Hebrews 13
Ta̤ma̤tô Cǒmara asǎphlǒ
1Mô̤ǐhè kè̌khî lô̌khô lû̌û tôpwa̤ kû̌ tôpwa̤ pô̤̌ khrǐphû̌ tôbǎ mô̤ǐ kè̌khî lû̌û tôpwa̤ kû̌ tôpwa̤ nunî̌꤮. 2Shôpe̤ kaǎshǔ tǎ̤ lô̌khô shǐpwǎ̤shǐmè̤ tǎ̤mǎ̤ nî̌꤮. Kòyò tokhlǒkhlǒ nî̌ asî kaǎshǔ lô̌khô shǐpwǎ̤ dě dǒ a ta̤gènè̤ tǒ̤tô̤̌ akûnu, a kaǎshǔ lò̤tô mǒkhû̌ tanaphû̌ tokhlǒ. a 3Sî̌ya ma̤jè̌ pû kòyò lò̤tě̤ apô̤kû tokhlǒ dě bè̌ na sǎphlǒ pô̤̌ na lò̤tě̤ kû̌ asî dǒ apô̤kû pô̤̌nu nî̌꤮. Sî̌ya ma̤jè̌ pû kòyò dǒ a khòjî̌khòjû̌ ta̤ tokhlǒ dě bè̌ na sǎphlǒ pô̤̌ na khòbǎ ta̤ kû̌ asî pô̤̌nu nî̌꤮. 4Lǒ̤꤮ bò kòyò dǒ a ô̌hǐô̌phò dě, dǒ a ô̌ kû̌ aphû̌amanu akhû̌akhî, a bǎ bè̌dubè̌nǎ̤ ǐ lô̌khô a ô̌ kû̌ hǐkû̌phònu. Ma kû̌ wṳ̂ nî̌ bǎ cǒ lû̌û tôpwa̤ kû̌ tôpwa̤. Kòyò dǒ asǎphlǒ patǎ phû̌mò̤̌ nutokhlǒ kû̌ kòyò dǒ a cû̌sǔnṳ̌plěnṳ̌ kòyòphû̌kòyòma tokhlǒnu Cǒmara cî̌htò̌ asî pě. 5Ô̌tephe lô̌khô kû̌ ta̤mô̤ǐ ru tokhlǒ nî̌꤮. Sǎphlǒtô sǎphlǒbǎ lô̌khô kû̌ ta̤ dǒ a ô̌ kû̌ nanu tokhlǒ, ma̤titèhî̌dě Cǒmara hî̌ kû̌, “He bè̌kè nô̌ na tîkî̌꤮ tô̤̌, he wîkè nô̌ na tôkhò̌꤮ tô̤̌,” b a hî̌ pô̤̌nu. 6Pô̤̌nudě, “Cǒmara mî̌ pwa̤ dǒ a ma̤jè̌ he. Kòyò ma̤ he pô̤̌hî̌tètè̌ bǎbǎ, he ǐsha tô̤̌,” c pa hî̌ lô̌khô pô̤̌o numî̌ anǐ̤ pwǎ. 7Gènè̤htò̌sô̌ lô̌khô kòyò dǒ a htû sî ikǒlǒkòdû̌ dě a shôbǐǐ bǎ hto sî kû̌ Cǒmara alě̤ayô̤̌ nutokhlǒ nî̌꤮. Gènè̤kè̌kè̌ lô̌khô asî ata̤ô̌htûpwa̤ dǒ awô̌ nutokhlǒ, dě gû̌kè̌lû̌mò̌mṳ lô̌khô asî ta̤yṳ̌nu tokhlǒ nî̌꤮. 8Yeshǔ Khrǐ nî̌ pyǎnô̤̌ bǎbǎ, khò̌tini̤ bǎbǎ, pe̤wô̤pě bǎbǎ, a htû̌tèlè̌jò tô̤̌, tûgûlǎ̤lǎ̤ pwǎ. 9No tili̤tôlô̌ cû̌sǔnṳ̌plěnṳ̌ tǎ̤ sî kû̌ lǒ̤bò ta̤sû̌ǐtòwòǐ dǒ a khô̌ nutokhlǒ tǎ̤mǎ̤ nî̌꤮. Gû̌ cû̌ kû̌ tǎ̤mǎ̤ nî̌꤮. Sî sǎphlǒ nî̌, a tô nǐ̤khû̌nǐ̤ǎ kû̌ Cǒmara abwǐsîrî akhû̌akhî pwǎ. Dǒ sî ganǎ̤de gû̌ma̤ shǎǎshǎô a ta̤sû̌ta̤tòwò tokhlǒ akhû̌khî dě sî sǎphlǒ khû̌ǎhtò̌ tô̤̌ pô̤̌nu mè̤̌tô̤̌. Sî ganǎ̤de gû̌ma̤ kû̌ ta̤sû̌ta̤tòwò akhû̌khînu, a nǐ̤bwǐnǐ̤sîrî dǒ sîya tôcǒ꤮ tô̤̌. 