Genesis 47

Phayṳ̂tǎ ahǐphû̌phòphû̌ hèô̌ dǒ Gû̌shegǎ

1Phayṳ̂tǎ kaǎnṳ̌ awè̤̌ sò̌yè̤̌ dě ahè kè̌shǐ kû̌ Khwǐ dě a hî̌ lû̌û kû̌, “Hepha kû̌ hepṳ̌wè̤̌ sî ô̌ dǒ Khanagǎ dě a tô̤̌nṳ̌bò asû̌phû̌ kû̌ pè̤̌mṳ̌ tokhlǒ, ta̤mi̤ta̤mò̤̌mṳ̌ tokhlǒ kû̌ lǒ̤bò ta̤ dǒ aô̌ kû̌ asî tokhlǒ dě a hètǒ̤ hǒ. Khònò̤̌dě asî glè̌ hè ô̌lô̌khô dǒ Gû̌shegǎnu” 2Dě a hèdǔlè̌lṳ̌ asî nusò̌yè̤̌ kû̌ Khwǐ.

3Dě Khwǐ gwè̌ asî kû̌, “Sî ma̤ ta̤ma̤ titè?”

Dě asî hî̌tîkhî kû̌, “běcǎdû̌, najû̌ hǒtokhlǒ mî̌ pwa̤kè̌ǐ sû̌phû̌ kû̌ pè̤̌ sô̌sô̌kû̌ paphipaphu tokhlǒ nupwǎ. 4Najû̌ hǒtokhlǒ hèô̌ lè bǎ gǎ hǒ akû, ma̤titè̌hî̌dě dǒ Khanagǎkûnu gǎwǐ̤gǎkodû̌ akhû̌akhî, najû̌ tokhlǒ asû̌phû̌ kû̌ pè̤̌mṳ̌ tokhlǒ lǎ̤shaǎ gûlǎ̤ ô̌ petô̤̌ hǒ. Pô̤̌nudě khònò̤̌nu, běcǎ, khòsǎdô dǐô̌ pe pa bǎ Gû̌shegǎkû nunî̌.”

5Htodě Khwǐ hî̌ Khûyṳ̂tǎ kû̌, “Khònò̤̌ napha kû̌ napṳ̌wè̤̌sî hètǒ̤kû̌ na hǒ, 6Ijî̌gǎ tôgǎlǎ̤ aô̌ hǒ dǒ nata̤pǒ alǎ̤ hǒnu, noô̌mò̌ napha kû̌ na̤pṳ̌wè̤̌ sîtokhlǒ dǒ gûlǎ̤ wô̌lǒ bǎ gǎkû nutôkûkû nî̌. Dě dǐô̌ asî dǒ Gû̌shegǎkû nu. Dǒ asîklanu na kè̌ kè̌shǐ kòyò tokhlǒkhlǒ dǒ a sî̌jò̌khlo kû̌ akhô kè̌hî̌dě nokè̌ǐma̤ǐ asî kû̌ pwa̤kè̌pè̤̌ he sû̌phû̌ kû̌ pṳ̂̌pa̤nǎ̤ nî̌.”

7Htodě Khûyṳ̂tǎ kaǎhènṳ̌ apha Phaya̤kò dě a hèdǔlè̌lṳ̌ lû̌û kû̌ Khwǐ, dě Phaya̤kò hènṳ̌ hî̌mô̤hî̌bǎwô̌ Khwǐ. 8Dě Khwǐ gwè̌ Phaya̤kò kû̌, “Na ô̌ beněhǒ ya?”

