Gen 46 | KxfSCKXF | STEP | Pô̤̌nukhû̌khî, Phaya̤kò tô̤̌nṳ̌ bò atě̤ta̤ dě a hǎhtò̌cû̌ dě bǎ a cû̌tǒ̤ dǒ Wî̤̌berashabǎ akhanu, a ma̤si ta̤mi̤ta̤mò̤̌ dě lṳhtò̌ apha PhaIsè̌ a Cǒmaradû̌.

Genesis 46

Phaya̤kò kû̌ ahǐphû̌phòphû̌ tokhlǒ cû̌ dǒ Ijî̌gǎ

1 Pô̤̌nukhû̌khî, Phaya̤kò ^{▼▼Phaya̤kò kû̌ PhaIsôrěla mî̌ tôpwa̤ nô̤̌ pwǎ.} tô̤̌nṳ̌ bò atě̤ta̤ dě a hǎhtò̌cû̌ dě bǎ a cû̌tǒ̤ dǒ Wî̤̌berashabǎ akhanu, a ma̤si ta̤mi̤ta̤mò̤̌ dě lṳhtò̌ apha PhaIsè̌ ^{▼▼PhaIsè̌ tèhtò̌ ta̤lṳhtò̌wǎ̤ kû̌ lǒ̤ dě a cabahtò̌ Cǒmara tûjû̌pwa̤ bǎ gûlǎ̤nu tôplǎplǎ tǒ̤pwǎ.} a Cǒmaradû̌. ^c 2 Dě bǎ Lṳmṳ̌khǐ akhanu, Cǒmaradû̌ hî̌bǎ kû̌ Phaya̤kò dǒ ta̤dǔlṳ̌htò̌ akû dě “Yakò, Yakò,” a kaǎ lû̌û.

Dě “He ô̌pwǎ,” a hî̌shǔ Cǒmaradû̌ pô̤̌nu.

3 Dě Cǒmaradû̌ hî̌ lû̌û kû̌, “He mî̌ Cǒmaradû̌, napha a Cǒmaradû̌, ǐshacû̌ tǎ̤ dǒ Ijî̌gǎ tǎ̤mǎ̤. He nohtûhtò̌ na kû̌ khlilèdû̌ tôcǒ bǎnu pě. 4 He gǔ cû̌wô̤̌wô̤̌gû̌ kû̌ na dǒ Ijî̌gǎ pě, dě he gǔ kaǎge mè̤̌caca sô̌ nakhlinalè tokhlǒ bǎ gǎnu tôgǎ akû pě. Na gǔ sǎlò̤tě̤kè dǒ Khûyṳ̂tǎ acǔdekû pe.”

5 Htodě Phaya̤kò ô̌ bǎ Wî̤̌berashabǎ nudě a hǎhtò̌cû̌. Dě aphû̌ tokhlǒ dò̌ ǐtû̌ apha Phaya̤kò kû̌ asî aphû̌ama sîtokhlǒ kû̌ lô̤ dǒ Khwǐ ǐgenṳ̌ asî kû̌ lǎ̤ gedò̌hè kû̌ Phaya̤kò nutokhlǒ alô̤. 6 Htodě asî tô̤̌ ǐbò asî ta̤mi̤ta̤mò̤̌ kû̌ asîtimǐtitè dǒ a kè̌lǎ ǐtû̌ bǎ Khanagǎkû nutokhlǒ, dě Phaya̤kò kû̌ aphû̌ali̤ tokhlǒ hǎhtò̌cû̌ lô̌khô dǒ Ijî̌gǎ. ^d 7 A kaǎcû̌nǐ̤ aphû̌sî, ali̤sî kû̌ akhlialè lǒ̤bò.

Kòyò dǒ a gû̌cû̌ kû̌ Phaya̤kò dǒ Ijî̌gǎ tokhlǒ

8 Mi̤ dǒ alǎ̤ hǒtokhlǒ mî̌ Isôrěla akhlialè amè̤̌ Phaya̤kò aphû̌pwa̤khû dǒ a gû̌cû̌ gû̌kû̌ lû̌û dǒ Ijî̌gǎ nutokhlǒ ami̤hǒ. Asî mî̌ kwè̌ mò̌pè hî̌dě Phaya̤kò aphû̌wè̤̌pwǎ̤ Khûrǔbe, 9 kû̌ Pharǔbe aphû̌pwa̤khû Khûěnò̌, Khûphalǔ, Khûhesarû kû̌ Khûkamǐ sîtokhlǒ.

10 Kû̌ Phasumeû aphû̌pwa̤khû Khûjemǔela, Khûcami, Khûûha, Khûcakhi, Khûsûha kû̌ Khûshûlǎ, dě Khûshûlǎ numî̌ Khana khlilèmǒ̤ aphû̌.