10Pa dǒ a yṳ̌ǎ Khrǐ tokhlǒ ayanu, pa ô̌ kû̌ pa ta̤lṳhtò̌awǎ̤ hǒ. Bǎbǎkǎlè Yǔdaphû̌ pwa̤shû̌gǎ dǒ a lṳhtò̌ ta̤ dě a ma̤ta̤ dǒ hǐphû̌dû̌ akû tokhlǒ nî̌, ta̤lṳhtò̌ dǒ pa ǎ dě anǐ̤nu asî ǎnǐ̤ kû̌ kòyò tô̤̌. 11Yǔdaphû̌ pwa̤shû̌gǎ ikǒlǒkòdû̌lǒ tôpwa̤ nî̌ a phî̌nṳ̌ ta̤phû̌ta̤wè̤ asǐ dě a cû̌nṳ̌ dǒ ta̤lǎ̤ plò̌shǐlǒ nutôtô̤̌ dě a nṳ̌ lṳhtò̌ bǎ kòyò ta̤lṳhtò̌ dǒ a gǔ plûkè kòyò ta̤sǔ nutokhlǒ. Bǎbǎkǎlè ta̤phû̌ta̤wè̤ anǎ̤glǒ tokhlǒnu kòyò bǎ cû̌ shû̌ukè bò a dǒ ta̤lṳhtò̌hô awe̤khlo. d 12Pô̤̌nudě pô̤̌khô Yeshǔ gǔ ma̤ plò̌shǐ kòyò hǎkhû̌phû̌ tokhlǒ kû̌ sǐ ayanu a bǎcû̌ tṳ̌sikhòsi anǎ̤ dǒ wî̤̌khlo tôkû. 13Pô̤̌nudě pa gǔ cû̌ khòwô̤̌wô̤̌ kû̌ ta̤pîjî̌ǐsho kû̌ a dǒ wî̤̌khlonu tǎ꤮. ▼▼pa gǔ cû̌khòwô̤̌wô̤̌gû̌ ta̤pîjî̌ǐsho kû̌ a yô̤̌mûyô̤̌sǎ mî̌, pa yṳ̌ǎ gû̌ma̤ pe Yǔdaphû̌ a ta̤lṳta̤tòhtò̌ tokhlǒ kû̌ a ta̤cubucaba alǎ̤klô tokhlǒ tô̤̌. Mè̤̌mè̤̌tôkhônu, pa gǔ yṳ̌ǎ tǒ̤pwǎ Yeshǔ nô̤̌ pwǎ. Pa glè̌ gû̌ Yeshǔ kò dě pa yṳ̌ǎ a akhû̌akhîdě kòyò glè̌ pî̤jî̌ǐsho pa bǎbǎkǎlè pa ǐsha petô̤̌ hǒ.
14Ma̤titèhî̌dě wî̤̌ dǒ paya dǒ a ô̌měô̌gle tûjû̌pwa̤ dǒ hǎkhû̌nu a ô̌ tôwî̤̌ tô̤̌. Pa kè̌lǎ wî̤̌ dǒ a glè̌ hè pěnu tôwî̤̌. 15Pô̤̌nudě, dǒ pa Běcǎ Yeshǔ Khrǐ a ta̤ma̤jè̌ pa akhû̌akhî, pa gǔ lṳhtò̌ pa ta̤htû̌sò̌htò̌ a ta̤lṳhtò̌ dǒ Cǒmara a ô̌ pṳ̂̌꤮ tôplǎ dǒ a amè̤̌kû̌ Yeshǔ mî̌ pa Běcǎ, pa olò̤ pô̤̌onu tǎ꤮. 16Ma̤wô̌ta̤ tokhlǒ bǎbǎ, ta̤ma̤jè̌ma̤kwe kè̌khîlû̌ tôpwa̤ kû̌ tôpwa̤ tokhlǒnu bǎbǎ shôpe̤ lô̌khô tǎ̤mǎ̤ nî̌꤮, ma̤titèhî̌dě hǒtokhlǒ numî̌ ta̤lṳta̤tòhtò̌ dǒ atô Cǒmara asǎphlǒ. 