Gen 41 | KxfSCKXF | STEP | Bǎ pwa̤ dǒ khwǐ yṳ̌ǎ lû̌û dě a ôkè̌bǎ Khwǐ asîpî̌shisî̌yô̤̌ aikǒlǒkò nutôpwa̤ nǐ̤bǎ sô̌ ata̤ma̤ a tûlû̌hè ginǐ̤něnu, Khwǐ hǎmimò̤̌ kû̌ a cû̌ ihtǒ ô̌ dǒ Nahi shilô̤̌mǒ̤dû̌ htu bǎ Ijî̌gǎ wî̤̌nu.

Genesis 41

Khûyṳ̂tǎ shôbǐǐlṳ̌ bǎ Khwǐ ata̤hǎmi̤mò̤̌ yô̤̌sǎyô̤̌mû

1 Bǎ pwa̤ dǒ khwǐ yṳ̌ǎ lû̌û dě a ôkè̌bǎ Khwǐ asîpî̌shisî̌yô̤̌ aikǒlǒkò nutôpwa̤ nǐ̤bǎ sô̌ ata̤ma̤ a tûlû̌hè ginǐ̤něnu, Khwǐ hǎmimò̤̌ kû̌ a cû̌ ihtǒ ô̌ dǒ Nahi shilô̤̌mǒ̤dû̌ htu bǎ Ijî̌gǎ wî̤̌nu. 2 Dě a kè̌shǐ pṳ̂̌mǒ̤ bû̌suklǔ susô̌tôdo ô̌ dǒ Nahi shilô̤̌mǒ̤dû̌kû dě a gîhtò̌ bǎ lû̌û, dě a hǎhtò̌ǎ lô̌khô mi̤ bǎ gôpô̤̌mṳ̌klanu. 3 Htodě a kè̌shǐ pô̤̌ pṳ̂̌mǒ̤ susô̌tôdo ô̌ bǎ Nahi shilô̤̌mǒ̤dû̌kû htò̌ dě a htò̌ ihtǒô̌ dǒ pṳ̂̌mǒ̤ hǎhtò̌wǐ nu susô̌tôdo akòshî̌, dě pṳ̂̌mǒ̤ nususô̌tôdo mî̌ agwè̌, aphû̌mò̤̌ jòjî̌tô̤̌. 4 Dě pṳ̂̌mǒ̤ dǒ agwè̌, aphû̌mò̤̌ nususô̌tôdo ǎkè pṳ̂̌mǒ̤ dǒ abû̌suklǔ nususô̌tôdo. Dě Khwǐ shî̌nǎ kè.

5 Htodě a hǎmôô̌ sô̌ dě a hǎmimò̤̌ tèplè̌ pô̤̌ ta̤hǎmimò̤̌ tôcǒ, dě a kè̌shǐ bǔkû̌lǎmṳ̌ tômṳ̌ plô̤̌ susô̌tôplô̤̌, dě aplô̤̌dû̌ plô̤̌htû dě asǎ shò̌ wî̤̌lî. 6 Htodě akè̌shǐ pô̤̌ bǔkû̌lǎmṳ̌ tômṳ̌ plô̤̌htò̌ susô̌tôplô̤̌, dě gili̤sǎgû̌ dǒ gǎlṳmṳ̌htò̌ gǎshashigǎ htò̌hèbǎ lû̌û dě aplô̤̌nôkhwekè, asǎsû̌sǎphîbòkè. 7 Dě bǔkû̌lǎplô̤̌ dǒ anôkhwe, asǎsû̌sǎphî nu susô̌tôplô̤̌ û̌yṳ̂ nṳ̌kè bǔkû̌lǎplô̤̌ dǒ aplô̤̌dû̌plô̤̌htû dě asǎ shò̌wô̌ nu susô̌tôplô̤̌. Htodě Khwǐ shî̌nǎ dě a sî̌ya pwǎ kû̌ a hǎmimò̤̌ pwǎ.

