Hebrews 9

Ta̤olò̤ ali̤

1Khònò̤̌dě ta̤olò̤ awǐ tômû dǒ Cǒmara olò̤kè a kòyò tokhlǒnu, a ô̌ kû̌ a ta̤cubucaba a ta̤sû̌ta̤tòwò lǎ̤bû̌lǎ̤klô tokhlǒ kû̌ lǎ̤caba hǐphû̌dû̌ aplò̌shǐ dǒ kòyò bô̌htò̌ma̤htò̌ yǎnu tômè. 2Hǐphû̌dû̌nu a ô̌ ginǐ̤tô̤̌. ^a Awǐ tôtô̤̌nu kòyò bè̌ǐ kû̌ mî̌tè̌kowǎ̤ tôkǔ, gògǒ htò̌yô̤̌ tôbǎ kû̌ mû̌ aplò̌shǐ dǒ kòyò bè̌htò̌ yǎ dǒ gògǒ htò̌yô̤̌ tokhlǒ. ^b Hǒtôtô̤̌ numî̌ kòyò kaǎ kû̌ ta̤plò̌shǐ gûlǎ̤. ^c 3Hǐphû̌dû̌ a takhade lǎ̤nṳ̌nu kòyò cotě̤tṳbǐ kû̌ hugò̌pwǐ tôpṳ. Hugò̌pwǐ ô̌pe tôpṳ dǒ kòyò cobǐ tě̤tṳ̌kè dǒ alô̤mô̤̌ tôtô̤̌ dǒ kòyò kaǎ kû̌ gûlǎ̤plò̌shǐlǒnu tôtô̤̌. ^d 4Gûlǎ̤ nutôtô̤̌ akûnu, ta̤lṳhtò̌awǎ̤hta dǒ kòyò lǎ̤shû̌htò̌ kû̌ ta̤numû̌nushu tokhlǒnu a ô̌ tôwǎ̤, ^e htodě ta̤olò̤ tǒplò̌shǐ dǒ kòyò lòbǐ lû̌û kû̌ htanu a ô̌ tômè. Dǒ tǒ akûnu, kòyò bè̌nṳ̌ kû̌ po̤hǎphû̌ tômè dě kòyò shû̌nṳ̌ kû̌ ma̤nǎmû̌, ^f kû̌ PhaArû nò̌htô̌ dǒ alǎ dô̌jǎhtò̌ nutôbô, ^g kû̌ ta̤mǎlò̤ amṳ̂shǐ a ta̤olò̤ lǒ̤běnu ginǐ̤bǎ. ^h 5Dǒ tǒplò̌shǐ akhû̌nu, kòyò bô̌htò̌ mǒkhû̌tanaphû̌ dǒ kòyò kaǎ kû̌ Kherǔbe aplò̌kîshî̌ kakhanu sò̌ginǐ̤ ô̌ dě a hǔbǐlò̤ adî̌ge dǒ tǒplò̌shǐ akhû̌dǒ dě Cǒmara lǎ̤plûkè kòyò ta̤sǔ alô̤nu. Lǎ̤shôbǐǐphlô bǎ sînu a ô̌ dû̌꤮wî̤ pe akhû̌akhî, khònò̤̌dě hî̌ pṳ̂̌bò bǎ sî tô̤̌. ⁱ

