Hebrews 2
Ta̤ma̤hǎplǎge dǒ adû̌ayô̤̌
1Dǒ pa sî̌yahto kû̌ Cǒmara aphû̌khû mî̌ adû̌ayô̤̌ pô̤̌nu akhû̌akhî, pô̤̌khô pa gǔ cû̌tephekè ta̤tě̤ta̤mè̤̌ dǒ pa ganǎ̤de hto nutô̤̌ ayanu, pa bǎ bè̌dubè̌nǎ̤khlo yǎ. 2Cǒmara ǐlò̤ paphipaphu dǒ awǐkha tokhlǒ ta̤we̤ta̤kè tôcǒ. ▼▼ta̤we̤ta̤kè hǒtôcǒ numî̌ ta̤sû̌ta̤tòwò dǒ Cǒmara ǐlò̤ Khûmṳ̂shě nuhǒ.
Dě a hî̌bǎlò̤ tutṳ̌ kû̌ mǒkhû̌ tanaphû̌ tokhlǒ. Dě kòyò dǒ a ganǎ̤de ta̤we̤ta̤kè hǒtokhlǒnu, a bǎ ganǎ̤de gû̌ma̤ yǎ. Kòyò dǒ a ganǎ̤de gû̌ma̤ kû̌ kòyò tô̤̌ tokhlǒnu, Cǒmara cî̌htò̌ hto asî pô̤̌ a gwǎ kû̌ asî nuhǒ. 3Pô̤̌nudě, khònò̤̌ pa kè̌ bè̤̌dubè̌nǎ̤ kû̌ kòyò ta̤ma̤hǎplǎge adû̌ayô̤̌nu tô̤̌ hî̌dě Cǒmara gǔ cî̌htò̌ mè̤̌mî̌ca pa pě. Cǒmara a ta̤ma̤hǎplǎge aklè̌aklònu, Běcǎ anǎ̤glǒ shôbǐǐlṳ̌ wǐ bǎ kòyò hǒ. Dě kòyò dǒ a ganǎ̤de lû̌û hî̌nu tokhlǒnu a shôbǐǐlṳ̌pô̤̌ bǎ tutṳ̌ pa kû̌ ta̤ma̤hǎplǎge ta̤we̤ta̤kè tokhlǒ numî̌ a mè̤̌mî̌ca pô̤̌nu. 4Cǒmara shôbǐǐlṳ̌phlô bǎpô̤̌ kòyò kû̌ dǒ ta̤ma̤hǎplǎge ta̤we̤ta̤kè numî̌ atô mè̤̌mî̌ca. Dǒ ta̤dǔlè̌lṳ̌ ta̤ma̤dòǐ khěkhô̌ sî, ata̤ma̤ cô̌klǐcô̌sè sî kû̌ ata̤ma̤ ǒò̌ kiti̤kaa sî akhû̌akhî, a dǔlè̌lṳ̌phlô hto kòyò kû̌ ta̤ma̤hǎplǎge ta̤we̤ta̤kè numî̌ a tôhǒ. Htokhôtô̤̌, jû̌ tûû̌ atô Cǒmara asǎphlǒ dě a ǐlò̤ kwe bǎ kòyò ta̤sî̌ta̤jò̌ sû tokhlǒ. Dě a ǐlò̤ tutṳ̌ kû̌ Yôla Plò̌shǐ Běcǎ. Dǒ Yôla Plò̌shǐ Běcǎ Yeshǔnu tokhlǒ akhû̌akhî, Cǒmara dǔlè̌lṳ̌phlô bǎ kò kû̌ ta̤we̤ta̤kè numî̌ a tôhǒ. Kòyò dǒ a sûcû̌ pa dǒ ta̤ma̤hǎplǎge tôpwa̤
