Genesis 34

Kòyò ma̤phǔmò̤̌ Mǒ̤dǐna

1Dě tôni̤kha, Phaya̤kò kû̌ Mǒ̤le̤a aphû̌pwa̤mǒ̤ Mǒ̤dǐna hǎhtò̌cû̌ ô̌lèbǒsû̌ kû̌ pwa̤mǒ̤ tokhlǒ bǎ gǎkûnu. ^a 2Bǎ pwa̤pǒshipǒgǎ Hǐwǐ khlilèphû̌ Phahamû aphû̌ Khûshake kè̌shǐlû̌ akhanu, a kaǎcû̌ lû̌ dě a cû̌ma̤phû̌mò̤̌ kè lû̌û. 3Dě a sǎyṳnṳ̌ Phaya̤kò aphû̌ Mǒ̤dǐna, dě a hî̌bǎ tili̤tôlô̌ ǐ Mǒ̤dǐna dǒ a gǔ sǎyṳ lû̌û. 4Dě Khûshake hî̌ apha Phahamû kû̌, “Pô̤̌khô pwa̤mǒ̤ hǒtôpwa̤ gǔ htû hema ayanu, tîwî̌tòwò bǎ mò̌ he.”

5Bǎ Phaya̤kò ganǎ̤dehto kû̌ Khûshake ma̤phû̌mò̤̌ aphû̌ Mǒ̤dǐna akhanu, aphû̌pwa̤khû tokhlǒ dě a hèkè̌ pe lô̌khô ata̤mi̤ta̤mò̤̌ tokhlǒ dǒ mi̤kla akhû̌akhî, a hî̌ tôcǒ tô̤̌, sǔtukǔ a ô̌ tǒ̤ dǒ aphû̌ tokhlǒ getǒ̤ dǒ hǐ.

6Ma̤pô̤̌nudě Khûshake apha Phahamû hǎhtò̌cû̌ hî̌bǎ kû̌ Phaya̤kò. 7Phaya̤kò aphû̌ tokhlǒ ganǎ̤de ta̤we̤ta̤kènu kû̌ asî ô̌ dǒ mi̤kla dě a gebò dǒ hǐ. Dě asî sǎphlǒsha gutṳ̌ dě a sǎphlǒdû̌ lô̌khô jòjî̌ tô̤̌. Ma̤titèhî̌dě Khûshake cû̌ma̤phû̌mò̤̌ kû̌ Phaya̤kò aphû̌pwa̤mǒ̤ pô̤̌numî̌ ta̤sòwò̤̌dû̌ gutṳ̌ tôcǒ dǒ Isôrěla nutômṳ̌ tôcǒ aya, dě ta̤ma̤ pô̤̌o tokhlǒnu a tô ma̤ tô̤̌.

8Bǎbǎkǎlè Phahamû hî̌ asî kû̌, “Hephû̌ Khûshake sǎphlǒô̌ naphû̌pwa̤mǒ̤nu, dě khòsǎdô ǐ mò̌ lû̌û kû̌ ama nî̌. 9Ma̤khòmò̤̌ lû̌û hò̌, ǐ mò̌ naphû̌pwa̤mǒ̤ kû̌ pa, dě sî phî̌ sô̌tû̌ paphû̌pwa̤mǒ̤ kǎ. 10Sî cû̌ô̌ dǒ pakla mî̌ anǐ̤, sî sǎyṳ ô̌ bǎtè tôkû kû̌ bǎbǎ anǐ̤ pwǎ. Ô̌ kû̌ lô̌khô bǒo dě ma̤gǔma̤khè̌ǎ pwî̤ǎshaǎ lô̌khôtû̌, pwî̤ǐ lô̌khô hǎkhû̌ bǒo.” Phahamû hî̌ pô̤̌nu.

11Htodě Khûshake hî̌ Mǒ̤dǐna apha kû̌ apṳ̌pwa̤khû tokhlǒ kû̌, “Khòsǎdô phî̌shǔ mò̌ heta̤sǎyṳnu dě sî kwi he titètè̌ bǎbǎ, he gǔ ǐtû̌ sî pě. 12Pwa̤khòmò̤̌phû̌mǒ̤ tôkhô aya bǎbǎ, asû aya bǎbǎ, sî sǎyṳ kwi pwî̤dû̌ pwǐtè bǎbǎ kwi mò̌, he gǔ ǐtûû̌ pwǐ sî kwi nupě. Shû̌dè ǐ he kû̌ Mǒ̤dǐna nunî̌ apǒhǒ.”