6Bǎ kòyò tîwî̌tòwò bè̌ tě̤tôtě̤bǎ htobò ta̤nutokhlǒ dǒ agûlǎ̤ kû̌ agûlǎ̤ akhanu, pṳ̂̌꤮ ni̤ni̤ pwa̤shû̌gǎ tokhlǒ nṳ̌ dǒ hǐphû̌dû̌kû awǐlǒ tôtô̤̌ dě a nṳ̌ma̤ lô̌khô a ta̤phǐta̤ma̤. ^j 7Bǎbǎkǎlè dǒ ta̤plò̌shǐlǒnu tôtô̤̌ akûnu, a genṳ̌nǐ̤ pwǎtǒ̤ pwa̤shû̌gǎ ikǒdû̌lǒ nutôpwa̤ nô̤̌pwǎ. Tôněnu a nṳ̌pwǎ tôplǎ dě a bǎ phǐnǐ̤ sǐ dǒ a gǔ lṳhtò̌ kû̌ ta̤sǔ ayanu, kû̌ kòyò dǒ a gènè̤ tǒ̤tô̤̌ dě a ma̤sǔ tò̤̌ tokhlǒ ata̤sǔ aya. ^k 8Dǒ ta̤nu akhû̌akhî, Yôla Plò̌shǐ Běcǎ dǔlè̌lṳ̌ bǎ pa kû̌, kè̌ kòyò noǎ ǐtûû̌ hǐphû̌dû̌ plò̌shǐ ali̤ hǒtômè hî̌dě klè̌lǎ̤nṳ̌ dǒ hǐphû̌ mè̤̌mî̌ca nutômè akûnu, a lûmô khôtô̤̌. 9Ta̤nutokhlǒ mî̌ a sǎyṳ dǔlè̌lṳ̌khô̌ pa ta̤ma̤mǎnǎ dǒ pa htukha khònò̤̌kha tokhlǒ hǒ. A sǎyṳ nè̌lṳ̌hto pa kû̌ ta̤lṳta̤tòhtò̌ nutokhlǒ kû̌ ta̤phû̌ta̤wè̤ dǒ kòyò lṳhtò̌ a tokhlǒnu, a ma̤ mṳ̂̌plîphǔjò bǎ pwa̤ hè cubucabahtò̌ ta̤nutokhlǒ asǎphlǒ tô̤̌. 10Ta̤lṳta̤tòhtò̌ hǒtokhlǒnu, a nǎla̤ǐ pwǎ ta̤cubucaba a lǎ̤bû̌lǎ̤klô tokhlǒ dǒ a hî̌ kû̌ hǒomî̌ ǎnǐ̤, hǒnumî̌ ô anǐ̤ tô̤̌, tôbǎ shǔbò nǎ̤ pô̤̌onu, a hî̌ nutokhlǒ hǒ. Ta̤sû̌ta̤tòwò numî̌ gû̌ ma̤ta̤ dǒ akhlo tôkhô pwǎ, a ma̤ tèplè̌jò sǎphlǒ tô̤̌. Nǎ̤glǒ phěyî̌ tôkhô, kòyòhǎkhû̌phû̌ bǎ gû̌ma̤ tǒ̤dǒ Cǒmara ma̤tèplè̌ bǎ asî klè̌ asa tôbô.

Ta̤olò̤ asa

11Bǎbǎkǎlè khònò̤̌ Khrǐ hè htûhto pô̤̌ pwa̤shû̌gǎ ikǒdû̌ dǒ adû̌lǒkhlo kòyò tôpwa̤ nuhǒ. A phî̌hènṳ̌ bǎ pa ta̤wî̤ta̤wô̌ dǒ a ô̌ kû̌ pa khònò̤̌ tokhlǒ hǒ. A cû̌nṳ̌ hto dǒ hǐphû̌dû̌ dǒ adû̌khlo, a lǒbebò kû̌ kòyò ma̤nu tômè akûhǒ. Hǐphû̌dû̌ plò̌shǐnu, kòyò ma̤htò̌ǐ kû̌ acǔde tôpwǎ̤꤮ tô̤̌, kòyò bô̌lò̤ lû̌û mè̤̌tô̤̌tô̤̌, a ô̌ dǒ hǎkhû̌nu mè̤̌tô̤̌tô̤̌. 12Bǎ a cû̌nṳ̌ lṳhtò̌ta̤ dǒ ta̤lǎ̤ plò̌shǐ lǒkhlo kò tôtô̤̌ akhanu, a phî̌nṳ̌ pè̤̌ sî asǐ, pṳ̂̌pha sî asǐ numè̤̌tô̤̌. A gǔ nṳ̌ lṳhtò̌ta̤ ayanu, a phî̌nṳ̌ tûû̌ asǐ akhû̌akhî, a hènṳ̌ pwǎ tôplǎ dě ahtoaphlǔ bòhǒ, dě a ma̤hǎplǎge pa tûjû̌pwa̤ hǒ. 13Dǒ pa ta̤sû̌ta̤tòwò ali̤ akûnu, pè̤̌ sî kû̌ pṳ̂̌phalo sî asǐnu kû̌ pṳ̂̌phû̌ dǒ kòyò shû̌u htûhtò̌bò lû̌û kû̌ kûphǎ tokhlǒnu, kòyò bǎ plṳ̌ kû̌ kòyò dǒ a phû̌mò̤̌ kû̌ ta̤cubucaba alǎ̤klônu tôpwa̤ alô̤, ^l ma̤titèhî̌dě pô̤̌khô anǎ̤glǒ gǔ mṳ̂̌plî dǒ akhlo tôkhô ayanudě, asî ma̤mṳ̂̌plî lû̌û pô̤̌nu. ^m 14Pô̤̌nudě, gènè̤ kè̌mò̌ lô̌khô Khrǐ asǐnu, a ma̤ mṳ̂̌plî bûsǔlǔkhlo pa kû̌ ta̤nutokhlǒ pě dǒ Yôla Plò̌shǐ Běcǎ ô̌htûpwa̤ tûjû̌pwa̤ akhû̌akhî, Khrǐ lṳhtò̌hto anǎ̤glǒ dǒ ata̤sǔ ô̌ tôcǒ꤮ tô̤̌ dǒ Cǒmara a ô̌ hǒ. Pô̤̌khô pa gǔ ma̤ bǎ Cǒmara dǒ a htûpwa̤ tôpwa̤ ata̤ma̤ ayanu, Khrǐ cǔbò pa sǎphlǒ nutokhlǒ kû̌ pa ta̤ma̤ dǒ abwǐsîrî ô̌kû̌ kòyò tô̤̌ nutokhlǒ kû̌ asǐ pě.