5Pa hî̌ bǎ sî kû̌ hǎkhû̌sa ô̌htò̌ dǒ nô̌kòpě awe̤akè numî̌, Cǒmara rû̌htò̌ mǒkhû̌ tanaphû̌ tokhlǒ dǒ a glè̌ bǎ pǒǐ ta̤ayanu mè̤̌bǎtô̤̌. 6A rû̌htò̌ tèplè̌ khô̌ dǒ kòyòphû̌khû tôkhôhǒ, ma̤titèhî̌dě ta̤hî̌bǎ ô̌dǒ lî̤plò̌shǐkû tôtô̤̌ dě a hî̌ kû̌, b “Ǒ꤮ Cǒmara, na cû̌ shôpe̤nǎpè̤̌pe kòyòhǎkhû̌phû̌ tokhlǒ tô̤̌ hî̌dě, asî mî̌ kòyò hî̌tè tokhlǒ ya? Asî mî̌ kòyò dǒ alě̤apwî̤ ô̌ kû̌ kòyò tô̤̌ tokhlǒpwǎ dě na cû̌ kè̌khwè̌ǐ tûû̌ asî pwǐ꤮ numî̌ ama̤mî̌titè? 7Na ǐ kòyòhǎkhû̌phû̌ tokhlǒ a ta̤siwi̤sòwò̤ dǒ ajǎkhlo kû̌ mǒkhû̌ tanaphû̌ tokhlǒ tashò̌phû̌nô̤̌ bǎbǎkǎlè dǒ nô̌kònu, na ǐ sô̌ asî ta̤bwǐdû̌sîrîhtû, dě na bè̌dû̌bè̌htû sô̌ asî nutokhlǒ, dě 8Na no pǒǐ bò̌꤮ bò asî,” c a hî̌ pô̤̌nu. Bǎ Cǒmara nopǒ ta̤lǒ̤꤮ bò kû̌ asî akhapěnu, ta̤dǒ a pǒtǒ̤ta̤tô̤̌nu a ô̌ pe tôcǒ tô̤̌ hǒ. Bǎbǎkǎlè khònò̤̌ khanu pa kè̌shǐ kòyò hǎkhû̌phû̌ pǒbò ta̤lǒ̤꤮ bò khôtô̤̌. 9Bǎbǎkǎlè, ta̤we̤ta̤kè dǒ pa sî̌ganǎ̤ mè̤̌mî̌ca numî̌ amè̤̌ Yeshǔ nuhǒ. Bǎ a hèlò̤ dǒ hǎkhû̌ akhanu, a nǐ̤bǎ ta̤siwi̤sòwò̤ dǒ ajǎkhlo kû̌ mǒkhû̌ tanaphû̌ tokhlǒ tashò̌phû̌nô̤̌, ma̤titèhî̌dě, dǒ Cǒmara abwǐsîrî akhû̌akhî, Yeshǔ bǎ tṳ̌sikhòsi bǎ pa lǒ̤꤮ bò aya. Dǒ Yeshǔ tṳ̌sikhòsi akhû̌akhî, khònò̤̌ pa sî̌ganǎ̤ kû̌ Cǒmara no ta̤bwǐdû̌sîrîhtû, bè̌dû̌bè̌htû kòyò kû̌ Yeshǔ hǒ. 10Lǒ̤꤮ bò ta̤nutokhlǒ mî̌ Cǒmara aya lǒ̤꤮ bò pwǎ dě a bô̌lò̤ ǐ bò ta̤ pṳ̂̌꤮ tôcǒ hǒ. Pô̤̌khô Cǒmara gǔ ǐ padô̌ kòyò saprṳ̂ kû̌ a ta̤bwǐdû̌sîrîhtû tokhlǒ ayanudě, a ma̤lǒhtò̌behtò̌ Běcǎ Yeshǔ kû̌ a no khòjî̌khòjû̌ lû̌û nuhǒ. Cǒmara ma̤ ta̤ pô̤̌o numî̌ atô pwǎ. Dě Běcǎ Yeshǔ htû bǎ pa pwa̤sû klè̌ dǒ a ma̤hǎplǎge pa tôpwa̤ pě. 11Yeshǔ ma̤ mṳ̂̌plîge kòyòhǎkhû̌phû̌ tokhlǒ a ta̤ma̤sǔ tokhlǒ. Kòyòhǎkhû̌phû̌ dǒ Yeshǔ ma̤ mṳ̂̌plîkè asî ta̤sǔ nutokhlǒ kû̌ Yeshǔ numî̌, apha jû lû̌û tôpwa̤ nupwǎ akhû̌akhî, Yeshǔ kaǎ asî kû̌ pṳ̌wè̤̌nu a sòwò̤̌ tô̤̌. 