Gen 39 | KxfSCKXF | STEP | Tôni̤kha Ishômelǎ khlilèphû̌ pwa̤ma̤gǔma̤khǎ ta̤tokhlǒ kaǎcû̌kè Khûyṳ̂tǎ dǒ Ijî̌gǎ. Dě a shaǎcû̌kè lû̌û dǒ Ijî̌ khlilèphû̌ ikǒdû̌ Pò̌tǐpha a ô̌. Ikǒdû̌ Pò̌tǐpha mî̌ Ijî̌gǎkhwǐ apwa̤ma̤ta̤phû̌ tôpwa̤, a mî̌ pwa̤ô̌pǒ̤kè̌ǐ khwǐ tokhlǒ ikǒdû̌ tôpwa̤.

Genesis 39

Khûyṳ̂tǎ kû̌ ikǒdû̌ Pò̌tǐpha ama

1 Tôni̤kha Ishômelǎ khlilèphû̌ pwa̤ma̤gǔma̤khǎ ta̤tokhlǒ kaǎcû̌kè Khûyṳ̂tǎ dǒ Ijî̌gǎ. Dě a shaǎcû̌kè lû̌û dǒ Ijî̌ khlilèphû̌ ikǒdû̌ Pò̌tǐpha a ô̌. Ikǒdû̌ Pò̌tǐpha mî̌ Ijî̌gǎkhwǐ apwa̤ma̤ta̤phû̌ tôpwa̤, a mî̌ pwa̤ô̌pǒ̤kè̌ǐ khwǐ tokhlǒ ikǒdû̌ tôpwa̤. 2 Cǒmara tûjû̌pwa̤ ô̌cu kû̌ Khûyṳ̂tǎ akhû̌akhî, a ma̤ titètè̌ mî̌ adû̌htò̌htûhtò̌ dě a ô̌cu bǎ aběcǎ Ijî̌ khlilèphû̌ nutôpwa̤ ahǐ. ^a 3 Bǎ aběcǎ sî̌ganǎ̤ kû̌ Cǒmara tûjû̌pwa̤ ô̌ kû̌ lû̌û, dě a ma̤ titètè̌ bǎbǎ Cǒmara tûjû̌pwa̤ ǐ dû̌htò̌htûhtò̌ lû̌û akhanu, 4 A kè̌dû̌ ǐlû̌ dě Khûyṳ̂tǎ htûhtò̌ apwa̤ma̤ta̤phû̌. Dě a no pǒǐ kè̌khwè̌ǐ lû̌û lǒ̤bò ahǐphòdǒkû kû̌ atě̤ta̤ lǒ̤bò. 5 Sahtò̌ bǎ ikǒdû̌ Pò̌tǐpha no pǒǐ kè̌ǐbò lû̌û tôhǐtôphòbò kû̌ atě̤ta̤ lǒ̤bò akhanu, dǒ Khûyṳ̂tǎ akhû̌akhî, Cǒmara tûjû̌pwa̤ ǐshowî̤ ahǐdǒkû. Cǒmara tûjû̌pwa̤ ǐshowî̤ Pò̌tǐpha ahǐaphò kû̌ awe̤sî ahǔklasî tokhlǒ. 6 Pô̤̌nudě a no kè̌ǐbò atě̤ta̤ kû̌ Khûyṳ̂tǎ pṳ̂̌tocǒ, a lǎ̤lṳ̂ kè̌tîkhî pe tôcǒ tô̤̌, a sî̌ganǎ̤ pwǎtǒ̤ a lǎ̤ǎlǎ̤ô tôcǒ nô̤̌ pwǎ.

Kòyò dǒlò̤tě̤ Khûyṳ̂tǎ dǒ apô̤kû

Khûyṳ̂tǎ mî̌ aphawî̤phatwè̤̌ mè̤mè̤̌. 7 Bǎ anô̌nu aběcǎ ama kè̌ lû̌ dě sǎyṳ lû̌û dě a hî̌ lû̌kû̌, “Nṳ̌hǎmôô̌ kû̌ he.”

8 Bǎbǎkǎlè Khûyṳ̂tǎ htè̌shěshukè lû̌û dě a hî̌ lû̌kû̌, “Gènè̤kè̌ mò̌, tě̤ta̤ lǒ̤bò dǒ hǐdǒkû mî̌, heběcǎ lǎ̤lṳ̂ kè̌tîkhî pe kû̌ anǎ̤ tôcǒ tô̤̌, a no pǒǐbò he kû̌ atě̤ta̤ lǒ̤bò hǒ. 9 Bǎ hǐdǒkû nî̌ kòyò dǒ adû̌ khlo kû̌ henu a ô̌pe tôpwǎ̤ tô̤̌. Heběcǎ ǐlò̤bò dǒ hecǔdekû pṳ̂̌tocǒ. Na htû lû̌ma akhû̌akhî, a ǐ he tô̤̌ mî̌ tǒ̤ pwǎ na nô̤̌. He glè̌ cû̌ ma̤tǒ̤ ta̤sǔ phû̌mò̌dû̌ nutôcǒ dǒ a ma̤ takǎ shěshu Cǒmaradû̌nu hětè?” 10 Pṳ̂̌ni̤ni̤ a tili̤tôlô̌ Khûyṳ̂tǎ, bǎbǎkǎlè Khûyṳ̂tǎ htè̌shěshu lû̌û, a hǎmôô̌ kû̌ lû̌û tô̤̌tô̤̌, a ô̌plǒ kû̌ lû̌û tô̤̌tô̤̌.

