Hebrews 10

1Khònò̤̌ pa sî̌yaphlô kû̌ ta̤sû̌ta̤tòwò dǒ Khûmṳ̂shě bè̌kè numî̌ amè̤̌pwǎ ta̤yǎ̤yô̤ ta̤ma̤mǎnǎ tôcǒpwǎ. Ta̤ amè̤̌mî̌cǎ dǒ ta̤sû̌ta̤tòwò sǎyṳ nè̌lṳ̌ numî̌ amè̤̌kû̌ lǒ̤bò ta̤wî̤ta̤twè̤̌ dǒ a hè tutṳ̌ dǒ Khrǐ a ô̌ tokhlǒnu hǒ. Ta̤sû̌ta̤tòwònu a hî̌ kû̌, pṳ̂̌něně꤮ tôbǎ lṳhtò̌ ta̤phû̌ta̤wè̤nu akhû̌akhî, ma̤lǒhtò̌behtò̌ jò bǎ kòyòhǎkhû̌phû̌ tô̤̌. 2Ta̤lṳhtò̌ ta̤phû̌ta̤wè̤nu, a kè̌ ma̤mṳ̂̌plî kòyò dǒ a cabahtò̌ Cǒmara tokhlǒ ata̤sǔ tôplǎ pwǎ dě a htophlǔ bò kè̌hî̌dě, asî tô gènè̤ ǐtû̌ kû̌ pe anǎ̤ kû̌ ata̤sǔ ô̌ pe tô̤̌ hǒ kò̌. Dě asî tô ô̌kǔkèkû̌ lǒ̤bò a ta̤lṳtòhtò̌ nutokhlǒ tǎ. 3Bǎbǎkǎlè asî ata̤lṳtòhtò̌ tokhlǒnu, pṳ̂̌něně꤮ a dǐ gènè̤htò̌bǎsô̌ asî kû̌ a ta̤sǔô̌ pô̤̌nu pwǎ. 4Ma̤titèhî̌dě pṳ̂̌phalô asǐ, pè̤̌ asǐ tokhlǒnu a phî̌ tephejòkè ta̤sǔ tîkî̌꤮ tô̤̌.

5Pô̤̌nu akhû̌akhî, bǎ Khrǐ hèlò̤ dǒ hǎkhû̌ akhanu, a hî̌ Cǒmara kû̌, ^a

“Kòyò lṳhtò̌ bǎ na ta̤phû̌ta̤wè̤ sîtokhlǒ kû̌ ta̤lṳta̤tòhtò̌ sî tokhlǒnu, na sǎyṳ tô̤̌. Bǎbǎkǎlè na tîwî̌tòwò nǎhto he nǎ̤glǒ dǒ he glè̌ bǎ lṳhtò̌ ayahǒ.

6Kòyò shû̌u lṳhtò̌ sado ta̤phû̌ta̤wè̤ tokhlǒ dǒ ta̤lṳhtò̌wǎ̤khû̌ bǎbǎ, ta̤plûkè ta̤sǔ a ta̤lṳta̤tòhtò̌nu bǎbǎ, na sǎphlǒ ô̌ tô̤̌tô̤̌.

7Pô̤̌nudě, he hî̌ kû̌, ‘pô̤̌ kòyò wě̤ hewe̤hekè dǒ lî̤plò̌shǐ akûnu, he hî̌ Cǒmara kû̌, he ô̌ pwǎ, ǒ Cǒmara, pô̤̌khô he glè̌ hè ma̤ bǎ na pô̤̌ na sǎyṳ noma̤ he nutokhlǒ ayanudě, he hètǒ̤hǒ,’” ^b Khrǐ hî̌ Cǒmara pô̤̌nu.