15Dǒ ta̤we̤ta̤kènu akhû̌akhî, ta̤ǐshowî̤ tûjû̌pwa̤ dǒ Cǒmara olò̤kè bǎ hto kòyò dǒ a kaǎ lû̌û tokhlǒ gǔ nǐ̤bǎ ayanu, Khrǐ phî̌hèǐ bǎ Cǒmara a kòyò tokhlǒ ta̤olò̤ asa nutôcǒ dǒ Cǒmara a ô̌ hǒ. Pô̤̌khô Khrǐ gǔ ma̤hǎplǎge dě plûhǎhtò̌ pili̤ cû̌kè kòyò ô̌ dǒ ta̤olò̤ ali̤ alǎ̤ nutokhlǒ ayanu, a bǎ khòlṳ̌kè asǎphlǒ. Dǒ a khòlṳ̌ asǎphlǒ akhû̌akhî, asî nǐ̤bǎ bò̌ û̌tě̤û̌ca, a ta̤ǐshowî̤ tûjû̌pwa̤ dǒ Cǒmara olò̤ hto nutokhlǒnu hǒ.

16Hî̌kûmṳ̂̌ lî̤ tôbǎ dǒ kòyò tôpwa̤pwa̤ kè̌ wě̤nǎ kû̌ kòyò nutôpwa̤ gǔ bè̌ kòyòsi nutôpwa̤ a û̌tě̤û̌ca numî̌, pô̤̌khô a gǔ nǐ̤bǎ û̌tě̤û̌canu, a bǎ dǔlè̌lṳ̌ kû̌ kòyò wě̤nǎ lî̤nu tôpwa̤ mî̌ a bǎ si htohǒ, pô̤̌nu. 17Kòyò dǒ a wě̤nǎ lî̤si nutôbǎ tôpwa̤nu, a kè̌ ô̌htûpwa̤ pepwǎ hî̌dě, lî̤nutôbǎ ma̤jò tôcǒ꤮ tô̤̌. Bǎbǎkǎlè htû̌꤮ a si htopědě kòyò nutôpwa̤ phî̌nṳ̌ nô̌ kòyòsi nutôpwa̤ a û̌tě̤û̌ca pwǎ. 18Pô̤̌nu akhû̌akhî, pô̤̌khô ta̤olò̤ awǐ nutômû gǔ sahtò̌ ma̤ta̤ ayanu, a lǎ̤lṳ̂ ta̤phû̌ta̤wè̤ dǒ kòyò lṳhtò̌ lû̌nu asǐ. 19Bǎ Khûmṳ̂shě hî̌lṳ̌ bǎ htobò kòyò pṳ̂̌꤮ tôpwa̤ kû̌ lǒ̤bò Cǒmara mǎnǎ a ta̤sû̌ta̤tòwò tokhlǒ akhanu, a phî̌ pṳ̂̌phû̌ sî asǐ kû̌ pè̤̌ sî asǐ dě a toklosada kû̌ shi, htodě a phî̌ sû̌phû̌shǔalî̤ dě a bǒmě kû̌ sǒphò dǒ kòyò kaǎ kû̌ Hǐsû̌phòphû̌ nutôphò akhi dě a tishǐ kû̌ lî̤ dǒ kòyò wě̤ kû̌ Cǒmara a ta̤sû̌ta̤tòwò tôbǎ, htokhôtô̤̌ a tishǐ bò kû̌ kòyò pṳ̂̌꤮ tôpwa̤. ⁿ 20Khûmṳ̂shě hî̌ kòyò tokhlǒ kû̌, “Sǐ numî̌ a ma̤měma̤gle Cǒmara ta̤olò̤ dǒ Cǒmara mǎnǎ dǒ sî gǔ gû̌ma̤ aya nuhǒ” ^o a hî̌ asî pô̤̌nu. 21Htodě hǐphû̌dû̌ aplò̌shǐ nutômè kû̌ lǒ̤bò timî̌titè dǒ kòyò noǎ a kû̌ ta̤cubucaba aya tokhlǒnu, a tishǐ bò kû̌ sǐ pô̤̌nu. ^p 22Kè̌ hî̌ tě̤mè̤̌ mî̌, ta̤sû̌ta̤tòwò hî̌ kû̌, ta̤phû̌ta̤li̤ dǒ kòyò noǎ a kû̌ ta̤cubucaba aya tokhlǒnu, kòyò bǎ ma̤mṳ̂̌plî ta̤phû̌ta̤li̤ kû̌ sǐnu pṳ̂̌tocǒ. Sǐ kè̌ sǐlò̤ tô̤̌nu, Cǒmara plûkèbò̌ ta̤sǔ tôcǒ꤮ tô̤̌. ^q

