Genesis 37
Khûyṳ̂tǎ ata̤hǎmi̤mò̤̌
1Khònò̤̌dě Phaya̤kò cû̌ô̌ dǒ Khanagǎkû bǎ apha ô̌ ǐ yǎ dǒ awǐkhanu. a 2Hǒtokhlǒ mî̌ Phaya̤kò akhlialè tě̤kalò̤ awe̤akè tokhlǒ hǒ. Khûyṳ̂tǎ mî̌ pwa̤nějǎphû̌ dǒ a ô̌ pepwǎ shǐsusô̌tôně, dě a cû̌kè̌wô̤̌wô̤̌ sû̌phû̌ kû̌ pè̤̌ kû̌ awè̤̌ sî mî̌ aphama nô̌ sô̌ Mǒ̤bǐlaha kû̌ Mǒ̤sǐlapa aphû̌pwa̤khû sîtokhlǒ. Dě ta̤sǔ dǒ awè̤̌sî ma̤ tokhlǒnu Khûyṳ̂tǎ geshôbǐǐlṳ̌ bǎ bò kû̌ apha. 3Khònò̤̌dě Phaya̤kò ▼▼Phaya̤kò kû̌ PhaIsôrěla mî̌ tôpwa̤ nô̤̌ pwǎ.
nǐ̤bǎ nô̌ Khûyṳ̂tǎ htû̌ anědû̌lapwǎ̤nu akhû̌akhî, a mô̤ǐkhlo Khûyṳ̂tǎ kû̌ aphû̌pwa̤khû dǒ ashǔshawa̤ tokhlǒ dě a shò̌ǐ bǎ lû̌û jejûhtû dǒ awî̤tè̤̌sǐ tôpṳ dě a ǐ lû̌û. 4Bǎ awè̤̌sî tokhlǒ kè̌shǐ kû̌ apha mô̤ǐkhlo Khûyṳ̂tǎ kû̌ asî akha, asî sǎkhěkhû̌khwè ǐ lû̌û dě asî hî̌bǎmô̤ hî̌bǎwô̌ pe lô̌khô lû̌û tô̤̌. 5Tôhǎdě Khûyṳ̂tǎ hǎmimò̤̌ dě a shôbǐǐlṳ̌ bǎ awè̤̌ sî akha, asî lě̤ sǎkhě pô̤̌ lû̌û. 6Dě a hî̌ asî kû̌, “Ganǎ̤de lô̌khô he ta̤hǎmimò̤̌nu. 7Pa ô̌ dǒ hǔklakhû̌ dě pa gî̌plǒ wô̤̌wô̤̌ lû̌ bǔtṳ̂̌ dě tôplǎnô̤̌ hebǔtṳ̂̌ cû̌ ihtǒsô̌, dě sîbǔtṳ̂̌ tokhlǒ ihtǒô̌ te̤we̤bò hebǔtṳ̂̌ dě a û̌lò̤ bò hebǔtṳ̂̌.” 8Awè̤̌sî tokhlǒ hî̌shǔ lû̌û kû̌, “Na gènè̤ kû̌ na glè̌ htû khwǐ pě ya? Na glè̌ pǒǐ mè̤̌caca pa pě ya?” Dǒ ata̤hǎmi̤mò̤̌ kû̌ ata̤hî̌bǎ tokhlǒ akhû̌akhî, asî lě̤ sǎkhěkhû̌khwè pô̤̌ lû̌û. 9Htodě a hǎmimò̤̌ pô̤̌ tôplǎ dě a shôbǐǐlṳ̌ bǎpô̤̌ kû̌ awè̤̌sî tokhlǒ dě a hî̌ kû̌, “Ganǎ̤de lô̌khô, he hǎmimò̤̌ pô̤̌ dǒ ashǔshawa̤ tôcǒ, hǒtôplǎ dě lṳmṳ̌, la, kû̌ shǎ shǐtèmè̤ û̌lò̤bò lô̌khô dǒ helô̤mô̤̌ nî̌.” 