8Běcǎ Khrǐ hî̌wǐ kû̌, “Lṳhtò̌ ta̤phû̌ta̤wè̤nu bǎbǎ, lṳhtò̌ sǒsǎ wû̌phô sî bǎbǎ, shû̌u lṳhtò̌ ta̤phû̌ta̤wè̤ sî bǎbǎ, lṳhtò̌ ta̤lṳ dǒ a gǔ plûkè pa ta̤sǔ sînu bǎbǎ na sǎphlǒô̌tô̤̌,” (Asî lṳhtò̌ ta̤lṳta̤tòhtò̌ hǒtokhlǒ pô̤̌ Khûmṳ̂shě a ta̤sû̌ta̤tòwò ô̌nu bǎbǎkǎlè Běcǎ Khrǐ hî̌ pô̤̌nu.) 9Pô̤̌nudě a hî̌pô̤̌ kû̌, “Pô̤̌khô he gǔ hè ma̤ bǎ na pô̤̌ na ta̤sǎyṳ ô̌ nudě, kè̌mò̌ he hètǒ̤hǒ,” a hî̌ sô̌ pô̤̌nu. Pô̤̌nudě Cǒmara bè̌ tephekè ta̤lṳta̤tòhtò̌ dǒ ali̤alṳ̂̌ nutokhlǒ kû̌ ta̤lṳtòhtò̌ ta̤phû̌ta̤wè̤ dǒ ali̤alṳ̂̌ nutokhlǒ dě a htû̌lè̌ tèplè̌khô̌kè kû̌ klè̌ dǒ asa tôbô. 10Yeshǔ Khrǐ ma̤ bǎ pô̤̌ Cǒmara a ta̤sǎyṳ ô̌nu, htokhôtô̤̌ dǒ a lṳhtò̌ anǎ̤glǒ tôplǎnô̤̌pwǎ dě a htophlǔ bòhǒ akhû̌akhî, a ma̤ plò̌shǐ pa hǒ.

11Pwa̤shû̌gǎ pṳ̂̌꤮ tôpwa̤nu, a bǎ ihtǒ ma̤ ta̤cubucaba a lǎ̤bû̌lǎ̤klô tokhlǒ pṳ̂̌ni̤ni̤꤮. Gûlǎ̤lǎ̤꤮ asî bǎ lṳhtò̌ tôplǎ hto tôplǎ. Ta̤lṳta̤tòhtò̌ tokhlǒnu a phî̌ tephekè jò kòyò ta̤sǔ tôcǒ꤮ tô̤̌. ^c 12Bǎbǎkǎlè Khrǐ lṳhtò̌ bǎ pa ta̤sǔ aya tokhlǒnu, a lṳhtò̌ tôplǎnô̤̌pwǎ dě a hto phlǔbò tûjû̌pwa̤ hǒ. Dě a ge hǎnòò̌ô̌ dǒ Cǒmara a cǔtômû tôkhô hǒ. ^d 13Khònò̤̌dě Yeshǔ gǔ ô̌pǒ̤ tǒ̤htû̌ Cǒmara pṳ̂̌mě bǎ lû̌û kòyò dǒ a sǎkhě lû̌û nutokhlǒ ▼

▼yô̤̌mûyô̤̌sǎ sô̌sô̌kû̌ “khuwè̤” pa hî̌ nuhǒ

pě, dě a gǔ dǐô̌ hto lû̌û dǒ akhò̌lôpô̤̌ lǎ̤yî̤̌ alǎ̤nu pě. 14Dǒ Khrǐ lṳhtò̌ pwǎ anǎ̤ tôplǎ akhû̌akhî, kòyò dǒ a ma̤mṳ̂̌plîhto asî ta̤sǔ tokhlǒnu, a ma̤cǒma̤tè̤ asî tûjû̌pwa̤ hǒ.

