Heb 12 | KxfSCKXF | STEP | Pô̤̌nudě, kòyò dǒ a dǔlè̌lṳ̌ bǎ pa kû̌ a ta̤yṳ̌ta̤nǎ̤ tokhlǒnu, a ô̌ te̤we̤plṳ̂te̤we̤phǎ kû̌ pa. Pô̤̌nu akhû̌akhî, pa wîkè ta̤pṳ̂̌꤮ tocǒ dǒ a ma̤ dǐdò tě̤tṳ pa tokhlǒ kû̌ ta̤sǔ dǒ a ma̤ topho lòkhǔkè pa hǒtokhlǒ tǎ꤮! Dě pa kè̌wô̤̌wô̤̌ lû̌û kòyò ǐ pa ta̤bò̌htò̌htǔ dǒ palô̤mô̤̌nu dě pa gǔ sǎphlǒhtû khlè̌hètǒ̤ dǒ a ô̌nu tǎ꤮.

Hebrews 12

Papha Cǒmara

1 Pô̤̌nudě, kòyò dǒ a dǔlè̌lṳ̌ bǎ pa kû̌ a ta̤yṳ̌ta̤nǎ̤ tokhlǒnu, a ô̌ te̤we̤plṳ̂te̤we̤phǎ kû̌ pa. Pô̤̌nu akhû̌akhî, pa wîkè ta̤pṳ̂̌꤮ tocǒ dǒ a ma̤ dǐdò tě̤tṳ pa tokhlǒ kû̌ ta̤sǔ dǒ a ma̤ topho lòkhǔkè pa hǒtokhlǒ tǎ꤮! Dě pa kè̌wô̤̌wô̤̌ lû̌û kòyò ǐ pa ta̤bò̌htò̌htǔ dǒ palô̤mô̤̌nu dě pa gǔ sǎphlǒhtû khlè̌hètǒ̤ dǒ a ô̌nu tǎ꤮. 2 Asô̌sô̌kû̌ kòyò khlè̌ tokhlǒ kè̌tôtǐ hètô pwǎ ta̤ma̤pè̤̌ bò̌htò̌htǔ nuhǒ, pô̤̌nudě pa kè̌hè tôtǐ pwǎtǒ̤ Yeshǔ nô̤̌ tǎ꤮. Ma̤titèhî̌dě a mî̌ pa ta̤yṳ̌ta̤nǎ̤ a kòshî̌gutṳ̌ tôpwa̤. Htokhôtô̤̌, a mî̌ pwa̤ dǒ a ma̤lǒma̤be bǎ pa ta̤yṳ̌ta̤nǎ̤ tôpwa̤. A khòsi htopědě, a sî̌ganǎ̤ nǎ hto kû̌ a gǔ nǐ̤bǎ ta̤sǎlě̤sǎlò̤ pě akhû̌akhî, a tôbǎ khòsi dǒ nò̌dò̌htǔlô̤ bǎbǎkǎlè a sòwò̤̌ tôcǒ꤮ tô̤̌. Khònò̤̌dě a hǎnòò̌ dǒ Cǒmara a lǎ̤hǎnòò̌ htò̌yô̤̌ dǒ cǔtômû nutôkhô hǒ. 3 Pô̤̌khô sî ma̤ ta̤wô̌ dě sî gǔ lò̤dô̌lò̤de tô̤̌, dě sî gǔ sǎphlǒpî̌ tô̤̌ ayanu, gènè̤kè̌ lô̌khômò̌ Běcǎ Yeshǔ awe̤akènu, pwa̤ma̤sǔphû̌ tokhlǒ sǎkhěkhû̌khwè lû̌û ma̤takhû̌takǎ mî̌ca lû̌û bǎbǎkǎlè a khòsǎdô mî̌ca dǒ asîkhû̌.