13Khûshake ma̤phû̌mò̤̌ hto asî apṳ̌ Mǒ̤dǐna akhû̌akhî, Phaya̤kò aphû̌pwa̤khû tokhlǒ lô̌shôbǐǐ geshěshǔ Khûshake kû̌ apha Phahamû pô̤̌o: 14Dě asî hî̌ kû̌, “Pa ma̤khòmò̤̌ jò papṳ̌pwa̤mǒ̤ kû̌ pwa̤ dǒ a dǔtṳ̌ kû̌ kòyò bě tô̤̌ nutokhlǒ tô̤̌. Pa kè̌ ma̤khòmò̤̌ mò̌ mî̌, a htûhtò̌ ta̤sòwò̤̌dû̌ dǒ paya pě. ^b 15A ô̌ pwǎ tôcǒ pwǎ, pwa̤khû lǒ̤bò dǒ sîkhlisîlè akla nutokhlǒ kè̌ dǔtṳ̌ bò asîbě pô̤̌ pa mî̌, pa jû pwǎ. 16Pô̤̌nudě pa gǔ ǐ paphû̌pwa̤mǒ̤ tokhlǒ kû̌ sî pě dě pa gǔ phî̌ tè̌ kû̌ sîphû̌pwa̤mǒ̤ tokhlǒ pěpě. Dě pa gǔ ô̌plǒô̌cu kû̌ sî dě pa gǔ htûhtò̌ kû̌ sî khlilèphû̌ tôcǒ nô̤̌ pě. 17Bǎbǎkǎlè sî kè̌ jûbò̌ kû̌ dǒ sî gǔ dǔtṳ̌bě tô̤̌ mî̌, pa kaǎ tîkhî sô̌ papṳ̌pwa̤mǒ̤ pě.”

18Asî ata̤shôbǐǐ nî̌ atôabǎ Phahamû kû̌ aphû̌ Khûshake asǎphlǒ. 19Khûshake sǎyṳ̌tûlû̌ shû̌lě Phaya̤kò aphû̌pwa̤mǒ̤ akhû̌akhî, pô̤̌ asî hî̌ lû̌û nu a ma̤pò̤̌yǎ̤pò̤̌sha pe tô̤̌. Dǒ a ô̌ ǐ wî̤̌kû lǒ̤bò numî̌ kòyò bè̌dubè̌nǎ̤ dû̌shî̌ lû̌û. 20Htopô̤̌nudě Phahamû kû̌ aphû̌ Khûshake cû̌ kû̌ asî dǒ wî̤̌takha lǎ̤ô̌plǒhî̌bǎcu kè̌shǐshěshǔ lû̌û agûlǎ̤ dě a cû̌hî̌bǎ kû̌ pwa̤khû bǎnu tokhlǒ. 21Dě asî hî̌ kû̌, “Phaya̤kò kû̌ aphû̌ sîtokhlǒ mî̌ a bǒsû̌khǎkhô kû̌ pa pwǎ, pa dǐô̌ asî dǒ pashipagǎkû dě nocû̌noge ma̤gǔma̤khè̌ǎ pili̤ pû asî tǎ, ma̤titèhî̌dě hǎkhû̌ gûlǎ̤ dǒ pagǎkû nî̌ a ô̌lè̤̌ pe dǒ asîlǎ̤ô̌ aya. Pa ma̤khòmò̤̌ gû̌ kû̌ asîkhlilèphû̌ pwa̤mǒ̤ tokhlǒ dě asî khòmò̤̌ kû̌ paphû̌pwa̤mǒ̤ tokhlǒ mî̌ anǐ̤nǐ̤. 22Tǒ̤ tôcǒpwǎ dǒ pa lǎ̤lṳ̂ ma̤ mî̌ amè̤̌ lǒ̤bò papwa̤khû nutokhlǒ kè̌ dǔtṳ̌ bě pô̤̌ asî numî̌, asîsǎphlǒ tô kû̌ a gǔ htûhtò̌ kòyò tôcǒ nô̤̌ kû̌ pa pě. 23Pa kè̌ ma̤pô̤̌nu mî̌, asî ta̤mi̤ta̤mò̤̌ kû̌ asîtimǐtitè tokhlǒ gǔ htûhtò̌ pata pě, mè̤̌tô̤̌ya? Ma̤pô̤̌nudě pa jû pô̤̌ asî hî̌ panu tǎ, dě asî gǔ ô̌plǒ kû̌ pa pě.”