10Dě bǎ a shôbǐǐlṳ̌ bǎ apha kû̌ awè̤̌ tokhlǒ akha, apha sǎhtǎ lû̌û dě a hî̌ lû̌û kû̌, “Na cû̌hǎmi̤mò̤̌ tǒ̤ pô̤̌nṳ̌mî̌ yô̤̌sǎyô̤̌mû hè hětè? Namǒ̤ kû̌ he kû̌mî̌ nawè̤̌ sîtokhlǒ bǎ hèdô̌gînîlò̤ mè̤̌caca dǒ nalô̤mô̤̌ pě ya?” a hî̌ lû̌û pô̤̌nu. 11Pô̤̌nudě awè̤̌ tokhlǒ sǎkhěkhû̌khwèbò lô̌khô lû̌û bǎbǎkǎlè apha to̤mǎǐ ta̤we̤ta̤kè hǒo dǒ asǎphlǒkû. c Khûyṳ̂tǎ awè̤̌ tokhlǒ shaǎcû̌ kè lû̌û dǒ Ijî̌gǎ
12Tôni̤khadě Khûyṳ̂tǎ awè̤̌ sîtokhlǒ hǎhtò̌cû̌ kè̌ lô̌khô aphasû̌phû̌ kû̌ pè̤̌ dǒ Wî̤̌shake kòshî̌ tôkû. 13Dě Phaya̤kò hî̌ Khûyṳ̂tǎ kû̌, “Nawè̤̌ sî cû̌kè̌ lô̌khô sû̌phû̌ dǒ Wî̤̌shake kòshî̌ tôkû. He hî̌ na, cû̌ dǒ asîô̌nu nî̌.” Dě Khûyṳ̂tǎ hî̌shǔ apha kû̌, “O, anǐ̤ pwǎ, pha.” 14Dě apha hî̌ pô̤̌ lû̌û kû̌, “Cû̌mò̌ khònò̤̌ dě cû̌kè̌kè̌ mò̌ nawè̤̌ sî ô̌shû̌ô̌mô̤ ya, htodě sû̌phû̌ kû̌ pè̤̌ sîtokhlǒ mî̌ a ma̤ kwè̌ hětènu, gehî̌lṳ̌ bǎ he nî̌.” Dě a ô̌ bǎ Hebrû gǎlǒ̤to̤kû nudě a nohǎhtò̌cû̌ Khûyṳ̂tǎ dǒ Wî̤̌shake. Bǎ Khûyṳ̂tǎ hètǒ̤ dǒ Wî̤̌shake kòshî̌ akhanu, 15Kòyò tôpwa̤ kè̌shǐ lû̌û cû̌htôcû̌lò̤ bǎ hǔklakhû̌ nu dě a gwè̌ lû̌û kû̌, “Na cû̌ kè̌lǎ kwè̌ mǐtitè?” 16Khûyṳ̂tǎ hî̌shǔ lû̌û kû̌, “He cû̌kè̌lǎ hewè̤̌ tokhlǒ pwǎ. Asî cû̌kè̌ lô̌khô sû̌phû̌ bǎtè tôkû mî̌ na sî̌ganǎ̤ ya?” 17Dě kòyòpha nutôpwa̤ hî̌shǔ lû̌û kû̌, “Asî ô̌ bǒo dě a hǎhtò̌cû̌kè hǒ, he ganǎ̤de asî hî̌ ǐtûû̌ lû̌û kû̌, ‘pa cû̌ dǒ Wî̤̌dò̌ta tǎ!’ a hî̌ ǐtûû̌ lô̌khô lû̌û pô̤̌nu yahî̌.” Pô̤̌nudě Khûyṳ̂tǎ gû̌cû̌kû̌ awè̤̌ sîtokhlǒ akò, dě a cû̌kè̌shǐ asî bǎ Wî̤̌dò̌ta akòshî̌nu. 18Bǎbǎkǎlè bǎ awè̤̌ sîtokhlǒ kè̌shǐ cû̌lṳ̌ pepwǎ lû̌û, dě a hètǒ̤ khôtô̤̌ akhanu, asî gènè̤ gǔma̤si lô̌khô lû̌û. 19Dě asî hî̌ lô̌khô kû̌, “Dǒnu, pwa̤hǎmi̤mò̤̌ běcǎ nutôpwa̤ hè hǒ!” 20“Cû̌! pa cû̌ma̤sikè yǎ dě cû̌wîtě̤ kè yǎ dǒ shiû̌khwekû tôkûkû tǎ, dě pa ge hî̌ kû̌ ta̤mi̤ta̤mò̤̌ tôcǒ ěsi lû̌û pô̤̌nu tǎ! Dě pa ô̌pǒ̤ kè̌kè̌ tǎ! Ata̤ hǎmimò̤̌ tokhlǒ tôkhò̌ a htûhtò̌ jò pě mǐtô̤̌.” 