9Phaya̤kò hî̌shǔ lû̌û kû̌, “He htûshǐtèmè̤ dě cû̌ô̌ tûkû hto tûkû bǎ hǎkhû̌nu dǒ aněně alalakû dě, he ô̌ hto aně tôya̤ kû̌ sushi hǒ. Heně htû kû̌ jî̌ kò tô̤̌, htodě apò̤̌asha lîlè. Ma̤hî̌nudě heně htû gunò̤lǎ kû̌ hephihephu sî dǒ a htûshǐtèmè̤ dě cû̌ô̌ tûkû hto tûkû bǎ hǎkhû̌nu tokhlǒ aně tô̤̌.” 10Htodě Phaya̤kò hî̌mô̤hî̌bǎwô̌ kè tîkhîsô̌ Khwǐ dě a hǎhtò̌cû̌ kè. 11Pô̤̌ Khwǐ nolò̤nu, Khûyṳ̂tǎ noô̌ apha kû̌ apṳ̌wè̤̌sî bǎ Ijî̌gǎkû, gûlǎ̤ wô̌lǒ nutûkû. Dě gûlǎ̤ bǎnutûkû mî̌ aphǔ kû̌ Ramasè̌ gûlǎ̤. 12Phayṳ̂tǎ ma̤jè̌ma̤kwe padô̌ apha kû̌ apṳ̌awè̤̌ kû̌ apha ahǐphû̌phòphû̌ lǒ̤bò tokhlǒ lǎ̤ǎlǎ̤ô aya, phijǎpî̌tî̌phû̌ ô̌ pwǐtènu a ma̤jè̌ nṳ̌bò.

Gǎwǐ̤gǎko dǒ Ijî̌gǎkû

13Khònò̤̌nu Gǎwǐ̤gǎko ajî̌jû̌ akhû̌akhî, gûlǎ̤ bǎtè tûkû ya bǎbǎ shǎǎshǎô ô̌pe tûkû tô̤̌ hǒ. Ijî̌gǎphû̌ tokhlǒ bǎbǎ, khanagǎphû̌ tokhlǒ bǎbǎ, dǒ gǎwǐ̤gǎko ajî̌ akhû̌akhî, asî khòbǎbò ta̤ô̌hǎwǐ̤shèwè̤ hǒ. 14Ru dǒ Ijî̌gǎphû̌ kû̌ khanagǎphû̌ tokhlǒ hè pwî̤ǎ lô̌khô bǔkû̌lǎ dě a ǐ apwî̤ tokhlǒnu Khûyṳ̂tǎ phǐplǒ lǒ̤bò dě a hèbè̌wô̌ lǒ̤bò dǒ Khwǐ lǎ̤bè̌plǒ ru gûlǎ̤. 15Bǎ Ijî̌gǎphû̌ kû̌ khanagǎphû̌ tokhlǒ noǎ bò ǐkè hto asî ru akhanu, Ijî̌phû̌ tokhlǒ hè lǒ̤bò dǒ Khûyṳ̂tǎ aô̌ dě a hèhî̌ lû̌û kû̌, “Paru ô̌ petô̤̌, bǎbǎkǎlè khòsǎdô ǐ mò̌ pa shǎǎshǎô nî̌, kè̌mè̤̌tô̤̌ hî̌pěmî̌ pa glè̌ si bò mè̤̌mǐca mè̤̌kû̌ bǎ nalô̤mô̤̌nu pě.”

16Khûyṳ̂tǎ hî̌tîkhî asî kû̌, “Sîru kè̌ hǎlǒ̤ hî̌dě pṳ̂̌hè lô̌khô sî ta̤mi̤ta̤mò̤̌nu, he htû̌lè̌ bǎ sî kû̌ shǎǎshǎô pě.” 17Pô̤̌nu akhû̌akhî, asî pṳ̂̌hè lô̌khô asî ta̤mi̤ta̤mò̤̌ tokhlǒ dǒ Khûyṳ̂tǎ ô̌, dě Khûyṳ̂tǎ htû̌lè̌ bǎ asî tîsî̌, sû̌phû̌, pè̤̌, pṳ̂̌pa̤nǎ̤, mǐû̌lǎ nutokhlǒ kû̌ shǎǎshǎô. Bǎnu tôně hè akû dě a htû̌lè̌ ǎ bǎ asî shǎǎshǎô kû̌ asî ta̤mi̤ta̤mò̤̌ tokhlǒ.

18Ně nutôně hǎbò hto dě dǒ anô̌kò tôněnu, kòyòtokhlǒ hè dǒ Khûyṳ̂tǎ aô̌ dě a hèhî̌ lô̌khô lû̌û kû̌, “Běcǎ, dǒ na lô̤mô̤̌nu, pa bè̌hǔbè̌bǐ jò tocǒ tô̤̌. Pa ru hǎbòmǔtegle hǒ, pa ta̤mi̤ta̤mò̤̌ mî̌ a htû bò nata hǒhǒ. Pa lǎ̤ǐ nanu aô̌kè pě tocǒ tô̤̌, a ô̌kè pwǎ tǒ̤ panǎ̤glǒ kû̌ pahǎkhû̌ pwǎ. 19Pa glè̌ cû̌si lô̌khô bò dǒ nalô̤mô̤̌ hî̌tè? Htokhôtô̤̌ pa glè̌ cû̌ ǐ ô̌khwekè bò pahǎkhû̌ sîtokhlǒ hî̌tè? Pwî̤ mò̌ pa kû̌ pahǎkhû̌ hǒ dě htû̌lè̌ǎ dô̌mò̌ pa kû̌ shǎǎshǎô nî̌. Dě pa ǐbò tû̌ pahǎkhû̌, pa htû bòtû̌ Khwǐ ajû̌ pě. Pô̤̌khô pa glè̌ ô̌htûpwa̤ sělě bò̌ pô̤̌ dě pa glè̌ si tô̤̌. Htokhôtô̤̌ pô̤̌khô pahǎkhû̌ tokhlǒ glè̌ ô̌khwekè tô̤̌ ayanu, ǐ mò̌ pa bǔkhli dǒ pa glè̌ shǒǎ ayanu pwǎ.”

20Phayṳ̂tǎ pwî̤ bǎbò hǎkhû̌ tokhlǒ dǒ Khwǐ aya bǎ Ijî̌gǎkûnu dǒ gǎwǐ̤gǎko jî̌jû̌ akhû̌akhî, Ijî̌gǎphû̌ tokhlǒ ashǎǎ tû̌ lǒ̤bò ahǎkhû̌ dě lǒ̤bò hǎkhû nutokhlǒ a htûbò Khwǐ ata. 21Kòyò lǒ̤bò ô̌ bǎ Ijî̌gǎkû kòshî̌ tǒ̤dǒ gǎ gutṳ̌ tokhlǒnu Khûyṳ̂tǎ no hèhtûbò asî kû̌ jû̌. 22Ma̤hî̌nudě a pwî̤ǎ tô̤̌ tǒ̤ pwa̤lṳtě̤ta̤ tokhlǒ ahǎkhû̌ pwǎ ma̤titè̌hî̌dě Khwǐ ǐ mò̌ asî ru lǎ̤noǎ dě asî lǎ̤pwî̤ǎpwî̤ô aya aru ô̌ lô̌khô pwǎ akhû̌akhî a lṳ̂ ashǎǎ kû̌ asîhǎkhû̌ tô̤̌. 23Khûyṳ̂tǎ hî̌ Kòyò tokhlǒ kû̌, “Khònò̤̌nu he pwî̤ǎ hto sî kû̌ sîhǎkhû̌ tokhlǒ dǒ Khwǐya hǒ. Hǒolè ta̤khlita̤lè dǒ sîya. Hè shǒǎlǔǎ mò̌ lô̌khô dǒ sîhǔklakhû̌nu. 24Bǎbǎkǎlè bǎ sî kè̌ge hto sîta̤sǎta̤phô pě akhanu, hèǐ tîkhî mò̌ tîkhîsô̌ Khwǐ yè̤̌pû̌ dě tôpû̌ pěnî̌. Dǒ a ô̌kè lǐ̤pû̌nu dě bè̌kè kû̌ akhlialè htodě noǎ kû̌ sîya tûû̌ kû̌ sîhǐphû̌phòphû̌ kû̌ sîphû̌sîli̤ pî̌tî̌ tokhlǒ alǎ̤ǎlǎ̤ô ayanu.”

