Gen 28 | KxfSCKXF | STEP | Pô̤̌nudě PhaIsè̌ kaǎ Khûya̤kò dě a hî̌mô̤hî̌bǎwô̌ lû̌û htokhôtô̤̌ a mǎnǎ lû̌û ayô̤̌ kû̌, “Na bǎ phî̌nṳ̌ kû̌ pwa̤mǒ̤ bǎ Khanagǎkûnu tôpwǎ̤꤮ tô̤̌.

Genesis 28

PhaIsè̌ nocû̌ Khûya̤kò dǒ Phalaba a ô̌

1 Pô̤̌nudě PhaIsè̌ kaǎ Khûya̤kò dě a hî̌mô̤hî̌bǎwô̌ lû̌û htokhôtô̤̌ a mǎnǎ lû̌û ayô̤̌ kû̌, “Na bǎ phî̌nṳ̌ kû̌ pwa̤mǒ̤ bǎ Khanagǎkûnu tôpwǎ̤꤮ tô̤̌. 2 Tôplǎnô̤̌ cû̌phwèmò̌ dǒ namǒ̤ apha Phabusuěla ô̌ ǐtû̌ pada Aragǎkûnu. Dě cû̌phî̌ nama bǎnu, dě phî̌ gesô̌tû̌ kû̌ naphadû̌ Phalaba aphû̌pwa̤mǒ̤ sîtokhlǒ akla tôpwa̤ nî̌. 3 Cǒmara dǒ apô̤aphǎ nutôpwa̤ ǐshowî̤ tû̌ na pě nî̌, dě na gǔ phû̌ô̌plûli̤ô̌wô̤̌ dě ô̌wô̤̌ô̌dû̌htò̌ tû̌ lô̌khô nî̌꤮. Dě na gǔ htûhtò̌ tû̌pû khlilèdû̌ tôcǒ kû̌ khlilèphû̌ dû̌wî̤ tokhlǒ apha pě. ^a 4 Pô̤̌khô na gǔ nǐ̤bǎ shigǎ dǒ Cǒmaradû̌ ǐ kû̌ napha PhaAbraha dǒ na ô̌ ǐtûû̌ a pô̤̌ shǐtèmè̤ nutôgǎ ayanu, ta̤ǐshowî̤ dǒ Cǒmaradû̌ ǐ PhaAbrahanu a ǐ kû̌ na kû̌ nakhlinalè hǒtokhlǒ nî̌꤮.” ^b 5 Htodě PhaIsè̌ nocû̌ Khûya̤kò dǒ Mǒ̤ribè̌kha awè̤̌ Phalaba ô̌ ǐ Pada Aragǎ nutôgǎ. Phabusuěla mî̌ Phalaba kû̌ Mǒ̤ribè̌kha apha dě a mî̌ Aramǐ khlilèphû̌. Mǒ̤ribè̌kha mî̌ Khûya̤kò kû̌ Khûětò̌ amǒ̤.

Khûětò̌ phǐpô̤̌ ama tôpwa̤

6 Khònò̤̌ Khûětò̌ sî̌ganǎ̤ kû̌ apha PhaIsè̌ ǐshowî̤ apṳ̌ Khûya̤kò dě a sûcû̌ lû̌û dǒ Pada Aragǎ dě a no cû̌phî̌ lû̌ma bǎnu hǒ. Dě Khûětò̌ sî̌yapô̤̌ kû̌ bǎ apha ǐshowî̤ Khûya̤kò akhanu a hî̌ lû̌û kû̌, “Na bǎ phî̌nṳ̌ kû̌ Khanagǎmǒ̤ tô̤̌.” 7 Khûya̤kò ganǎ̤de amǒ̤aphayô̤̌ dě a hǎhtò̌cû̌ dǒ Pada Aragǎ, Khûětò̌ sî̌ganǎ̤ tě̤mè̤̌kèhǒ. 8 Kǎtô̤̌ khònò̤̌dě Khûětò̌ sî̌ganǎ̤ tě̤tě̤mè̤̌mè̤̌ pô̤̌ kû̌ apha PhaIsè̌ sǎyṳ nophǐ aphû̌pwa̤khû tokhlǒ kû̌ Khanamǒ̤ tô̤̌. 9 Ma̤hî̌nudě Khûětò̌ hǎhtò̌cû̌phî̌ pô̤̌ ama kû̌ Pha Ishômelǎ aphû̌pwa̤mǒ̤ Mǒ̤mahalǎ, PhaAbraha ali̤pwa̤mǒ̤, Khûnabayû a pṳ̌pwa̤mǒ̤. Khûětò̌ maô̌ htotû̌hǒ tokhlǒ bǎbǎkǎlè a cû̌phî̌ pô̤̌.