17Ganǎ̤de lô̌khô sî ta̤cubucaba a ikǒlǒkòdû̌ tokhlǒ ayô̤̌ dě gû̌ma̤ pô̤̌ asî hî̌lò̤ nunî̌꤮. Asî ô̌pǒ̤ kè̌ǐ sî ta̤ô̌htûpwa̤ dě ta̤ dǒ asî ma̤ tokhlǒnu, a bǎ hî̌lṳ̌ getîkhî sô̌ Cǒmara pě. Sî kè̌ dò̌nò̌ku tô̤̌ hî̌dě a ma̤ kû̌ ta̤sǎplǎ̤sǎyṳ pě. Dě a htûbwǐhtûsîrî dǒ sîya tôcǒ꤮ tô̤̌. 18Kwicaba bǎ pô̤̌ lô̌khô dǒ paya. Pa sî̌ganǎ̤ tě̤tě̤mè̤̌mè̤̌ kû̌ dǒ pa sǎphlǒkûnu mô̤mô̤̌꤮ a mô̤ pwǎ, a bè̌ pa ta̤sǔ tôcǒ꤮ tô̤̌. Htodě pa ma̤ta̤ titètè̌ bǎbǎ, pa sǎyṳ ma̤shěshupwǎ ta̤ dǒ atô tokhlǒ pṳ̂̌꤮ tôplǎ. 19Dě sî kwicaba akhanu, he kwisǎyṳ sî kû̌ pô̤̌khô Cǒmara gǔ sûgetîkhî sô̌ he dǒ sîô̌ nudě, kwi cabashû̌shû̌ bǎ pô̤̌ lô̌khô dǒ heya nî̌꤮. Ta̤kwicaba dǒ agutṳ̌kò
20– 21Pô̤̌khô sî gǔ ma̤tôma̤bǎ ta̤pè̤̌ta̤dû a Cǒmara nutôpwa̤ asǎphlǒ nudě, ta̤wô̌ lǒ̤bò dǒ sî lṳ̂bǎ tokhlǒnu, a gǔ ǐ bòmǔtegle pû sî nî̌꤮. Dǒ Yeshǔ Khrǐ akhû̌akhî, Cǒmara gǔ ma̤ta̤ dǒ pakû pô̤̌ atô kû̌ asǎphlǒ nutokhlǒ nî̌. Cǒmara ma̤htûpwa̤ getîkhî hto pa Běcǎ Yeshǔ dǒ ta̤si hǒ. Dě dǒ Běcǎ Yeshǔ tṳ̌sikhòsi asǎphlǒ dě asǐ bǎ sǐlò̤ akhû̌akhî, a ma̤měma̤glekè hto Cǒmara a ta̤olò̤ asa dǒ a ô̌ tûjû̌pwa̤ nutômûhǒ. Dǒ a ma̤hto pô̤̌nu akhû̌akhî, Yeshǔ htû pa pwa̤kè̌sû̌phû̌ dǒ adû̌lǒ tôpwa̤ hǒ. Pa mî̌ asû̌phû̌ tokhlǒ hǒ. Kòyò gǔ ma̤bwǐdû̌ma̤sîrîhtû pû Yeshǔ Khrǐ tûjû̌pwa̤ talakhǎ nî̌꤮.Ta̤hî̌bǎ dǒ agutṳ̌kò
22He sû̌khô sî, lî̤ dǒ he wě̤ ǐkhû̌ǐǎ sînu a htû bǎtô̤̌. Htodě he kwisǎyṳ sî dǒ sî gǔ sǎphlǒhtû dě ganǎ̤de he ta̤ǐkhû̌ǐǎ sînu nî̌꤮. 23He sǎyṳ dǐsî̌ganǎ̤ bǎ sî kû̌ kòyò plûhtò̌hto pa pṳ̌wè̤̌ Khûtîmôte dǒ apô̤kû hǒ. A kè̌ hètǒ̤ lǎ kû̌ he pě hî̌dě htû̌꤮ he hè ô̌lè kû̌ sî pěnu, he gǔ kaǎhèǐ a pě. 24Shôbǐǐ lṳ̌cû̌ bǎpû pa ta̤hî̌mô̤hî̌wô̌ tokhlǒnu kû̌ sî ikǒlǒkòdû̌ lǒ̤꤮ bò kû̌ lǒ̤bò Cǒmara a kòyò nutokhlǒ nî̌꤮. Htodě pa pṳ̌wè̤̌ khrǐphû̌ dǒ Italigǎ nutokhlǒ sûhè padô̌ sî ata̤hî̌mô̤hî̌wô̌ tokhlǒ. 25Cǒmara abwǐsîrî ô̌kû̌ pû sî lǒ̤bò nî̌꤮.
Copyright information for
KxfSCKXF