Genesis 42

Khûyṳ̂tǎ awè̤̌sî cû̌pwî̤ǎ lô̌khô bǔkû̌lǎ dǒ Ijî̌gǎ

1Bǎnukha, Phaya̤kò kû̌ ahǐphû̌phòphû̌ ô̌ dǒ Khanagǎ, dě bǎ Phaya̤kò ganǎ̤de kû̌ bǔkû̌lǎ ô̌ dǒ Ijî̌gǎ akhanu, a hî̌ aphû̌sî kû̌, “Sî cû̌ ô̌ dò̌tûklû̌ kè̌khî lû̌û tôpwa̤ kû̌ tôpwa̤ mî̌ ama̤titè, tapwǎpwǎ ama̤ pwǎ sî ya? 2He ganǎ̤de kû̌ dǒ Ijî̌gǎ nu bǔkû̌lǎ ô̌, pô̤̌khô pa gǔ si tô̤̌, pa gǔ ô̌htûpwa̤ sělě bǎpe ayanu, lò̤mò̌, cû̌mò̌ dě cû̌pwî̤ mò̌ lô̌khô kû̌ kòyò bǔkû̌lǎ bǎnu nî̌.” ^a

3Pô̤̌nu akhû̌akhî, Khûyṳ̂tǎ awè̤̌pwa̤khû pwa̤shǐ lò̤ lô̌khô dǒ Ijî̌gǎ dě a cû̌pwî̤ lô̌khô bǔkû̌lǎ bǎnu. 4Bǎbǎkǎlè Phaya̤kò plûcû̌ Khûyṳ̂tǎ apṳ̌pwa̤khû Khûbîyame̤ kû̌ awè̤̌sî tô̤̌, ma̤titèhî̌dě hî̌pě aphû̌ Khûbîyame̤ cû̌ htûhtò̌ tocǒcǒ hè̌ a ǐsha pô̤̌nu. 5Bǎ Khanagǎ nu mî̌ gǎwǐ̤gǎkodû̌ ô̌ htò̌ akhû̌akhî, Phaya̤kò ▼

▼Phaya̤kò kû̌ PhaIsôrěla mî̌ tôpwa̤ nô̤̌ pwǎ.

aphû̌pwa̤khû tokhlǒ cû̌tǒ̤ kû̌ kòyò ashǔshawa̤ dě a cû̌pwî̤ ge lô̌khô bǔkû̌lǎ bǎnu. ^c 6Khònò̤̌dě Khûyṳ̂tǎ htûhtò̌ pwa̤pǒshipǒgǎ bǎ Ijî̌gǎnu, dě a shaǎlò̤ bǎbò shiphû̌gǎphû̌ tokhlǒ bǔkû̌lǎ. Dě bǎ Khûyṳ̂tǎ awè̤̌sî tokhlǒ hètǒ̤ akhanu, asî dô̌gînî̤ û̌lò̤ lô̌khô dǒ hǎkhû̌. 7Khûyṳ̂tǎ kè̌shǐ awè̤̌sî kû̌ sělě a to̤ǐ asî, bǎbǎkǎlè a jî̌ anǎ̤ pô̤̌ a sî̌ganǎ̤ asî tô̤̌nu, dě a hî̌bǎshohî̌bǎshû̌ asî kû̌, “Sî ô̌ bǎtè hè?”

Dě asî hî̌shǔ lû̌û kû̌, “Pa ô̌ dǒ Khanagǎ hè dě pa hè pwî̤ kû̌ kòyò bǔkû̌lǎ lǎ̤ǎ bǒo.”

8Khûyṳ̂tǎ to̤ǐ awè̤̌sî bǎbǎkǎlè awè̤̌sî to̤ǐ yǎ tô̤̌. 9Khûyṳ̂tǎ gènè̤htò̌bǎ sô̌ a ta̤hǎmi̤mò̤̌ asî awe̤akènu dě a hî̌ asî kû̌, “Sî mî̌ pwa̤cû̌kè̌hǔkè̌côta̤ tokhlǒ ya! pô̤̌khô sî gǔ hèshě pa ayanu, sî hèkè̌kè̌ wǐ pashigǎ akhû̌shiǎjǎ dǒ pa takabǐbò̌ ǐ tô̤̌ nu takûkû yahî̌.” ^d 10Asî hî̌shǔ kû̌, “Ǒ běcǎ, amè̤̌ bǎtô̤̌, pa hè pwǎ pô̤̌ najû̌ tokhlǒ nupwǎ, pa hèpwî̤ pwǎ shǎǎshǎô pwǎ. 11Lǒ̤bò pa nutokhlǒ mî̌ paphacu lû̌û pwǎ, najû̌ hǒtokhlǒ mî̌ kòyò cǒtè̤ tokhlǒ pwǎ, pacû̌kè̌hǔkè̌côta̤ mè̤tô̤̌.”

