Gen 48 | KxfSCKXF | STEP | Dǒ anô̌nu kò hèshôbǐǐ Khûyṳ̂tǎ kû̌ apha ô̌mô̤ tô̤̌. Pô̤̌nudě Khûyṳ̂tǎ kaǎnṳ̌ aphû̌pwa̤khû Khûmanǎ̤she kû̌ KhûĚpheri nusò̌ginǐ̤ dě a cû̌kè̌ lô̌khô apha.

Genesis 48

Phaya̤kò ǐshowî̤ KhûĚpheri kû̌ Khûmanǎ̤she

1 Dǒ anô̌nu kò hèshôbǐǐ Khûyṳ̂tǎ kû̌ apha ô̌mô̤ tô̤̌. Pô̤̌nudě Khûyṳ̂tǎ kaǎnṳ̌ aphû̌pwa̤khû Khûmanǎ̤she kû̌ KhûĚpheri nusò̌ginǐ̤ dě a cû̌kè̌ lô̌khô apha. 2 Bǎ kò hî̌ bǎ Phaya̤kò kû̌, “Naphû̌ Khûyṳ̂tǎ hèkè̌tǒ̤ na hǒ,” akhanu, a jî̌pwǐ̤ ihtǒhǎnòò̌ dǒ alǎ̤dakhû̌.

3 Phaya̤kò hî̌ Khûyṳ̂tǎ kû̌, “Cǒmara dǒ apô̤aphǎ nutôpwa̤ ô̌lṳ̌htò̌ mò̌ he dǒ Khanagǎ Wî̤̌lûǔsa nutûkû dě a ǐshowî̤ he. ^a 4 Dě a hî̌ he kû̌, ‘he glè̌ no phû̌ô̌dû̌li̤ô̌wô̤̌ na pě, dě nakhlinalè tě̤gîlò̤ tokhlǒ glè̌ ô̌dû̌ô̌wô̤̌ ô̌plṳ̂ô̌phǎ pě, dě he glè̌ no htûhtò̌ na kû̌ khlilèdû̌wî̤ tokhlǒ pě. Htodě Khanagǎnu he glè̌ ǐ kû̌ nakhlinalè tě̤gelò̤ tokhlǒ dě no htû asîta tûjû̌pwa̤ talakhǎ pě.’”

5 Dě Phaya̤kò hî̌ hènè pô̤̌ kû̌, “Bǎ he hè bǎ Ijî̌gǎ hǒ tô̤̌ akhanu, naphû̌pwa̤khû dǒ a ô̌phijǎlò̤ bǎ Ijî̌gǎ sò̌ginǐ̤nu, he ǐhto asî pô̤̌ hephû̌ nuhǒ. KhûĚpheri kû̌ Khûmanǎ̤she sò̌ginǐ̤nu, a glè̌ htû hephû̌pwa̤khû sô̌sô̌kû̌ Khûrǔbe kû̌ Khûsumeûnu hǒ. 6 Naphû̌ dǒ a ô̌phijǎlò̤ nô̌ dǒ asî kò bǎtè tôpwa̤ bǎbǎnu naphû̌ pwǎ. Dě û̌cataya dǒ asî glè̌ nǐ̤bǎ tokhlǒnu kòyò glè̌ wě̤mǎnǎ ô̌ tû̌ dǒ KhûĚpheri kû̌ Khûmanǎ̤she ami̤ ata̤wě̤mǎnǎ akû pě. 7 Dǒwǐkha, bǎ he ô̌ dǒ Padanaragǎ dě he tîkhî gesô̌ akha, dě pa gephǔ kû̌ Wî̤̌ěphrata dě pa ô̌ pepwǎ dǒ klè̌lô̤ akhanu, namǒ̤ Mǒ̤rakhîlǎ sikè bǎ Khanagǎkûnu. Dě he bǎ lǔǐ a bǎ klè̌ lǎ̤cû̌ dǒ Wî̤̌ěphratalô̤ nutûkû.” Wî̤̌ěphrata mî̌ Wî̤̌bè̌telehe nupwǎ. ^b

