Hebrews 3
Yeshǔ htû pa pwa̤shû̌gǎ ikǒdû̌
1Pô̤̌nu akhû̌akhî, pṳ̌wè̤̌ khrǐphû̌ dǒ Cǒmara kaǎ sî nutokhlǒ gènè̤ kè̌mò̌ lô̌khô Yeshǔ dǒ Cǒmara nohè htû yǎ kû̌ pwa̤shôbǐǐ Cǒmara alě̤ayô̤̌ kû̌ pwa̤shû̌gǎ ikǒdû̌lǒ tôpwa̤nu. 2Pô̤̌ Khûmṳ̂shě cǒ kû̌ ata̤ma̤ dǒ Cǒmara a hǐphû̌phòphû̌ tokhlǒ ayanu, Běcǎ Yeshǔnu, acǒ kû̌ Cǒmara dǒ a bè̌htò̌ lû̌û dě a noma̤ lû̌û kû̌ ata̤ma̤ nutôpwa̤. a 3Kòyò dǒ a ma̤htò̌ hǐ tômè tôpwa̤nu, kòyò bè̌dû̌bè̌htûkhlo a kû̌ hǐnu tômè. Pô̤̌nudě Yeshǔ nî̌ kòyò tô bè̌dû̌bè̌htûkhlo a kû̌ Khûmṳ̂shě. 4Hǐ pṳ̂̌꤮ tèmènu kòyò pwa̤ma̤htò̌ yǎ, a ô̌nò tôpwa̤pwa̤nu amè̤̌kǎ. Bǎbǎkǎlè pwa̤ dǒ a bô̌htò̌ ta̤pṳ̂̌꤮ tocǒ numî̌ Cǒmara pwǎ. 5Khûmṳ̂shě nî̌ acǒ kû̌ ata̤ma̤ dǒ Cǒmara a hǐphû̌phòphû̌ tokhlǒ aya, pô̤̌ pwa̤ma̤ta̤phû̌ tôpwa̤ nuhǒ. Dě Khûmûshě ta̤ma̤ tokhlǒnu, a dǔlè̌lṳ̌ ô̌nǎwǐ kè̌lû̌mò̌mṳ yǎ̤yô̤yǎ̤gî̌ ta̤tě̤ta̤mè̤̌ tokhlǒ dǒ Cǒmara gǔ dǔlè̌lṳ̌ kòyò dǒ nô̌kòpě tokhlǒ aya pě. 6Bǎbǎkǎlè, Khrǐ nî̌ asô̌sô̌kû̌ Khûmṳ̂shě dǒ a htû pwa̤ma̤ta̤phû̌ dǒ Cǒmara ahǐkû nutôpwa̤ mè̤̌tô̤̌. A mî̌ Cǒmara aphû̌khû tôpwa̤. A mî̌ acǒ kû̌ ata̤ma̤ dě a kè̌khwè̌ǐ apha Cǒmara a hǐphû̌phòphû̌ tokhlǒ. Pa kè̌ gû̌ khukhuhehe hè sělě kû̌ Khrǐ tǒ̤dǒ agutṳ̌ htokhôtô̤̌ ta̤ dǒ Cǒmara gǔ ǐ panu, pa kè̌ kè̌shuǐ hènè tǒ̤dǒ agutṳ̌ numî̌, pa mî̌ Cǒmara ahǐphû̌phòphû̌ hǒ.Khrǐ mî̌ adû̌khlo Khûmṳ̂shě
7Pô̤̌nudě Yôla Plò̌shǐ Běcǎ hî̌ kû̌, “Khò̌tini̤, sî kè̌ ganǎ̤de Cǒmara alě̤pwe̤htò̌ hî̌dě, 8Ǐkǒpwǐ̤ lô̌khô tǎ̤ pô̤̌ sîphisîphu nutokhlǒ tǎ̤mǎ̤ nî̌꤮. Bǎ sîphisîphu tokhlǒ ô̌ dǒ lǒ̤mî̌shô̌kla akhanu, a htè̌shěshu Cǒmara dě a ganǎ̤de lô̌khô lû̌yô̤̌ tô̤̌. A ma̤kè̌kè̌ lô̌khô Cǒmara. b 9Ně lǐ̤shi akû, he ma̤ bǎ kwè̌꤮ asî mî̌titènu, asî kè̌shǐ htohǒ bǎbǎkǎlè a ma̤kè̌kè̌ lô̌khô pe he pwǎ. 10Pô̤̌nudě he sǎphlǒdû̌ asî dě he hî̌ asî kû̌, ‘asî mî̌ kòyò dǒ asǎphlǒcǒ lô̌khô kû̌ he tô̤̌ tokhlǒ. Asî sî̌yaphlô lô̌khô ta̤ dǒ he noma̤ asî nutokhlǒ tô̤̌,’ he hî̌ asî pô̤̌nu. 11Pô̤̌nudě he sǎphlǒdû̌ asî dě he hî̌lò̤ asî ayô̤̌ tômû kû̌, ‘shigǎ dǒ he olò̤ kû̌ he gǔ ǐ kû̌ asî lǎ̤ô̌kǔ nutôkûnu, asî nṳ̌bǎ petô̤̌ hǒ,’ he ǐsho lò̤kè asî pô̤̌nu.” c 12He pṳ̌wè̤̌ sî꤮, sè̌rè̌ tûû̌ lô̌khô sînǎ̤ nî̌꤮. Bè̌ phû̌mò̤̌ lô̌khô tǎ̤ sî sǎphlǒ tǎ̤mǎ̤, sî bè̌ sî sǎphlǒ kû̌ sî yṳ̌ǎ kû̌ kòyò Cǒmara dǒ a htûpwa̤ nutôpwa̤ tô̤̌, sî cû̌ tephekè tûû̌ sîya pô̤̌nu tokhlǒnu ma̤tǎ̤ lô̌khô tôpwǎ̤꤮ tǎ̤mǎ̤ nî̌꤮. 13Mè̤mè̤̌tôkhôdě, khònò̤̌ ta̤ma̤hǎplǎge dǒ Cǒmara ǐ panu pô̤̌khô ta̤sǔ gǔ lô̌ǐplò̤ǐ tǎ̤ sî tôpwǎ̤꤮ tǎ̤mǎ̤, pô̤̌khô sî gǔ ikǒpwǐ̤ lô̌khô tôpwǎ̤ tô̤̌ ayanu, pṳ̂̌꤮ ni̤ni̤ ǐkhû̌ǐǎ ma̤jè̌ kè̌khîlû̌ tôpwa̤ kû̌ tôpwa̤ nî̌꤮. 14Ma̤titèhî̌dě, pa ta̤yṳ̌ǎ Cǒmara dǒ asakhû̌lû̌khanu, pa kè̌ pṳ̂̌měwô̌bǎ a tǒ̤dǒ agutṳ̌ hî̌dě, pa htûhto pwa̤ma̤plǒta̤ kû̌ Khrǐ hǒ. 15Htodě lî̤plò̌shǐkû hî̌ kû̌, “Sî kè̌ ganǎ̤de Cǒmara alě̤pwe̤htò̌ khò̌tini̤ hî̌nu, ikǒpwǐ̤ tǎ̤ lô̌khô pô̤̌ sîphisîphu ikǒpwǐ̤ dě htè̌shěshu Cǒmara dě ganǎ̤de lû̌ûyô̤̌ tô̤̌ nutokhlǒ ma̤nu tǎ̤mǎ̤ nî̌꤮,” d a hî̌ pô̤̌nu. 16Kòyò dǒ a ganǎ̤de hto lô̌khô Cǒmara alě̤pwe̤htò̌ bǎbǎkǎlè a htè̌shěshu Cǒmara, a ganǎ̤de lû̌ûyô̤̌ tô̤̌ tokhlǒ numî̌ mò̌pè? Kòyò nutokhlǒ mî̌ amè̤̌kû̌ Khûmṳ̂shě kaǎge asî dǒ Ijî̌gǎkûnu tokhlǒhǒ. e 17Cǒmara sǎphlǒdû̌ asî anělǐ̤shi nutokhlǒ mî̌ mò̌pè? Kòyò dǒ a ma̤sǔ Cǒmara dě a nosikè asî dǒ lǒ̤mî̌shô̌kla nutokhlǒ mè̤̌tô̤̌ ya? 18Bǎ Cǒmara hî̌lò̤ asî kû̌, shigǎ dǒ he ǐ asî kû̌ a lǎ̤ô̌kǔ aya nutôkû mî̌ a nṳ̌ bǎ petô̤̌ a hî̌ lû̌ nutokhlǒ mî̌ mò̌pè? Ahî̌lò̤ yô̤̌ numî̌, a hî̌ kòyò dǒ a ganǎ̤de lû̌yô̤̌ tô̤̌ nutokhlǒ hǒ. 19Pô̤̌nudě dǒ asî yṳ̌tô̤̌ akhû̌akhî, asî nṳ̌jò pe gǎ nutôgǎ tô̤̌ numî̌ pa sî̌yaphlôbò tûû̌ hǒ.
Copyright information for
KxfSCKXF