Gen 6-7 | KxfSCKXF | STEP | Bǎ kòyòhǎkhû̌phû̌ sahtò̌ ô̌plṳ̂ô̌dû̌hè dě ô̌peshecû̌ lǒ̤bò dǒ hǎkhû̌ tôbě dě kòyò phû̌ô̌lò̤nṳ̌ phû̌pwa̤mǒ̤ sîtokhlǒ akhanu,

Genesis 6

Kòyòhǎkhû̌phû̌ ata̤phû̌mò̤̌shǐhtô

1 Bǎ kòyòhǎkhû̌phû̌ sahtò̌ ô̌plṳ̂ô̌dû̌hè dě ô̌peshecû̌ lǒ̤bò dǒ hǎkhû̌ tôbě dě kòyò phû̌ô̌lò̤nṳ̌ phû̌pwa̤mǒ̤ sîtokhlǒ akhanu, 2 Cǒmaradû̌ atanaphû̌ sîtokhlǒ kè̌shǐ kòyò aphû̌mǒ̤ tokhlǒ mǒ̤twè̤̌mǒ̤wî̤̌ mî̌ca dě a rû̌htò̌ lô̌khô kû̌ ama. 3 Dě Cǒmara tûjû̌pwa̤ hî̌ kû̌, “He noô̌ he yôla htûpwa̤ kû̌ kòyòhǎkhû̌phû̌ tokhlǒ tûjû̌pwa̤ mî̌ awô̌ tô̤̌, ma̤titèhî̌dě asî ô̌ kû̌ phěyî̌sǐshi dǒ a sijò pwǎ akhû̌akhî, asî bǎ ô̌htûpwa̤ pwǎ aně tôya̤ kû̌ ginǐ̤shi pwǎ.”

4 Bǎnu tôhtukha bǎbǎ, htukha dǒ nô̌kònu bǎbǎ, Cǒmaradû̌ atanaphû̌ tokhlǒ kû̌ kòyò aphû̌mǒ̤ tokhlǒ phî̌lû̌û dě a phû̌ô̌lò̤nṳ̌ kòyòshû̌kòyòsho kòyòdû̌htû tokhlǒ. Dě ami̤dû̌ lṳ̌shilṳ̌gǎ lô̌khô dǒ bǎnukha nutokhlǒ hǒ. ^a

5 Cǒmara tûjû̌pwa̤ kè̌shǐ kòyòhǎkhû̌phû̌ sîtokhlǒ kû̌ ajî̌ajû̌ aphû̌mò̤̌shǐhtô akěashô̌ mî̌ca, htokhôtô̤̌ asî sǎphlǒ tokhlǒ nî̌ a gènè̤ gǔma̤ còcè̌ ta̤phû̌mò̤̌shǐhtô pṳ̂̌taplǎ. ^b 6 Dǒ Cǒmara tûjû̌pwa̤ bô̌lò̤nṳ̌ kòyòhǎkhû̌phû̌ bǎ hǎkhû̌nu akhû̌akhî, a gènè̤mô̤ ǐtû̌ tîkî̌ tô̤̌ dě a shèwè̤ jî̌ lû̌sǎphlǒ. 7 Dě Cǒmara tûjû̌pwa̤ hî̌ kû̌, “Lǒ̤bò kòyòhǎkhû̌phû̌ kû̌ ta̤phû̌ta̤wè̤ dǒ adû̌dû̌ apî̌tî̌tî̌ nutokhlǒ kû̌ htû̌phû̌yṳ̌phû̌ dǒ he bô̌lò̤ bò asî tokhlǒnu, he ma̤hǎmǎkè bò asî bǎ hǎkhû̌ nupě. Ma̤titèhî̌dě dǒ he bô̌lò̤ asî akhû̌akhî, a shèwè̤ mî̌ca hesǎphlǒ.” 8 Bǎbǎkǎlè Khûnṳ̂̌a nǐ̤bǎ khô̌ Cǒmara tûjû̌pwa̤ abwǐdû̌ asîrîhtû.

Phanṳ̂̌a awe̤akè

9 Hǒomî̌ ta̤wě̤mǎnǎ Phanṳ̂̌a akhlialè gelò̤ tutṳ̌sî awe̤akè. Bǎ Phanṳ̂̌a ahtukhanu, a mî̌ kòyòcǒkòyòtè̤ tôpwa̤, a ta̤ô̌htûpwa̤ nî̌ kòyò lǎ̤bè̌ ata̤sǔ ô̌tô̤̌. Htokhôtô̤̌ abǒsû̌khǎkhô cû̌cukhacu ta̤ kû̌ Cǒmaradû̌. ^c 10 Phanṳ̂̌a aphû̌pwa̤khû ô̌ sò̌su. Dě asî mi̤ kû̌ Khûshemǎ, Khûhamǎ kû̌ Khûyaphè̌.

