Genesis 50
Kòyòhǎ kòyòwô ǐbǎ Phaya̤kò
1Bǎ Phaya̤kò sǎlò̤tě̤ hto akhanu, Khûyṳ̂tǎ û̌lò̤ phô̌mětegle apha dě a hǎtahǎ dě a gômô̤ǐ apha. 2Htodě pô̤̌khô Khûyṳ̂tǎ aphalṳ̌tṳ̂̌ gǔsogǔû tô̤̌ aya, Khûyṳ̂tǎ no bè̌nṳ̌ apwa̤ma̤ta̤phû̌ ta̤khû̌saradû̌ kû̌ ta̤khû̌ta̤tǐ̤ dǒ anumû̌ nutokhlǒ dǒ aphalṳ̌tṳ̂̌kû. ▼▼Bǎ kòyò bè̌nṳ̌ ta̤khû̌ khôtô̤̌ akhanu, kòyò è̌phò̌ lû̌hǐphu dě kòyò phî̌htò̌bòkè hǐphu phupwe̤ lǒ̤bò
Pô̤̌nudě ta̤khû̌saradû̌ tokhlǒ bè̌nṳ̌ lô̌khô ta̤khû̌ dǒ Phaya̤kò ▼▼Phaya̤kò kû̌ PhaIsôrěla mî̌ tôpwa̤ nô̤̌ pwǎ.
Alṳ̌tṳ̂̌kû. 3Kòyò ma̤pô̤̌numî̌ ayî̤ ni̤lǐ̤shi. Dě Ijî̌phû̌ tokhlǒ sǎplǎ̤sǎbǎ hǎ bǎ ni̤susô̌tôshi. 4Bǎ asî sǎplǎ̤sǎyṳ hǎ hto ani̤ susô̌tôshi akhanu, Khûyṳ̂tǎ hî̌ Khwǐ apwa̤ma̤ta̤phû̌ dǒ aô̌ bǎ khwǐhôkû nutokhlǒ kû̌, “Sî kè̌ mô̤nṳ̌ he hî̌dě, khòsǎdô cû̌shôbǐǐ tě̤tě̤mè̤̌mè̤̌ bǎpû he khwǐ kû̌ ta̤we̤ta̤kè nunî̌, dě hî̌ a kû̌, 5‘bǎ hepha glè̌ si akhanu, a no ǐsho he yô̤̌sǎ dě a hî̌ kû̌, “He glè̌ phǔ si hǒ, lǔǐnṳ̌ he dǒ lǒ̤lṳ̌kû dǒ he khǔnǎ kû̌ henǎ̤ dǒ Khanagǎkû nutôkû nî̌,” Pô̤̌nudě khòsǎdô dǐgehtò̌ lǔǐ kûmṳ̂̌ hepha nî̌, htopědě he gesô̌ tû̌ pě.’” c 6Khwǐ hî̌tîkhî lû̌û kû̌, “Pô̤̌ na ǐsho hto napha kû̌ na glè̌ma̤ bǎ yǎnu, gekihtò̌ lǔǐ mò̌ yǎ.” Kòyò lǔǐ Phaya̤kò
7Pô̤̌nudě Khûyṳ̂tǎ gekihtò̌ lǔǐ hto apha. Lǒ̤bò pwa̤htûdû̌htûpwǎ̤ dǒ khwǐ ahôhtakû tokhlǒ, apwa̤ma̤ta̤phû̌ tokhlǒ kû̌ lǒ̤bò pwa̤htûdû̌htûpwǎ̤ bǎ Ijî̌gǎkû nutokhlǒ gû̌ge kû̌ bò lô̌khô kû̌mî̌ Khûyṳ̂tǎ. 8Phayṳ̂tǎ ahǐphû̌phòphû̌, apṳ̌awè̤̌, apha ahǐphû̌phòphû̌ gû̌ge kû̌ bò kû̌ Khûyṳ̂tǎ dǒ Gû̌shegǎ. Bǎ Gû̌shegǎ numî̌ a ô̌kè pwǎtǒ̤ asî phijǎphû̌ tokhlǒ, asî sû̌phû̌ kû̌ pè̤̌ kû̌ pṳ̂̌pa̤nǎ̤ tokhlǒ nô̤̌ pwǎ. 9Tîsî̌lô̤ lǎ̤htò̌shě ta̤shě kû̌ kliphû̌ pwa̤dò̌ tîsî̌ tokhlǒ gû̌ge kû̌ bò kû̌ yǎyǎ. Dě lǒ̤bò kòyò