Heb 8 | KxfSCKXF | STEP | Khònò̤̌, ta̤ dǒ a lṳ̂dû̌lǒ tôcǒ dǒ he sǎyṳ nosî̌yaphlô sî numî̌ amè̤̌kû̌ pa pwa̤shû̌gǎ ikǒdû̌lǒ nutôpwa̤ hǒ. A mî̌ Yeshǔ hǒ. Khònò̤̌ a hǎnòò̌ô̌ dǒ mǒkhû̌ dě a hǎnòò̌ô̌ dǒ Cǒmara dǒ alîata̤kakha, apô̤aphǎ nutôpwa̤ lǎ̤nòò̌ acǔde cǔtômû nutôkhô hǒ.

Hebrews 8

Yeshǔ mî̌ pa pwa̤shû̌gǎ ikǒdû̌lǒ tôpwa̤

1 Khònò̤̌, ta̤ dǒ a lṳ̂dû̌lǒ tôcǒ dǒ he sǎyṳ nosî̌yaphlô sî numî̌ amè̤̌kû̌ pa pwa̤shû̌gǎ ikǒdû̌lǒ nutôpwa̤ hǒ. A mî̌ Yeshǔ hǒ. Khònò̤̌ a hǎnòò̌ô̌ dǒ mǒkhû̌ dě a hǎnòò̌ô̌ dǒ Cǒmara dǒ alîata̤kakha, apô̤aphǎ nutôpwa̤ lǎ̤nòò̌ acǔde cǔtômû nutôkhô hǒ. ^a 2 Khònò̤̌ a ma̤hto pwa̤shû̌gǎ ikǒlǒkòdû̌lǒnu ata̤ma̤, dě a ma̤ hto dǒ ta̤lǎ̤ aplò̌shǐ tôkû akû hǒ. Hǐphû̌dû̌ aplò̌shǐ mè̤̌mî̌canu kòyò ma̤ kû̌ kòyòhǎkhû̌phû̌ acǔde mè̤̌tô̤̌. Běcǎ ma̤htò̌ kû̌ anǎ̤ sanǎ̤.

3 Pwa̤shû̌gǎ ikǒdû̌lǒ pṳ̂̌꤮ tôpwa̤nu, kòyò bè̌htò̌ a kû̌ a bǎ lṳhtò̌ta̤ htodě a bǎ lṳhtò̌ kû̌ ta̤phû̌ta̤wè̤ tokhlǒ dǒ Cǒmara a ô̌. Pô̤̌nudě, pa pwa̤shû̌gǎ dǒ adû̌lǒkhlo tôpwa̤nu, a bǎ lṳhtò̌ ta̤ tôcǒcǒ. 4 Bǎbǎkǎlè Yeshǔ dǒ a htû pwa̤shû̌gǎ ikǒdû̌lǒ tôpwa̤nu, bǎ a ô̌pe bǎ hǎkhû̌ akha, pwa̤shû̌gǎ dǒ a bǎlṳbǎtòhtò̌ pô̤̌ ta̤sû̌ta̤tòwò ô̌nu, a ô̌tû̌ akhû̌akhî, a htû kû̌ kòyò pwa̤shû̌gǎ tô̤̌. 5 Hǐphû̌dû̌ plò̌shǐ dǒ pwa̤shû̌gǎta̤ tokhlǒ nṳ̌ma̤ ǐ lû̌û dǒ hǎkhû̌ tômè numî̌, a kè̌lû̌mò̌mṳ yǎ̤yô̤yǎ̤gî̌ Cǒmara a ta̤lṳhtò̌hô mè̤̌mî̌ca dǒ mǒkhû̌ nutômè pwǎ. Hǐphû̌dû̌ tômènu a mè̤̌mî̌ca mè̤̌tô̤̌, mè̤̌pwǎ dǒ mǒkhû̌ a mè̤̌mî̌ca nutômè a yômǔyôla pwǎ. Ma̤titèhî̌dě, bǎ Cǒmara noma̤htò̌ Khûmṳ̂shě hǐphû̌dû̌ dǒ hǎkhû̌ akhanu, a hî̌ lû̌û kû̌, “Gû̌ma̤ kè̌lû̌mò̌mṳ tě̤mè̤̌wô̌bǎ sô̌sô̌bò pô̤̌ na kè̌shǐ hto mǒkhû̌ ta̤lṳhtò̌hô ata̤yô̤ dǒ khôlôkhû̌ nunî̌,” ^b Cǒmara hî̌ lû̌û pô̤̌nu. 6 Yeshǔ ma̤ta̤ pô̤̌ pwa̤shû̌gǎ tôpwa̤nu, awô̌ khlope kû̌ pwa̤shû̌gǎta̤ dǒ hǎkhû̌ nutokhlǒ ma̤nu. Pô̤̌nudě, Cǒmara a ta̤olò̤ asa dǒ Yeshǔ phî̌hènǐ̤ numî̌ awô̌khlo pe kû̌ ta̤olò̤ ali̤nu. Ta̤olò̤ asanu, a gètè̤ nǎla̤htò̌ǐ ta̤olò̤ dǒ awô̌khlo tokhlǒ alô̤.