8 Bǎ lṳmṳ̌lî akhanu, Khwǐ gènè̤ tirǐsò̌ ǐsha tûû̌ ata akhû̌akhî, a nocû̌ kaǎbò pwa̤ dǒ a hî̌htò̌ sî̌jò̌ ta̤hǎmimò̤̌ yô̤̌sǎyô̤̌mû kû̌ pwa̤sî̌jò̌phû̌ dǒ Ijî̌gǎkû nutokhlǒ dě a shôbǐǐlṳ̌ bǎ asî kû̌ ata̤hǎmi̤mò̤̌ nutokhlǒ. Bǎbǎkǎlè kòyò shôbǐǐ htò̌lṳ̌ jò bǎ lû̌û ta̤hǎmimò̤̌ yô̤̌sǎyô̤̌mû tôpwǎ̤ tô̤̌. ^a.

9 Hǒtôplǎ dě pwa̤ dǒ khwǐ yṳ̌ǎ lû̌û dě a ôkè̌bǎ Khwǐ asîpî̌shisî̌yô̤̌ aikǒlǒkò nutôpwa̤ hî̌ khwǐ kû̌, “Ǒ khò̌tini̤ he sǐyahèlò̤ kû̌ he ta̤sǔ ô̌ hǒ. 10 Bǎ khwǐdû̌ dǒ a mî̌ he běcǎdû̌ sǎphlǒdû̌ he kû̌ pwa̤ma̤ bǎ namû̌ ikǒlǒkòdû̌ nutôpwa̤ dě běcǎ dǒlò̤tě̤ pa dǒ apô̤kû bǎ pwa̤ô̌pǒ̤kè̌ǐ khwǐ ikǒdû̌ nutôpwa̤ ahǐ akhanu, 11 Pa hǎmimò̤̌ wô̤̌wô̤̌lû̌ ta̤hǎmimò̤̌ tôpwa̤ tôcǒ dǒ tanǎ̤mṳ̌shî̌ akû, dě pa tôpwa̤ kû̌ tôpwa̤ ata̤hǎmi̤mò̤̌nu a ô̌ kû̌ yô̤̌sǎyô̤̌mû. 12 Bǎnukha, pwa̤ô̌pǒ̤kè̌ǐ khwǐ ikǒdû̌ nutôpwa̤ ajû̌ amè̤̌kû̌ Hebrǔ kòyò khlilèphû̌ pwa̤nějǎphû̌ tôpwa̤ ô̌plǒ kû̌ pa bǎnu. Dě pa shôbǐǐlṳ̌ bǎ lû̌û pa ta̤hǎmi̤mò̤̌ dě a shôbǐǐlṳ̌ bǎ pa tôpwa̤ kû̌ tôpwa̤ ta̤hǎmimò̤̌ yô̤̌sǎyô̤̌mû tokhlǒ. 13 Pô̤̌ a shôbǐǐ bǎ panu a htûhtò̌ mè̤̌caca, běcǎ ǐ sô̌ heta̤ma̤, htodě běcǎ ma̤si jolě̤lṳ htò̌kè pwa̤ma̤ bǎ běcǎ mû̌ nutôpwa̤ dǒ sǒlô̤.”

14 Ma̤pô̤̌nudě Khwǐ nocû̌kaǎhè Khûyṳ̂tǎ dǒ a ô̌ dě kòyò cû̌kaǎhtò̌ taplṳ̌tawě̤ lû̌û dǒ apô̤kû. Dě bǎ a dǐbǎ hto a ikǒ, a dǐbǎ hto akhǎshǔ, a htû̌lè̌ tèplè̌ htohǒ aje akhanu, a hènṳ̌ dǒ Khwǐ alô̤mô̤̌. 15 Dě Khwǐ hî̌ lû̌û kû̌, “He hǎmimò̤̌ ta̤hǎmimò̤̌ tôcǒ, dě tôpwa̤ kòyò shôbǐǐlṳ̌ jò yô̤̌sǎyô̤̌mû tô̤̌. Bǎbǎkǎlè kòyò shôbǐǐlṳ̌ bǎ he kû̌ na shôbǐǐlṳ̌ jò ta̤hǎmimò̤̌ tokhlǒ yô̤̌sǎyô̤̌mû, he ganǎ̤de pô̤̌nu.”