11 Cǒmaradû̌ kè̌shǐ sî̌ganǎ̤bò kû̌ kòyòhǎkhû̌phû̌ asǎphlǒnu a phû̌mò̤̌shǐhtô jî̌lî, bǎtè tôkû bǎbǎ aphû̌mò̤̌shǐhtô bò jî̌jî̌. 12 Cǒmaradû̌ kè̌lò̤ bǎ hǎkhû̌ nudě a phû̌mò̤̌shǐhtô jî̌jû̌ lǒ̤bò, kòyòhǎkhû̌phû̌ ô̌ bǎ hǎkhû̌nu a ma̤bò lô̌khô ta̤sǔta̤plě pṳ̂̌ tôpwa̤hǒ. 13 Cǒmaradû̌ hî̌ Phanṳ̂̌a kû̌, “He bè̌lò̤ he sǎphlǒ kû̌ he gǔ cî̌htò̌ ma̤pî̌kè bò kòyòhǎkhû̌phû̌ pṳ̂̌ tôpwa̤ pě. Ma̤titèhî̌dě hǎkhû̌nu alǒbebò kè kû̌ ta̤phû̌mò̤̌shǐhtô hǒ. Ma̤titèhî̌dě dǒ asî akhû̌akhî, he gǔ ma̤pî̌kè bò asî sadakû̌ hǎkhû̌ pě. 14 Dě phî̌ mò̌ sǒlǎhǐ ^{▼▼kòyò ma̤ sǒkhlidû̌ kû̌ sǒ mî̌titènu kò sî̌ganǎ̤ tě̤tě̤mè̤̌mè̤̌ tôpwǎ̤ tô̤̌.} Dě ma̤htò̌mò̌ kû̌ sǒkhlidû̌ nunî̌. Ma̤tě̤tṳ kû̌ dǒdǎ tôtô̤̌ kû̌ tôtô̤̌ dě plṳ̌bǐ bò akûkû akhlokhlo kû̌ sǒcònu nî̌. 15 Ma̤dû̌ yǎ pwǐtè hî̌dě, ma̤htû yǎ aplǎ̤ suya̤. Ma̤lè̤̌ yǎ aplǎ̤ yè̤̌shi dě ma̤htò̌yô̤̌ yǎ aplǎ̤ sushi nî̌. 16 Na bǎ ma̤bǐ gukhû̌, agukhû̌ kû̌ dǒdǎ aplǎkûnu bè̌kè a tôplǎ̤ nî̌. Dǒ awě̤pa̤nu dǐô̌ takha tôbǎ dě ma̤ htò̌ yǎ su tô̤̌ dě ma̤htò̌ yǎ alǎ̤ tôtô̤̌, aklǎmakû tôtô̤̌ kû̌ akhû̌ tôtô̤̌ nî̌. 17 He no dû̌htò̌ shi dǒ hǎkhû̌nu pě dě he gǔ ma̤pî̌kèbò ta̤ dǒ a ô̌ bǎ mǒlǎ̤ tokhlǒ pě. Lǒ̤bò ta̤ dǒ a ô̌ bǎ hǎkhû̌ tokhlǒnu a gǔ si kèbò pě. ^e 18 Bǎbǎkǎlè he gǔ ma̤měma̤gle he ta̤olò̤ kû̌ na pě. Kaǎnṳ̌ naphû̌ pwa̤khû tokhlǒ kû̌ nama, dě kaǎnṳ̌ nadè̌ nutokhlǒ dě nṳ̌ lô̌khô dǒ sǒkhlidû̌kû nunî̌. ^f 19 Pô̤̌khô lǒ̤bò ta̤phû̌ta̤wè̤ tokhlǒ gǔ ô̌htûpwa̤ sělě pô̤̌ lô̌khô ayanu, pṳ̂̌nṳ̌ sûkhû̌ amǒ̤ kû̌ apha tôcǒ mî̌ tôphû̌ bǎ sǒkhlidû̌kû nunî̌. 20 Lǒ̤bò htû̌ kû̌ htû̌lǐ̤, ta̤phû̌ta̤wè̤ kû̌ ta̤phû̌ta̤wè̤ akhli, ta̤phû̌ta̤wè̤ dǒ adû̌dû̌ apî̌tî̌tî̌ nutokhlǒ akhli kû̌ akhli gǔ hèpabò dǒ naô̌ pě dě pô̤̌khô a gǔ htûpwa̤ sělě pô̤̌ ayanu dě pṳ̂̌nṳ̌ amǒ̤ tôbǎ apha tôbǎ nî̌꤮. 21 Phî̌nṳ̌ plǒbò nalǎ̤ǎlǎ̤wè̤ pṳ̂̌tocǒ kû̌ ta̤phû̌ta̤wè̤ lǎ̤ǎlǎ̤ô pṳ̂̌tocǒ nî̌꤮.”