8 Bǎ Phaya̤kò ^{▼▼Phaya̤kò kû̌ Ishôrěla mî̌ tôpwa̤ nô̤̌ pwǎ} kè̌shǐ Khûyṳ̂tǎ aphû̌pwa̤khû tokhlǒ akhanu, “Asî mî̌ mò̌pè?” a gwè̌ pô̤̌nu. 9 Khûyṳ̂tǎ hî̌tîkhî lû̌û kû̌, “Asî mî̌ hephû̌pwa̤khû dǒ Cǒmaradû̌ ǐ he bǎ he ô̌ bǎ Ijî̌gǎkû hǒtokhlǒ pwǎ” dě Phaya̤kò hî̌ kû̌, “Kaǎhè mò̌ heli̤ sî dǒ heô̌nu, dě he glè̌ ǐshowî̤ asî pě.”

10 Bǎnukhadě Phaya̤kò mǒ̤pwǎ̤ lǎ hto akhû̌akhî, amǐ̤sǎ khǐpôlô̤̌kè hǒ, dě a kè̌shǐ wô̌ petô̤̌ pwǎ. Pô̤̌nukhû̌khî, Khûyṳ̂tǎ kaǎhèphǔ aphû̌sî dǒ apha ô̌ dě apha phô̌mě ali̤ dě a gômô̤ asî.

11 Dě Phaya̤kò hî̌ Khûyṳ̂tǎ kû̌, “He gènè̤tǒ̤ pe kû̌ he kè̌shǐbò̌ tîkhîsô̌ namǐ̤sǎ tô̤̌, bǎbǎkǎlè khònò̤̌nu Cǒmaradû̌ ǐ kè̌shǐ tǒ̤pô̤̌ he kû̌ naphû̌ tokhlǒ hǒ.”

12 Htodě Khûyṳ̂tǎ kaǎhtò̌kè aphû̌sî dǒ aphakhò̌lôpô̤̌plǎ, ^{▼▼Phaya̤kò bè̌ô̌ asî dǒ akhò̌plǎ amṳ̂asǎ mî̌ a bè̌hǒ pô̤̌ aphû̌kû̌ anǎ̤ hǒ, hǒnumî̌ Ishôrělakhlilè alǎ̤klô tôcǒ hǒ} dě a dô̌gînî̤û̌lò̤ lô̌khô dǒ jûkhû̌ dǒ aphalô̤mô̤̌nu. 13 Khûyṳ̂tǎ kaǎhèbò aphû̌ nusò̌ginǐ̤ dě a kaǎhè bè̌ô̌ Khûěpheri dǒ a cǔtômû tôkhô, bǎbǎkǎlè a ô̌tôdě Phaya̤kò cǔcôcǐ tôkhô, dě dǒ Khûmanǎ̤she tèdě a kaǎhè lû̌û dǒ a cǔcôcǐ tôkhô, bǎbǎkǎlè a ô̌tôdě Phaya̤kò cǔtômû tôkhô, htodě Khûyṳ̂tǎ no hèô̌phǔ asî kû̌ a Phuya̤kò. 14 Ma̤hî̌nudě Phaya̤kò bè̌sekhěkè acǔde, dě Khûěpheri pî̌tî̌khlo bǎbǎ a bè̌htò̌ acǔcômû dǒ aikǒlô̤. Dě Khûmanǎ̤she htû phûwè̤̌pwǎ̤ bǎbǎ a bè̌htò̌ acǔcôcǐ dǒ aikǒlô̤.