16 Khûyṳ̂tǎ hî̌shǔ lû̌û kû̌, “He shôbǐǐjò nô̌ ta̤hǎmimò̤̌ yô̤̌sǎyô̤̌mû tô̤̌, bǎbǎkǎlè Cǒmaradû̌ gǔ ta̤hǎmimò̤̌ yô̤̌sǎyô̤̌mû dǒ awô̌ pě.” 17 Khwǐ shôbǐǐlṳ̌ bǎ Khûyṳ̂tǎ kû̌, “He hǎmimò̤̌ kû̌ he cû̌ ihtǒ ô̌ dǒ Nahi shilô̤̌mǒ̤dû̌ htu, 18 dě he kè̌shǐ pṳ̂̌mǒ̤ susô̌tôdo ô̌ dǒ shilô̤̌mǒ̤kû dě a gîhtò̌, dě abû̌suklǔ mî̌ abû̌suklǔ, dě a hǎhtò̌ǎ lô̌khô mi̤ bǎ gôpô̤̌mṳ̌ ^{▼▼gôpô̤̌mṳ̌ mî̌ a sô̌sô̌kû̌ dîkû̌mṳ̌nu, bǎbǎkǎlè gôpô̤mṳ̌ mî̌ a dô̌htò̌ dǒ shilô̤̌, shidû̌shite̤we̤, shikoǒdû̌htu.} klanu. 19 Htodě he kè̌shǐ pô̤̌ pṳ̂̌mǒ̤ susô̌tôdo ô̌ dǒ shilô̤̌mǒ̤kû htò̌ dě pṳ̂̌mǒ̤nu susô̌tôdo mî̌ agwè̌, aphû̌mò̤̌shǐhtô gutṳ̌. Bǎ Ijî̌gǎkûnu pṳ̂̌mǒ̤ dǒ aphû̌mò̤̌shǐhtô pô̤̌nu, he kè̌shǐ nô̌ tôkhò̌ tô̤̌. 20 Htodě pṳ̂̌mǒ̤ dǒ agwè̌, aphû̌mò̤̌nu susô̌tôdo ǎkè pṳ̂̌mǒ̤ dǒ abû̌suklǔ dǒ ahǎhtò̌wǐnu susô̌tôdo. 21 Asî ǎhto kèhǒ pṳ̂̌mǒ̤ dǒ abû̌, asû̌ nususô̌tôdo bǎbǎkǎlè kòyò sî̌ganǎ̤ kû̌ a ǎ htonu tôpwa̤ tô̤̌, gûlǎ̤lǎ̤ agwè̌ to̤gûlǎ̤ pô̤̌ dǒ awǐnu pwǎ. Htodě he sî̌nǎ kè.

22 “Htodě he cû̌hǎmi̤mò̤̌ kè̌shǐ bǔkû̌lǎmṳ̌ tômṳ̌ plô̤̌ susô̌tôplô̤̌, aplô̌dû̌plô̌htû dě asǎ shò̌ wô̌ mî̌ca. 23 Htodě bǔkû̌lǎmṳ̌ dǒ ashǔshawa̤ tômṳ̌ dô̌htò̌ tè̌dě a plô̌ susô̌tôplô̤̌, dě gili̤sǎ shû̌ dǒ gǎshashigǎ lǒ̤seměkhû̌ htò̌hèbǎ lû̌û dě aplô̤̌htò̌ bǔplô̤̌ dě anôkhwe, asǎsû̌sǎphî susô̌tôplô̤̌. 24 Dě bǔkû̌lǎplô̌ dǒ anôkhwe, asǎsû̌sǎphînu susô̌tôplô̤̌ pî̌gînṳ̌kè bǔkû̌lǎplô̌ dǒ aplô̌dû̌plô̌htû dě asǎ shò̌ wô̌nu susô̌tôplô̤̌. Ta̤hǎmimò̤̌nu he shôbǐǐlṳ̌ bǎ kû̌ pwa̤ dǒ a hî̌htò̌sî̌jò̌ ta̤hǎmimò̤̌ yô̤̌sǎyô̤̌mû nutokhlǒ bǎbǎkǎlè asî shôbǐǐlṳ̌ jò bǎ he yô̤̌sǎyô̤̌mû tôpwa̤ tô̤̌.”