22 Htodě Phanṳ̂̌a gû̌ma̤ pô̤̌ Cǒmaradû̌ mǎnǎnu pṳ̂̌tocǒ.

Genesis 7

Shidû̌htò̌bǐ awe̤akè

1 Dě Cǒmara tûjû̌pwa̤ hî̌ Phanṳ̂̌a kû̌, “Kaǎ nṳ̌ nahǐphû̌phòphû̌ dě nṳ̌mò̌ dǒ sǒkhlidû̌kû nunî̌꤮. Dǒ kòyò hǒtôhtu aklanu he kè̌shǐ na kû̌ na mî̌ kòyòcǒkòyòtè̤ tôpwa̤ hǒ. 2 Lǒ̤bò ta̤phû̌ta̤wè̤ dǒ amṳ̂̌plî dě agwǎ lṳhtò̌ kû̌ Cǒmara tokhlǒnu, pṳ̂̌nṳ̌ amǒ̤ susô̌tôdo kû̌ apha susô̌ tôdo nî̌꤮. Dě ta̤phû̌ta̤wè̤ dǒ a mṳ̂̌plî tô̤̌ dě agwǎ lṳhtò̌ kû̌ Cǒmara tô̤̌ tokhlǒ pṳ̂̌nṳ̌ yǎ amǒ̤ kû̌ apha tôphû̌ pwǎ nî̌꤮. 3 Dě htû̌patǐ khlilè pṳ̂̌tocǒnu, pṳ̂̌nṳ̌ yǎ tôcǒ mî̌ susô̌tôphû̌, tôcǒ mî̌ susô̌tôphû̌, dě pṳ̂̌nṳ̌ amǒ̤ tôbǎ apha tôbǎ pṳ̂̌tôcǒ nî̌꤮. Pô̤̌khô asî gǔ phû̌phǎ ô̌dû̌htò̌ sělě dǒ hǎkhû̌ taběbò ayanu, ma̤ pô̤̌nu nî̌꤮. 4 Ma̤titèhî̌dě susô̌tôni̤ behtò̌ pěnu, he no julò̤ yî̤gipi̤ gǎ lṳ̌mṳ̌khǐkhǐ lṳmṳ̌shasha ani̤ lǐ̤shi kû̌ asa lǐ̤shi pě. Lǒ̤bò kòyòhǎkhû̌phû̌ kû̌ ta̤phû̌ta̤wè̤ dǒ he bô̌lò̤ lû̌û bǎ hǎkhû̌ tokhlǒnu he gǔ ma̤si kèbò asî pě.” 5 Dě Phanṳ̂̌a ma̤bò pô̤̌ Cǒmara tûjû̌pwa̤ hî̌bǎlò̤ lû̌û nutokhlǒ.

6 Bǎ shi dû̌htò̌ dǒ hǎkhû̌ akhanu Phanṳ̂̌a ně ô̌ aya̤susô̌ hǒ. ^g 7 Pô̤̌khô Phanṳ̂̌a kû̌ ama kû̌mî̌ aphû̌pwa̤khû kû̌ adè̌ sîtokhlǒ gǔ hǎplǎ kû̌ shidû̌ nudě asî nṳ̌ lô̌khô dǒ sǒkhlidû̌kû. ^h 8 Ta̤phû̌ta̤wè̤ lǒ̤bò dǒ adû̌dû̌ apî̌tî̌tî̌ kû̌, htû̌phû̌yṳ̌phû̌ tokhlǒnu a mṳ̂̌plî bǎbǎ, a mṳ̂̌plî tô̤̌ bǎbǎ, dǒ a ô̌ lô̌khô bǎ hǎkhû̌ hǒtôbǎ lǒ̤bònu, 9 amǒ̤ tôbǎ apha tôbǎ asî nṳ̌ bè̌sûkhû̌bò lô̌khô dǒ sǒkhlidû̌kû pô̤̌ Cǒmaradû̌ mǎlò̤kè Phanṳ̂̌anu. 10 Susô̌tôni̤ behtò̌ dě shi dû̌htò̌ bǐkè hǎkhû̌ hǒ.

11 Bǎ Phanṳ̂̌a ně behtò̌ yasusô̌, ginǐ̤la tôla, shǐsusô̌ tôni̤ akhanu, lǒ̤bò shikû dǒ hǎlǎ̤ nutokhlǒ a pǒ̤htò̌bò. Shitakha dǒ mǒkhû̌ nutokhlǒ bǎbǎ a môhèlò̤ asô̌sô̌kû̌ takha lûmônu. ⁱ 12 Htodě gǎjulò̤ lṳ̌mṳ̌khǐkhǐ lṳmṳ̌shasha dě a julò̤ ani̤ lǐ̤shi.