11 Kû̌ Phale̤wǐ aphû̌pwa̤khû Khûkerûshû, Khûkûha kû̌ Khûmerarǐ sîtokhlǒ.

12 Kû̌ KhûYǔda aphû̌pwa̤khû Khûěra, Khûûna̤nu, Khûshelǎ, Khûpěrasa kû̌ Khûserǎ sîtokhlǒ. Bǎbǎkǎlè KhûEra kû̌ Khûûna̤nu mî̌ a sikè dǒ asî ô̌pe bǎ Khanagǎkû akhanu. Kû̌ Phapěrasa aphû̌pwa̤khû Khûhesaro kû̌ Khûhamǔla sîtokhlǒ gû̌cû̌pakû̌.

13 Kû̌ PhaIsakharô aphû̌pwa̤khû Khûtûlǎ, Khûpǔa, Khûcǔbǎ kû̌ Khûshǐmarû sîtokhlǒ.

14 Kû̌ Phasabǔlû aphû̌pwa̤khû Khûserǎ, Khûelû kû̌ Khûcalèěla sîtokhlǒ.

15 Lǒ̤bò kòyòmi̤ dǒ dô̌lṳ̌ htohǒ hǒtokhlǒ mî̌ amè̤̌kû̌ Mǒ̤le̤a kû̌ Phaya̤kò aphû̌pwa̤khû, ali̤pwa̤khû kû̌ akhlialè dǒ a ô̌phijǎlò̤ lô̌khô dǒ Pada aragǎkû hǒ. Dě Phaya̤kò kû̌ Mǒ̤le̤a aphû̌pwa̤mǒ̤ Mǒ̤dǐna ^e cû̌tǒ̤ gû̌ kû̌ asî. Phaya̤kò kû̌ Mǒ̤le̤a aphû̌ali̤ pwa̤mǒ̤pwa̤khû lǒ̤bò mî̌ a ô̌ pwa̤ sushi kû̌ sò̌su.

16 Phagǎ aphû̌pwa̤khû dǒ a cû̌kû̌ tokhlǒ mî̌, Khûsephi, Khûhakǐ, Khûshǔni, Khûesabû, Khûeri, Khûaròdǐ kû̌ Khûareli.

17 Kû̌ PhaAsharô aphû̌pwa̤khû Khûǐmana, Khûishaba, Khûishabǐ kû̌ Khûberǐya. Asî apṳ̌pwa̤mǒ̤ mî̌ Mǒ̤saranu hǒ. Htodě Phaberǐya aphû̌pwa̤khû Khûheba kû̌ Khûmalakhǐěla sî cû̌ gû̌.

18 Lǒ̤bò kòyòmi̤ dǒ dô̌lṳ̌ htohǒ hǒtokhlǒ mî̌ amè̤̌kû̌ Phaya̤kò kû̌ Mǒ̤sǐlapa aphû̌ali̤ kû̌ alṳ̂ tokhlǒ hǒ. Dě Mǒ̤sǐlapa numî̌ Phalaba ǐ bǎ aphû̌pwa̤mǒ̤ Mǒ̤le̤a kû̌ pwa̤ma̤jè̌ bǎlû̌û nutôpwa̤ hǒ. Dě lǒ̤bò bò mî̌ a ô̌ shǐsusô̌.

19 Phaya̤kò kû̌ Mǒ̤rakhîlǎ phû̌ô̌lò̤ phû̌pwa̤khû sò̌ginǐ̤ dě ami̤ kû̌ Khûyṳ̂tǎ kû̌ Khûbîyame̤.

20 Bǎ Ijî̌gǎkûnu Khûyṳ̂tǎ kû̌ ama Mǒ̤asanǎ phû̌ô̌lò̤ phû̌pwa̤khû sò̌ginǐ̤, dě ami̤ kû̌ Khûmanǎ̤she kû̌ Khûěpheri, dě Mǒ̤asanǎ numî̌ Wî̤̌ûna apwa̤lṳtòhtò̌ta̤ Phapò̌tiphera aphû̌pwa̤mǒ̤. ^f

21 Phabîyame̤ aphû̌pwa̤khû tokhlǒ mî̌ Khûbela, Khûbekha, Khûaashabelǎ, Khûgerǎ, Khûna̤ma, Khûěhǐ, Khûrû̌shǎ, Khûmǔpe, Khûhǔpe kû̌ Khûarǔdǎ sîtokhlǒ hǒ.

