalè gǎkûnu pě ya?”

6PhaAbraha hî̌shǔ lû̌ kû̌, “Tô̤̌! anǐ̤nò tô̤̌! Kaǎge tǎ̤ hephû̌pwa̤khû dǒnu tîkî̌꤮ tǎ̤mǎ̤. 7Běcǎ Cǒmara tûjû̌pwa̤ mî̌ Cǒmaradû̌ dǒ a pǒǐ mǒkhû̌ dě a kaǎhtò̌ he dǒ hepha akhlialè kû̌ kòyò lǎ̤lǔlò̤ hedîplô gûlǎ̤nu, kû̌ pwa̤ dǒ a ǐsholò̤ ayô̤̌ dě a olò̤ he tôpwa̤ hî̌ he kû̌, ‘he ǐ nakhlinalè kû̌ shigǎ pě.’ Pô̤̌nudě pô̤̌khô na gǔ kè̌lǎ kaǎgeǐ bǎ hephû̌pwa̤khû ama bǎnu tôgǎ ayanu, Cǒmara sûhè wǐ bǎtû̌ na amǒkhû̌tanaphû̌ pě. 8Pwa̤mǒ̤ phû̌sǎ nutôpwa̤ kè̌ gû̌gekû̌ natô̤̌ hî̌dě na hǎplǎtû̌ kû̌ na ǐsholò̤ nayô̤̌ nupě. Kaǎcû̌ tǎ̤ hephû̌pwa̤khû dǒ gǎnu tôgǎ tîkî̌꤮ tǎ̤mǎ̤ nî̌,” PhaAbraha hî̌ pô̤̌nu. 9Pô̤̌nudě PhaAbraha pwa̤ma̤ta̤phû̌ bè̌nṳ̌ acǔde dǒ aběcǎkhò̌lǎ̤ dě a ǐsholò̤ ayô̤̌ kû̌ ta̤we̤ta̤kè bǎnu.

10Dě apwa̤ma̤ta̤phû̌ nutôpwa̤ cǐnṳ̌ aběcǎ tîsî̌budû̌ ado shǐ dě a dò̌cû̌nṳ̌ timǐtitè kû̌ sû dǒ awî̤awô̌lǒ nutokhlǒ dě a hǎhtò̌cû̌ yî̤ dǒ Mèsûpûtemǐyǎgǎ cǔcôcǐ lṳmṳ̌lò̤ Phanakhò ô̌ ǐ wî̤̌ nutôwî̤̌. 11Dě bǎ a cû̌ tǒ̤ dǒ wî̤̌khlo akhanu, a no hǎmôô̌lò̤ bò tîsî̌budû̌ bǎ shiû̌ kòshî̌nu. Bǎ nukha mî̌ lṳmṳ̌hǎlò̤ hǒ, dě a tô bǎ pwa̤mǒ̤ tokhlǒ hè dò̌ lô̌khô shi bǎnu.

12Dě a kwicabahtò̌ kû̌, “Ǒ꤮ Cǒmara tûjû̌pwa̤, heběcǎ PhaAbraha a Cǒmaradû̌, khò̌tini̤ dě khòsǎdô ma̤htoma̤phlǔ mò̌ bǎ heta̤ma̤ nudě dǔlṳ̌ mò̌ nata̤mô̤ dǒ ahǎbòjò tô̤̌nu kû̌ heběcǎ PhaAbraha nî̌꤮. 13Khònò̤̌dě he ihtǒ ô̌ bǎ shiû̌ kòshî̌nu, dě pwa̤mǒ̤phû̌sǎ dǒ wî̤̌kû tokhlǒ hè dò̌ lô̌khô shi. 14Dě he kwisǎyṳ pwa̤mǒ̤phû̌sǎ dǒ asî kla tôpwa̤pwa̤ pě, dě he hî̌ a kû̌, ‘khòsǎdô bè̌tě̤ nashiko dě dǐô̌ mò̌ he shi,’ dě na kè̌ rû̌phî̌htò̌ mè̤̌caca bǎ najû̌ KhûIsè̌ aya hî̌dě a hî̌shǔshu he kû̌, ‘ô mò̌, dě he dǐô̌ padô̌ pô̤̌ na tîsî̌budû̌ shi pěpě.’ A kè̌ ma̤ pô̤̌o numî̌ he sî̌ganǎ̤ kû̌ na dǔlṳ̌ nata̤mô̤ kû̌ heběcǎ hǒ.”

