Genesis 26

PhaIsè̌ kû̌ Khwǐabǐmôlè̌

1Bǎnukha, bǎ PhaIsè̌ ô̌ bǎ Beralahèrû gûlǎ̤ akhanu, pô̤̌ Gǎwigǎko htûhtò̌ bǎ hto dǒ PhaAbraha ahtukhanu a htûhtò̌ pô̤̌ tôplǎ. Pô̤̌nukhû̌khî, PhaIsè̌ hǎhtò̌cû̌kè dǒ Wî̤̌kèra, Phǐlǐsôtǐ khlilèphû̌ tokhlǒ akhwǐ Abǐmôlè̌khǔ nutôpwa̤ a ô̌. ^a 2Cǒmara tûjû̌pwa̤ ô̌lṳ̌htò̌ bǎ PhaIsè̌ dě a hî̌ lû̌û kû̌, “Cû̌ tǎ̤ dǒ Ijî̌gǎ tǎ̤mǎ̤ nî̌! ô̌ pwǎ gǎ bǎ he noô̌ na nutôgǎ pwǎ nî̌. ^b 3Ô̌yṳ̂̌ kûmṳ̂̌ bǎ gǎ nutôgǎ akû nî̌. He gǔ ô̌ kû̌ na dě he gǔ ǐshowî̤ na pě, ma̤titèhî̌dě ta̤olò̤ dǒ he olò̤ nǎ hto kû̌ napha Abrahanu he gǔ ma̤lǒhtò̌behtò̌ tûû̌ pě dě lǒ̤bò hǎkhû̌ gûlǎ̤ bǒo tokhlǒnu, he gǔ ǐ bò kû̌ na kû̌ nakhlinalè tokhlǒ pě. ^c 4He gǔ no ô̌dû̌htò̌ tûû̌ nakhlinalè asô̌sô̌kû̌ shǎ ô̌ dǒ mǒlǎ̤ pě, dě lǒ̤bò hǎkhû̌ tokhlǒnu he gǔ ǐ bò kû̌ asî pě. Dǒ nakhlinalè akhû̌akhî, dě lǒ̤bò khlilèphû̌ ô̌ dǒ hǎkhû̌ tokhlǒ gǔ nǐ̤bǎ tutṳ̌ ta̤ǐshowî̤ pě. ^d 5PhaAbraha ganǎ̤deyṳ̌ǎ bò heta̤mǎnǎyô̤̌ kû̌ heta̤sû̌ǐtòwòǐ kû̌ ta̤sû̌ta̤tòwò nutokhlǒ akhû̌akhî, he gǔ ǐshowî̤ mè̤̌caca na pě.” ^e 6Pô̤̌nudě PhaIsè̌ ô̌pwǎ bǎ Wî̤̌kèrakûnu.

7Bǎ kòyò gwè̌ lû̌ma Mǒ̤ribè̌kha awe̤akè akhanu, a hî̌ bǎ kòyò kû̌, “A mî̌ he pṳ̌pwa̤mǒ̤ pwǎ,” a ǐsha hî̌ bǎ kòyò kû̌, “A mî̌ hema,” pô̤̌nu. Ma̤titèhî̌dě Mǒ̤ribè̌khanu a mǒ̤wî̤ tè̤̌sǐ akhû̌akhî, “Dǒ a akhû̌akhî, dě hî̌pě kòyò ô̌ bǎnu tokhlǒ gǔ ma̤si he a gènè̤ ǐtûû̌ anǎ̤ pô̤̌nu.” ^f

8Bǎ PhaIsè̌ ô̌yî̤ bǎ gûlǎ̤ nutôkû akha, Khwǐabǐmôlè̌ amè̤̌kû̌ Phǐlǐsôtǐ akhwǐ nî̌ a ô̌ dǒ takhaphû̌htu dě a kè̌lò̤ akha, a kè̌shǐ PhaIsè̌ phô̌gômô̤̌ ǐ ama Mǒ̤ribè̌kha. 9Ma̤hî̌nudě Khwǐabǐmôlè̌ kaǎ KhûIsè̌ dě a hî̌ lû̌û kû̌, “A mî̌ nama mè̤̌caca pwǎsînî, ma̤titèdě nacû̌ hî̌tǒ̤ he kû̌, ‘a mî̌ hepṳ̌pwa̤mǒ pwǎ’ ma̤titè?”