4 Sî shěshǔ kû̌ ta̤sǔta̤phû̌mò̤̌ nutokhlǒ bǎbǎkǎlè sî khòbǎ ta̤jî̌ta̤jû̌ tǒ̤dǒ kòyò bǎma̤si sînu, a ô̌nô̌ tôpwǎ̤꤮ tô̤̌. 5 Cǒmara ǐkhû̌ǐǎ sî pô̤̌ aphû̌ kû̌ anǎ̤ numî̌ sî shôpe̤kè hǒ ya? A hî̌ sî kû̌,

“Ǒ hephû̌ sî꤮ bǎ Běcǎ tṳ̂mṳ̂̌ sû̌ǐtòwòǐ wô̌kè sî akhanu, bè̤̌dubè̌nǎ̤ a tṳ̂mṳ̂̌ sû̌ǐwô̌ sînu nî̌꤮. Bǎ a tṳ̂mṳ̂̌ sî akhanu, sǎphlǒpî̌ tǎ̤ lô̌khô tǎ̤mǎ̤ nî̌꤮. ^a 6 Ma̤titèhî̌dě, Cǒmara tṳ̂mṳ̂̌ sû̌ǐwô̌ gesô̌ kòyò dǒ a mô̤ǐ nutokhlǒ. Dě kòyò lǒ̤꤮ bò dǒ Cǒmara bè̌ asî kû̌ aphû̌ nutokhlǒnu, a plèǐ lû̌û.” ^b

7 Sî khòbǎ ta̤tokhlǒnu, khòsǎphlǒhtû dě bè̌ a pô̤̌ pha Cǒmara sû̌ǐwô̌ gesô̌ sî pwǎnu nî̌꤮. Cǒmara tṳ̂mṳ̂̌ta̤ma̤ sû̌ǐwô̌ gesô̌ aphû̌ kû̌ anǎ̤ nutokhlǒ pwǎ. Pha dǒ a tṳ̂mṳ̂̌ sû̌ǐwô̌ gesô̌ kû̌ aphû̌ tokhlǒ tô̤̌ numî̌ a ô̌ nô̌ tôpwa̤pwa̤ ya? 8 Cǒmara sû̌ǐtòwòǐ wô̌ge bò aphû̌ pṳ̂̌꤮ tôpwa̤. Kè̌ a tṳ̂mṳ̂̌ sû̌ǐwô̌gesô̌ sî tô̤̌ hî̌nu, sî htû mè̤̌mî̌ca aphû̌ khôtô̤̌. Sî mè̤̌pwǎ phû̌ dǒ a shôdô apha nutokhlǒ pwǎ. 9 Pa ô̌ kû̌ pamǒ̤papha dǒ hǎkhû̌nu tokhlǒ dě a tṳ̂mṳ̂̌ sû̌ǐtòwòǐ wô̌ gesô̌ pa dě pa bè̌dubè̌nǎ̤ ǐ asî. A sô̌sô̌ pô̤̌nudě pa ô̌ kû̌ papha dǒ mǒkhû̌ nutôpwa̤ akhû̌akhî, pa tô shò̌lò̤ khlope pa sǎphlǒ dǒ alǎ̤nu. Dě pa nǐ̤bǎ ta̤htûpwa̤ pě. 10 Papha dǒ hǎkhû̌ nutokhlǒ tṳ̂mṳ̂̌ sû̌ǐtòwòǐ wô̌ gesô̌ pa aněala alṳmṳ̌ni̤ lṳmṳ̌sa sî tokhlǒnu, a yî̤tô̤̌, tòshò̌phû̌pwǎ dě a bè̌ lô̌khô kû̌ a ma̤ ta̤ numî̌ awô̌ pwǎ a gènè̤ dě a sû̌ǐ pa pwǎ. Pô̤̌khô pa gǔ plò̌shǐ sô̌sô̌kû̌ pô̤̌ papha Cǒmara nudě, a tṳ̂mṳ̂̌ sû̌ǐtòwòǐ wô̌ gesô̌ pa ta̤ dǒ a gǔ htûbwǐhtûsîrî dǒ paya nutokhlǒ pwǎ. 11 Bǎ Cǒmara tṳ̂mṳ̂̌ sû̌ǐ wô̌ gesô̌ pa akhanu, a sô̌sô̌ kû̌ sǎplǎ̤sǎyṳ lû̌ûnu, a sô̌sô̌ kû̌ ta̤sǎlě̤sǎlò̤ ô̌ tôcǒ tô̤̌. Bǎbǎkǎlè kòyò dǒ a khòbǎ nô̌ kòyò tṳ̂mṳ̂̌ sû̌ǐtòwòǐ wô̌ gesô̌ lû̌û tokhlǒnu, dǒ nô̌kòpě dě a gǔ nǐ̤bǎ khû̌kǎ pěnumî̌ amè̤̌ ta̤ô̌htûpwa̤ dǒ acǒatè̤ dě a nǐ̤bǎ sǎphlǒ gûjû̌kabǎ pě.