15Bǎ a kwicabahto nò̌khôtô̤̌ akhanu, a kè̌shǐ pwa̤mǒ̤ tôpwa̤ ami̤ kû̌ Mǒ̤ribè̌kha ò̌hènṳ̌ shiko. A mî̌ Phabusuěla aphû̌pwa̤mǒ̤. Phabusuěla mî̌ Mǒ̤mǐlakha aphû̌pwa̤khû. Dě Mǒ̤mǐlakha mî̌ PhaAbraha awè̤̌pwa̤khû Phanakhò ama. 16Pwa̤mǒ̤phû̌sǎnu amǒ̤wî̤ tè̤̌sǐlî, a hǎmôô̌ bǎ kû̌ pwa̤khû tôkhò̌꤮ khôtô̤̌. A hǎtě̤ dò̌ shi dǒ shiû̌kû dě a dò̌be ashiko dě a ge gîhtò̌ sô̌.

17Dě PhaAbraha apwa̤ma̤ta̤phû̌ nutôpwa̤ khlè̌cû̌ dǒ a ô̌ dě a cû̌hî̌ lû̌û kû̌, “Khòsǎdô dǐô̌ mò̌ he shi dǒ nashiko kûnu tîkî̌phû̌ nî̌.”

18Dě a hî̌shǔ lû̌û kû̌, “Ǒ phadû̌, ô mò̌,” dě a tṳplṳ̌tewě̤ bè̌lò̤tě̤ ashiko dě a dǐô lû̌û.

19A dǐô̌ hto lû̌û shi dě a hî̌ lû̌û kû̌, “He dò̌ô kǒpô̤̌ mò̌ na tîsî̌budû̌ nutokhlǒ ashishi.” 20Dě a tṳplṳ̌tewě̤ bè̌lò̤ ashiko dě a lò̌nṳ̌ dǒ klô̌kû htodě a khlè̌lò̤ dò̌hto dò̌sô̌sô̌ shi dǒ shiû̌kû dě a dǐôkǒ dǐôbe bǎ bò atîsî̌budû̌ pṳ̂̌todo. 21Bǎnuakha, pwa̤khû nutôpwa̤ kè̌hǔǐ lû̌ dě hǒnumî̌ Cǒmara tûjû̌pwa̤ ma̤htoma̤phlǔ bǎ heta̤ma̤ ya, mî̌ amè̤̌tô̤̌ya a gènè̤ ǐtû̌ ata pô̤̌nu.

22Bǎ tîsî̌budû̌ tokhlǒ ôkǒ bò shi akhanu, pwa̤khû nutôpwa̤ phî̌htò̌ nò̌sèhta lǎ̤sè dǒ nò̌khîlô̤ dǒ alě̤dû̌pwî̤htû tôkǔ dě a sè bǎ lû̌û, dě a plû̌nṳ̌ bǎ lû̌û cǔgô̌bôhta lě̤dû̌pwî̤htû ginǐ̤bô. 23Dě a gwè̌ lû̌û kû̌, “Khòsǎdô, na hî̌ mò̌ he, na mî̌ mò̌pè aphû̌pwa̤mǒ̤ ya? Dǒ naphahǐ numî̌ he kû̌ hekòyò tokhlǒ lǎ̤môô̌ khò̌tasa aya mî̌ a ô̌ ya?”

24Dě pwa̤mǒ̤ nutôpwa̤ hî̌shǔ lû̌û kû̌, “Hepha mî̌ Phabusuěla. Dě amǒ̤apha mî̌ Phanakhò kû̌ Mǒ̤mǐlakha.” 25Htodě a hî̌ pô̤̌ kû̌, “Dǒ paô̌ nu, phadû̌ sîta̤mi̤ta̤mò̤̌ lǎ̤ǎ aya, bǔlô̤̌ sî, mi̤sî ô̌ lǒlǒbebe htodě phadû̌ sîlǎ̤môô̌ gûlǎ̤mî̌ aô̌ô̌.”