15Pa sî̌ganǎ̤ kû̌ ta̤hî̌bǎ ayô̤̌ hǒtômû atô pwǎ. Ma̤titèhî̌dě, dǒ lî̤plò̌shǐ akûnu, Yôla Plò̌shǐ Běcǎ hî̌ sô̌sô̌ pô̤̌nu, dě a hî̌ kû̌,

16“Hǒomî̌ ta̤olò̤ asa dǒ he gǔ hî̌bǎ tèplè̌ kû̌ hekòyò tokhlǒ htû̌꤮ nô̌kòpě ayanu hǒ, Běcǎ hî̌ pô̤̌nu. He gǔ shû̌nṳ̌ he ta̤sû̌ta̤tòwò dǒ asî asǎphlǒkû pě, dě he wě̤mǎnǎ ta̤sû̌ta̤tòwònu dǒ asî ta̤gènè̤ tokhlǒ alô̤ pě.” ^f

17Htodě a hî̌ pô̤̌ kû̌,

“He gǔ shôpe̤nǎkè asî ta̤sǔ lǒ̤bò nutokhlǒ pě, kû̌ ta̤phû̌mò̤̌shǐhtô dǒ asî ma̤ nutokhlǒ pě.” ^g

18Pô̤̌nudě khònò̤̌ Cǒmara plûkè ta̤sǔ nutokhlǒ akhû̌akhî, lṳhtò̌ ta̤lṳta̤tòhtò̌ dǒ a gǔ plûkè pa ta̤sǔ tokhlǒnu a lǎ̤lṳ̂ petô̤̌.

Yṳ̌ǎ hènè gutṳ̌ Cǒmara

19Pô̤̌nudě, he pṳ̌wè̤̌ sî꤮. Dǒ Yeshǔ asǐ akhû̌akhî, pa hènṳ̌ kû̌ ta̤sǎphlǒ khuhe dǒ ta̤lǎ̤ plò̌shǐ gutṳ̌ hǒtôplǎ mî̌ anǐ̤ hǒ. 20Běcǎ Yeshǔ khòlṳ̌ asǎphlǒ dǒ paya akhû̌akhî, a bǔmô bǎ paklè̌ asa dǒ a ǐ pa ta̤htûpwa̤ hǒtôbô. Klè̌ hǒtôbô nî̌ a cû̌nṳ̌phlǔ tûlû̌ bò̌ kû̌ kòyò cotě̤tṳ hugò̌pwǐ pṳdû̌ dǒ amè̤̌ Khrǐ anǎ̤glǒ tôbǎnu hǒ dě a cû̌tǒ̤ dǒ Cǒmara a ô̌ hǒ. 21Pwa̤shû̌gǎ ikǒdû̌ dǒ adû̌khlo kò dě a kè̌khwè̌nǐ̤ Cǒmara ahǐ hǒtôpwa̤nu, pa nǐ̤bǎ a hǒ. 22Pô̤̌nudě pa hèphǔ lô̌khô dǒ Cǒmara a ô̌ tǎ꤮. Pa gǔ hè kû̌ pa sǎphlǒ dǒ acǒatè̤, kû̌ pa ta̤yṳ̌ dǒ atě̤amè̤̌ nutokhlǒ tǎ꤮. Ma̤titèhî̌dě, pa sǎphlǒ a ta̤gènè̤ phû̌mò̤̌, pô̤̌khô a gǔ ma̤mṳ̂̌plî ayanu, kòyò cǔbò hto pa kû̌ Khrǐ asǐ hǒ. Htokhôtô̤̌ panǎ̤glǒ nî̌ kòyò cǔbò hto kû̌ shiplò̌shǐ hǒ. ^h 23Pa gǔ pṳ̂̌mě wô̌bǎ pa ta̤kè̌shuǐ dǒ pa hî̌ bǎ hto kòyò nutokhlǒ tǎ, ma̤titèhî̌dě pa sî̌ganǎ̤ kû̌ Cǒmaranu acǒ kû̌ a ta̤olò̤ dě a ma̤pô̤̌ a hî̌nu pṳ̂̌taplǎ. 24Pa ta̤mô̤ ǐtû̌ lû̌û tôpwa̤ kû̌ tôpwa̤nu, pô̤̌khô sǔ sǔ a gǔ ô̌ dû̌htò̌ dě, pô̤̌khô pa gǔ ma̤ta̤ dǒ awô̌ tokhlǒ ayanu, pa gǔ gènè̤ padô̌ kòyò dǒ pa gǔ ǐkhû̌ǐǎ ǐ lû̌û tôpwa̤ kû̌ tôpwa̤ hî̌tè awe̤akè tokhlǒnu pwǎ tǎ꤮. 25Kòyò tokhlǒkhlǒnu, a wîkè ta̤caba wô̤̌wô̤̌lû̌ sî, bǎbǎkǎlè pa dě, wîkè kû̌ tǎ̤ kòyò pa lǎ̤klô caba wô̤̌wô̤̌ lû̌û pô̤̌ asî nutokhlǒ wîkènu tǎ̤mǎ̤ nî̌꤮. Mè̤̌mè̤̌tôkhônu, pa gǔ ǐkhû̌ǐǎ wô̤̌wô̤̌ lû̌û tôpwa̤ kû̌ tôpwa̤ tǎ꤮. Běcǎ glè̌ hèsô̌ lṳmṳ̌ni̤ lṳmṳ̌sanu a phǔhtò̌hǒ akhû̌akhî, pa ǐkhû̌ǐǎ shò̌gû̌ ǐtû̌ lǒkhlo pô̤̌ lû̌û tôpwa̤ kû̌ tôpwa̤ tǎ꤮.