21Bǎbǎkǎlè bǎ Khûrǔbe ganǎ̤de asî hî̌ pô̤̌nu akha, a ma̤hǎplǎ Khûyṳ̂tǎ dǒ asî cǔdekû dě a hî̌ kû̌, “Pa ma̤si yǎ tô̤̌ tǎ!” d 22Khûrǔbe hî̌ pô̤̌ asî kû̌, “Cû̌ma̤si tǎ̤ a mǎ̤. Wîtě̤kè yǎ dǒ shiû̌khwekû dǒ gǎshashigakûnu, ma̤si a kû̌ sînǎ̤ tǎ̤mǎ̤ nî̌.” Khûrǔbe hî̌ pô̤̌onu mî̌ a tîwî̌tòwò ma̤hǎplǎ Khûyṳ̂tǎ dǒ asîcǔdekû dě a glè̌ kaǎgesô̌ lû̌û dǒ aphaô̌ pwǎ. 23Pô̤̌nudě bǎ Khûyṳ̂tǎ hètǒ̤ dǒ awè̤̌ sî ô̌ akha, asî plû̌htò̌ kèbò lû̌jejûhtû wî̤tè̤̌sǐ dǒ asô̌ ǐ nutôpṳ. 24Dě asî wîtě̤kè lû̌û dǒ shiû̌khwekû. Shiû̌ nutôû̌ mî̌ a khwe pwǎ dě shi ô̌ tîkî̌ tô̤̌. 25Htodě bǎ asî hǎnòò̌ ǎ shǎ akha, asî kè̌cû̌tô dě a kè̌shǐ lô̌khô Ishômelǎ khlilèphû̌ saprṳ̂ ô̌ dǒ Kǐlè̌gǎ hè. Dǒ asî tîsî̌budû̌lô̤nu a dò̌cû̌ǐ lô̌khô ta̤numû̌ dǒ lǎ̤bè̌nṳ̌mò̤̌wǐ kû̌ hǎsǐtokhlǒ, sǔri ta̤khû̌numû̌ tîkî̌ kû̌ Mǔrashinumû̌ dě a dò̌cû̌ lô̌khô dǒ Ijî̌gǎ. 26KhûYǔda hî̌ apṳ̌wè̤̌ tokhlǒ kû̌, “Pa kè̌ ma̤si pa pṳ̌ dě pa kè̌ ma̤bǐma̤hǔ alṳ̌tṳ̂̌ hî̌mî̌, abwǐsirî ô̌ mî̌titè? 27Tònò̤̌ pa ma̤si yǎnu, cû̌! pa cû̌shaǎ lû̌û kû̌ Ishômelǎ khlilèphû̌ nutokhlǒ tǎ! dě a mî̌ papṳ̌ tûû̌, pasǐpashi tûû̌ pwǎ.” Dě apṳ̌wè̤̌ tokhlǒ jûbò lû̌yô̤̌. 28Pô̤̌nudě bǎ Mǐdiya khlilèphû̌ ▼▼dǒ Hebrǔyô̤̌ mî̌ a kaǎ pwa̤ma̤gǔ ma̤ǎta̤phû̌nu a hî̌ ayô̤̌ ginǐ̤mû. A kaǎ kû̌ Mǐdiyaphû̌ mè̤̌tô̤̌dě Ishamelǎphû̌ pô̤̌nu. Lî̤plò̌shǐ pwa̤sî̌jò̌phû̌ saprṳ̂ nî̌ gènè̤ lô̌khô kû̌ ayô̤̌nu ginǐ̤mû mî̌ tômṳ̌mṳ̌ nô̤̌ pwǎ.