12Dě Yeshǔ hî̌ Cǒmara kû̌, “He hî̌lṳ̌ bǎ he pṳ̌wè̤̌ tokhlǒ kû̌ nami̤ pě. Dǒ kòyò cubucaba plǒ lû̌û aklǎmakûnu, he htû̌sò̌htò̌ na pě.” d 13A hî̌ pô̤̌ kû̌, “He nǎla̤ǐ yṳ̌ǎ Cǒmara.” e Dě a hî̌ pô̤̌ kû̌, “He ô̌plǒ kû̌ phû̌mǒ̤phû̌khû dǒ Cǒmara ǐlò̤ he tokhlǒ bǒo.” f 14Phû̌mǒ̤phû̌khû a kaǎ lû̌û tokhlǒnu, a ô̌ kû̌ anǎ̤glǒ sǐshi dǒ a sijònu akhû̌akhî, Běcǎ Yeshǔ hèlò̤ phî̌nṳ̌ kû̌ kòyò hǎkhû̌phû̌ anǎ̤glǒ dǒ a sô̌sô̌kû̌ kû̌ asînu. A htûhtò̌ sô̌sô̌kû̌ kòyòhǎkhû̌phû̌ akhû̌akhî, a si jò. Pô̤̌khô Yeshǔ gǔ ma̤pî̌kè hǎkhû̌tana dǒ kòyò kaǎ kû̌ Sehtô dǒ a ô̌ kû̌ a ta̤pô̤ta̤phǎ shû̌sho dǒ a pǒǐ ta̤si nutôdo ayanu, a tṳ̌sikhòsikè anǎ̤ hǒ. 15Htokhôtô̤̌ dǒ a tṳ̌sikhòsi akhû̌akhî, a plûhǎhtò̌ pilikè kòyò dǒ a ǐsha ta̤si alǎ̤ nutokhlǒ hǒ. Asî hǒtokhlǒnu asô̌sô̌ kû̌ a htû ta̤si ajû̌ tokhlǒ hǒ, dě sahtò̌ dǒ a ô̌phijǎlò̤lû̌ akhape a ǐsha lô̌khô ta̤si alǎ̤. 16Pa sî̌ganǎ̤phlôphlǔ kû̌ Běcǎ Yeshǔ ma̤jè̌ mǒkhû̌ tanaphû̌ tokhlǒ tô̤̌. A ma̤jè̌ tèplè̌ bǎ dǒ PhaAbraha akhlialè tokhlǒ. g 17Pô̤̌nu akhû̌akhî, pô̤̌khô Běcǎ Yeshǔ htûdû̌ pwa̤ dǒ a ma̤ Cǒmara a ta̤phǐta̤ma̤ pô̤̌ pwa̤shû̌gǎ ikǒdû̌lǒ dǒ acǒ kû̌ ayô̤̌ dě a sǎyṳgwèbǎǐjò kòyò tôpwa̤, htokhôtô̤̌ pô̤̌khô a tṳ̌sikhòsibǎ dǒ kòyò tokhlǒ a ta̤ma̤sǔ tokhlǒ plûkè ayanu, a hèlò̤ phî̌ kòyòhǎkhû̌phû̌ alǎ̤klô sô̌sô̌kû̌ apṳ̌awè̤̌ nutokhlǒ hǒ. 18Dě khònò̤̌, anǎ̤ Běcǎ tûû̌ kè̌shǐsanǎ̤ hè bǎ hto ta̤khòjî̌jû̌ tokhlǒ, ta̤tili̤tôlô̌ tokhlǒ akhû̌akhî, kòyò dǒ a kè̌shǐtṳ̌bǎ ta̤jî̌jû̌ kû̌ ta̤tili̤tôlô̌ tokhlǒnu a ma̤jè̌bò̌ kòyò pwǎ.
Copyright information for
KxfSCKXF