KhûIsè̌ hî̌shǔ lû̌û kû̌, “O, khwǐ, he kè̌ hî̌ kû̌ amî̌ hema hî̌ dě hî̌pě kòyò ma̤si he hè̌ he gènè̤ ǐsha pô̤̌nu pwǎsînî.”

10Dě Khwǐabǐmôlè̌ hî̌ lû̌û kû̌, “Ma̤titè na cû̌ma̤tǒ̤ pa pô̤̌o ma̤tèya? He kòyò pwa̤khû tôpwa̤pwa̤ kè̌ cû̌ hǎmôô̌ plǒkû̌ nama mî̌ kè̌hî̌dě, dǒ na lô̌ pa pô̤̌o akhû̌akhî, a gǔ ma̤sǔ ta̤ dě Cǒmara gǔ cî̌htò̌ pa pě.” ^g

11Ma̤hî̌nudě Khwǐabǐmôlè̌ dǐsè̌rè̌ ǐbò kòyò nutokhlǒ kû̌, “Kòyò tôpwa̤pwa̤ kè̌ ma̤sha pwa̤khû hǒtôpwa̤ tô̤̌mî̌ ama numî̌, kòyò bǎ ma̤si mè̤̌caca lû̌û pě.”

12Cǒmara tûjû̌pwa̤ ǐshowî̤ KhûIsè̌ akhû̌akhî, a shǒlò̤wǐ̤lò̤ ta̤mṳ̌ta̤bô bǎ gûlǎ̤ nutôkû dě bǎnu taně akû a nǐ̤bǎ dû̌wî̤ akhli dǒ a shǒlò̤wi̤lò̤nu aplǎ taya̤. 13Pô̤̌nudě KhûIsè̌ nî̌ sǔ sǔ ǎbǎôbǎ hènè, dě a htûhtò̌ pwa̤dû̌yò̤̌htò̌sa tôpwa̤. 14Asû̌phû̌ kû̌ pè̤̌, pṳ̂̌panǎ̤ kû̌ apwa̤ma̤ta̤phû̌ sî ô̌wô̤̌ô̌dû̌ dě Phǐlǐsôtǐ khlilèphû̌ tokhlǒ sǎkhěbò lû̌û. ^h 15Pô̤̌nudě lǒ̤bò shiû̌ dǒ KhûIsè̌ apha PhaAbraha ajû̌ tokhlǒ phonǎ lô̌khô bǎ apha Abraha htukha tokhlǒnu, Phǐlǐsôtǐ khlilèphû̌ tokhlǒ bǒbǐbò shiû̌ nutokhlǒ kû̌ hǎkhû̌. ⁱ

16Htodě Khwǐabǐmôlè̌ hî̌ KhûIsè̌ kû̌, “Hǎhtò̌cû̌ tephe kèmò̌ kû̌ pa, nasîrîshû̌sîrîsho khlo pa hǒ.”

17Dě KhûIsè̌ hǎhtò̌cû̌kè kû̌ gûlǎ̤ bǎnu dě a cû̌ô̌ dǒ Kèragǎ lô̤̌te̤kû tôkû. 18KhûIsè̌ phosô̌ shiû̌ dǒ apha PhaAbraha htukha a pho hto nutokhlǒ. Dě shiû̌ hǒtokhlǒnu mî̌ bǎ PhaAbraha si hto akha, Phǐlǐsôtǐ khlilèphû̌ tokhlǒ pholò̤bǐ bò a nutokhlǒ hǒ. Dě KhûIsè̌ kaǎ sô̌ shiû̌ nutokhlǒ ami̤ sô̌sô̌kû̌ apha kaǎnǎ htonu.