13 Phanṳ̂̌a kû̌ aphû̌pwa̤khû sò̌su Khûshemǎ, Khûhamǎ, Khûyaphè̌ kû̌ Phanṳ̂̌a ama kû̌mî̌ adè̌ sò̌su nṳ̌ lô̌khô dǒ sǒkhlidû̌kû bǎ gǎjulò̤ nutôni̤nu. 14 Lǒ̤bò ta̤phû̌ta̤wè̤ dǒ mi̤kla nutokhlǒ kû̌ ta̤phû̌ta̤wè̤ dǒ kòyòbǔ a dǒhǐdǒphò nutokhlǒ kû̌ lǒ̤bò ta̤phû̌ta̤wè̤ dǒ adû̌dû̌ apî̌tî̌tî̌ nutokhlǒ kû̌ ta̤phû̌ta̤wè̤ dǒ a wi̤ dǒ mǒlǎ̤ nutokhlǒnu, a nṳ̌ô̌ bò kû̌ asî. 15 Lǒ̤bò ta̤bô̌lò̤ dǒ ata̤htûpwa̤ ô̌ tokhlǒnu, amǒ̤ tôdo apha tôdo, tôphû̌ hto tôphû̌ a nṳ̌ wô̤̌wô̤̌ lô̌khô kû̌ Phanṳ̂̌a dǒ sǒkhlidû̌kû. ^j 16 Ta̤phû̌ta̤wè̤ tôcǒ kû̌ tôcǒ, amǒ̤ kû̌ apha nṳ̌ sôgwè̌ lô̌khô dǒ sǒkhlidû̌kû pô̤̌ Cǒmaradû̌ mǎnǎ Phanṳ̂̌a, htodě Cǒmara tûjû̌pwa̤ ma̤bǐkè takha.

17 Gǎjulò̤ yî̤gipi̤ ani̤lǐ̤shi dě sǔ sǔ shi dû̌htò̌ dǒ hǎkhû̌nu dě a jo gôjô htò̌kè sǒkhlidû̌nu dǒ shikhû̌ dě sǒkhlidû̌ ô̌gôjô htò̌yô̤̌ kè kû̌ hǎkhû̌. 18 Sǔ sǔ shi dû̌htò̌ dǒ hǎkhû̌ nudě sǒkhlidû̌ lô̤̌cû̌kè dǒ shikhû̌. 19 Shi dû̌htò̌dû̌wî̤ akhû̌akhî, a plǒbǐ bò khôlôdû̌ khôlôhtû htò̌yô̤̌ tǒ̤dǒ mǒlǎ̤ nutokhlǒ. 20 Sǔ sǔ shi dû̌htò̌ dě a dû̌bǐ tûlû̌bò khôlô nutokhlǒ aplǎ̤ shǐyè̤̌ plǎ̤. 21 Htû̌phû̌yṳ̌phû̌ tokhlǒ bǎbǎ, ta̤phû̌ta̤wè̤ a na̤ dǒ kòyò bǔ bǎ hǐnu tokhlǒ bǎbǎ, ta̤mi̤ta̤mò̤̌ dǒ aplò̤ nutokhlǒ bǎbǎ, kòyòhǎkhû̌phû̌ bǎbǎ, lǒ̤bò ta̤ dǒ a ta̤htûpwa̤ wṳ̌khû̌wṳ̌wè̤ bǎ hǎkhû̌ tokhlǒnu a sikèbò. 22 Lǒ̤bò ta̤bô̌lò̤ dǒ ata̤htûpwa̤ ô̌bò bǎ khosûkhû̌ tokhlǒnu, a sibòkè. 23 Lǒ̤bò ta̤ dǒ a ô̌ htûpwa̤ wṳ̌wè̤ dǒ hǎkhû̌ tokhlǒnu a sikè bò hǒ, kòyòhǎkhû̌phû̌ bǎbǎ, lǒ̤bò ta̤mi̤ta̤mò̤̌ dǒ a ô̌ dǒ mi̤kla nutokhlǒ bǎbǎ, lǒ̤bò ta̤phû̌ta̤wè̤ dǒ kòyò bǔ dǒ hǐ nutokhlǒ bǎbǎ, htû̌phû̌yṳ̌phû̌ wi̤ dǒ mǒlǎ̤ sîtokhlǒ bǎbǎ Cǒmara tûjû̌pwa̤ ma̤sikè bò hǒ. A ô̌ htûpwa̤ pwǎtǒ̤ Phanṳ̂̌a kû̌ kòyò dǒ a ô̌ kû̌ lû̌û nutokhlǒ pwǎ. ^k 24 Shidû̌ bǎ hǎkhû̌nu ayî̤ ani̤ tôya̤ kû̌ yè̤̌shi.