25 Htodě Khûyṳ̂tǎ hî̌shǔ lû̌û kû̌, “Ta̤hǎmimò̤̌nu ginǐ̤cǒ mî̌ tôcǒ nô̤̌ dě yô̤̌sǎyô̤̌mû sô̌sô̌ lû̌û pwǎ. Cǒmaradû̌ glè̌ ma̤ hǒ ta̤ dě a dǔlṳ̌ ô̌nǎwǐhǒ phakhwǐ hǒ. 26 Pṳ̂̌mǒ̤ bû̌suklǔ susô̌tôdonu mî̌ a sǎyṳhî̌ kû̌ ně susô̌tôně, bǔkû̌lǎ plô̤̌dû̌plô̤̌htû nususô̌tôplô̤̌ mî̌ a sǎyṳhî̌ kû̌ ně susô̌tôně hǒhǒ. Hǒo ginǐ̤cǒ mî̌ tôcǒ nô̤̌ dě yô̤̌sǎyô̤̌mû sô̌sô̌ lû̌û pwǎ. 27 Pṳ̂̌mǒ̤gwè̌ dǒ a hǎhtò̌nô̌nu susô̌tôdo mî̌ a sǎyṳhî̌ kû̌ ně dǒ a hè nô̌ susô̌tôněnu pě. Gili̤sǎ shû̌ dǒ gǎshashigǎkhû̌ hèbǎ lû̌û dě aplô̤̌ hǎhtò̌ bǔkû̌lǎplô̌ dǒ anôkhwe, asǎsû̌sǎphî numî̌ a sǎyṳhî̌ kû̌ ně glè̌ gǎwǐ̤gǎko pě susô̌tôněnu hǒ.

28 “Cǒmaradû̌ glè̌ ma̤ ta̤nu a dǔlṳ̌ ô̌nǎwǐ phakhwǐ hǒ akhû̌akhî, a gǔhtûhtò̌ pô̤̌ he shôbǐǐlṳ̌ bǎ phakhwǐnu pě. 29 Bǎ Ijî̌gǎkûnu bǔkû̌lǎ lǎ̤ǎlǎ̤ô ô̌lǒô̌behtò̌ susô̌tôně pě. 30 Bǎbǎkǎlè nususô̌tôně htopě dě gǎwǐ̤gǎko gǔ ô̌htò̌tè̌ susô̌tôně pě. Dě kòyò gǔ shôpe̤kè bò ně dǒ bǔhudî lǎ̤ǎlǎ̤ô ô̌lǒô̌behtò̌ nususô̌tôně pě. Ma̤titèhî̌dě gǎwǐ̤gǎko jî̌jû̌ gutṳ̌ dě a gǔ ma̤pî̌kè Ijî̌gǎ pě. 31 Kòyò gǔ shôpe̤kè bò lǎ̤ǎlǎ̤ô ô̌lǒô̌be dǒ awǐnu susô̌tôně pě, ma̤titèhî̌dě gǎwǐ̤gǎko htûhtò̌ dǒ nô̌kò susô̌tôně pěnu ajî̌ajû̌ gutṳ̌ pě. 32 Ma̤pô̤̌nudě phakhwǐ hǎmimò̤̌nu ginǐ̤cǒbò mî̌ asô̌ lû̌û pwǎ. Hǒomî̌ Cǒmaradû̌ dǔlṳ̌ tě̤tě̤mè̤̌mè̤̌ mè̤̌caca hǒ phakhwǐ dǒ a gǔ htûhtò̌ pě, dě ô̌yî̤tô̤̌nu a gǔ no htûhtò̌ mè̤̌caca pě.