19KhûIsè̌ ajû̌ tokhlǒ pholò̤ shiû̌ bǎ lô̤̌te̤kû nutôkû dě a pholò̤ bǎ kû̌ shihǎhtò̌ tôkû. 20Kèragǎphû̌ pwa̤kè̌ǐ sû̌phû̌, pṳ̂̌ tokhlǒ hètô̤̌klǐ kû̌ KhûIsè̌ apwa̤ma̤ta̤phû̌ tokhlǒ kû̌, “Shiû̌ mî̌ pata.” Pô̤̌nudě KhûIsè̌ pô̤kè shiû̌ mi̤ kû̌ ěsè̌. (Ěsè̌ yô̤̌sǎyô̤̌mû mî̌ klǐ kè̌khî lû̌û tôpwa̤ kû̌ tôpwa̤.) 21KhûIsè̌ apwa̤ma̤ta̤phû̌ sî pho khô̌ sô̌ shiû̌ dǒ ashǔshawa̤ tôû̌ bǎbǎkǎlè a hè tô̤̌klǐ hè hto pepe asî, pô̤̌nudě KhûIsè̌ pô̤nṳ̌ shiû̌nu ami̤ kû̌ Sǐnǎ. (Sǐnǎ amṳ̂asǎmî̌ hto kè̌khî lû̌û.) 22Htodě a cû̌ tephekè dǒ gûlǎ̤ ashǔshawa̤ tôkû dě a cû̌pholò̤ khô̌ pô̤̌ shiû̌ tôû̌ dě kòyò hètô̤̌klǐ pe asî tôpwǎ̤ tô̤̌, Pô̤̌nudě KhûIsè̌ pô̤ shiû̌nu ami̤ kû̌ Rahû̌bû. Dě a hî̌ kû̌, “Khònò̤̌, Cǒmara tûjû̌pwa̤ ǐ pa gûlǎ̤ lǎ̤ô̌ tôkû hǒ dě pa gǔ ǎbǎôbǎ bǒo tôkû pě.” (Rahû̌bû yô̤̌sǎyô̤̌mû mî̌ ǐ pa gûlǎ̤lè̤̌ tôkûhǒ.)

23KhûIsè̌ hǎhtò̌cû̌kè kû̌ gûlǎ̤ bǎnu dě a cû̌ ô̌kǔ dǒ Wî̤̌berashabǎ. 24Bǎnu tôsa dě Cǒmara tûjû̌pwa̤ ô̌lṳ̌htò̌ bǎ KhûIsè̌ dě a hî̌ lû̌û kû̌, “He mî̌ napha PhaAbraha a Cǒmaradû̌, ǐsha tǎ̤mǎ̤ nî̌, ma̤titèhî̌dě he ô̌ kû̌ na, he gǔ ǐshowî̤ na pě, dě he gǔ no ô̌wô̤̌ô̌dû̌ htò̌ nakhlinalè tokhlǒ pô̤̌ he olò̤nǎ hto kû̌ hejû̌ KhûAbrahanu pě.”

25Htodě KhûIsè̌ tèhtò̌ ta̤lṳhtò̌wǎ̤ kû̌ lǒ̤ bǎnu tôkû dě cubucabahtò̌ Cǒmara tûjû̌pwa̤. Dě a ma̤htò̌ ahǐphû̌ gò̌pwǐ bǎnu dě ajû̌ tokhlǒ pho lô̌khô shiû̌ bǎnu tôû̌.