Ta̤sû̌ǐtòwòǐ tokhlǒ kû̌ ta̤dǐsè̌rè̌ tokhlǒ

12 Pô̤̌nudě, ma̤shohtò̌ sô̌ sî cǔde dǒ a gayǎ̤ lǎlǎnu tokhlǒ, dě ma̤shû̌htò̌ sô̌ khò̌lô̤mě̤ dǒ a gònò̤̌gòglè nutokhlǒ. ^c 13 Tûlû̌ gû̌hè sělě gutṳ̌ ta̤tě̤ta̤mè̤̌ aklè̌nu nî̌꤮. Kòyò dǒ ata̤yṳ̌ pî̌tî̌ tokhlǒnu, asô̌sô̌kû̌ kòyò khò̌lôpô̤̌dě nutokhlǒ hǒ. Pô̤̌khô kòyò dǒ a khò̌lôpô̤̌dě nutokhlǒ gǔ lò̤khǔpo̤ tô̤̌, htodě pô̤̌khô asî khò̌lôpô̤̌ wô̌ tîkhîsô̌ ayanu, tûlû̌ gû̌ sělě hènè gû̌pô̤̌ lô̌khô nî̌꤮. ^d

Ta̤dǐsè̌rè̌bǎ kòyò kû̌ ta̤htû̌tiwǐ̤ cû̌khô̌kè Cǒmara awe̤akè

14 Jî̌pwǐ̤ ô̌mô̤ô̌kla pû kû̌ kòyò pṳ̂̌꤮ tôpwa̤ nî̌꤮. Jî̌pwǐ̤ ô̌htûpwa̤ plò̌shǐ lô̌khô nî̌꤮. Ma̤titèhî̌dě ta̤ô̌htûpwa̤ plò̌shǐ kè̌ ô̌tô̤̌ hî̌nu, kòyò kè̌shǐjò Běcǎ tôpwǎ̤꤮ tô̤̌. 15 Pô̤̌khô sî pṳ̂̌꤮ tôpwa̤ gǔ nǐ̤bǎ lô̌khô Cǒmara abwǐsîrî nudě, sè̌rè̌ lô̌khô sînǎ̤ nî̌꤮. Nohtûhtò̌ tǎ̤ lô̌khô sînǎ̤ pô̤̌ sǒmṳ̌ dǒ awè̤̌htòô̌ dě kòyò ǎ a dě a sijò kòyò nutokhlǒ tôpwǎ̤ tǎ̤mǎ̤ nî̌꤮. Kòyò dǒ asô̌sô̌kû̌ sǒmṳ̌ dǒ a ma̤ sijò kòyò tokhlǒnu a gǔ dô̌htò̌ dǒ sîkla dě a ma̤pò̤̌ma̤sha dû̌wî̤ kòyò kû̌ a ta̤wè̤̌ta̤htò si nupě. ^e 16 Nohtûhtò̌ tǎ̤ lô̌khô sî nǎ̤glǒnu kû̌ kòyò dǒ a cû̌sǔnṳ̌plěnṳ̌ pwa̤mǒ̤pwa̤khû nutokhlǒ tǎ̤mǎ̤ nî̌꤮. Htûhtò̌ sô̌sô̌ lô̌khô tǎ̤ pô̤̌ Khûětò̌ dǒ a bè̌dû̌ kû̌ kòyò Cǒmara ayô̤̌ tô̤̌ dě a shaǎ ǐ sô̌ phû̌wè̤̌pwǎ̤ û̌tě̤û̌ca kû̌ hǎsǐ tôbè nutôpwa̤ tǎ̤mǎ̤ nî̌꤮. ^f 17 Pô̤̌ sî sî̌ganǎ̤ hto nuhǒ, dǒ nô̌kò dě bǎ a sǎyṳ hè phǐgû̌ ta̤ǐshowî̤ dǒ apha ô̌ akhanu, apha ǐpe lû̌û tô̤̌. A kè̌shuǐ ta̤ǐshowî̤ kû̌ amǐ̤sǎshi bǎbǎkǎlè, dǒ a shaǎ hto phû̌wè̤̌pwǎ̤ a û̌tě̤û̌ca akhû̌akhî, a htû̌lè̌ tèplè̌ khô̌jò petô̤̌. ^g