Khrǐ lṳhtò̌ anǎ̤ akhû̌khî, Cǒmara plûkè ta̤sǔ

23Hǐphû̌dû̌ plò̌shǐnu kû̌ timǐtitè dǒ kòyò noǎ a kû̌ ta̤cubucaba aya tokhlǒnu, kòyò ma̤ kè̌lû̌mò̌mṳ kû̌ mǒkhû̌nu a timǐtitè tokhlǒ pwǎ. Timǐtitè ô̌dǒ akû pṳ̂̌꤮ tôcǒnu kòyò bǎ ma̤ mṳ̂̌plîbò a kû̌ ta̤phû̌ta̤wè̤ asǐ pô̤̌nu. Bǎbǎkǎlè mǒkhû̌ atimǐtitè mè̤̌mî̌ca tokhlǒnu, kòyò gǔ ma̤ mṳ̂̌plî a kû̌ ta̤lṳhtò̌ dǒ awô̌lǒ khlope kû̌ ta̤phû̌ta̤wè̤ asǐnu. 24Ma̤titèhî̌dě hǐphû̌dû̌ plò̌shǐ dǒ kòyò ma̤ kû̌ kòyò cǔde dě kòyò kè̌lû̌mò̌mṳ gû̌ma̤ pwǎ amǒ̤glǒ mè̤̌mî̌ca tômè akûnu, Khrǐ cû̌nṳ̌ bǎnu mè̤̌tô̤̌. A cû̌nṳ̌ tûû̌ dǒ mǒkhû̌ dě khònò̤̌ a kwisǎyṳ bǎ pa dǒ Cǒmara alô̤mô̤̌. 25Pwa̤shû̌gǎ ikǒdû̌lǒ tôpwa̤nu, a bǎ phî̌nṳ̌ ta̤phû̌ta̤wè̤ asǐ dě a nṳ̌ dǒ ta̤lǎ̤ plò̌shǐlǒ nutôtô̤̌ pṳ̂̌꤮ ně bǎbǎkǎlè Khrǐ nî̌ a nṳ̌ lṳhtò̌ anǎ̤ tôplǎ hto tôplǎ pô̤̌nu mè̤̌tô̤̌. 26Kè̌ Khrǐ lǎ̤lṳ̂nṳ̌ sǎla̤la̤ pô̤̌nu kè̌hî̌dě, a tôbǎ khòlṳ̌ sǎla̤la̤ asǎphlǒ dǒ hǎkhû̌ htûhtò̌lû̌ akha pe a lǎ̤lṳ̂ khòlṳ̌ pô̤̌nutô̤̌. Khònò̤̌ bǎ hǎkhû̌ glè̌ phǔ꤮ gutṳ̌hǒ akhanu, a hè khòlṳ̌ pwǎ tôplǎ dě a htophlǔ bòhǒ. Dǒ a lṳhtò̌ anǎ̤glǒ kû̌ anǎ̤nu akhû̌akhî, a phî̌cû̌ tephekè kòyòhǎkhû̌phû̌ tokhlǒ ata̤sǔ tokhlǒ hǒ. 27Kòyò pṳ̂̌꤮ tôpwa̤ bǎ si pwǎ tôplǎnô̤̌pwǎ. Dě a sihto pěnu, Cǒmara cî̌htò̌ asî pě. 28Pô̤̌nudě pô̤̌khô Khrǐ phî̌cû̌ tephekè bò kòyò saprṳ̂ ata̤sǔ tokhlǒnu dě a khòlṳ̌ pwǎ tôplǎ pwǎ. A hè sô̌ pě bǎbǎkǎlè a hè phî̌cû̌ tephekè bǎ pa ta̤sǔ pěnu mè̤̌tô̤̌. A hè ma̤hǎplǎge kòyò dǒ a ô̌pǒ̤kè̌shǔ lû̌û nutokhlǒ pě pwǎ. ^r