Hebrews 7

Pwa̤shû̌gǎ ikǒdû̌ Malakhǐsedè̌

1Malakhǐsedè̌ mî̌ Wî̤̌shale̤ akhwǐ tôpwa̤, dě a htû Cǒmara dǒ adû̌gutṳ̌ nutôpwa̤ a pwa̤shû̌gǎ tôpwa̤. Bǎ PhaAbraha cû̌shěpè̤̌ hto khwǐ sò̌lǐ̤ dě a ge dǒ klè̌lô̤ akhanu, Malakhǐsedè̌ cû̌ kè̌shǔǐ lû̌û dě ǐshowî̤ lû̌û. ^a 2Dě PhaAbraha ǐ bò yǎ tě̤ta̤ dǒ a nǐ̤bǎ nutokhlǒ pû̌shǐnutôpû̌. Malakhǐsedè̌ ami̤ yô̤̌mûyô̤̌sǎ awǐlǒ tômû mî̌ “Ta̤cǒta̤tè̤ akhwǐ.” htodě Shale̤ yô̤̌mûyô̤̌sǎ mî̌ sǎphlǒ gûjû̌kabǎ akhû̌akhî, ami̤ ô̌pô̤̌ tûû̌ kû̌, “Sǎphlǒ ta̤gûjû̌kabǎ akhwǐ.” ^b 3Malakhǐsedè̌ apha bǎbǎ, amǒ̤ bǎbǎ, aphiphu khlilè tokhlǒ bǎbǎ, kòyò wě̤mǎnǎ bǎ a tôcǒ꤮ tô̤̌. A ta̤ô̌phijǎlò̤ kû̌ ata̤si awe̤akè tokhlǒnu bǎbǎ, kòyò wě̤mǎnǎ bǎ yǎ tô̤̌tô̤̌. A mî̌ asô̌sô̌kû̌ Cǒmara aphû̌khû tôpwa̤. A htû pwa̤shû̌gǎ tûjû̌pwa̤.

4A nu, a htûdû̌ pwǐ꤮ tènu gènè̤kè̌ lô̌khô mò̌. Papha PhaAbraha dǒ ami̤ lṳ̌shilṳ̌gǎ tôpwa̤nu a ǐ lû̌û pû̌shǐnutôpû̌ kû̌ ta̤ dǒ a cû̌ shěpě̤ dě a phî̌ge nutokhlǒ. 5Khònò̤̌dě ta̤sû̌ta̤tòwò hî̌ Khûle̤wǐ akhlialè dǒ a htû pwa̤shû̌gǎ nutokhlǒ kû̌, asî gǔ kwi pû̌shǐnutôpû̌ dǒ apṳ̌wè̤̌ Isèrèlaphû̌ tokhlǒ a ô̌. Isèrèlaphû̌ tokhlǒ numî̌, PhaAbraha akhlialè gelò̤ tutṳ̌ bǎbǎkǎlè KhûLe̤wǐ akhlialè tokhlǒ bǎ kwi asî pwǎ. ^c 6Malakhǐsedè̌ mî̌ akhlialè gelò̤ dǒ KhûLe̤wǐ mè̤̌tô̤̌ bǎbǎkǎlè a phî̌ pû̌shǐnutôpû̌ dǒ PhaAbraha a ô̌. Dě a ǐshowî̤ PhaAbraha. PhaAbraha mî̌ pwa̤ dǒ a nǐ̤bǎ Cǒmara a ta̤olò̤ tôpwa̤ hǒ. 7Kòyò dǒ a ǐshowî̤ ta̤ tôpwa̤nu adû̌khlo kû̌ kòyò dǒ a nǐ̤bǎ ta̤ǐshowî̤ tôpwa̤ numî̌ sǎphlǒ wò̌wè̌ agûlǎ̤ ô̌ tôcǒtô̤̌. 8Yǔdaphû̌ pwa̤shû̌gǎta̤ dǒ akhlialè gelò̤ dǒ Le̤wǐphû̌ ô̌ tokhlǒnu, a phî̌shǐshu pû̌shǐnutôpû̌ dǒ kòyò gǔ si pě nutokhlǒ a ô̌ pwǎ. Bǎbǎkǎlè Malakhǐsedè̌nu, pa sî̌ganǎ̤tû̌ Cǒmara alě̤ayô̤̌ hî̌ kû̌ a ô̌htûpwa̤ pwǎ. 9Htokhôtô̤̌ pa hî̌bǎ kû̌, KhûLe̤wǐ akhlialè dǒ a kwi pû̌shǐnutôpû̌ tokhlǒnu a ǐ kû̌ PhaAbraha dě PhaAbraha ǐ tutṳ̌ kû̌ Malakhǐsedè̌ hǒ. 10Ma̤titèhî̌dě, bǎ PhaAbraha kè̌shǐshěshu kû̌ Malakhǐsedè̌ akhanu, KhûLe̤wǐ nutôpwa̤ nî̌ a ô̌phijǎlò̤ khôtô̤̌. A ô̌pepwǎ dǒ aphiphu Abraha anǎ̤glǒ phěyî̌ akû pwǎ.