26Pa nǐ̤bǎ hto ta̤tě̤ta̤mè̤̌ a ta̤sî̌khû̌sî̌ya dě pa kè̌ ma̤ takǎ sělě gutṳ̌pe ta̤sǔ kè̌hî̌dě ta̤lṳta̤tòhtò̌ dǒ a gǔ plûkè pa ta̤sǔ ayanu a ô̌ pe tô̤̌. 27A ô̌kè pwǎ tôcǒ dǒ pa gǔ ô̌pǒ̤pwǎ Cǒmara a ta̤cî̌htò̌ kû̌ mî̌gè̌ plô̤̌dû̌ dǒ a gǔ gè̌sikè bò kòyò dǒ a sǎkhě Cǒmara tokhlǒnu pě. ⁱ 28Bǎ nukha nî̌ kòyò dǒ a ma̤si Khûmṳ̂shě a ta̤sû̌ta̤tòwò tôpwa̤pwa̤nu, kòyò sò̌ginǐ̤ kè̌mè̤̌tô̤̌dě sò̌su kè̌ yṳ̂̌lṳ̌bò̌ mè̤̌mî̌ca lû̌û ta̤sǔ hî̌nu, kòyò bǎ ma̤ sikè lû̌û, dě kòyò bǎ sǎyṳgwèbǎǐ lû̌û tôpwǎ̤꤮ tô̤̌. ^j 29Pô̤̌nudě sî gènè̤ kè̌mò̌ kòyò dǒ a hî̌ takǎ Cǒmara aphû̌khû hǒtokhlǒ, dě a wîkè lû̌û tokhlǒnu, Cǒmara gǔ cî̌htò̌ jî̌khlo asî pě. Htodě Khrǐ khòlṳ̌ asǎphlǒ dě a dǐ htûhtò̌ Cǒmara a ta̤olò̤ asa nuhǒ dě Khrǐ cǔbò pa kû̌ asǐ hǒ. Pô̤̌nudě kòyò dǒ a bè̌ lě̤dû̌pwî̤htû Khrǐ asǐ tô̤̌ tokhlǒnu, Cǒmara gǔ cî̌htò̌ jî̌khlo asî pě. Htokhôtô̤̌ kòyò hǒtokhlǒnu a hî̌ phû̌mò̤̌ Yôla Plò̌shǐ Běcǎ dǒ a ǐ asî ta̤bwǐta̤sîrî nutôpwa̤ akhû̌akhî, Cǒmara gǔ cî̌htò̌jî̌ khlo asî kû̌ kòyò dǒ a ma̤si Khûmṳ̂shě a ta̤sû̌ta̤tòwò nutokhlǒ pě. ^k 30Ma̤titèhî̌dě, pa sî̌ganǎ̤ tûû̌ kû̌ Cǒmara hî̌ kû̌, “He ma̤ geshěshu asî pě. He ma̤lǐ̤ geshěshu asî pô̤̌ asî ma̤sǔ hto nutokhlǒ pě,” ^l htodě a hî̌ pô̤̌ kû̌, “Běcǎ cî̌htò̌ tûû̌ a kòyò pě,” a hî̌ pô̤̌nu. ^m 31Kòyò dǒ a lò̤tě̤tô dǒ Cǒmara a htûpwa̤ nutôpwa̤ ta̤cî̌htò̌ akla tôpwa̤pwa̤nu, a sǎgònò̤̌ ǐsha jî̌le.