12Dě Khûyṳ̂tǎ hî̌ pô̤̌ asî kû̌, “A mè̤̌tô̤̌, sî hèkè̌kè̌ pashigǎ ta̤khû̌shiǎjǎ dǒ pa takaǐ bò̌ tô̤̌nu takûkû yahî̌.”

13Bǎbǎkǎlè asî hî̌shěshǔ lû̌û kû̌, “Najû̌ amè̤̌kû̌ pa tokhlǒmî̌ paphacu lû̌û pwǎ dě papṳ̌wè̤̌ pwa̤khû ô̌ shǐsò̌ginǐ̤ dě pa ô̌ dǒ Khanagǎ. Papṳ̌pwa̤khû kònò dě a ô̌kè kû̌ papha, tôpwa̤pe dě a ô̌ pe bǎtô̤̌.”

14Khûyṳ̂tǎ hî̌shǔ asî kû̌, “Pô̤̌ he hî̌ hto sînu, sî mî̌ pwa̤cû̌kè̌hǔkè̌côta̤ tokhlǒ pwǎ! 15He bǎ ma̤kè̌kè̌ sî pô̤̌o, he ishǒlò̤ heyô̤̌ kû̌ Khwǐ ami̤ dě sîpṳ̌ kònò kè̌ hètǒ̤ bǒo tô̤̌ mî̌, sî bǎ hǎhtò̌cû̌tephe kû̌ gûlǎ̤ bǒo tô̤̌. 16Dǒ sîkla tôpwa̤pwa̤ bǎ gekaǎhè sîpṳ̌, dǒ a ô̌kè tokhlǒ dě bǎ dǒlò̤tě̤bò asî dǒ apô̤kû pě, pô̤̌khô he gǔ sî̌ganǎ̤ kû̌ sî hî̌bǎcǒ yô̤̌ ya mî̌ acǒtô̤̌yanu he bǎ ma̤kè̌kè̌ sî pô̤̌o. Sî kè̌ hî̌lòhô mî̌, he ǐsho heyô̤̌ kû̌ Khwǐ ami̤ dě sî mî̌ pwa̤cû̌kè̌hǔkè̌côta̤ tokhlǒ hǒ.” 17Htodě a dǒlò̤tě̤ kèbò awè̤̌sî dǒ apô̤kû suni̤.

18Abe suni̤ tôni̤ akhanu, Khûyṳ̂tǎ hî̌ asî kû̌, “He mî̌ kòyò dǒ a bè̌dubè̌nǎ̤ Cǒmaradû̌ tôpwa̤ akhû̌akhî, ma̤ lô̌khô pô̤̌ he hî̌ sînu, sî gǔ htûpwa̤ pě. 19Sî kè̌ mè̤̌caca kòyòcǒtè̤ khlǒ hî̌dě, no ô̌kè tôpṳ̌wè̤̌ bǎ apô̤kûnu, dǒ ashǔshawa̤ tokhlǒ dě phî̌nṳ̌ lô̌khô bǔkû̌lǎ lǎ̤ǎnu dě gemò̌ lô̌khô dǒ hǐphû̌phòphû̌ dǒ a tṳ̌bǎ kû̌ ta̤ô̌hǎwǐ̤shèwè̤ nutokhlǒ a ô̌nu. 20Bǎbǎkǎlè pô̤̌khô he gǔ sî̌ganǎ̤ kû̌ sî hî̌bǎcǒ dě he gǔ no ma̤si sî kû̌ kòyò tô̤̌ ayanu, sî bǎ ge kaǎ hè sîpṳ̌ kònò bǎ heô̌ bǒo.” Dě asî jû lô̌khô pô̤̌ a hî̌nu.

