Heb 6 | KxfSCKXF | STEP | Pô̤̌nudě pa bè̌kèbò pa ta̤sû̌ǐtòwòǐ bǎ kòyò Khrǐ awe̤akè dǒ a kòshî̌ nutokhlǒ dě pa cû̌ hènè gû̌ pô̤̌ kòyò dǒ alô̤mô̤̌ dě sû̌ǐ sî̌ganǎ̤ gû̌ pô̤̌ kòyò dǒ kòyò dû̌to̤yobǎ sî̌ya alô̤mô̤̌ a ta̤sû̌ǐ nutokhlǒ tǎ꤮. Getîkhî hèyî̤yî̤ kòyò sû̌ǐ bǎ pa ta̤sû̌ǐtòwòǐ a kòshî̌ dǒ a hî̌ kû̌, sî bǎ wîkè ta̤ma̤ dǒ abwǐsîrî ô̌tô̤̌ nutokhlǒ, dě sî bǎ yṳ̌ǎ Cǒmara, ta̤sû̌ǐ pô̤̌o tokhlǒnu, pa gǔ kè̌lǎ sî̌ya getîkhîsô̌ petô̤̌, pa gǔ cû̌ sělě pô̤̌ kû̌ kòyò dǒ alô̤mô̤̌ tǎ꤮.

Hebrews 6

1 Pô̤̌nudě pa bè̌kèbò pa ta̤sû̌ǐtòwòǐ bǎ kòyò Khrǐ awe̤akè dǒ a kòshî̌ nutokhlǒ dě pa cû̌ hènè gû̌ pô̤̌ kòyò dǒ alô̤mô̤̌ dě sû̌ǐ sî̌ganǎ̤ gû̌ pô̤̌ kòyò dǒ kòyò dû̌to̤yobǎ sî̌ya alô̤mô̤̌ a ta̤sû̌ǐ nutokhlǒ tǎ꤮. Getîkhî hèyî̤yî̤ kòyò sû̌ǐ bǎ pa ta̤sû̌ǐtòwòǐ a kòshî̌ dǒ a hî̌ kû̌, sî bǎ wîkè ta̤ma̤ dǒ abwǐsîrî ô̌tô̤̌ nutokhlǒ, dě sî bǎ yṳ̌ǎ Cǒmara, ta̤sû̌ǐ pô̤̌o tokhlǒnu, pa gǔ kè̌lǎ sî̌ya getîkhîsô̌ petô̤̌, pa gǔ cû̌ sělě pô̤̌ kû̌ kòyò dǒ alô̤mô̤̌ tǎ꤮. 2 Ta̤jushi awe̤akè, bè̌htò̌ cǔde dǒ kò lô̤ sî, ta̤si ihtǒhtûpwa̤sô̌, ta̤cî̌htò̌ tûjû̌pwa̤ awe̤akè sînu, pa lǎ̤lṳ̂ sû̌ǐ sî̌ganǎ̤ gutṳ̌pe panǎ̤ tô̤̌. 3 Kè̌ Cǒmara plûcû̌ sělě pa hî̌dě pa kè̌lǎ sî̌ganǎ̤hè dû̌ pô̤̌ ta̤sû̌ǐtòwòǐ dǒ adû̌ayô̤̌ tokhlǒ dǒ alô̤mô̤̌ tôkhô pě.

4 Kòyò dǒ a wîkè ata̤yṳ̌ tokhlǒnu asî yò̤lǎ̤plǎdî̌ gejòpe asǎphlǒ tôkhò̌꤮ tô̤̌. Dǒ awǐkha, asî sî̌ganǎ̤ hto Cǒmara a ta̤tě̤ta̤mè̤̌ tokhlǒ hǒ. Asî kè̌shǐ sî̌yahèbǎ hto Cǒmara asû dě a nǐ̤bǎdû̌ hto Yôla Plò̌shǐ Běcǎ kû̌ kòyò dǒ ashǔshawa̤ tokhlǒ hǒ. 5 Cǒmara alě̤ayô̤̌nu, awô̌ mî̌ca numî̌ asî sî̌ganǎ̤hè htohǒ. Asî kè̌shǐhèbǎ hto kû̌ Cǒmara a ta̤pô̤ta̤phǎ shû̌sho dǒ a gǔ ô̌lṳ̌htò̌ bǎ kòyò dǒ nô̌kòpě tôhtu nutokhlǒ hǒ. 6 Asî kè̌ kè̌shǐhè bǎhto ta̤nutokhlǒ dě a kè̌ htû̌ti̤wǐ̤ cû̌khô̌kè kû̌ Cǒmara hî̌nu, a yò̤lǎ̤plǎdî̌ gesô̌jòpe asǎphlǒ tôkhò̌꤮ tô̤̌. Hǒnumî̌ a sô̌sô̌ kû̌ asî ma̤sihtò̌ sô̌ Cǒmara aphû̌khû dǒ nò̌dò̌htǔlô̤ dě a ma̤ sòwò̤̌kè Běcǎ Yeshǔ dǒ kòyò tôprṳ̂tôphǎ alô̤mô̤̌ hǒ.