26A hî̌ hto lû̌û pô̤̌nudě pwa̤khûnu tôpwa̤ dô̌gînî̤lò̤ cabahtò̌ Cǒmara tûjû̌pwa̤. 27Dě a hî̌ kû̌, “Htû̌sò̌htò̌ Cǒmara tûjû̌pwa̤, heběcǎ PhaAbraha a Cǒmaradû̌. A mî̌ a mô̤nṳ̌ heběcǎ kû̌ ata̤mô̤ dǒ ahǎbòjò tô̤̌nu dě a cǒ kû̌ ayô̤̌. A sûhè he dě a no kè̌shǐ tôtǐ he kû̌ heběcǎ akhlialè.”

28Htodě pwa̤mǒ̤phû̌sǎ nî̌ a khlè̌ge shôbǐǐ bǎ amǒ̤ kû̌ akhlialè tokhlǒ kû̌ lǒ̤bò ta̤htûhtò̌ nutokhlǒ. 29Mǒ̤ribè̌kha awè̤̌pwa̤khû ami̤ kû̌ Khûlaba nutôpwa̤ khlè̌hèkè̌shǔ pwa̤khû nutôpwa̤ dǒ shiû̌kû. 30Dě bǎ a kè̌shǐ nò̌sèhta lǎ̤sè dǒ nò̌khîlô̤ kû̌ cugô̌bôhta dǒ apṳ̌ pwa̤mǒ̤ cǔgô̌lô̤, dě a ganǎ̤de pô̤̌ apṳ̌ pwa̤mǒ̤ hî̌ bǎ lû̌û kû̌ pwa̤khû nutôpwa̤ hî̌ kwè̌ lû̌û hětè akhanu, tôplǎnô̤̌ a khlè̌hè kè̌shǔǐ pwa̤khû nutôpwa̤, dě a kè̌shǐ lû̌ ihtǒ ô̌ dǒ atîsî̌budû̌ kòshî̌ bǎ shiû̌htunu. 31Dě Khûlaba hî̌ lû̌û kû̌, “Ǒ pṳ̌wè̤̌, ge, ge dǒ hǐ, na mî̌ pwa̤ dǒ a nǐ̤bǎ Cǒmara tûjû̌pwa̤ ata̤ ǐshowî̤ tôpwa̤. Na cû̌ihtǒô̌tǒ̤ bǎnu ma̤titè? He tîwî̌tòwò nǎ bǎ bò nagûlǎ̤gûbò̌ kû̌ natîsî̌budû̌ tokhlǒ alǎ̤ô̌ hǒ.”

32Dě pwa̤khû nutôpwa̤ gû̌gekû̌ dǒ lû̌hǐ, dě bǎ a ge tǒ̤ dǒ hǐ akha, Khûlaba apwa̤ma̤ta̤phû̌ tokhlǒ a bè̌tě̤bò ta̤phû̌ta̤li̤ dǒ tîsî̌budû̌ alô̤. Htodě asî phî̌hè bǔlô̤̌ kû̌ mi̤ tokhlǒ dě a bǔǎ bǎ asî tîsî̌budû̌ tokhlǒ, htokhôtô̤̌ a phî̌hè bǎ PhaAbraha apwa̤ma̤ta̤phû̌ nutôpwa̤ kû̌ akhô tokhlǒ shi dě a cǔbò bǎ asîkhò̌lô̤pô̤̌. 33Dě bǎ kòyò bè̌lò̤ bǎ lû̌û lǎ̤ǎlǎ̤ô akhanu, a hî̌ asî kû̌, “He kè̌ hî̌bǎ heta̤hî̌bǎ tô̤̌ mî̌, he ǎ jò nô̌ ta̤ǎta̤ônu khôtô̤̌.”

dě “Hî̌ mò̌,” Khûlaba hî̌ lû̌û pô̤̌nu.