18 – 19 Sî hèphǔ dǒ Cǒmara a ô̌ numî̌, asô̌sô̌kû̌ Isôrělaphû̌ dǒwǐkha tokhlǒ hè dǒ Tǐnǎkhôlô a ô̌nu mè̤̌tô̤̌. Asî hètǒ̤ dǒ Tǐnǎkhôlô dǒ kòyò kè̌shǐjò lû̌û, kòyò pṳ̂̌bǎ jò lû̌û nutômè a ô̌, mî̌gè̌htò̌ dǒ khôlô nutômè alô̤, poǒlṳ̌ khǐsiwi̤ lò̤jobǐ, gili̤sǎ dû̌hè, kǐlû pwe̤htò̌ dě Cǒmara alě̤pwe̤htò̌ dǒ khôlô nutômè akû. Isôrělaphû̌ tokhlǒ ganǎ̤de alě̤pwe̤htò̌ dě a ǐsha tûlû̌shû̌lě akhû̌akhî, asî kwisǎyṳ Cǒmara kû̌ a gǔ hî̌bǎ pǒhǒ. ^h 20 Ma̤titèhî̌dě, alě̤pwe̤htò̌ dě a hî̌ kû̌, “Ta̤phû̌ta̤wè̤ bǎbǎ a kè̌ hè ma̤bǎ khôlô nutômè hî̌nu, bǎ desikè a kû̌ lǒ̤,” ⁱ ta̤hî̌bǎ pwe̤lò̤ hǒtômû nî̌ asî khòpè̤̌pe tô̤̌. 21 Asî kè̌shǐ lô̌khô ta̤ htûhtò̌ pô̤̌o dǒ asî lô̤mô̤̌ dě, asî ǐsha jî̌ akhû̌akhî, “He ǐsha gònò̤̌gòglè,” ^j Khûmṳ̂shě hî̌ pô̤̌nu.

22 Bǎbǎkǎlè, sî dě sî hètǒ̤ dǒ Sǐûkhôlôhǒ. Khôlô hǒtômè numî̌ amè̤̌ Cǒmara dǒ a htûpwa̤ nutôpwa̤ awî̤̌ tôwî̤̌ dǒ kòyò kaǎ kû̌ Wî̤̌yarǔshôle dǒ mǒkhû̌nu tôwî̤̌ hǒ. Cǒmara amǒkhû̌ tanaphû̌ dǒ a ô̌ dǒ asî̌ kû̌ asî̌kû tokhlǒ hè̌ô̌plǒ sǎlě̤ wô̤̌wô̤̌ kû̌ bò lû̌û bǎnu. Dě sî hè ô̌plǒ kû̌ amǒkhû̌ tanaphû̌ nutokhlǒ hǒ. 23 Sî hètǒ̤ dǒ Cǒmara a phû̌wè̤̌pwǎ̤ ^{▼▼Yǔdaphû̌ alǎ̤klô ô̌ kû̌ phû̌wè̤̌pwǎ̤ mî̌ a nǐ̤bǎ khô̌ ta̤bè̌dubè̌nǎ̤ lû̌û kû̌ û̌tě̤û̌ca tokhlǒ.} tokhlǒ lǎ̤hè ô̌plǒcu lû̌û agûlǎ̤ nuhǒ. Kòyò wě̤nṳ̌ asîmi̤ dǒ mǒkhû̌ hǒ. Sî hètǒ̤ lô̌khô dǒ Cǒmara dǒ a gǔ cî̌htò̌ kòyò pṳ̂̌tôpwa̤ kû̌ anǎ̤ nutôpwa̤ alô̤mô̤̌ hǒ. Sî hètǒ̤ dǒ kòyòcǒkòyòtè̤ dǒwǐkha tokhlǒ a yôla htûpwa̤ dǒ Cǒmara ma̤lǒbe hto lû̌û nutokhlǒ a ô̌ hǒ. 24 Sî hètǒ̤ dǒ Yeshǔ a ô̌ hǒ. Ta̤olò̤ asa dǒ kòyòhǎkhû̌phû̌ kû̌ Cǒmara aplǎkûnu a htû bǎ pwa̤ma̤ta̤ dǒ aplǎkû tôpwa̤ hǒ. Htokhôtô̤̌ sî hètǒ̤ dǒ Běcǎ Yeshǔ asǐ lǎ̤sǐlò̤ agûlǎ̤ dǒ awô̌ khlo pe kû̌ Khûabelǎ asǐnu a ô̌ hǒ. ^l