33 “Pô̤̌nukhû̌khî khònò̤̌ phakhwǐ tôbǎ rû̌htò̌ hǒ kòyò dǒ ata̤sî̌jò̌wô̌ ô̌, kòyò dǒ a gènè̤phlôphǎ sî̌jò̌ ta̤ tôpwa̤pwa̤ dě nopǒ nǐ̤ a kû̌ Ijî̌gǎnu. 34 Bǎ bǔhudî lǎ̤ǎlǎ̤ô ô̌lǒô̌be susô̌tôně akû pě akhanu, phakhwǐ tôbǎ rû̌htò̌ ikǒlǒkòdû̌ tokhlǒ dǒ a bǎ cû̌ phǐplǒ bǔkû̌lǎ lǎ̤ǎlǎ̤ô yè̤̌phû̌ tôphû̌ dǒ shiphû̌gǎphû̌ tokhlǒ a ô̌. 35 Bǎ bǔkû̌lǎ lǎ̤ǎlǎ̤ô ô̌lǒô̌be susô̌tôně dǒ a glè̌ hètǒ̤hǒ pěnu, asî tôbǎ cû̌ phǐplǒ bò shǎǎshǎô pṳ̂̌ tôcǒ, dě asî bǎ ge bè̌plǒ lǒ̤bò bǔkû̌lǎ lǎ̤ǎlǎ̤ônu dǒ Khwǐ asiwi̤sòwò̤ ata̤pǒ alǎ̤ pwǎ, dě no bè̌plǒ nǐ̤bò asî dǒ wî̤̌ tokhlǒ akû dě no ô̌pǒ̤kè̌ma̤ nǐ̤ asînu. 36 Pô̤̌nukhû̌khî htǔ gǎwǐ̤gǎkodû̌ ô̌htò̌hǒ bǎ Ijî̌gǎkû susô̌tôně akha pěnu, pô̤̌khô shiphû̌gǎphû̌ tokhlǒ gǔ ǎnṳ̌ônṳ̌ ayanu, asî tôbǎ phǐplǒbè̌plǒ ô̌nǎbò shǎǎshǎô pô̤̌nu. Tǒ̤ dě bǎ gǎwǐ̤gǎko akha shigǎ gǔ pî̌kè tô̤̌ pě,” Khûyṳ̂tǎ pwe̤ǐ Khwǐ pô̤̌nu.

37 Dě Khwǐ kû̌ lǒ̤bò apwa̤ma̤ta̤phû̌ tokhlǒ jû bò lô̌khô Khûyṳ̂tǎ ata̤hî̌ ô̌nǎ hǒtokhlǒ. 38 Dě Khwǐ hî̌ ǐtûû̌ a kòyò tokhlǒ kû̌, “Kòyò dǒ Cǒmaradû̌ ayôla plò̌shǐ ô̌ dǒ lû̌kû sô̌sô̌kû̌ Khûyṳ̂tǎnu, pa cû̌kè̌shǐ jò bǎ nô̌ya?”

39 Htodě a hî̌ Khûyṳ̂tǎ kû̌, “Cǒmaradû̌ dǐsî̌ganǎ̤ lǒ̤bò hǒ na ta̤ hǒtokhlǒ akhû̌akhî, kòyò dǒ a sî̌yaphlôphǎ jò ta̤ dě ata̤sî̌ta̤jò̌ ô̌ sô̌sô̌kû̌ nanu a ô̌pe tôpwa̤ tô̤̌ hǒ. 40 Na bǎ htò̌pǒ nǐ̤ hehônu pě, dě hekòyò lǒ̤bò gǔ ganǎ̤de lǒ̤bò nata̤hî̌bǎ pě. Kòyò dǒ adû̌khlo kû̌ na numî̌ tǒ̤pwǎ he dǒ a htû khwǐnu tôpwa̤ pwǎ.” ^c