34“He mî̌ PhaAbraha apwa̤ma̤ta̤phû̌ tôpwa̤,” dě a hî̌ pô̤̌ kû̌, 35“Cǒmara tûjû̌pwa̤ ǐshowî̤ dû̌wî̤ mî̌ca heběcǎ akhû̌akhî, a dû̌yò̤̌htò̌sa mî̌ca. A ǐlò̤bò lû̌û sû̌phû̌ kû̌ pè̤̌, pṳ̂̌pa̤nǎ̤ tokhlǒ, ruhta kû̌ pwa̤ma̤ta̤phû̌ pwa̤mǒ̤ pwa̤khû kû̌ tîsî̌budû̌ kû̌ mǐû̌lǎ sîtokhlǒ. 36Bǎ heběcǎ ama Mǒ̤sarè̌ mǒ̤pwǎ̤ akhanu, a phû̌ô̌lò̤ bǎ PhaAbraha phû̌pwa̤khû tôpwa̤, dě lǒ̤bò atimî̌titè nutokhlǒ dě a ǐbò kû̌ lû̌û hǒ. 37Heběcǎ noǐsho heyô̤̌ dě a hî̌ he kû̌, ‘na bǎ rû̌lǎphî̌htò̌ bǎ hephû̌pwa̤khû ama kû̌ Khanamǒ̤ bǎ he ô̌ ǐ Khanagǎkûnu tô̤̌. 38Na bǎ ge dǒ hepha agǎ dě kè̌lǎ kaǎge bǎ hephû̌ pwa̤khû ama dǒ hekhlihelè aklanu.’

39“Htodě he gwè̌ heběcǎ kû̌, ‘Hî̌kû̌lǎmò̌, pwa̤mǒ̤ kè̌ gû̌gekû̌ he tô̤̌ hî̌dě he tô ma̤ hětè?’ 40Dě heběcǎ hî̌shǔ he kû̌, ‘Cǒmara tûjû̌pwa̤ dǒ he ganǎ̤de lû̌yô̤̌ nutôpwa̤ nî̌, a sûcû̌ tû̌kû̌ atanaphû̌ kû̌ na dě a gǔ kè̌lǎ bǎtû̌ na pě. Dě na gǔ kè̌lǎ kaǎge nǐ̤padô̌ hephû̌pwa̤khû ama dǒ hekhlihelè kû̌ hepha ahǐphû̌phòphû̌ aklanu pě. 41Na lǎ̤hǎplǎ kû̌ nata̤ǐshonu klè̌ ô̌pwǎ tôbônô̤̌pwǎ. Bǎ na ge dǒ hekhlihelè ô̌ akhanu, asî kè̌ plûge pwa̤mǒ̤ nutôpwa̤ tô̤̌ hî̌dě, na gǔ hǎplǎ kû̌ nata̤ǐsho nayô̤̌nu pě.’

42“Khò̌tini̤ bǎ he hè dǒ shiû̌kû akhanu he kwicabahtò̌ kû̌, ‘Ǒ Cǒmara tûjû̌pwa̤, heběcǎ PhaAbraha a Cǒmaradû̌, khòsǎdô ma̤phlǔma̤hto mò̌ bǎ heta̤ma̤ nunî̌.’ 43Bǎ he ihtǒô̌ dǒ shiû̌ kòshî̌ dě bǎ pwa̤mǒ̤phû̌sǎ hèdò̌ô shi akhanu, he kè̌ hî̌ kû̌, ‘khòsǎdô dǐô̌ pè̤̌mò̌ he shi dǒ nashiôko kûnu.’ 44Dě a kè̌ hî̌shǔ he kû̌, ‘ô mò̌, he dǐôkǒ pô̤̌ natîsî̌budû̌ tokhlǒ shi pěpě,’ a kè̌ hî̌ pô̤̌nu hî̌dě, he hî̌ sělě pô̤̌ Cǒmara tûjû̌pwa̤ kû̌, ‘khòsǎdô, a numî̌ nohtû tûû̌ kû̌ na rû̌htò̌ bǎ heběcǎ aphû̌pwa̤khû amanu nî̌꤮.’

45“Bǎ he kwicaba htokhôtô̤̌ dǒ hesǎphlǒkû tô̤̌ akhanu, he kè̌shǐ Mǒ̤ribè̌kha ò̌hènṳ̌ shiko. Dě a hètǒ̤ dǒ shiû̌kû dě a dò̌htò̌shi dě he hî̌ lû̌kû̌, ‘dǐ ô pè̤̌mò̌ he shi hò̌.’

46“Dě a tṳplṳ̌tewě̤ bè̌lò̤ ashiko dě a hî̌shǔ he kû̌, ‘ô mò̌, he dǐôkǒ padô̌ natîsî̌budû̌ tokhlǒ ashi pěpě.’ dě he ô ashi dě a dǐô bǎpô̤̌ hetîsî̌budû̌ tokhlǒ ashi.