25 Pô̤̌nudě, pô̤̌khô sî gǔ htû kòyò dǒ a ganǎ̤de Cǒmara alě̤pwe̤htò̌ dě a htè̌shěshu Cǒmara nutokhlǒ tô̤̌nu, ô̌sè̌rè̌ lô̌khô sînǎ̤ nî̌꤮. Bǎ Isôrělaphû̌ tokhlǒ ganǎ̤de ta̤dǐsè̌rè̌ asî dǒ hǎkhû̌nu akhanu, asî ganǎ̤de lô̌khô lû̌ûyô̤̌ tô̤̌. Pô̤̌nudě a khlè̌ hǎplǎbò̌ lô̌khô kû̌ ta̤cî̌htò̌ tô̤̌. Kè̌ ma̤pô̤̌nudě kè̌ pa htè̌shěshu dǒ mǒkhû̌ nutôpwa̤ dǔlè̌lṳ̌ panu kè̌hî̌dě, gènè̤kè̌mò̌, sî khlè̌ hǎplǎ bò̌jò pe kû̌ Cǒmara a ta̤cî̌htò̌ tîkî̌꤮ nô̌tô̤̌hǒ. ^m 26 Bǎnuakha Cǒmara ayô̤̌nu apwe̤ guyṳ̌ bò hǎkhû̌ tôbǎ. Bǎbǎkǎlè khònò̤̌dě a olò̤ kû̌, “He gǔ ma̤ guyṳ̌ pô̤̌gesô̌ pě tôplǎ, dě he ma̤ guyṳ̌ tǒ̤ hǎkhû̌ nutô̤̌, he ma̤ guyṳ̌ pô̤̌ bò mǒlǎ̤ tokhlǒ pě,” ⁿ a hî̌ pô̤̌nu. 27 A hî̌ kû̌, “Ma̤pô̤̌ sô̌ pě,” yô̤̌mûyô̤̌sǎ mî̌, a shôbǐǐlṳ̌phlô kèhto kû̌ Cǒmara ma̤ guyṳ̌htò̌ bò ta̤bô̌lò̤ nutokhlǒ pě, dě a hǎmǎkè bò pě. A guyṳ̌ jòtô̤̌ tokhlǒ gǔ ô̌kè pwǎ ayanu, Cǒmara ma̤guyṳ̌ pô̤̌nupwǎ.

28 Pô̤̌nudě, pa hî̌bwǐhî̌sîrî wô̤̌wô̤̌ lû̌û Cǒmara tǎ꤮, ma̤titèhî̌dě pa nǐ̤bǎ shigǎ dǒ a guyṳ̌ jòtô̤̌ nutôgǎ. Pa gǔ cabahtò̌ Cǒmara kû̌ ta̤caba dǒ atô kû̌ asǎphlǒ kû̌ ta̤ǐsha bè̌dubè̌nǎ̤ lû̌û akûnu tǎ꤮. 29 Ma̤titèhî̌dě pa Cǒmara mî̌ asô̌sô̌kû̌ mî̌gè̌htò̌ dǒ a gè̌sikè kòyò nuhǒ. ^o