Pwa̤ma̤gǔma̤khǎ tokhlǒ hètǒ̤ akha, awè̤̌sî cǐhtò̌ Khûyṳ̂tǎ dǒ shiû̌khwekû dě asî shaǎkè lû̌û kû̌ pwa̤ma̤gǔma̤khǎ tokhlǒ kû̌ ruyî̌ abǎ ginǐ̤shi. Dě asî kaǎcû̌kè Khûyṳ̂tǎ dǒ Ijî̌gǎ. f 29Bǎ Khûrǔbe getǒ̤ dǒ shiû̌khwekûnu dě a gekè̌shî̌ pe Khûyṳ̂tǎ bǎnu tô̤̌ akha, a sǎplǎ̤ dě a cǐhǎyè̌ tû̌ aje. 30Dě a getîkhî dǒ apṳ̌wè̤̌ tokhlǒ a ô̌ dě a hî̌ kû̌, “Papṳ̌pwa̤khû ô̌ pe tô̤̌ ya! he bǎ ma̤ hětè?” 31Asî ma̤si pè̤̌phû̌ tôdo htodě a phî̌ Khûyṳ̂tǎ ajejûhtûnu dě a junṳ̌ kè lû̌je dǒ pè̤̌sǐkla. 32Asî phî̌genṳ̌ ajejûhtûwî̤̌ nutôpṳ dǒ aphaô̌ dě asî hî̌ lô̌khô kû̌, “Pa kè̌shǐ jenu, je nutôpṳ mî̌ naphû̌ ajejûhtû mî̌ ya mè̤̌tô̤̌ yanu, na kè̌ tě̤tě̤mè̤̌mè̤̌ kè̌kè̌ mò̌.” 33Apha to̤ǐwô̌ jenu dě a hî̌ kû̌, “Hǒo mî̌ hephû̌ ajejûhtû mè̤̌caca hǒ! ta̤mi̤ta̤mò̤̌ tôcǒcǒ ěsikè lû̌û hǒ. A ěmǔěplě bò Khûyṳ̂tǎ hǒ.” g 34Phaya̤kò dǔlṳ̌ ata̤sǎplǎ̤ dě a cǐhǎyè̌ aje dě a sô̌htò̌ jejû tôphrû tôpṳ̌ ▼▼jejû tôphrû mî̌ kòyò kûsô̌ bǎ kòyò sǎplǎ̤ akha
dě ahǎ mṳ̌ni̤mṳ̌sa yî̤ dû̌ gǔgǔ dǒ aphû̌ya. 35Lǒ̤bò aphû̌pwa̤khû kû̌ aphû̌pwa̤mǒ̤ tokhlǒ jî̌pwǐ̤ hè ma̤lèǐ lû̌û bǎbǎkǎlè a jû ma̤lèǐ anǎ̤ tô̤̌ dě a hî̌ kû̌, “He hǎô̌kǔjò petô̤̌, he gǔhǎgǔwô tǒ̤ dǒ he si dě gǔ cû̌ ô̌plǒ kû̌ hephû̌ dǒ lṳ̌gǎnǎdo pě.” Dě Khûyṳ̂tǎ apha hǎwô sělě nṳ̌pô̤̌ lû̌ya. i 36Bǎnukha Mǐdiya khlilèphû̌ tokhlǒ shaǎkè Khûyṳ̂tǎ pô̤̌ jû̌ tôpwa̤ bǎ Ijî̌gǎkûnu. Dě a shaǎ kû̌ kli ikǒdû̌ Pò̌tǐpha. Ikǒdû̌ Pò̌tǐpha mî̌ a ma̤ bǎ Ijî̌gǎkhwǐ ata̤ma̤. Pò̌tǐpha mî̌ a htû pwa̤ô̌pǒ̤kè̌khwè̌ǐ khwǐ tokhlǒ a ikǒdû̌.
Copyright information for
KxfSCKXF