47“He gwè̌ lû̌û kû̌, ‘na mî̌ mò̌pè aphû̌pwa̤mǒ̤ ya?’

“Dě a hî̌shǔ he kû̌, ‘he mî̌ Phabusuěla aphû̌pwa̤mǒ̤, hephuhephi mî̌ Phunakhò kû̌ Phimǐlakha.’

“Dě he sèhtò̌ bǎ anò̌sèhta dě he plû̌nṳ̌ bǎ lû̌û cǔgô̌bô tokhlǒ dǒ acǔgô̌lô̤. 48Cǒmara tûjû̌pwa̤ sûhè tôtǐ bǎhe dǒ heběcǎ akhlialè ô̌ akhû̌akhî, he hèkè̌shî̌ bǎ aphû̌pwa̤khû ama, dě he dô̌gînî̤lò̤ cabahtò̌ Cǒmara tûjû̌pwa̤. He htû̌sò̌htò̌ǐ Cǒmara tûjû̌pwa̤ mî̌ heběcǎ PhaAbraha a Cǒmaradû̌ hǒ. 49Ma̤pô̤̌nudě na kè̌ dǔlṳ̌ na ma̤mô̤ma̤wô̌, nata̤cǒta̤tè̤ kû̌ heběcǎ hî̌dě, hî̌mò̌ he khònò̤̌. He tôbǎ ma̤ hětè, he gǔ sî̌ganǎ̤ ayanudě, khòsǎdô tô̤̌ dě tô̤̌, o dě o, hî̌mò̌he.”

50Khûlaba kû̌ Phabusuěla hî̌ kû̌, “Pô̤̌ na bè̌lṳ̌ hto panu, hǒnumî̌ Cǒmara tûjû̌pwa̤ tîwî̌tòwò pwǎ akhû̌akhî, pa lǎ̤hî̌ gûlǎ̤ ô̌pe tôcǒ tô̤̌ hǒ. 51Hǒolè, Mǒ̤ribè̌kha ô̌ dǒ nakòshǐnu, kaǎnṳ̌ yǎ dě ge mò̌, pô̤̌ Cǒmara tûjû̌pwa̤ nè̌klè̌nè̌klò htohǒnu, nohtûhtò̌mò̌ kû̌ nǎ̤běcǎ aphû̌pwa̤khû ama nunî̌.”

52Bǎ PhaAbraha apwa̤ma̤ta̤phû̌ ganǎ̤de asî hî̌ pô̤̌o akhanu, a dô̌gînîlò̤ dǒ hǎkhû̌ dě a cabahtò̌ Cǒmara tûjû̌pwa̤. 53Htodě a phî̌htò̌ jehǐyò̤̌ kû̌ ta̤dòǐ tokhlǒ dě a ǐ kû̌ Mǒ̤ribè̌kha, htodě a ǐ pô̤̌ awè̤̌pwa̤khû kû̌ amǒ̤sî sû dǒ alě̤dû̌pwî̤dû̌ tokhlǒ. 54Htodě PhaAbraha apwa̤ma̤ta̤phû̌ kû̌ pwa̤khû ô̌ bǎnu tokhlǒ ǎcuôcu wô̤̌wô̤̌ lû̌, htodě a hǎmôô̌ bǎnu tôsa.

Htodě bǎ lṳmṳ̌lî dě asî hǎmôô̌ ihtǒ akhanu, PhaAbraha apwa̤ma̤ta̤phû̌ nutôpwa̤ hî̌ kû̌, “Khòsǎdô plûge mò̌ he dǒ heběcǎ ô̌.”

55Bǎbǎkǎlè awè̤̌pwa̤khû kû̌ amǒ̤ hî̌ lû̌û kû̌, “Noô̌kè pô̤̌ kûmṳ̂̌ kû̌ pa bǒo asashǐ tîkî̌phû̌nu, htopě dě no ge nô̌ a pě.”

