Hebrews 4
Lǎ̤ô̌kǔ dǒ Cǒmara a kòyò tokhlǒ aya
1Cǒmara olò̤ pe pa tǒ̤lò̤khònò̤̌ kû̌ pa nṳ̌bǎ dǒ lǎ̤ô̌kǔ agûlǎ̤nu pě. Pô̤̌khô sî pṳ̂̌꤮ tôpwa̤ gǔ nṳ̌bǎ dǒ lǎ̤ô̌kǔ dǒ Cǒmara olò̤ ayanu, pa bè̌sè̌rè̌ lô̌khô panǎ̤. 2Ma̤titèhî̌dě pa ganǎ̤de kû̌ ta̤sǎlě̤we̤kè pô̤̌ paphipaphu tokhlǒ ganǎ̤de hto nuhǒ. Ma̤titèhî̌dě asî ganǎ̤de bǎbǎkǎlè, a phî̌shěshunò lô̌khô ta̤sǎlě̤we̤kènu kû̌ ta̤yṳ̌ tô̤̌ akhû̌akhî, a htûbwǐhtûsîrî dǒ asîya tô̤̌. 3Bǎbǎkǎlè pa dǒ a yṳ̌ǎ tokhlǒnu, lǎ̤ô̌kǔ dǒ Cǒmara olò̤nu pa nṳ̌bò̌ hǒ. Kòyò dǒ a yṳ̌ǎ kû̌ kòyò Cǒmara tô̤̌ tokhlǒ ayanu, Cǒmara hî̌ asî kû̌, a “He sǎphlǒdû̌ asî dě he hî̌lò̤ phlǔkè asî kû̌, ‘shigǎ dǒ he gǔ ǐ asî lǎ̤ô̌kǔ aya tôgǎnu, asî nṳ̌bǎ petô̤̌ hǒ,’” b a hî̌ pô̤̌nu. Bǎbǎkǎlè lǎ̤ô̌kǔ dǒ Cǒmara olò̤ kû̌ a gǔ ǐ kòyò pěnu, a ma̤htopě dě a bô̌lò̤ hǎkhû̌ akha nupe hǒ. 4Ma̤titèhî̌dě susô̌tôni̤ nutôni̤ awe̤akè numî̌ lî̤plò̌shǐkû hî̌ tôtô̤̌ kû̌, “Ni̤susô̌ akûnu Cǒmara ma̤htobò ata̤ma̤ dě bǎ susô̌tôni̤ nutôni̤ nî̌ a ô̌kǔ,” c a hî̌ pô̤̌nu. 5A hî̌ sô̌sô̌lû̌nu a ô̌ pe tôtô̤̌ kû̌, “Shigǎ dǒ he gǔ ǐ asî lǎ̤ô̌kǔ aya tôgǎnu, asî nṳ̌bǎ petô̤̌” a hî̌ sô̌ pô̤̌nu. d 6Kòyò dǒ a nṳ̌bǎpe dǒ Cǒmara a lǎ̤ô̌kǔnu, a ô̌kèpe tokhlǒkhlǒ. Bǎbǎkǎlè kòyò dǒnukha tokhlǒ dǒ a ganǎ̤de hto ta̤sǎlě̤we̤kè tokhlǒnu, a ganǎ̤de lô̌khô Cǒmara ayô̤̌ tô̤̌ akhû̌akhî, a nǐ̤bǎ gû̌pe kòyò lǎ̤ô̌kǔnu tô̤̌ hǒ. 7Pô̤̌nudě lṳmṳ̌ni̤ shěkhǎ dǒ kòyò gǔ nṳ̌ dǒ Cǒmara lǎ̤ô̌kǔnu, a bè̌khô̌tû̌ lṳmṳ̌ni̤ dǒ ashǔshawa̤ tôni̤. A bè̌khô̌pe lṳmṳ̌ni̤ dǒ ashǔshawa̤ tôni̤ numî̌ khò̌tini̤ hǒ. Dǒ nô̌kò něyî̤layî̤nu, Cǒmara shôbǐǐlṳ̌ tutṳ̌ bǎ ayô̤̌ tômû kû̌ Khûdawi̤ pô̤̌ he wě̤ htonu dě a hî̌ kû̌, “Khò̌tini̤ sî kè̌ ganǎ̤de Cǒmara alě̤pwe̤htò̌ hî̌dě ikǒpwǐ̤ lô̌khô tǎ̤mǎ̤ nî̌꤮.” e a hî̌ pô̤̌nu. 8Khûyṳ̂shǔ sûnṳ̌ kòyò dǒ Khanagǎ kûnu, a kè̌ mè̤̌mî̌ca gǎ dǒ Cǒmara olò̤kè lǎ̤ô̌kǔ agûlǎ̤nu tôgǎ kè̌hî̌dě, Cǒmara hî̌khô̌ bǎ lṳmṳ̌ni̤ dǒ ashǔshawa̤ tôni̤ tôkhò̌꤮ tô̤̌. f 