11 Tôni̤kha, bǎ Khûyṳ̂tǎ cû̌nṳ̌ma̤ ata̤ma̤ dǒ hǐdǒkû akhanu, bǎ hǐdǒkûnu pwa̤ma̤ta̤ma̤phû̌ ô̌ tôpwǎ̤ tô̤̌. 12 Tôplǎdě ikǒdû̌ Pò̌tǐpha ama cǐmě lû̌jejûhtû dě a hî̌ lû̌û kû̌, “Cû̌ hǎmôô̌ plǒ kû̌ he nî̌,” a cǐmě shotuklǔ Khûyṳ̂tǎ je dě Khûyṳ̂tǎ khlè̌hǎhtò̌ dǒ hǐdòkû̌ dě ajejûhtû ô̌kè dǒ lû̌cǔdekû.

13 Bǎ ikǒdû̌ Pò̌tǐpha ama kè̌shǐ kû̌ Khûyṳ̂tǎ jejûhtû ô̌kè dǒ acǔdekû dě a khlè̌hǎhtò̌ akhanu, 14 A kaǎgǔhtò̌ apwa̤ma̤ta̤phû̌ tokhlǒ dě a hî̌ asî kû̌, “Kè̌mò̌, hewṳ̂ cû̌ kaǎgeǐ Hebrǔ khlilèpha nutôpwa̤ glè̌ ma̤shòwò̤̌ pa hǒ. A hènṳ̌ dǒ hǐdǒkû dě a glè̌ hènṳ̌ hǎmôô̌ plǒ kû̌ he, dě he kaǎgǔ pwǎ sînî. 15 A ganǎ̤de he kaǎgǔ dě sělě a plû̌tě̤kè aje dǒ he kòshî̌ dě a khlè̌hǎhtò̌ dǒ akhlo.”

16 Dě a phî̌mě Khûyṳ̂tǎ jejûhtû bǎ anǎ̤lô̤nu tǒ̤dǒ Khûyṳ̂tǎ aběcǎ getǒ̤ sô̌. 17 Dě bǎ awṳ̂ getǒ̤ dǒ hǐ akha, a shôbǐǐlṳ̌ bǎ lû̌û kû̌ ta̤we̤ta̤kè pô̤̌ a hî̌ bǎ kòyònu, dě a hî̌ kû̌, “Na kaǎge ǐ Hebrǔ khlilèphû̌ dǒ amè̤̌ jû̌ nutôpwa̤ hènṳ̌ dǒ hehǐdǒkû dě a glè̌ nṳ̌ ma̤shòwò̤̌ he. 18 Dě a ganǎ̤de he kaǎgǔ dě sělě a plû̌tě̤kè aje dǒ he kòshî̌ dě a khlè̌hǎhtò̌ dǒ akhlo.”

19 Bǎ ikǒdû̌ Pò̌tǐpha ganǎ̤de ama hî̌ bǎ lû̌û kû̌, “Najû̌ nutôpwa̤ ma̤ he pô̤̌o,” akhanu, a ganǎ̤de dě kû̌ a sǎphlǒdû̌ jòjî̌tô̤̌. 20 Dě a pṳ̂̌ Khûyṳ̂tǎ dě a dǒlò̤tě̤kè lû̌û dǒ apô̤kû bǎ kòyò lǎ̤dǒlò̤tě̤ kû̌ kòyò dǒ a ma̤sǔ khwǐ nutôkû. Dě Khûyṳ̂tǎ bǎ genṳ̌ ô̌ dǒ apô̤ kû. 21 Bǎbǎkǎlè Cǒmara tûjû̌pwa̤ ô̌cu kû̌ lû̌û dě a mô̤ǐ lû̌û kû̌ ta̤mô̤ dǒ ahǎbòjò tô̤̌, dě pwa̤ô̌pǒ̤ apô̤ ikǒdû̌ nutôpwa̤ kè̌dû̌ǐ tû̌ lû̌û. ^b 22 Pô̤̌nukhû̌khî, pwa̤ô̌pǒ̤ apô̤ ikǒdû̌ nutôpwa̤ nopǒbò Khûyṳ̂tǎ kû̌ kòyò ô̌ bǎ apô̤kû nutokhlǒ. Bǎ apô̤kûnu a htûhtò̌ titètè̌ bǎbǎ a nopǒǐkè̌ǐbò kû̌ lû̌û dě a htokè bò kû̌ Khûyṳ̂tǎ pwǎ. 23 Pwa̤ô̌pǒ̤ apô̤ ikǒdû̌ nutôpwa̤ no pǒǐkè̌ǐ bò kû̌ Khûyṳ̂tǎ akhû̌akhî, a lǎ̤lṳ̂ kè̌tîkhî pe tôcǒ tô̤̌. Ma̤titèhî̌dě Cǒmara tûjû̌pwa̤ ô̌cu kû̌ Khûyṳ̂tǎ dě a ma̤ ta̤ titètè̌ bǎbǎnu, ahtûhtò̌bò.