11Bǎ Cǒmara ǐ Yǔdaphû̌ tokhlǒ ta̤sû̌ta̤tòwò akhanu, a bè̌htò̌ pwa̤shû̌gǎta̤ dǒ akhlialè gelò̤ dǒ Le̤wǐphû̌ nutokhlǒ a ô̌. Asî bǎ lṳhtò̌ bǎ kòyò pô̤̌ ta̤sû̌ta̤tòwò tokhlǒ ô̌nu. Le̤wǐphû̌ pwa̤lṳta̤phû̌ tokhlǒ ma̤ ata̤ma̤ tokhlǒ bǎbǎkǎlè pô̤̌khô kòyò gǔ htûhtò̌ kòyòcǒkòyòtè̤ ayanu, asî ma̤jòtô̤̌. Pô̤̌nudě Cǒmara bǎ no hèkhò tèplè̌ pwa̤shû̌gǎ dǒ ashǔshawa̤ tôpwa̤. Pwa̤shû̌gǎ tôpwa̤nu akhlialè gelò̤ dǒ Le̤wǐphû̌ dǒ akhlialè gelò̤ tutṳ̌ dǒ PhaArû a ô̌nu mè̤̌tô̤̌. Pwa̤shû̌gǎ tôpwa̤nu, asô̌sô̌kû̌ Malakhǐsedè̌ nuhǒ. 12Ma̤titèhî̌dě bǎ kòyò htû̌lè̌ tèplè̌ pwa̤shû̌gǎ akhlialè akhanu, kòyò bǎ htû̌lè̌ tèplè̌ kû̌ ta̤sû̌ta̤tòwò tokhlǒ. 13Běcǎ Yeshǔ Khrǐ dǒ pa hî̌ǐ yǎ awe̤akè tôpwa̤ numî̌, a hènṳ̌kè bǎ pwa̤shû̌gǎ dǒ awǐkha nutokhlǒ agûlǎ̤ hǒ. A mî̌ Le̤wǐ akhlialè mè̤̌tô̤̌. Akhlialè gelò̤ khô̌ dǒ ashǔshawa̤ tôcǒ dǒ kòyò kaǎ kû̌ Yǔda akhlialè pô̤̌ pwa̤shû̌gǎta̤ tôpwa̤ ma̤ ta̤ dǒ ta̤lṳhtò̌wǎ̤ akòshî̌nu, akhlialè nî̌ a ma̤bǎ kû̌ kòyò pwa̤shû̌gǎ ta̤ma̤ tôpwǎ̤꤮ tô̤̌. 14Kòyò sî̌ganǎ̤ mè̤̌mî̌ca kû̌ pa Běcǎ Yeshǔ Khrǐnu, akhlilè gelò̤ dǒ Yǔda tômṳ̌tôcǒ a ô̌. Dǒ awǐkha mî̌, Yǔda akhlialè gǔ htûhtò̌ pwa̤shû̌gǎta̤ tokhlǒ pěnu, Khûmṳ̂shě hî̌bǎ tôkhò̌꤮ tô̤̌.