56Bǎbǎkǎlè a hî̌shǔ asî kû̌, “Ma̤pò̤̌ma̤yope tǎ̤ he mǎ̤, Cǒmara tûjû̌pwa̤ ma̤htophlǔ hto bǎ heta̤ma̤ hǒ dě he bǎ ge dǒ heběcǎ ô̌ hǒ.” 57Dě asî hî̌ kû̌, “Pa kaǎ Mǒ̤ribè̌kha dě pa gwè̌ kè̌kè̌ lû̌û tǎ.” 58Pô̤̌nudě asî kaǎhè Mǒ̤ribè̌kha dě asî gwè̌ lû̌û kû̌, “Na sǎphlǒô̌ gû̌ge kû̌ pwa̤khû nutôpwa̤ hǒ ya?”

Dě a hî̌shǔ asî kû̌, “O, he sǎphlǒ gû̌ ge hǒ.”

59Ma̤pô̤̌nudě asî plûgekè Mǒ̤ribè̌kha kû̌ pwa̤kè̌khwè̌ǐ lû̌û tôpwa̤, dě a no ge asî kû̌ PhaAbraha apwa̤ma̤ta̤phû̌ kû̌ a kòyò sîtokhlǒ. 60Dě ahǐphû̌phòphû̌ tokhlǒ ǐshowî̤ lô̌khô Mǒ̤ribè̌kha kû̌,

“Pa pṳ̌pwa̤mǒ̤ gǔ htûhtò̌ mǒ̤ dǒ phû̌ô̌wô̤̌li̤ô̌dû̌ dǒ asò̌atěkû pě nî̌.

Nakhlinalè tokhlǒ gǔ ma̤pè̤̌ bò pû asîkhuwè̤ awî̤̌ tokhlǒ pě nî̌.”

61Dě Mǒ̤ribè̌kha kû̌ pwa̤kè̌ǐ lû̌û tokhlǒ htò̌dò̌ tîsî̌budû̌ tokhlǒ dě a gû̌gekû̌ pwa̤khû nutôpwa̤, dě PhaAbraha apwa̤ma̤ta̤phû̌ kaǎnṳ̌ Mǒ̤ribè̌kha dě a hǎhtò̌ge wô̤̌wô̤̌ lô̌khô lû̌û.

62Bǎnukha, KhûIsè̌ ô̌ bǎ Beralahèrû̌ gûlǎ̤ dě a hǎhtò̌cû̌ ô̌ dǒ Khanagǎ lô̤̌kò tôkhô. 63Lṳmṳ̌hǎ gûjû̌lò̤ akhanu, KhûIsè̌ gènè̤ cû̌ô̌ dǒ ya̤dakhû̌ dě a kè̌cû̌tô dě a kè̌shǐ tîsî̌budû̌ tokhlǒ ge. 64Mǒ̤ribè̌kha kè̌htò̌ dě a kè̌shǐ KhûIsè̌ dě a ô̌ dǒ tîsî̌budû̌lô̤ dě a hǎtě̤. 65Dě a gwè̌ PhaAbraha apwa̤ma̤ta̤phû̌ nutôpwa̤ kû̌, “Pwa̤khû ô̌ dǒ ya̤dakhû̌ dě a hè dǒ pa ô̌ nutôpwa̤ mî̌ mò̌pè?”

Pwa̤ma̤ta̤phû̌ nutôpwa̤ hî̌shǔ lû̌û kû̌, “A mî̌ heběcǎ KhûIsè̌ hǒ.” Hǒtôplǎ dě Mǒ̤ribè̌kha phî̌ gò̌pwǐ dě a hǔlò̤bǐ kû̌ amǐ̤sǎ.

66Htodě pwa̤ma̤ta̤phû̌ nutôpwa̤ shôbǐǐlṳ̌ bǎ KhûIsè̌ kû̌ lǒ̤bò a ma̤ hto ta̤ dǒ a cû̌ klè̌ hǒtôplǎ nutokhlǒ. 67Htodě KhûIsè̌ kaǎgeǐ Mǒ̤ribè̌kha dǒ amǒ̤ Mǒ̤sara ahǐphû̌kû dě a htûhtò̌ lû̌ma. Dě a mô̤ǐ wô̌ lû̌û. Bǎ amǒ̤ si hto lû̌lǎ̤ akhanu, a sǎplǎ̤ mè̤mè̤̌ bǎbǎ khònò̤̌ Mǒ̤ribè̌kha htû ama dě asǎphlǒ mô̤ gesô̌.