nutokhlǒ gû̌ge kû̌bò dě kû̌ lû̌ kò. 10Bǎ asî getǒ̤ dǒ Ata dǒ kòkaǎkû̌ lǎ̤pô̤̌bǔgûlǎ̤ hǔklakhû̌, Jòda shilô̤̌mǒ̤ lṳmṳ̌htò̌ nutûkû akha, asî hǎtahǎ sǎplǎ̤sǎyṳ lô̌khô bǎnu dě Khûyṳ̂tǎ hǎwô sǎplǎ̤sǎyṳ apha bǎnu susô̌tasa. 11Bǎ khanagǎphû̌ ô̌ bǎnu tokhlǒ kè̌shǐ kòyò nutokhlǒ hǎ lô̌khô bǎ Ata kòyòkaǎkû̌ lǎ̤pô̤̌bǔgûlǎ̤ hǔklakhû̌ akhanu, asî hî̌ lô̌khô kû̌, “Ijî̌ khlilèphû̌ tokhlǒ hǎtahǎ sǎplǎ̤jî̌jû̌le,” pô̤̌nudě kò kaǎ kè agûlǎ̤ nutûkû ami̤ kû̌ Abelǎmi̤sare. Dě gûlǎ̤ hǒ tûkû mî̌ a ô̌ dǒ Jòda shilô̤̌mǒ̤ lṳmṳ̌htò̌ tôkhô. (Abelǎmi̤sare yô̤̌mûyô̤̌sǎ mî̌ Ijî̌gǎ ata̤hǎtahǎ.) 12Pô̤̌nukhû̌khî, Phaya̤kò aphû̌ tokhlǒ ma̤ lô̌khô pô̤̌ apha mǎnǎkè asî yô̤̌nu. 13Dě asî ò̌ge alṳ̌tṳ̂̌ dǒ Khanagǎ dě a gelǔnṳ̌kè lû̌û bǎ lǒ̤lṳ̌kû ô̌ dǒ Mèpe̤lǎ hǔklakhû̌ nutôkû, dě a ô̌phǔ kû̌ Mè̤mare gûlǎ̤, bǎ Khanagǎkûnu, dě gûlǎ̤ nutûkû mî̌ PhaAbraha pwî̤ dǒ Hǐtǐ khlilèphû̌ KhûĚpharû acǔdekû dě a ma̤kè kû̌ alǎ̤lǔǐ akhlialè gûlǎ̤. d 14Bǎ Khûyṳ̂tǎ lǔǐnṳ̌ hto apha akhanu, a kû̌ apṳ̌wè̤̌ tokhlǒ kû̌ kòyò dǒ a hèsû kû̌ lû̌û lṳ̌ nutokhlǒ gelò̤ wô̤̌wô̤̌ tîkhîsô̌ lô̌khô kû̌ lû̌û dǒ Ijî̌gǎ.Khûyṳ̂tǎ ǐkhû̌ǐǎ ǐ apṳ̌wè̤̌sî
15Bǎ kò lǔǐ kè hto Phaya̤kò dě asî getǒ̤ tîkhîsô̌ dǒ Ijî̌gǎ akhanu, Khûyṳ̂tǎ apṳ̌wè̤̌ tokhlǒ hî̌ lô̌khô kû̌, “Khûyṳ̂tǎ kè̌ sǎphlǒdû̌ pe pa dě a kè̌ ma̤ ge tîkhî shěshu mè̤̌mǐca pa pô̤̌ pa ma̤pò̤̌ma̤sha lû̌û nutokhlǒ pědě a glè̌ htûhtò̌ kwè̌ hî̌tèpěya?” 16Pô̤̌nukhû̌khî, asî nocû̌ shôbǐǐ kò ta̤we̤ta̤kè dǒ Khûyṳ̂tǎ a ô̌ dě asî hî̌ kû̌, “Bǎ napha si khôtô̤̌ akhanu, a mǎkè pa yô̤̌sǎ. 17Dě Pha nohî̌ pa kû̌, ‘sî tôbǎ hî̌ Khûyṳ̂tǎ hî̌tè numî̌, khòsǎdô plûkè bǎpû napṳ̌nawè̤̌ tokhlǒ ata̤ma̤sǔma̤plě phû̌mò̤̌shǐhtô na nutokhlǒ kû̌ asîta̤sǔ nutokhlǒ nî̌,’ Pô̤̌nukhû̌khî, khònò̤̌dě khòsǎdô plûkè bǎpû napha a Cǒmaradû̌ apwa̤ma̤ta̤phû̌ tokhlǒ ata̤ma̤sǔma̤plě nutokhlǒ nî̌.” Bǎ Khûyṳ̂tǎ ganǎ̤de hto yô̤̌sǎ pô̤̌o akhanu a mǐ̤sǎshilò̤. 