Hebrews 5
1Pwa̤shû̌gǎ ikǒdû̌lǒ pṳ̂̌꤮ pwa̤pwa̤nu, kòyò rû̌htò̌ a dǒ kòyòhǎkhû̌phû̌ tokhlǒ akla pwǎ, dě kòyò bè̌htò̌ yǎ dǒ a gǔ ma̤ bǎ Cǒmara ata̤ma̤ dǒ kòyò lǒ̤꤮ bò agûlǎ̤. A gǔ lṳhtò̌tòhtò̌ bǎ kòyò ta̤tokhlǒ, htokhôtô̤̌ pô̤̌khô kòyò tokhlǒ ta̤sǔ gǔ plûkè ayanu, a lṳhtò̌ bǎ kòyò ta̤phû̌ta̤wè̤ tokhlǒ dǒ Cǒmara a ô̌ pě. 2Asî htûpwǎ kòyòhǎkhû̌phû̌ akhû̌akhî, a ma̤sǔma̤plě lô̌khô pwǎ. Pô̤̌nudě kòyò dǒ a sî̌ganǎ̤ tě̤mè̤̌ gû̌ kòyò ta̤tě̤ta̤mè̤̌ tô̤̌ dě a ma̤sǔma̤plě ta̤ tokhlǒ ayanu, asî gènè̤ gwèbǎǐjò kû̌ kò tô̤̌. 3Htodě asî sanǎ̤ nî̌ a ma̤sǔma̤plě ta̤ akhû̌akhî, asî bǎ lṳhtò̌ bǎ pwǎtǒ̤ kòyò nutokhlǒ ata̤sǔ tokhlǒnô̤̌ mè̤̌tô̤̌, asî bǎ lṳhtò̌ padô̌ asî ta̤sǔsǔ. a 4Kòyò tôpwa̤pwa̤ bè̌htò̌jò tûû̌ anǎ̤ kû̌ kòyò gǔ htûhtò̌ pwa̤shû̌gǎ ikǒdû̌lǒnu tôpwǎ̤꤮ tô̤̌. Pô̤̌ Cǒmara bè̌htò̌ PhaArû kû̌ a gǔ htû pwa̤shû̌gǎ ikǒdû̌lǒ tôpwa̤nu, kòyò dǒ a gǔ htû pwa̤shû̌gǎ ikǒdû̌lǒ tôpwa̤ numî̌, a gǔ mè̤̌ pwǎtǒ̤ Cǒmara tôpwa̤ bǎ rû̌htò̌ a nupwǎ. b 5Pô̤̌nudě, pô̤̌khô Khrǐ gǔ htû pwa̤shû̌gǎ ikǒdû̌lǒnu, a bè̌htò̌ tûû̌ anǎ̤ mè̤̌tô̤̌, a ma̤bwǐdû̌sîrîhtû tûû̌ anǎ̤ mè̤̌tô̤̌, Cǒmara bè̌htò̌ yǎ pwǎ. Dě Cǒmara hî̌ lû̌û kû̌, “Na mî̌ hephû̌pwa̤khû, khò̌tôni̤ dě, he htû napha hǒ,” c a hî̌ lû̌û pô̤̌nu. 6Cǒmara hî̌ dǒ ashǔshawa̤ tômû kû̌, “Na htû pwa̤shû̌gǎ tûjû̌pwa̤ dǒ asô̌sô̌kû̌ pwa̤shû̌gǎ Malakhǐsedè̌ dǒ awǐkha tôpwa̤,” d a hî̌ pô̤̌ lû̌û pô̤̌nu. 7Bǎ Yeshǔ ô̌htûpwa̤ bǎ hǎkhû̌ akhanu, a kwicaba lǒ̤sû̌lǒ̤sò̌ htò̌ Cǒmara dǒ a ma̤hǎplǎjò lû̌û dǒ ta̤sinu tôpwa̤, dě a yî̤̌kǒhtò̌ mǐ̤sǎshilò̤ kè. A shò̌lò̤ asǎphlǒ dě a sǎphlǒshû̌ ganǎ̤de Cǒmara ayô̤̌ akhû̌akhî, Cǒmara ganǎ̤de a ta̤kwicaba. e 8Yeshǔ htû Cǒmara aphû̌khû tôpwa̤ bǎbǎkǎlè bǎ a khòbǎ ta̤jî̌ta̤jû̌ akhanu, a phî̌nṳ̌ tutṳ̌pe ta̤ganǎ̤de ayô̤̌ dǒ Cǒmara a ô̌. 9Bǎ Khrǐ ganǎ̤de htobò Cǒmara ayô̤̌ pṳ̂̌꤮ tocǒ akhanu, a htûhtò̌ bǎbò kòyò dǒ a ganǎ̤de lû̌yô̤̌ nutokhlǒ a ta̤ma̤hǎplǎge ajû̌jû̌ apwa̤pwa̤ a kòshî̌gutṳ̌ hǒ. 10Dě Cǒmara bè̌htò̌ yǎ kû̌ pwa̤shû̌gǎ ikǒdû̌lǒ dǒ asô̌sô̌kû̌ pwa̤shû̌gǎ Malakhǐsedè̌ ma̤ta̤ dǒ awǐkha tôpwa̤ nuhǒ.Dǐ sè̌rè̌nǎ kû̌ kòyò gǔ wîkè tǎ̤ ta̤yṳ̌ tǎ̤mǎ̤
11Lǎ̤lṳ̂ hî̌ bǎ pô̤̌ sî kû̌ ta̤we̤ta̤kènu a ô̌ dû̌ pe. Sî sî̌yaphlô pò̤̌yǎ̤ tûû̌ sîya akhû̌akhî, he shôbǐǐphlô bǎ sî dě apò̤̌yǎ̤. 12Khònò̤̌dě sî tô htû lô̌khô sara tokhlǒhǒ. Bǎbǎkǎlè sî cû̌ lǎ̤lṳ̂pe lô̌khô pwǎ kòyò bǎ sû̌ǐ getîkhî sî kû̌ Cǒmara alě̤ayô̤̌ dǒ akòshî̌ pwǎ. Sî tô ǎ kû̌ kòyò shǎǎpwǐ̤ hǒ bǎbǎkǎlè sî cû̌ ôpe pwǎ lô̌khô nṳ̌shi pwǎ. f 13Kòyò tôpwa̤pwa̤ dǒ a ôpepwǎ nṳ̌shi numî̌ a sô̌sô̌pwǎ kû̌ phijǎ dǒ a ûnû̌pe nupwǎ. Ta̤cǒta̤tè̤ awe̤akènu, a sî̌ganǎ̤ dû̌wî̤ kû̌ kòyò tô̤̌. 14Bǎbǎkǎlè, shǎǎ a pwǐ̤ numî̌ kòyò dû̌to̤yobǎ sî̌ya dǒ a sû̌ǐ sî̌ganǎ̤hè bǎ hto anǎ̤ dǒ a gǔ běphò̌ sî̌ganǎ̤jò ta̤wô̌ kû̌ ta̤phû̌mò̤̌ nutokhlǒ aya pwǎ.
Copyright information for
KxfSCKXF