7 Pwa̤yṳ̌ǎta̤phû̌ dǒ asô̌sô̌kû̌ hǎkhû̌ dǒ a cî̌ô sǎla̤la̤ gǎjushi dě a nosǎhtò̌wî̤ sǎhtò̌wô̌ bǎ pwa̤ma̤ǎwe̤ ma̤ǎlè̤̌ aya tokhlǒnu, Cǒmara gǔ ǐshowî̤ asî pě. 8 Bǎbǎkǎlè hǎkhû̌nu a kè̌ no dô̌htò̌ pwǎ ta̤shî̌shô̌mṳ̌ kû̌ jôjǔjôpò̤mṳ̌ tokhlǒpwǎ numî̌, abwǐsîrî ô̌ tôcǒ꤮ tô̤̌. Yî̤khôtô̤̌nu Cǒmara gǔ cî̌htò̌ asî dě a gǔ shû̌ǔkè asî kû̌ mî̌ pě. ^{▼▼Pô̤̌nudě, Cǒmara gǔ cî̌htò̌ kòyò dǒ asô̌sô̌kû̌ hǎkhû̌ nutokhlǒ pě.} ^b

9 Bǎbǎkǎlè khôbǒsû̌ sî, pa hî̌cǒ pô̤̌o bǎbǎkǎlè pa yṳ̌ǎnṳ̌ sî pwǎ. Pa yṳ̌ǎnṳ̌ mè̤̌mî̌ca kû̌ sî gǔ ma̤ pwǎ ta̤wô̌ tokhlǒ pě. Ta̤wô̌ tokhlǒnu, a hè dǒ sî nǐ̤bǎ ta̤ma̤hǎplǎge a ô̌ pwǎ. 10 Cǒmara mî̌ a ma̤ ta̤cǒ pwǎ. Ta̤ma̤wô̌ dǒ sî ma̤hto tokhlǒnu a shôpě̤ tô̤̌. Ta̤mô̤ dǒ sî dǔlè̌lṳ̌ hto dǒ aya kû̌ sî ma̤jè̌ a kòyò tokhlǒ dě sî ma̤jè̌ hè sělě asînu a shôpe̤ bǎtô̤̌. 11 Pa ta̤sǎyṳ mî̌ pô̤̌o: pô̤̌khô ta̤wô̌ dǒ sî sǎphlǒhtû ô̌pǒ̤kè̌shěshu tokhlǒ gǔ lǒhtò̌behtò̌ bǎ sî ayanu, pa sǎyṳ dǒ sî pṳ̂̌꤮ tôpwa̤ gǔ sǎphlǒshû̌ ma̤ lô̌khô tǒ̤dǒ agutṳ̌ pô̤̌ sî ma̤htonu. 12 Pa sǎyṳ nohtû sî kòyò cè̌klè tô̤̌. Mè̤mè̤̌tôkhô pa sǎyṳ no sô̌sô̌ sî pô̤̌ kòyò dǒ a yṳ̌ǎ dě a khòsǎdô ta̤ khònò̤̌ nutokhlǒ pwǎ. Dě dǒ kòyò nutokhlǒ ma̤pô̤̌nu akhû̌akhî, asî nǐ̤bǎ lô̌khô Cǒmara a ta̤olò̤ nutokhlǒ pě.