26Bǎnuakha, Khwǐabǐmôlè̌ kû̌ akhô pwa̤ǐsî̌yajè̌ lû̌û KhûAhǔsa kû̌ akli ikǒlǒkòdû̌ Khûklòdu ô̌ dǒ Wî̤̌kèra dě a hètǒ̤ dǒ KhûIsè̌ ô̌. ^j 27Dě KhûIsè̌ gwè̌ asî kû̌, “Sî cû̌ hètǒ̤ heô̌ mî̌ ama̤titè? Sî sǎkhě he dě sî nohǎhtò̌cû̌ tepheyî̤kè hto he kû̌ sîgǎ hǒ yahî̌?”

28Dě asî hî̌shǔ lû̌û kû̌, “Khònò̤̌ pa kè̌shǐ sî̌ya mè̤̌caca kû̌ Cǒmara tûjû̌pwa̤ ô̌ kû̌ na akhû̌akhî, pa bè̌lò̤ pasǎphlǒ kû̌ dǒ pa kû̌ na aplǎkûnu pa tôbǎ ô̌ kû̌ ta̤ǎměma̤mě lû̌yô̤̌, pô̤̌nudě pa ǎměma̤gle lû̌ûyô̤̌ tǎ. 29Pô̤̌ pa ma̤bǎma̤sha nô̌ na tô̤̌ nu, olò̤mò̌ kû̌ na gǔ ma̤bǎma̤sha pa tô̤̌. Bǎ na hǎhtò̌cû̌ khôtô̤̌nu, pakè̌khwè̌ǐ wô̌ mî̌ca na dě pa nohǎhtò̌cû̌ mô̤mô̤wô̌wô̌ na pwǎ. Khònò̤̌dě Cǒmara tûjû̌pwa̤ ǐshowî̤ na hǒ.” 30Dě KhûIsè̌ ma̤ bǎ asî ta̤ǎplǒôplǒ dě asî ǎhtuôcu wô̤̌wô̤̌ lû̌û. 31Bǎ nô̌kò tôwô̤ lṳmṳ̌lî wî̤sò akhanu, asî ǎměôgle wô̤̌wô̤̌ lô̌khô lû̌û shǎǎ tôpwa̤ kû̌ tôpwa̤. Dě KhûIsè̌ hî̌mô̤hî̌bǎwô̌ asî dě plûgekè asî, dě asî ge mô̤mô̤wô̌wô̌ lô̌khô pwǎ. 32Bǎnu tôni̤ hǒ, KhûIsè̌ ajû̌ tokhlǒ geshôbǐǐ lû̌û kû̌ asî pho shiû̌ awe̤akè. Dě a ge hî̌ lû̌û kû̌, “Pa kè̌shǐ shihǎhtò̌ hǒ!” 33Dě a kaǎ shiû̌ nutôû̌ ami̤ kû̌ Shebǎ, ma̤pô̤̌nudě tǒ̤khònò̤̌ wî̤̌ nutîwî̤̌ kòyò kaǎ lû̌mi̤ kû̌ Berashebǎ. (Berashabǎ amṳ̂asǎ mî̌ agǔ sô̌sô̌kû̌ “ǎměǎgle lû̌shǎ kû̌ shiû̌” mè̤̌tô̤̌mî̌ “shiû̌ susô̌tôû̌.”)

Khûětò̌ phî̌ ama kû̌ Hǐtǐ khlilèphû̌mǒ̤ tokhlǒ

34Bǎ Khûětò̌ aně ô̌ lǐ̤shi akhanu, a phî̌ ama kû̌ Hǐtǐ kòyò khlilèphû̌, Phaberǐ aphû̌pwa̤mǒ̤ Mǒ̤jûda kû̌ Hǐtǐ khlilèpha PhaElû aphû̌pwa̤mǒ̤ Mǒ̤basôma. 35Asî ma̤gû̌ma̤gè̌ ma̤shuphǔshèwè mî̌ca PhaIsè̌ kû̌ Mǒ̤ribè̌kha asǎphlǒ.