18Htodě apṳ̌wè̤̌ tokhlǒ hènṳ̌ dô̌gînî̤û̌lò̤ lô̌khô dǒ alô̤mô̤̌ dě asî hî̌ lû̌û kû̌, “Khònò̤̌nu pa htû mè̤̌mǐca najû̌ hǒ.” 19Ma̤hî̌nudě Khûyṳ̂tǎ hî̌ tîkhîsô̌ asî kû̌, “Ǐshǔǐsha lô̌khô tǎ̤mǎ̤, he mî̌ Cǒmaradû̌ cǎ ya? He cî̌htò̌ sî mî̌ anǐ̤tô̤̌. 20Sî gènè̤ kû̌ sî ma̤jî̌ma̤jû̌ he bǎbǎ pô̤̌ sî kè̌shǐ khònò̤̌nu, pô̤̌khô kòyò saprṳ̂ ata̤htûpwa̤ glè̌ hǎplǎ ayanudě Cǒmaradû̌ ma̤tèplè̌kè dǒ awô̌ tôkhô hǒ. 21Pô̤̌nu akhû̌akhî, ǐsha lô̌khô tǎ̤mǎ̤ nî̌. He glè̌ dǐǎdǐô tû̌ sî kû̌ sîphû̌sîli̤ tokhlǒ pě.” Htodě a ǐkhû̌ǐǎ asî dě a hî̌bǎwô̌bǎ asî.Phayṳ̂tǎ si
22Phayṳ̂tǎ kû̌ apha ahǐphû̌phòphû̌ tokhlǒ ô̌hènè lô̌khô bǎ Ijî̌gǎnu. Dě bǎ Phayṳ̂tǎ si akha aně ô̌ hto tôya̤ kû̌ shǐ hǒ. 23Phayṳ̂tǎ kè̌shǐ nṳ̌lǎ pe aphû̌ PhaĚpheri aphû̌ali̤ tǒ̤dǒ ali̤alṳ̂ tokhlǒ dě, htokhôtô̤̌ a bǔǎ nṳ̌lǎ pě ali̤ tokhlǒ mè̤̌kû̌ Phamanǎ̤she aphû̌ Phamakhǐrô aphû̌ nutokhlǒ sô̌sô̌kû̌ aphû̌ kû̌ asanǎ̤nu. (Makhǐrô amṳ̂asǎ mî̌ kò shaǎkè yǎ.) 24Htodě a hî̌ apṳ̌wè̤̌ tokhlǒ kû̌, “He ô̌htûpwa̤ yî̤ petô̤̌, Cǒmaradû̌ glè̌ hèlò̤ ma̤jè̌ mè̤̌mǐca sî pě dě a glè̌ kaǎhtò̌kè sî kû̌ gǎ bǒo tôgǎ dě a glè̌ sûge sî gǎ dǒ a olò̤ hto ayô̤̌ kû̌ PhaAbraha, PhaIsè̌, Phaya̤kò nutôgǎ pě.” 25Htodě Khûyṳ̂tǎ no olò̤ Phaya̤kò aphû̌ tokhlǒ ta̤olò̤ tôcǒ, dě a hî̌ kû̌, “Cǒmaradû̌ glè̌ hèlò̤ ma̤jè̌ mè̤̌mǐca sî pě dě sî bǎ phî̌ge htò̌ǐ bò hekhwǐ tokhlǒ kû̌ sî pě nî̌.” e 26Phayṳ̂tǎ ně ô̌ tôya̤ kû̌ shǐ dě a sikè. Htodě pô̤̌khô Khûyṳ̂tǎ alṳ̌tṳ̂̌ gǔsogǔû tô̤̌ ayanu, kòyò bè̌nṳ̌ ta̤khû̌ta̤tǐ̤ dǒ anumû̌ nutokhlǒ dǒ alṳ̌tṳ̂̌kû, htodě kò bè̌nṳ̌kè lû̌û dǒ lṳ̌khû̌ bǎ Ijî̌gǎkûnu.
Copyright information for
KxfSCKXF