Gen 33 | KxfSCKXF | STEP | Htodě Phaya̤kò kè̌cû̌tô dě a kè̌shǐ PhaĚtò̌ kû̌ a kòyò dǒ apwa̤khû lǐ̤ya̤ hètǒ̤ dǒ lû̌ô̌. Pô̤̌nudě a bè̌yòkhô̌kè Mǒ̤le̤a kû̌ aphû̌ tokhlǒ, Mǒ̤rakhîlǎ kû̌ aphû̌ tokhlǒ kû̌ ajû̌mǒ̤nu sò̌ginǐ̤ aphû̌nu tokhlǒ pô̤̌nu.

Genesis 33

Phaya̤kò kè̌shǐshěshu kû̌ awè̤̌ PhaĚtò̌

1 Htodě Phaya̤kò kè̌cû̌tô dě a kè̌shǐ PhaĚtò̌ kû̌ a kòyò dǒ apwa̤khû lǐ̤ya̤ hètǒ̤ dǒ lû̌ô̌. Pô̤̌nudě a bè̌yòkhô̌kè Mǒ̤le̤a kû̌ aphû̌ tokhlǒ, Mǒ̤rakhîlǎ kû̌ aphû̌ tokhlǒ kû̌ ajû̌mǒ̤nu sò̌ginǐ̤ aphû̌nu tokhlǒ pô̤̌nu. 2 A bè̌ ajû̌mǒ̤nu sò̌ginǐ̤ kû̌ aphû̌ tokhlǒ dǒ alô̤mô̤̌lǒ, htodě a bè̌ Mǒ̤le̤a kû̌ aphû̌ tokhlǒnu dǒ aklama, dě Mǒ̤rakhîlǎ kû̌ aphû̌ Khûyṳ̂tǎ dě a bè̌ lû̌û dǒnô̌kòlǒ. 3 Phaya̤kò asanǎ̤ dě a cû̌ dǒlô̤mô̤̌lǒ dě bǎ a hèphǔ dǒ awè̤̌ ô̌ akha, a dǔlṳ̌ ata̤bè̌dubè̌nǎ̤ kû̌ awè̤̌ dě a hè kû̌ a dô̌gînîlò̤ û̌lò̤, a hè kû̌ a dô̌gînîlò̤ û̌lò̤ dǒ hǎkhû̌ susô̌tôplǎ.

4 PhaĚtò̌ kèdě a khlè̌hè kè̌shǐshěshu apṳ̌ Phaya̤kò dě a hèphô̌ gômô̤ lû̌û, htodě asî sò̌ginǐ̤ a hǎwô̤̌wô̤̌ lô̌khô lû̌û bǎnu. 5 PhaĚtò̌ kè̌cû̌tô dě a kè̌shǐcû̌ pwa̤mǒ̤ kû̌ phijǎ tokhlǒ dě a gwè̌ lû̌û kû̌, “Kòyò dǒ a gewô̤̌wô̤̌ kû̌ na nutokhlǒ mî̌ kwè̌ mò̌pè?” Dě Phaya̤kò hî̌shǔ lû̌û kû̌, “Asî mî̌ hephû̌ sîtokhlǒ dǒ Cǒmaradû̌ ǐlò̤ najû̌ amè̤̌ henu aya tokhlǒ hǒ.”

6 Htodě jû̌mǒ̤ nusò̌ginǐ̤ kû̌ aphû̌ tokhlǒ hèphǔ dǒ PhaĚtò̌ô̌ dě a dǔlṳ̌ ata̤bè̌dubè̌nǎ̤ dě a hèdô̌gînî̤ û̌lò̤ lô̌khô dǒ hǎkhû̌. 7 Sô̌sô̌ pô̤̌nudě Mǒ̤le̤a kû̌ aphû̌ tokhlǒ dǔlṳ̌ ata̤bè̌dubè̌nǎ̤ dě a hèdô̌gînî̤ û̌lò̤ lô̌khôkhô, htodě dǒ anô̌kònu Mǒ̤rakhîlǎ kû̌ aphû̌ Khûyṳ̂tǎ dǔlṳ̌ pô̤̌ kû̌ ata̤bè̌dubè̌nǎ̤ dě a hèdô̌gînî̤ û̌lò̤ dô̌dô̌.

8 PhaĚtò̌ gwè̌ pô̤̌ lû̌û kû̌, “Na cû̌sûhè ta̤mi̤ta̤mò̤̌ dǒ heô̌ nutokhlǒ mî̌ nata̤yè̤lò̤ ô̌ titèya?”

Dě Phaya̤kò hî̌shǔ lû̌û kû̌, “Pô̤̌khô heběcǎ gǔ sǎphlǒmô̤ dǒ hekhû̌ aya nudě he sûgewǐ bǎ naya sû tokhlǒ pwǎ.”