Khûyṳ̂tǎ htò̌pǒǐ Ijî̌gǎ

41 Taplǎdě Khwǐ hî̌ Khûyṳ̂tǎ kû̌, “Khònò̤̌dě he rû̌htò̌ hǒ na kû̌ pwa̤pǒ nǐ̤bò Ijî̌gǎ tôgǎ hǒ.” 42 Khwǐ plû̌htò̌ acǔtûplû̌ dǒ a ô̌ kû̌ khwǐta̤mǎta̤dò nutômè dǒ acǔmṳ̌lô̤ dě a plû̌nṳ̌ bǎ kû̌ Khûyṳ̂tǎ. A sô̌htò̌ bǎ lû̌û jejûhtûple dǒ awô̌, dě a kǒlǒhtò̌ bǎ lû̌û htapli̤ tôpli̤ dǒ agô̌bôlô̤̌. ^d 43 Khwǐ no htò̌dò̌ Khûyṳ̂tǎ tîsî̌lô̤ dǒ adò̌ǐ anô̌kònu ginǐ̤khû̌tôkhû̌ dě kòyò kaǎgǔhtò̌cû̌ dǒ lû̌lô̤mô̤̌ kû̌, “Dô̌gînî̤lò̤ lô̌khô!” Khwǐ no hǎhtò̌pǒǐ bòkè lû̌û kû̌ Ijî̌gǎ tôgǎ hǒ.

44 Htodě Khwǐ hî̌ lû̌û kû̌, “He mî̌ Khwǐ, bǎbǎkǎlè na kè̌ jû kòyò tôcǒ tô̤̌ mî̌, kòyò dǒ a ô̌ bǎ Ijî̌gǎkû hǒtokhlǒnu a bǎ gǔǎwṳ̌wè̤ nǐ̤ a cǔdeta̤ma̤ tôpwa̤ tô̤̌.” 45 Khwǐ kaǎ bǎ lû̌mi̤ kû̌ Ijî̌ khlilèphû̌ mi̤, Khûsaphene̤sapaněha, htodě a shû̌dè bǎ lû̌ma kû̌ Wî̤̌ûna apwa̤lṳtòhtò̌ta̤ phapò̌tiphera aphû̌pwa̤mǒ̤ Mǒ̤asana. Pô̤̌nukhû̌khî Khûyṳ̂tǎ cû̌lè te̤we̤ kè̌bò Ijî̌gǎ tôgǎ.

46 Bǎ Khûyṳ̂tǎ sahtò̌ htûhto Ijî̌gǎkhwǐ dě ma̤bǎ Khwǐ ata̤ma̤ akhanu, aně ô̌ hǒ sushi hǒ. A ô̌ dǒ Khwǐ ahôkû dě a hǎhtò̌ô̌lè te̤we̤kè̌bò Ijî̌gǎ tôgǎ. 47 Bǎ lǎ̤ǎlǎ̤ô ô̌lǒô̌behtò̌ susô̌tôně akûnu, sǒsusǒsǎ nṳ̌dû̌wô̤̌ gutṳ̌. 48 Khûyṳ̂tǎ no phǐplǒbè̌plǒ kòyò lǒ̤bò sǒsusǒsǎ dǒ a htò̌lǒhtò̌be bǎnu susô̌tôně bǎ Ijî̌gǎkû nutokhlǒ, dě a ge bè̌ô̌cu lǒ̤bò dǒ wî̤̌ nutokhlǒ akû. Khûyṳ̂tǎ bè̌plǒ nǐ̤ sǒsusǒsǎ lǎ̤ǎlǎ̤ô dǒ tôwî̤̌ kû̌ tôwî̤̌ shǒǐ tûû̌ dǒ awe̤kû hǔklakhû̌ nutokhlǒ. 49 Khûyṳ̂tǎ no phǐplǒ nṳ̌wǒ̤ gutṳ̌ kòyò sǒsusǒsǎ dě a asô̌sô̌kû̌ lǒ̤simǐ dǒ shidû̌shitewe̤htunu a ô̌dû̌wî̤ talû̌ shû̌lě dě a tô̤̌bǎpè̤̌ petô̤̌ akhû̌akhî a tô̤̌bǎ pe tô̤̌.