15 Htodě a ǐshowî̤ Khûyṳ̂tǎ dě a hî̌ kû̌, “Cǒmaradû̌ dǒ hephi PhuAbraha kû̌ hepha PhaIsè̌ ô̌htûpwa̤ ma̤tô asǎphlǒ nutôpwa̤ glè̌ ǐshowî̤ tû̌ phijǎ nutokhlǒ nî̌. Cǒmaradû̌ dǒ a kè̌ǐ he tǒ̤khònò̤̌ hǒtôpwa̤ glè̌ ǐshowî̤ phijǎ nutokhlǒ nî̌. 16 Mǒkhû̌tanaphû̌ dǒ a ma̤hǎplǎ he kû̌ lǒ̤bò ta̤pò̤̌ta̤sha nutôpwa̤ glè̌ ǐshowî̤ tû̌ asî nî̌. Hemi̤, hephu PhaAbraha ami̤ kû̌ hepha PhaIsè̌ ami̤ glè̌ ô̌kè tû̌ dǒ asî akhû̌akhî pě nî̌. Asî glè̌ phû̌ô̌dû̌li̤ô̌wô̤̌ tû̌ bǎ hǎkhû̌ pě nî̌.”

17 Bǎ Khûyṳ̂tǎ kè̌shǐ kû̌ apha bè̌htò̌ acǔcômû dǒ aphû̌ KhûĚpheri aikǒlô̤ akhanu, asǎphlǒ mô̤tô̤̌. Pô̤̌nukhû̌khî a pṳ̂̌mě aphacǔde cǔtômû dǒ abè̌htò̌ dǒ KhûĚpheri aikǒlô̤ hǒ dě a glè̌ bè̌cû̌ dǒ Khûmanǎ̤she aikǒlô̤. 18 Dě Khûyṳ̂tǎ hî̌ apha kû̌, “Pha, amè̤̌ tô̤̌, phûwè̤̌pwǎ̤ mî̌ dǒ hǒtôpwa̤ tû̌, bè̌htò̌ nacǔtômû dǒ aikǒlô̤nu.”

19 Bǎbǎkǎlè apha sǎhtǎshěshu lû̌û dě a hî̌ kû̌, “He sî̌ganǎ̤ pwǎ, phû̌khû, he sî̌ganǎ̤ pwǎ, Khûmanǎ̤she akhliali̤ mî̌ a glè̌ htûhtò̌ khlilèdû̌ tôcǒ pěpě. Akhlialè gelò̤tutṳ̌ tokhlǒ glè̌ ô̌wô̤̌ô̌dû̌htò̌ pěpě. Pwǐtètè̌ bǎbǎ, apṳ̌ akhlialènu a glè̌ dû̌ lǒkhlo kû̌ lû̌û pě dě akhlialènu a glè̌ htûhtò̌ dû̌wî̤ khlilèdû̌ tokhlǒ pě.” 20 Bǎnu tôni̤ a ǐshowî̤ asî dě a hî̌ kû̌, “Bǎ Ishôrělaphû̌ tokhlǒ ǐshowî̤ kò tôpwa̤pwa̤ akhanu, a glè̌ noǎ sîmi̤ pě, dě a glè̌ hî̌ kû̌, ‘Cǒmaradû̌ glè̌ nohtûhtò̌ tû̌ sî pô̤̌ Khûěpheri kû̌ Khûmanǎ̤shenu pě nî̌.’” Pô̤̌nudě Phaya̤kò kaǎwǐkhlo Khûěpheri ami̤ dě a kaǎnô̌ Khûmanǎ̤she ami̤. ^e

21 Htodě Phaya̤kò hî̌ Khûyṳ̂tǎ kû̌, “Pô̤̌ na kè̌shǐ tû̌ hǒ, helṳmṳ̌ni̤ phǔ tǒ̤hǒ, bǎbǎkǎlè Cǒmaradû̌ glè̌ ô̌pakû̌ na pě dě a glè̌ kaǎge tîkhîsô̌tû̌ na dǒ naphinaphusî tokhlǒ agǎnu pě. 22 Ta̤ dǒ he ǐ lǒkhlo na kû̌ nawè̤̌sî kû̌ napṳ̌ Khûbîyame̤ tôcǒ numî̌ amè̤̌ khôpa̤lô̤ dǒ he kû̌ shěpě̤nṳ̌ kû̌ henò̌she kû̌ hekhli dǒ Amò̤̌rǐ khlilèphû̌ tokhlǒ acǔdekû hǒtûkû nuhǒ.”