Běcǎ Yeshǔ mî̌ asô̌sô̌kû̌ Malakhǐsedè̌

15Bǎ pwa̤shû̌gǎ dǒ ashǔshawa̤ dǒ asô̌sô̌kû̌ Malakhǐsedè̌ dǒ awǐkha tôpwa̤ hètǒ̤ akhanu, kòyò sî̌yaphlô hè khlo kû̌ ta̤ dǒ pa hî̌ nutokhlǒ hǒ. 16Ta̤sû̌ta̤tòwò hî̌ kû̌ kòyò dǒ a htûhtò̌ pwa̤shû̌gǎnu, a bǎ khlilè gelò̤ dǒ tômṳ̌tôcǒ akû a hî̌ pô̤̌nu, bǎbǎkǎlè Yeshǔ hè htû pwa̤shû̌gǎ nî̌, atô pô̤̌ ta̤sû̌ta̤tòwò hî̌nǎ mè̤̌tô̤̌. Mè̤mè̤̌tôkhônu, a htûhtò̌ pwa̤shû̌gǎnu kû̌ a ta̤ô̌htûpwa̤ ta̤pô̤ta̤phǎ shû̌sho dǒ a htûpwa̤ tûjû̌pwa̤ talakhǎ nuhǒ. 17Ma̤titèhî̌dě lî̤plò̌shǐkû hî̌ kû̌,

“Na htû pwa̤shû̌gǎ tûjû̌pwa̤ dǒ asô̌sô̌kû̌ Malakhǐsedè̌ nupě” ^d a hî̌ pô̤̌nu.

18Pô̤̌nu akhû̌akhî, ta̤sû̌ta̤tòwò ali̤nu, kòyò bè̌tephekè a ma̤titèhî̌dě a khû̌shiǎjǎ dě a ma̤jè̌bò̌ pa tô̤̌. 19Khûmṳ̂shě a ta̤sû̌ta̤tòwònu a ma̤cǒma̤tè̤ jò kòyò tôpwǎ̤꤮ tô̤̌. Bǎbǎkǎlè khònò̤̌ pa ta̤kè̌shuǐ klè̌ asa tôbô dǒ awô̌khlo pe kû̌ ta̤sû̌ta̤tòwònu a ô̌ hǒ. Dě pa hènṳ̌phǔ dǒ Cǒmara a ô̌ kû̌ klè̌ asa nutôbô mî̌ anǐ̤ hǒ.

20Cǒmara wṳ̂̌dòlò̤ hto ayô̤̌ kû̌ Yeshǔ gǔ htû pwa̤shû̌gǎ tûjû̌pwa̤ pě. Bǎbǎkǎlè bǎ Le̤wǐ khlilèphû̌ tokhlǒ htû pwa̤shû̌gǎ akhanu, a wṳ̂̌dò ayô̤̌ kû̌ asî pô̤̌nu tômṳ̂̌꤮ tô̤̌. 21Bǎbǎkǎlè, Cǒmara hî̌ Yeshǔ kû̌,

“Běcǎ wṳ̂̌dòlò̤hto ayô̤̌ dě a hî̌khô̌ tèplè̌ petô̤̌, dě a hî̌ kû̌, ‘na gǔ htûhtò̌ pwa̤shû̌gǎta̤ tûjû̌pwa̤ pě,’” ^e

bǎ Yeshǔ htò̌ htû pwa̤shû̌gǎ akha, Cǒmara hî̌ lû̌û pô̤̌nu. 22Ta̤olò̤yô̤̌ asa dǒ Cǒmara ma̤htûhtò̌ hto pa dǒ pa gǔ nǐ̤bǎ ta̤pi̤li̤ aya tômûnu, awô̌ khlope kû̌ ta̤olò̤yô̤̌ dǒ ali̤ nutômû, ma̤titèhî̌dě Cǒmara wṳ̂̌dòlò̤ hto ayô̤ pô̤̌nu akhû̌akhî, Yeshǔ mî̌ pwa̤ dǒ a gǔ ma̤lǒbe tě̤tě̤mè̤̌mè̤̌ bǎ pa ta̤olò̤ asanu tômû tôpwa̤ hǒ.