Khûya̤kò hǎmimò̤̌ dǒ Betelǎ gûlǎ̤

10 Khûya̤kò ô̌ dǒ Berashabǎgǎ dě a hǎhtò̌cû̌kè dǒ Wî̤̌hara. 11 Bǎ a cû̌tǒ̤ dǒ gûlǎ̤ tôkû akhanu lṳmṳ̌hǎlò̤ lǎ lû̌û akhû̌akhî, a hǎmôô̌ bǎnu tôsa. Dě a phî̌ lǒ̤ tômè dě a ma̤ kû̌ alǎ̤môô̌gǒ tûkhǒ dě a hǎmôô̌ bǎnu. 12 Dě a hǎmimò̤̌ kû̌ a kè̌shǐ khǔbô tôbô ô̌ dǒ hǎkhû̌ dě a pô̤̌htò̌ tǒ̤ dǒ mǒkhû̌, dě Cǒmaradû̌ atanaphû̌ sîtokhlǒ kahtò̌kalò̤ lô̌khô bǎnu. ^c 13 Dě Cǒmara tûjû̌pwa̤ ihtǒ ô̌ dǒ khǔbôkhî dě a hî̌ kû̌, “He mî̌ Cǒmara tûjû̌pwa̤ dǒ a amè̤̌ naphu PhaAbraha a Cǒmaradû̌ kû̌ napha PhaIsè̌ a Cǒmaradû̌ tôpwa̤hǒ. Gǎ dǒ na hǎmôô̌ ǐ a khònò̤̌ tôgǎnu, he gǔ ǐ kû̌ na kû̌ nakhlinalè tokhlǒ pě. ^d 14 Nakhlinalènu a gǔ ô̌wô̤̌ô̌dû̌ asô̌sô̌kû̌ hǎkumṳ̌ bǎ hǎkhû̌ nutokhlǒ pě. Asî gǔ ô̌peshe cû̌ bò dǒ cǔmû cǔcǐ lô̤̌kò lô̤̌khi pě. Dě dǒ na kû̌ nakhlilènu akhû̌akhî, lǒ̤bò khlilèphû̌ dǒ hǎkhû̌ tokhlǒnu gǔ nǐ̤bǎ tutṳ̌ kû̌ ta̤ǐshowî̤ pě. ^e 15 Dě nacû̌ bǎtè tôkû bǎbǎ, he ô̌cu kû̌ na pě, he tugǔtaka tû̌ na pě. He gǔ kaǎ gesô̌ na bǎ gǎnu tôgǎ pě. Pô̤̌ he olò̤ hto nanu, a kè̌ lǒbehtò̌ khô tô̤̌ mî̌, he wîkè nô̌ na tô̤̌,” Cǒmaradû̌ hî̌ Khûya̤kò pô̤̌nu.

16 Dě bǎ Khûya̤kò shî̌nǎhtò̌ akha, a hî̌ kû̌, “Ǒ Cǒmara tûjû̌pwa̤ ô̌ mè̤̌mî̌ca bǎo ya. A ô̌ bǒo dě he sî̌ganǎ̤ tô̤̌tô̤̌.” 17 A ǐsha dě a hî̌ kû̌, “Ǒ gûlǎ̤ bǒo tôkû mî̌ a gònògòglè ǐsha gutṳ̌! Hǒomî̌ asô̌sô̌ kû̌ Cǒmaradû̌ ahǐ kû̌ mǒkhû̌ atakhakû hǒ.”

18 Dǒ anô̌tôwô̤ akhanu, Khûya̤kò ihtǒ dě a phǐhtò̌ lǒ̤ dǒ a hǎmôtokhǒ ǐ nutômè dě a dôihtǒô̌ ma̤mǎnǎ kû̌ ta̤sî̌yahtò̌, dě dǒ ta̤bè̌plò̌shǐ nǐ̤ lǒ̤ hǒtômè ayanu, a lò̌lò̤ htǒshi dǒ lǒ̤ hǒtômè akhû̌. 19 Dě a kaǎ ǐtûû̌ gûlǎ̤ bǎnu tôkû ami̤ kû̌ Betelǎ, dě dǒ awǐkha wî̤̌ nutôwî̤̌ mî̌ kòyò kaǎ lû̌mi̤ kû̌ Wî̤̌lǔsa. (Betelǎ yô̤̌sǎyô̤̌mû mî̌ Cǒmaradû̌ ahǐ.)

20 Dě Khûya̤kò ǐsholò̤ ayô̤̌ dě a hî̌ kû̌, “Cǒmaradû̌ kè̌ ô̌cu kû̌ he, a kè̌ kè̌khwèǐ he kû̌ he cû̌klè̌ yî̌ hǒtôplǎ, dě a kè̌ ǐ he lǎ̤ǎlǎ̤ô lǎ̤kûlǎ̤sô̌, 21 Htokhôtô̤̌ he kè̌ getǒ̤mô̤ getǒ̤wô̌ bò̌ sô̌ dǒ hepha ahǐ mî̌, Cǒmara tûjû̌pwa̤nu a gǔ htû he Cǒmaradû̌ pě. 22 Htodě lǒ̤ dǒ he dôihtǒô̌ ma̤dòǐ kû̌ ta̤sî̌yahtò̌ nutômènu a gǔ htûtû̌ Cǒmaradû̌ ahǐ pě, dě lǒ̤bò ta̤ dǒ na ǐ he tokhlǒnu, he gǔ ǐ getîkhî sô̌ kû̌ na apû̌shǐ akû tôpû̌ pě.”