9 Bǎbǎkǎlè PhaĚtò̌ hî̌shǔ lû̌û kû̌, “Ǒ hepṳ̌, heta ô̌lǒô̌be bò hǒ. Lǒ̤bò ta̤ dǒ a ô̌ kû̌ nanu tokhlǒ tûlû̌ phî̌ bò mò̌ kû̌ nayanu.”

10 Phaya̤kò hî̌ pô̤̌ lû̌û kû̌, “Mè̤̌tô̤̌, khòsǎdôdě tûlû̌ phî̌ mò̌. Na kè̌ kè̌mô̤ he hî̌dě phî̌shǔ he sûnu. Khònò̤̌ he kè̌shǐ namǐ̤sǎ kû̌ nata̤kaǎmô̤shǔ he nudě, a asô̌sô̌kû̌ he kè̌shǐ Cǒmaradû̌ amǐ̤sǎ. 11 Khòsǎdô phî̌shǔ mò̌ sû dǒ he phî̌ge bǎ nanu, ma̤titèhî̌dě Cǒmaradû̌ ma̤bwǐma̤sîrî dû̌ he akhû̌akhî, he lṳ̂bǎ titètè̌ mî̌ heta ô̌lǒô̌be bò.” Phaya̤kò hî̌ kudǔdǔ lû̌û dě a phî̌shǔ sô̌ lû̌û.

12 Dě PhaĚtò̌ hî̌ lû̌û kû̌, “Cû̌ pa cû̌ sělě pô̤̌ tǎ, dě he cû̌ kû̌ na.”

13 Bǎbǎkǎlè Phaya̤kò hî̌ lû̌û kû̌, “He běcǎdû̌ sǎganǎ̤ kû̌ phijǎphû̌ tokhlǒ mî̌ anějǎlajǎ pe. Kǎtô̤̌ he bǎ kè̌ǐwô̌ pô̤̌ hesû̌phû̌mǒ̤ kû̌ pṳ̂̌mǒ̤ dǒ aphû̌ ônû̌ pe lû̌û nutokhlǒ. Tôni̤ akû, pa kè̌ bôcû̌ shû̌shû̌ asî hî̌mî̌, lǒ̤bò ta̤mi̤ta̤mò̤̌ nutokhlǒ mî̌ a gǔ si bò pě. 14 Běcǎdû̌, khòsǎdô tûlû̌ ge wǐmò̌ he mî̌ najû̌ nî̌, sǎdôdô he gû̌ ge dǒ kû̌ heta̤mi̤ta̤mò̤̌ kû̌ phijǎphû̌ tokhlǒ dǒ nô̌kò pě. Dě he gǔ ge kè̌shǐ shěshu kû̌ běcǎdû̌ bǎ Sè̌ǐragǎ nupě.”

15 PhaĚtò̌ hî̌ lû̌û kû̌, “Kè̌hî̌pô̤̌nudě he bèkè padô̌ na kû̌ hekòyò tokhlǒ.”

Dě Phaya̤kò hî̌shǔ lû̌û kû̌, “A lǎ̤lṳ̂ bè̌kè nô̌ tô̤̌, na kaǎmô̤shǔ kaǎmô̤wô̌ he numî̌ a lǒbetû̌ hǒ.”

16 Dǒnô̌kòlǒnu PhaĚtò̌ getîkhî sô̌ dǒ Sè̌ǐragǎ bǎnu tôni̤hǒ. 17 Phaya̤kò dě a ge dǒ Wî̤̌sǔkû̌ dě a ge ma̤htò̌ ahǐ kû̌ ta̤mi̤ta̤mò̤̌ apô̤ tokhlǒ bǎnu. Pô̤̌nudě kòyò kaǎkè gûlǎ̤ bǎnutûkû kû̌ Wî̤̌sǔkû̌. (Sǔkû̌ yô̤̌sǎyô̤̌mû mî̌ ta̤mi̤ta̤mò̤̌ apô̤.)

18 Dǒnô̌kòdě Phaya̤kò cû̌ô̌ tutṳ̌pô̤̌ dǒ Pada aragǎ dě a getǒ̤ mô̤mô̤wô̌wô̌ dǒ Khanagǎkû Wî̤̌shake, dě a ma̤htò̌ hǐphû̌ bǎ wî̤̌nṳ tôwî̤̌ akòshî̌. ^a 19 Hǎkhû̌ dǒ a ma̤htò̌ hǐphû̌ nutôkû mî̌ a pwî̤ dǒ Phashake apha, Phahamû aphû̌ sîtokhlǒ a ô̌ dě a pwî̤ kû̌ ruyî̌ tôya. ^b 20 Dě a tèhtò̌ma̤htò̌ ta̤lṳhtò̌wǎ̤ kû̌ lǒ̤ bǎnu tôkû dě a kaǎ ǐ lû̌mi̤ kû̌ Ěla Elûhe Isôrěla. (yô̤̌sǎyô̤̌mû mî̌ Isôrelaphû̌ a Cǒmaradû̌ numî̌ Cǒmara.)