32Gènè̤htò̌ to̤ǐbǎ sô̌ lô̌khô dǒnukha bǎ sî nǐ̤bǎ hto samô̤̌pe pwǎ Cǒmara ata̤lî akhanu, sî kè̌shǐbǎ dû̌ ta̤jî̌ta̤jû̌ bǎbǎkǎlè sî khòsǎphlǒhtûbò̌ lô̌khô pwǎ. 33Tôplǎplǎnu kòyò ma̤ takhû̌takǎ sî, kòyò ma̤jî̌ma̤jû̌ sî dǒ kòyò tôprṳ̂tôphǎ alô̤mô̤̌, tôplǎplǎnu sî cû̌ ma̤jè tṳ̌bǎ gû̌ kòyò dǒ kòyò ma̤jî̌ma̤jû̌ asî pô̤̌nu tokhlǒ. 34Sî gwèbǎǐ kòyò dǒ kòyò dǒlò̤tě̤ lû̌û dǒ apô̤kû nutokhlǒ. Kòyò pè̤̌ǎpè̤̌ô phî̌ cû̌kè bò sî timǐtitè bǎbǎkǎlè, sî bè̌ sǎlě̤ lô̌khô pwǎ sî sǎphlǒ, ma̤titèhî̌dě sî sî̌ganǎ̤ kû̌ sî timǐtitè dǒ awô̌khlo dě a ô̌měô̌gle tûjû̌pwa̤nu a ô̌ dû̌wî̤pe dǒ mǒkhû̌ akhû̌akhî, sî sǎlě̤sǎlò̤ lô̌khô pwǎ.

35Pô̤̌nudě bè̌shû̌ lô̌khô sî sǎphlǒ. Sî nǐ̤bǎ ta̤ma̤nǐ̤khû̌kǎ dǒ adû̌ayô̤̌ tokhlǒ pě. 36Pô̤̌khô sî gǔ ma̤tô pô̤̌ Cǒmara sǎyṳ noma̤ sînu, htodě pô̤̌khô sî nǐ̤bǎ a ta̤olò̤ dǒ a olò̤ hto sî tokhlǒ ayanu, sî bǎkhòsǎphlǒhtû lô̌khô. 37Ma̤titèhî̌dě, lî̤plò̌shǐkû hî̌ kû̌,

“Yî̤khôtô̤̌ pěnu, pwa̤ dǒ a glè̌ hèlò̤ tôpwa̤ gǔ hèlǎ pě, a ma̤pò̤̌yǎ̤ petô̤̌.

38He kòyòcǒkòyòtè̤ sî tokhlǒnu, dǒ a yṳ̌nǐ̤nǎ̤nǐ̤ he akhû̌akhî, a gǔ htûpwa̤ lô̌khô pě. Bǎbǎkǎlè kòyò dǒ a cû̌ tephekhô̌kè kû̌ he tokhlǒnu, atô he sǎphlǒ tô̤̌,” ⁿ lî̤plò̌shǐkû hî̌ pô̤̌nu.

39Pa mî̌ kòyò dǒ a cû̌ tephekhô̌kè tokhlǒ, dě a cû̌tǒ̤ dǒ ta̤pî̌ta̤lṳ̂̌ pě nutokhlǒ mè̤̌tô̤̌. Pa mî̌ kòyò dǒ a yṳ̌ǎ ta̤ tokhlǒ dě a nǐ̤bǎ ta̤ma̤hǎplǎge tokhlǒ pě hǒ.