21Dě asî tôpwa̤ kû̌ tôpwa̤ hî̌ lô̌khô lû̌û kû̌, “A htûhtò̌ pô̤̌o mî̌ amè̤̌kû̌ pa ma̤si Khûyṳ̂tǎ akhû̌akhî hǒ. Pa kè̌shǐ kû̌ ajî̌ajû̌ lû̌û dě a kwisǎyṳ pa dǒ ta̤ô̌htûpwa̤ aya bǎbǎ pa bè̌dubè̌nǎ̤ tôcǒ tô̤̌. Pô̤̌nukhû̌khî ta̤jî̌ta̤jû̌ nî̌ a lò̤bǎ dǒ pakhû̌ hǒ.”

22Khûrǔbe hî̌shǔ asî kû̌, “Ma̤pò̤̌ma̤sha tǎ̤ a tǎ̤mǎ̤ nî̌ he hî̌sî tô̤̌ya. Sî ganǎ̤de cǎkǎ tô̤̌ no̤! Khònò̤̌dě dǒ pa ma̤si yǎ dě pa ma̤sǔ yǎ akhû̌akhî, pa bǎ khòbǎ kèhǒ.” ^e 23Asî gènè̤ lô̌khô kû̌ Khûyṳ̂tǎ sî̌ganǎ̤ asî ayô̤̌ tô̤̌. Ma̤titèhî̌dě bǎ Khûyṳ̂tǎ kû̌ asî hî̌bǎ lû̌û akhanu a noǎ pwa̤hî̌bǎtèplè̌htò̌jòyô̤̌ dǒ asî plǎkû.

24Khûyṳ̂tǎ hǎhtò̌cû̌ tephekè kû̌ asî dě a cû̌ hǎhǔ. Htodě a gehî̌bǎ getîkhîsô̌ kû̌ asî. Dě a no kaǎhtò̌ Khûsumeû dě a no comě lû̌û dǒ apṳ̌wè̤̌sî lô̤mô̤̌.

25Khûyṳ̂tǎ no tô̤̌nṳ̌be bò bǔkû̌lǎ dǒ awè̤̌sî huhtǒkû. Dě awè̤̌sî tôpwa̤ kû̌ tôpwa̤ aru tokhlǒnu ano shû̌nṳ̌ bò sô̌ dǒ asî huhtǒkû. Htodě asî lǎ̤ge dǒ klè̌lô̤ ayanu, a ǐge pô̤̌ asî lǎ̤ǎlǎ̤ô. Dě Khûyṳ̂tǎ apwa̤ma̤ta̤phû̌ tokhlǒ ma̤ pô̤̌ a hî̌nu. 26Htodě asî dò̌htò̌ bǔkû̌lǎ dǒ mǐû̌lǎ tokhlǒ alô̤ dě asî hǎhtò̌ge lô̌khô.

27Dě bǎ lṳmṳ̌khǐ, asî ô̌kǔ bǎ gûlǎ̤ lǎ̤ô̌kǔ akhanu, dǒ asî kla tôpwa̤ glè̌ bǔǎ amǐû̌lǎ ashǎ kû̌ hu dě a bǔmô ahuhtǒ akhanu, a kè̌shǐ aru dǒ ahuhtǒkû. 28Dě a shôbǐǐ bǎ apṳ̌wè̤̌sî kû̌, “Kòyò bè̌nṳ̌ bǎ gesô̌ he ru dǒ hehuhtǒ kûnu, Kè̌mò̌mò̌! a ô̌ dǒ he huhtǒ kûnu.” Pô̤̌nu akhû̌akhî ajî̌ bò asî sǎphlǒ, dě a ǐsha gònò̤̌gòglè lǒ̤bò lô̌khô dě a hî̌ kè̌khîlû̌û tôpwa̤ kû̌ tôpwa̤ kû̌, “Ǒ Cǒmaradû̌ cû̌ma̤tǒ̤ pa pô̤̌o mî̌ ma̤titè?”

29Bǎ asî getǒ̤ dǒ Khanagǎ asî apha Phaya̤kò ô̌ akhanu, asî ge shôbǐǐ lṳ̌bǎbò apha kû̌ lǒ̤bò ta̤ dǒ a htûhtò̌ kû̌ asî nutokhlǒ. Dě asî hî̌ kû̌, 30“Pwa̤pǒshipǒgǎ dǒ a pǒǐ shigǎ bǎ Ijî̌gǎnu tôpwa̤, a hî̌bǎshotuklǔ pa, a hî̌ pa kû̌ pa hèkè̌hǔkè̌cô asîgǎ. 31Bǎbǎkǎlè pa hî̌ a kû̌, ‘pa mî̌ kòyòcǒtè̤ pwǎ, pwa̤kè̌hǔkè̌côta̤ mè̤̌bǎtô̤̌. 32Pa tokhlǒ numî̌ phacubò lû̌û pwǎ dě papṳ̌wè̤̌ pwa̤khû ô̌ shǐsò̌ginǐ̤. Papṳ̌pwa̤khû kònò mî̌ a kû̌ papha dǒ Khanagǎ, tôpwa̤pe dě a ô̌ pe tô̤̌.’