7 Ta̤olò̤ wǐ nutûmû, a kè̌ lǒbe hî̌dě pa lǎ̤lṳ̂ pe ta̤olò̤ nô̌kò nutômû gǔ hènṳ̌ bôtèplè̌ pe lû̌û gûlǎ̤tô̤̌ hǒ. 8 Bǎbǎkǎlè Cǒmara pè̤̌wǎ̤ ta̤sǔ dǒ a kòyò tokhlǒ alô̤ dě a hî̌ kû̌,

“Shěkhǎ dǒ he gǔ ma̤ ta̤olò̤ asa kû̌ Isôrělaphû̌ tokhlǒ bǎbǎ, Yǔdaphû̌ tokhlǒ bǎbǎ a hètǒ̤pě,” ^c a hî̌ pô̤̌nu.

9 “Bǎ he cî̌hǎhtò̌ asî kû̌ he cǔde dě he kaǎge asî phiphu dǒ Ijî̌gǎ akhanu, he olò̤ hto heyô̤̌ kû̌ asînu a ô̌ bǎbǎkǎlè ta̤olò̤ khònò̤̌nu a khô̌. Asî cǒkû̌ he ta̤olò̤ nutô̤̌ akhû̌akhî, he htû̌ti̤wǐ̤ cû̌khô̌kè hemǐ̤sǎ kû̌ asî hǒ, Běcǎ hî̌pô̤̌nu.

10 Pô̤̌nudě, Běcǎ hî̌ kû̌ ta̤olò̤ asa dǒ he gle olò̤ kû̌ Isôrělaphû̌ sî tokhlǒnu, he hî̌ asî pô̤̌o pě, he gǔ shû̌nṳ̌ he ta̤sû̌ta̤tòwò tokhlǒ dǒ asî asǎphlǒ ta̤gènè̤ akû pě. He wě̤mǎwě̤dò he ta̤sû̌ta̤tòwò tokhlǒ dǒ asî sǎphlǒkû pě. He htû asî Cǒmara pě dě asî htû hekòyò pě.

11 Bǎnuakha pěnu, asî khlilèphû̌ sô̌sô̌ lû̌ tokhlǒ bǎbǎ, apṳ̌awè̤̌kla tokhlǒ bǎbǎ, a lǎ̤lṳ̂pe kòyò sû̌ǐtòwòǐ asî kû̌, ‘sî̌ganǎ̤ lô̌khô Běcǎ nî̌’ pô̤̌nu petô̤̌. Ma̤titèhî̌dě sahtò̌ dǒ kòyò gènè̤ pî̌tî̌lǒ lû̌û tôpwa̤ tǒ̤dǒ kòyò gènè̤dû̌lǒ lû̌û tôpwa̤nu, a sî̌ganǎ̤ bòkè he pě.

12 He gwèbǎǐ asî pě dě he plûkèbò asî ata̤phû̌mò̤̌shǐhtô tokhlǒ pě dě he gǔ shôpe̤bò asî ta̤sǔ tokhlǒ pě.” ^d

13 Cǒmara hî̌ kû̌ numî̌ ta̤olò̤ asa tôcǒ akhû̌akhî, a nohtûhtò̌kè ta̤olò̤ ali̤nu kû̌ a lǎ̤lṳ̂ petô̤̌. Ali̤alṳ̂ hǒ, kòyò lǎ̤lṳ̂pe lû̌û tô̤̌, dě yî̤khôtô̤̌ hî̌pě, a gǔ hǎmǎkè hǒ.