50 Bǎ gǎwǐ̤gǎkodû̌ hètǒ̤ khôtô̤̌ akhanu Khûyṳ̂tǎ ama amè̤̌ wî̤̌ûna apwa̤lṳtòhtò̌ta̤ Phapò̌tiphera aphû̌pwa̤mǒ̤ Mǒ̤asananu aphû̌ô̌ nṳ̌bǎ Khûyṳ̂tǎ phû̌pwa̤khû sò̌ginǐ̤ hǒ. 51 Khûyṳ̂tǎ hî̌ kû̌, “Cǒmaradû̌ no shôpe̤ kèbò hǒ he kû̌ he ta̤khò̌jî̌jû̌ kû̌ hepha ahǐphû̌phòphû̌ hǒ.” Ahî̌pô̤̌nu a kaǎ ǐtûû̌ aphû̌wè̤̌pwǎ̤ pwa̤khû hǒtôpwa̤ ami̤ kû̌ Khûmanǎ̤she. yô̤̌sǎyô̤̌mû mî̌ shôpe̤.) 52 Dě a kaǎ ǐtûû̌ aphû̌pwa̤khû dǒ nô̌kò tôpwa̤ ami̤ kû̌ Khûěpheri, dě a hî̌ kû̌, “Cǒmaradû̌ ǐhto he phû̌tokhlǒ bǎ shigǎ dǒ he khòbǎ ta̤jî̌ta̤jû̌ nutôgǎ akû nuhǒ.” (Ěpheri yô̤̌sǎyô̤̌mû mî̌ sǎhtò̌phôhtò̌ dû̌wî̤ lô̌khô.)

53 Shǎǎshǎô ô̌lǒô̌be dǒ Ijî̌gǎkû susô̌tôněnu agutṳ̌kè hǒ. 54 Dě gǎwǐ̤gǎkodû̌ susô̌tôně sahtò̌htûhtò̌ mî̌ca hǒ pô̤̌ Khûyṳ̂tǎ hî̌ ô̌nǎhtonu. Lǒ̤bò shigǎ dǒ ashǔshawa̤ tokhlǒ mî̌ gǎwǐ̤gǎkodû̌ ô̌htò̌ bò. Bǎbǎkǎlè bǎ Ijî̌gǎ tôgǎ lǎ̤bònu shǎǎshǎô ô̌ pwǎ. ^e 55 Bǎ Ijî̌ khlilèphû̌ lǒ̤bò sahtò̌ kè̌shǐtṳ̌bǎ hǒ gǎwǐ̤gǎkodû̌ akhanu, asî hèkwihtò̌ lô̌khô shǎǎshǎô dǒ Khwǐ a ô̌. Dě Khwǐ hî̌shǔ asî kû̌, “Cû̌ lô̌khô dǒ Khûyṳ̂tǎ ô̌nu, dě ma̤ lô̌khô pô̤̌ a shôbǐǐ sînu.” ^f

56 Gǎwǐ̤gǎko ô̌htò̌ peshe cû̌ bò hǒ tôgǎ. Dě ajî̌ajû̌ mè̤̌caca hǒ Ijî̌gǎ tôgǎ bò akhû̌akhî, Khûyṳ̂tǎ bǔmô lǒ̤bò bǔkû̌lǎ aphò tokhlǒ dě a shaǎlò̤ bǎ Ijî̌ khlilèphû̌ tokhlǒ bǔ. 57 Gǎwǐ̤gǎkodû̌ ô̌htò̌ lǒ̤bò dǒ hǎkhû̌ tôbǎ lǒ̤bò akhû̌akhî, kòyò ô̌ dǒ hǎkhû̌běkhû̌ lǒ̤bò tokhlǒ hè lô̌khô dǒ Ijî̌gǎ dǒ a gǔ hèpwî lô̌khô bǔkû̌lǎ dǒ Khûyṳ̂tǎ ô̌.