33“Kòyò dǒ a pǒ shigǎ bǎnu tôpwa̤ hî̌ pa kû̌, ‘pô̤̌khô he gǔ sî̌ganǎ̤ kû̌ sî mî̌ kòyòcǒtè̤ mè̤̌caca ya mè̤̌tô̤̌ yanu, he ma̤ pô̤̌o, no ô̌kè sî pṳ̌wè̤̌ tôpwa̤pwa̤ bǎ heô̌ bǒo, dǒ ashǔshawa̤ tokhlǒ dě phî̌ nṳ̌ lô̌khô bǔkû̌lǎ dě gemò̌ lô̌khô dǒ sîhǐphû̌phòphû̌ dǒ a kè̌shǐtṳ̌bǎ kû̌ ta̤ô̌hǎwǐ̤shèwè̤ nutokhlǒ a ô̌nu, dě hǎhtò̌ge mò̌ lô̌khô. 34Bǎbǎkǎlè sî bǎ ge kaǎ hè sîpṳ̌ kònò bǎ heô̌ bǒo dě he gǔ sî̌ganǎ̤ kû̌ sî mî̌ pwa̤cû̌kè̌hǔkè̌côta̤ mè̤̌tô̤̌, kòyò cǒtè̤ tokhlǒ pě, dě he gǔ ǐ tîkhî sô̌ sîpṳ̌wè̤̌ Khûsume̤û pě, dě sî gǔ apwî̤ǎ ma̤gǔǎ bǎ gǎkûnu pě.’”

35Bǎ asî glǒhtò̌ hu dǒ asî huhtǒkû akhanu, asîru nutokhlǒ ô̌bò dǒ asî huhtǒ pṳ̂̌tôpwa̤. Bǎ asî kû̌ apha kè̌shǐ ruhtahtǒ tokhlǒ akhanu, a ǐshabò lô̌khô. 36Asîpha Phaya̤kò hî̌ asî kû̌, “Sî ma̤hǎmǎbò hephû̌ tokhlǒ hǒ, Khûyṳ̂tǎ ô̌pe tô̤̌tô̤̌, htodě Khûsumeû mî̌ ô̌pe tô̤̌tô̤̌, khònò̤̌dě sî glè̌ kaǎcû̌ pe Khûbîyame̤ mî̌, sî ma̤ta̤ pô̤̌nudě ta̤gû̌ta̤gè̌ pṳ̂̌tocǒ lò̤bǎ bòkè he hǒ!”

37Hǒtôplǎ dě Khûrǔbe hî̌ apha kû̌, “He kè̌ kaǎge tîkhî ǐ sô̌ Khûbîyame̤ dǒ naô̌ tô̤̌ hî̌nu, tûlû̌ ma̤sikè tûû̌ hephû̌pwa̤khû sò̌ginǐ̤nu. Yṳ̌ǎnṳ̌ he dě plûcû̌ a dǒ hecudekû, he gǔ kaǎge tîkhî sô̌ tûû̌ a dǒ naô̌ pě.”

38Bǎbǎkǎlè Phaya̤kò hî̌shǔ kû̌, “Khûbîyame̤ bǎ cû̌ kû̌ sî tô̤̌, awè̤̌dě a sikè hǒ, dǒ hema Mǒ̤rakhîlǎ phû̌ô̌lò̤nṳ̌ aklanu a ô̌kèpwǎ tǒ̤ a tôpwa̤ nô̤̌ pwǎ. Bǎ na kaǎcû̌ a dǒ klè̌lô̤ akhanu, hî̌pě a cû̌htûhtò̌ jò tôcǒcǒ hè̌. He mǒ̤pwǎ̤ kè hǒ, hî̌pě he sikè kû̌ sî ma̤gû̌ma̤gè̌ sǎplǎ̤jî̌jû̌ he kû̌ hǒnṳ akhû̌akhî hè̌.”