22 Dě lǒ̤bò dô̌htò̌lṳ̌ htohǒ shǐsò̌lǐ̤ numî̌ Phaya̤kò kû̌ Mǒ̤rakhîlǎ aphû̌ali̤ tokhlǒ hǒ.

23 Phada aphû̌pwa̤khû mî̌ Khûhûshe.

24 Phanatali aphû̌pwa̤khû tokhlǒ mî̌ Khûcaseěla, Khûkǔni, Khûcesa kû̌ Khûshǐle sîtokhlǒ hǒ.

25 Lǒ̤bò dô̌lṳ̌ htohǒ hǒtokhlǒ mî̌ Phaya̤kò kû̌ Mǒ̤bǐlaha aphû̌ kû̌ ali̤ pwa̤khû tokhlǒ hǒ, dě Mǒ̤bǐlaha numî̌ Phalaba ǐ bǎ aphû̌pwa̤mǒ̤ Mǒ̤rakhîlǎ kû̌ pwa̤ma̤jè̌ bǎlû̌û nutôpwa̤ hǒ. Dě lǒ̤bò bò mî̌ a ô̌ susô̌tôpwa̤.

26 Phaya̤kò aphû̌ali̤ dǒ a gû̌cû̌ gû̌ kû̌ a dǒ Ijî̌gǎ nutokhlǒ mî̌ lǒ̤bò bò a ô̌ ashisusô̌ kû̌ apwa̤susô̌ dě kòyò dô̌pa Phaya̤kò adè̌ sîtokhlǒ tô̤̌. 27 Khûyṳ̂tǎ ô̌ bǎ Ijî̌gǎkû akhanu, aphû̌pwa̤khû ô̌ sò̌ginǐ̤, dě Phaya̤kò ahǐphû̌phòphû̌ dǒ a ô̌bò lô̌khô bǎ Ijî̌gǎkû numî̌ lǒ̤bò bò a ô̌ pwa̤ susô̌tishi. ^g

Khûyṳ̂tǎ hèkè̌shǔ apha dǒ Gû̌shegǎ

28 Pô̤̌khô Khûyṳ̂tǎ hèkè̌shěshǔ apha Phaya̤kò kû̌ apṳ̌wè̤̌ tokhlǒ dǒ Gû̌shegǎ ayanu, anocû̌kè̌shǐwǐ lû̌ kû̌ KhûYǔda. Dě bǎ asî cû̌tǒ̤ dǒ Gû̌shegǎ akhanu, 29 Khûyṳ̂tǎ htò̌ dò̌ nǐ̤ atîsî̌lô̤ dě a cû̌kè̌shǐshǔ kû̌ apha dǒ Gû̌shegǎ. Bǎ asî kè̌shǐshî̌shǔ hǒ lû̌û akhanu, Khûyṳ̂tǎ phô̌ apha gô̌bô dě a yî̤̌kǒyî̤̌hǎ kè yî̤ mî̌ca.

30 Dě Phaya̤kò hî̌ Khûyṳ̂tǎ kû̌, “Na ô̌htûpwa̤ pe pwǎnu he kè̌shǐnǐ̤tû̌ kèhtohǒ kû̌ henǎ̤ hǒ akhû̌akhî, he sikè khònò̤̌ mî̌ amô̤̌ jî̌ he hǒhǒ.”

31 Htodě Khûyṳ̂tǎ hî̌ apṳ̌wè̤̌sî tokhlǒ kû̌ apha akhlialè dǒ ashǔshawa̤ tokhlǒ kû̌, “He bǎ cû̌hî̌ Khwǐ kû̌, ‘he pṳ̌wè̤̌sî kû̌ hepha ahǐphû̌phòphû̌ ô̌ dǒ Khanagǎ dě a hètǒ̤ lô̌khô hǒ dǒ heô̌ hǒ. 32 Asî mî̌ pwa̤kè̌sû̌phû̌, pwa̤bǔǐta̤mi̤ta̤mò̤̌ tokhlǒ, htodě asî bôhè nǐ̤ lǒ̤bò lô̌khô hǒ asîsû̌phû̌ kû̌ pè̤̌mṳ̌, pṳ̂̌panǎ̤mṳ̌ tokhlǒ, htodě a tô̤̌hè ǐbò asîtě̤ta̤ dǒ a ô̌ kû̌ asînu tokhlǒ hǒ,’ he bǎ cû̌hî̌ a pô̤̌nu. 33 Dě bǎ Khwǐ kaǎ sî dě a gwè̌ sîta̤phǐta̤ma̤ akhanu, 34 Sî tôbǎ hî̌shǔ kû̌, pô̤̌ paphipaphusî bǔǎhè htohǒ ta̤mi̤ta̤mò̤̌nu najû̌ hǒtokhlǒ mî̌ a bǔǎhè gû̌ ta̤mi̤ta̤mò̤̌ dǒ pa phijǎ kha tǒ̤ khònò̤̌ hî̌ lô̌khô pô̤̌nu nî̌. Sî kè̌ hî̌ pô̤̌nu mî̌, a noô sî bǎ Gû̌shegǎ nupě. Ma̤titèhî̌dě Ijî̌phû̌ tokhlǒ mî̌ ama̤yǒ̤ gutṳ̌ pwa̤kè̌ sû̌phû̌ tokhlǒ,” a hî̌ asî pô̤̌nu.