Cǒmara a ta̤olò̤ mî̌ a tě̤mè̤̌

13 Bǎ Cǒmara olò̤ ayô̤̌ tômû kû̌ PhaAbraha akhanu, a wṳ̂̌dòlò̤ hto ayô̤̌ kû̌ a gǔ ma̤ pô̤̌ a olò̤nu. Kòyò dǒ adû̌khlo kû̌ lû̌ûnu a ô̌ tôpwǎ̤꤮ tô̤̌ akhû̌akhî, bǎ a wṳ̂̌dòlò̤ ayô̤̌ akha, a pô̤ ǐtûû̌ ami̤ pwǎ. 14 Cǒmara hî̌ lû̌û kû̌, “He olò̤ na kû̌ he gǔ ǐshowî̤ na, he gǔ no ô̌wô̤̌ô̌dû̌ nakhlinalè tokhlǒ pě,” ^c a hî̌ lû̌û pô̤̌nu. 15 PhaAbraha ô̌pǒ̤ khòsǎdôǐ, dě dǒnô̌kònu a nǐ̤bǎ Cǒmara olò̤ lû̌yô̤̌ nutômû.

16 Bǎ kòyò tôpwa̤pwa̤ sǎyṳ dǐsî̌ganǎ̤ bǎ kòyò kû̌ a ta̤hî̌bǎ numî̌ a tôpwǎ akhanu, a wṳ̂̌dò a ta̤hî̌bǎ ayô̤̌nu kû̌ kòyò dǒ a ô̌ kû̌ apô̤aphǎ shû̌sho tôpwa̤pwa̤ ami̤. Ma̤titèhî̌dě, a kè̌ wṳ̂̌dò pô̤̌nu hî̌dě, a ma̤ ô̌kǔkè ta̤to̤klî̌ lû̌û. 17 Kòyò dǒ a nǐ̤bǎ Cǒmara a ta̤olò̤ tokhlǒnu, Cǒmara sǎyṳ nosî̌ganǎ̤ tě̤tě̤mè̤̌mè̤̌ asî kû̌ pô̤̌ Cǒmara olò̤ hto asînu, a gǔ ma̤ lǒbe pô̤̌nu pě, a htû̌lè̌ tèplè̌ petô̤̌ akhû̌akhî, dǒ a ta̤olò̤ akûnu, a wṳ̂̌dò nṳ̌pa ayô̤̌ bǎnu. 18 Pô̤̌nudě Cǒmara ǐ bòkè pa a ta̤olò̤ kû̌ a ta̤wṳ̂̌dòlò̤ ayô̤̌ ginǐ̤cǒbò hǒ. Cǒmara lòhôjòtô̤̌ akhû̌akhî, ginǐ̤cǒnu a htû̌lè̌ tèplè̌ khô̌jò tô̤̌tô̤̌. Pa dǒ a khlè̌ tûdûbǐ dǒ Cǒmara a ô̌ tokhlǒnu, dǒ Cǒmara htû̌lè̌ tèplè̌ khô̌jò pe a ta̤olò̤ tô̤̌ akhû̌akhî, pa sǎphlǒmô̤ sǎphlǒshû̌htò̌ mî̌ca. Dǒ pa sǎphlǒmô̤ sǎphlǒshû̌ akhû̌akhî, ta̤kè̌shuǐ dǒ Cǒmara ǐ panu, pa pṳ̂̌mě hènè sělě dǒ agutṳ̌ hǒ. 19 Pa ta̤kè̌shuǐnu asô̌sô̌kû̌ lǒ̤dû̌ dǒ a cî̌ ô̌kǔmě sǒkhlidû̌ dǒ pa ta̤htûpwa̤ aya tômè nuhǒ. Pô̤̌ pwa̤shû̌gǎ ikǒdû̌lǒ nutôpwa̤ nṳ̌cû̌ tûlû̌bò̌ kû̌ gò̌pwǐ pṳdû̌ dǒ kòyò jǒlò̤tě̤bǐ a dǒ ta̤lṳhtò̌ hôkû nutôpṳ, dě pô̤̌ a nṳ̌ tǒ̤ dǒ ta̤lǎ̤ aplò̌shǐ akûnu, pa ta̤kè̌shuǐ nî̌ a měgle, a tě̤tě̤mè̤̌mè̤̌, dě a sûnṳ̌ padô̌ tûû̌ pa dǒ Cǒmara alô̤mô̤̌ pô̤̌nudě. ^d 20 Yeshǔ cû̌nṳ̌wǐ hto pagûlǎ̤ dǒ alô̤mô̤̌ hǒ. A htû hto pa pwa̤shû̌gǎ ikǒdû̌lǒ dǒ a ô̌ khòyî̤ tûjû̌pwa̤ nuhǒ. A mî̌ a sô̌sô̌ kû̌ pwa̤shû̌gǎ Malakhǐsedè̌ dǒ awǐkha tôpwa̤hǒ. ^e