25Asî hî̌tîkhîsô̌ kû̌, “Běcǎdû̌, na ma̤hǎplǎ hto najû̌ hǒtokhlǒ ata̤ô̌htûpwa̤ hǒ běcǎdû̌ ma̤mô̤ma̤wô̌ mî̌ca dǒ hǔklakhû̌ akhû̌akhî, pa sǎyṳhtû Khwǐ ajû̌ pwǎ.”

26Pô̤̌nudě hǎkhû̌ dǒ Ijî̌gǎkûnu, Khûyṳ̂tǎ ma̤ô̌htò̌kè ta̤sû̌ta̤tòwò tôcǒ kû̌ ta̤sǎta̤phô yè̤̌pû̌tôpû̌nu a tôbǎ htû Khwǐ ata. Bǎbǎkǎlè tǒ̤ pwǎ pwa̤lṳtòhtò̌ta̤ tokhlǒ ahǎkhû̌ tokhlǒnu, a htû Khwǐ ata tô̤̌. Ta̤sû̌ta̤tòwò hǒtocǒnu a ô̌pe tǒ̤ Khònò̤̌.

Phaya̤kò amṳ̌ni̤mṳ̌sa dǒ anô̌kò lǒ nutokhlǒ

27Pô̤̌nudě Isôrělaphû̌ tokhlǒ ô̌ lô̌khô bǎ Ijî̌gǎkû Gû̌shegǎ nutûkû. Dě asî dû̌yò̤̌htò̌ kû̌ dû̌yò̤̌htò̌, phû̌ô̌wô̤̌ li̤ô̌wô̤̌htò̌ kû̌ ô̌wô̤̌htò̌ lô̌khô bǎnu. 28Phaya̤kò ô̌ bǎ Ijî̌gǎkûnu shǐsusô̌tôně, dě lǒ̤ bò mî̌ aně ô̌ hto tôya̤ kû̌ lǐ̤shi kû̌ susô̌tôně hǒ. 29Bǎ Phaya̤kò sî̌ganǎ̤ kû̌ a glè̌ ô̌htûpwa̤ něyî̤layî̤ pě tô̤̌ hto akhanu, a kaǎhè aphû̌ Khûyṳ̂tǎ dě a hî̌ lû̌û kû̌, “Na kè̌ mô̤ǐ he hî̌dě, khòsǎdô bè̌nṳ̌ nacǔde bǎ hekhò̌lǎ̤ hǒ, olò̤ mò̌ nata̤hî̌bǎ dě ǐlò̤mò̌ he kû̌ nata̤sǎyṳgwèbǎǐ kû̌ nata̤cǒ kû̌ nata̤hî̌bǎ hǒ dǒ na glè̌ lǔǐnṳ̌ tǎ̤ he bǎ Ijî̌gǎkûnu tô̤̌ nunî̌. ^a 30Dě htû̌ he si hto pě akhanu, joge he dǒ Ijî̌gǎkûnu dě gelǔ wô̤̌wô̤̌kû̌ he bǎ kò lǔǐ hemǒ̤phaphiphu sî nutûkû nî̌.”

Dě Khûyṳ̂tǎ hî̌tîkhîshǔ lû̌û kû̌, “He ma̤tû̌ pô̤̌ na hî̌ nupě.”

31Htodě Phaya̤kò hî̌ kû̌, “Na glè̌ ma̤mǐca pô̤̌o pěnu, olò̤mò̌ nata̤hî̌bǎ” Pô̤̌nudě Khûyṳ̂tǎ olò̤ ayô̤̌ kû̌ apha. Htodě Phaya̤kò ▼

▼Phaya̤kò kû̌ Ishôrěla mî̌ tôpwa̤pwa̤ nô̤̌ pwǎ

û̌lò̤ cabahtò̌ bǎ alǎ̤mi̤kû ikǒhtunu.