9Pô̤̌nudě, asô̌sô̌kû̌ Cǒmara ma̤hto ata̤ma̤ ni̤susô̌ dě a ô̌kǔ dǒ lṳmṳ̌ni̤ susô̌tôni̤ nutôni̤ nuhǒ, Cǒmara a kòyò tokhlǒ genṳ̌ ô̌kǔ kû̌ Cǒmara pě. 10Ma̤titèhî̌dě, pô̤̌ Cǒmara ô̌kǔ dǒ ata̤ma̤ akûnu, kòyò dǒ a nṳ̌bǎ dǒ lǎ̤ô̌kǔ dǒ Cǒmara olò̤ tokhlǒnu, a ô̌kǔ lô̌khô dǒ ata̤ma̤ pě. g 11Pa phiphu dǒ꤮ awǐnu tokhlǒnu, a ganǎ̤dekû̌ Cǒmara ayô̤̌ tô̤̌ akhû̌akhî, a nṳ̌bǎ kû̌ kòyò dǒ Cǒmara lǎ̤ô̌kǔ agûlǎ̤nu tô̤̌. Pô̤̌khô pa gǔ gû̌kè̌lû̌mò̌mṳ kû̌ paphipaphu tôpwǎ̤ tǎ̤mǎ̤, htokhôtô̤̌ pô̤̌khô pa nṳ̌bǎ gû̌ kòyò dǒ lǎ̤ô̌kǔ agûlǎ̤ ayanu, pa tôpwa̤ kû̌ tôpwa̤ gǔ jî̌pwǐ̤wô̌ gutṳ̌ wô̤̌wô̤̌ lû̌û tǎ꤮. 12Cǒmara alě̤ayô̤̌nu, a htûpwa̤ dě a ma̤jò ta̤. A htò khlope kû̌ nò̌she dǒ a htòbò ginǐ̤khôginǐ̤gî̌ tôbǎ. A nṳ̌ pě̤phò̌ tǒ̤ dǒ yôla htûpwa̤ kû̌ ta̤ô̌htûpwa̤ lǎ̤ô̌cu lû̌û agûlǎ̤nu, htodě a nṳ̌ pě̤phò̌ tǒ̤dǒ awǐ̤ahtû̌ kû̌ ayô̤agî̌ lǎ̤ô̌ gûlǎ̤ nutôkû a dǐhǎhtò̌lṳ̌ bǎ kòyò sǎphlǒ a ta̤gènè̤ tokhlǒ kû̌ a ta̤sǎyṳ dǒ awô̌ kû̌ a phû̌mò̤̌ tokhlǒ. 13Lǒ̤bò ta̤bô̌lò̤ tokhlǒnu, Cǒmara kè̌shǐjòbò ta̤ô̌hǔô̌sè̌nu. Dǒ alô̤mô̤nu, asô̌sô̌kû̌ pa ô̌koyo lǒ̤bò pṳ̂̌꤮ tôpwa̤ pwǎ. Pa ma̤hto ta̤sî kû̌ pa gènè̤ hto ta̤ sîtokhlǒ, a kè̌shǐ sî̌ganǎ̤ bò. Pa bǎ hè shôbǐǐ htò̌lṳ̌ bò a pṳ̂̌꤮ tôcǒ pě.Yeshǔ mî̌ pwa̤shû̌gǎ ikǒdû̌lǒ tôpwa̤
14Pô̤̌nudě, pa pṳ̂̌mě̤tegle wô̌ lô̌khô pa ta̤yṳ̌ta̤nǎ̤ dǒ pa olò̤ bǎnu tǎ꤮, ma̤titèhî̌dě, pa ô̌ ǐtûû̌ kû̌ pa pwa̤shû̌gǎ ikǒdû̌lǒ nutôpwa̤, dě a cû̌nṳ̌ hto paya dǒ mǒkhû̌ hǒ. A mî̌ Cǒmara a phû̌pwa̤khû Yeshǔ nuhǒ. 15Pa pwa̤shû̌gǎ ikǒdû̌lǒ nutôpwa̤ nî̌ a sî̌ganǎ̤ pa ta̤khû̌shiǎjǎ tokhlǒ dě a sǎyṳgwèbǎǐ pa. Ma̤titèhî̌dě a kè̌shǐ tṳ̌bǎ kû̌ ta̤tili̤tôlô̌ pṳ̂̌tocǒ pô̤̌ pa kè̌shǐ tṳ̌bǎnu bǎbǎkǎlè a ma̤sǔkû̌ ta̤ tô̤̌. 16Pô̤̌nudě, pa lṳ̂bǎ ta̤ bǎkhò̌tè bǎbǎnu, pa tô hènṳ̌ khukhu dǒ pa Cǒmara dǒ a gwèbǎǐ kòyò nutôpwa̤ a lǎ̤hǎnòò̌ alô̤mô̤̌nu. Dě pa nǐ̤bǎ a ta̤sǎyṳgwèbǎǐ pě, dě pa kè̌shǐbǎ abwǐdû̌asîrîhtû dǒ a ma̤jè̌ pa nupě.
Copyright information for
KxfSCKXF