23Ta̤ dǒ a khô̌ pe lû̌û dǒ ashǔshawa̤ tôcǒ mî̌ amè̤̌kû̌ pwa̤shû̌gǎ dǒ awǐkha tokhlǒnu, a si lô̌khô akhû̌akhî, kò pwa̤htò̌ tutṳ̌ asî agûlǎ̤nu a ô̌ jûgrû. 24Bǎbǎkǎlè Yeshǔnu, a ô̌htûpwa̤ tûjû̌pwa̤ akhû̌akhî, a ǐlò̤ tutṳ̌ bǎ pwa̤shû̌gǎ ata̤ma̤nu dǒ kòyò cǔdekû tôpwǎ̤꤮ tô̤̌. 25Pô̤̌nudě kòyò dǒ a hè dǒ Cǒmara a ô̌ dě a hènṳ̌ tutṳ̌ dǒ Yeshǔ a ô̌ tokhlǒnu, Yeshǔ ma̤hǎplǎgebò̌ asî khònò̤̌ tǒ̤hènè ajû̌jû̌ apwa̤pwa̤ pě, ma̤titèhî̌dě pô̤̌khô a gǔ nṳ̌ kwisǎyṳbò̌ bǎ kòyò pô̤̌nu tokhlǒ aya dǒ Cǒmara a ô̌nu, a bǎ htûpwa̤ tûjû̌pwa̤.

26Pô̤̌nudě, Yeshǔ mî̌ pwa̤shû̌gǎ ikǒdû̌lǒ tôpwa̤ dǒ a ma̤lǒbe bǎbò lǒ̤꤮ bò pa ta̤lṳ̂bǎ tokhlǒ. A mî̌ aplò̌shǐ, ata̤sǔ ô̌tô̤̌, asǎphlǒ mṳ̂̌plî. Cǒmara bè̌yò tephekè khô̌ lû̌û kû̌ pwa̤ma̤sǔphû̌ tokhlǒ, dě a dǐô̌ lû̌û dǒ gûlǎ̤ htò̌yô̤̌lǒkhlo tôkû hǒ. 27A mî̌ asô̌sô̌kû̌ pwa̤shû̌gǎ ikǒdû̌lǒ dǒ ashǔshawa̤ nutokhlǒ mè̤̌tô̤̌. Pṳ̂̌ni̤ni̤ a lǎ̤lṳ̂ lṳhtò̌ wǐ tûû̌ ata̤sǔ tokhlǒ, htodě a lṳhtò̌ nô̌ bǎ kòyò dǒ ashǔshawa̤ tokhlǒ ata̤sǔ tokhlǒ pô̤̌nu mè̤̌tô̤̌. Bǎ a lṳhtò̌ anǎ̤ dǒ nò̌dò̌htǔlô̤ akhanu, a lṳhtò̌ pwǎ tôplǎ dě a htophlǔkè tûjû̌pwa̤ hǒ. ^f 28Pwa̤shû̌gǎ tokhlǒnu, a ta̤sǔta̤plě ô̌ pwǎ lô̌khô bǎbǎkǎlè ta̤sû̌ta̤tòwò ô̌ akhû̌akhî, kòyò bǎ bè̌htò̌ asî pwǎ. Bǎbǎkǎlè bǎ Cǒmara ǐlò̤hto ta̤sû̌ta̤tòwònu dǒ nô̌kò ayî̤kèhǒnu, a olò̤ khô̌tîkhîpô̤̌ tômû dě a wṳ̂̌dòlò̤ padô̌ ayô̤̌ bǎnu. A wṳ̂̌dòlò̤ ayô̤̌ kû̌ a bè̌htò̌ a phû̌pwa̤khû dǒ ata̤sǔ ô̌tô̤̌, a lǒbe nutôpwa̤ kû̌ a gǔ htûhtò̌ pwa̤shû̌gǎ ikǒdû̌lǒ tûjû̌pwa̤ hǒ.