24Lǒ̤bò pwa̤khû dǒ a hǎhtò̌cû̌ô̌ lô̌khô dǒ wî̤̌takhadû̌htu nutokhlǒ sǎphlǒtô bò Phahamû kû̌ aphû̌ Khûshake hî̌ bǎ asǐ tokhlǒ, dě lǒ̤bò pwa̤khû dǒ a ô̌ bǎ wî̤̌kû nutokhlǒ a dǔtṳ̌ bò lô̌khô abě.

25Nô̌kò suni̤ tôni̤nu, asî dǔtṳ̌abě dě asha pe lû̌û akhanu, Phaya̤kò aphû̌pwa̤khû, Khûsǐmû kû̌ KhûLe̤wǐ, amè̤̌ Mǒ̤dǐna awè̤̌pwa̤khû nusò̌ginǐ̤ phî̌nṳ̌ lô̌khô nò̌shî tôpwa̤ tôbǎ dě dǒ kòyò gènè̤tǒ̤ tôcǒ tô̤̌ akû a cû̌nṳ̌ sumṳ̌htò̌ lô̌khô dǒ wî̤̌nutôwî̤̌ akû, dě a cû̌nṳ̌ pě̤si bòmǔ te̤gle pwa̤khû ô̌ bǎ wî̤̌kû nutokhlǒ pṳ̂̌ tôpwa̤. ^c 26Asî pě̤si Phahamû kû̌ aphû̌ Khûshake kû̌ nò̌she dě a cû̌ kaǎ geǐ sô̌ Mǒ̤dǐna dǒ Khûshake ahǐ dě a hǎhtò̌gekè lô̌khô. 27Phaya̤kò aphû̌pwa̤khû dǒ ashǔshawa̤ tokhlǒ hènṳ̌ kè̌shǐ kû̌ pwa̤khû tokhlǒ si bòkè bǎ wî̤̌nṳ tîwî̤̌ akû. Dǒ wî̤̌ nutôwî̤̌ ma̤phû̌mò̤̌ asî apṳ̌pwa̤mǒ̤ akhû̌akhî, asî phî̌sigwǐ gekèbò ata̤dû̌yò̤̌htò̌sa sî. 28Lǒ̤bò kòyò sû̌phû̌ kû̌ pè̤̌ tokhlǒ kû̌ kòyò pṳ̂̌pa̤nǎ̤ kû̌ kò mǐû̌lǎhû̌ tokhlǒ, kû̌ lǒ̤bò ta̤ dǒ a ô̌ bǎ wî̤̌kû nutokhlǒ bǎbǎ, dǒ wî̤̌khlo hǐkhû̌ hǔklakhû̌ nutokhlǒ bǎbǎ, a phî̌geǐ bò kè. 29Asî phî̌geǐbò pô̤̌ kò ta̤dû̌yò̤̌htò̌sa tokhlǒ kû̌ kòyòphû̌kòyòma kòphû̌kòli̤ tokhlǒ lǒ̤bò. Htokhôtô̤̌ a phî̌ge bò̌bò a ô̌ bǎ hǐdǒkû nutokhlǒ bǎbǎ, a phî̌ge bò.

30Dě Phaya̤kò hî̌ Khûsumeû kû̌ KhûLe̤wǐ kû̌, “Sî ma̤pò̤̌ma̤sha mî̌ca he, Khana khlilèphû̌ kû̌ Peresǐkhlilèphû̌ dǒ a ô̌ bǎ gǎkû nutokhlǒ gǔ sǎkhěkhû̌khwè sǎphlǒdû̌ he pě hǒ. Pakòyò ô̌ tîkî̌phû̌ nô̤̌pwǎ, asî kè̌ gunò̤ lû̌û dě a kè̌ hèshě lô̌khô mò̌ he mî̌, a gǔ ma̤pî̌ma̤kè ma̤simè̤mè̤̌ lǒ̤bò he kû̌ hehǐphû̌phòphû̌ tômṳ̌tôcǒbò pě.”

31Bǎbǎkǎlè asî hî̌shǔ lô̌khô kû̌, “A cû̌ma̤ papṳ̌pwa̤mǒ̤ pô̤̌ pwa̤mǒ̤patǎ tôpwa̤ numî̌ atôabǎ cǎ ya?”