James 1

1He mî̌ Khûya̤kû, he htû Cǒmara kû̌ Běcǎ Yeshǔ Khrǐ ajû̌ tôpwa̤. He hî̌mô̤hî̌bǎwô̌ cû̌ bǎ Cǒmara a kòyò khlilè shǐginǐ̤mṳ̌ dǒ a cû̌pò̌ peshe lô̌khô dǒ ta̤lǎ̤ pṳ̂̌꤮ tûkû tokhlǒ a ô̌. ^a

Ta̤yṳ̌ta̤nǎ̤ kû̌ ta̤sî̌ta̤jò̌

2He pṳ̌wè̤̌ sî꤮, bǎ sî kè̌shǐ tṳ̌bǎ kû̌ ta̤pò̤̌ta̤sha ta̤tili̤tôlô̌ pṳ̂̌꤮ tôcǒ hèbǎ sî akhanu, bè̌ yǎ pô̤̌ ta̤sǎlě̤sǎlò̤ adû̌ tôcǒ dǒ sîyanu nî̌꤮. 3Ma̤titèhî̌dě, bǎ sî kè̌shǐ tṳ̌bǎ kû̌ ta̤pò̤̌ta̤sha ta̤tili̤tôlô̌ ma̤kè̌kè̌ sî ta̤yṳ̌ta̤nǎ̤ akhanu, a dǐô̌ dû̌htò̌ pô̤̌ sî ta̤sǎphlǒhtû tokhlǒ pwǎnu sî sî̌ganǎ̤ tûû̌ hǒ. 4Pô̤̌khô sî ta̤ô̌htûpwa̤ tokhlǒ gǔ yû̌gelò̤ tîkî̌ tô̤̌nu, pô̤̌khô a gǔ tôbǎ kû̌ Cǒmara asǎphlǒ dě sî gǔ dû̌htò̌ lǒbe kû̌ ta̤pṳ̂̌꤮ tocǒ ayanu, sî bǎ jî̌pwǐ̤ sǎphlǒhtû lô̌khô tǒ̤dǒ a gutṳ̌ nunî̌꤮. 5Bǎbǎkǎlè dǒ sîklanu, kòyò tôpwa̤pwa̤ kè̌ lṳ̂bǎ ta̤sî̌khû̌sî̌ya kè̌hî̌dě, a tô kwihtò̌ dǒ Cǒmara a ô̌ dě Cǒmara gǔ ǐlò̤ tûû̌ a pě. Ma̤titèhî̌dě Cǒmara sǎhtǎshěshu kòyò dǒ a kwihtò̌ lû̌nu a ô̌ tôpwǎ̤꤮ tô̤̌. A gwèbǎǐ kòyò pṳ̂̌꤮ tôpwa̤, dě a sǎyṳ ǐ kòyò pṳ̂̌꤮ tôpwa̤. 6Bǎbǎkǎlè, bǎ sî kwicaba akhanu, sî bǎ ô̌ kû̌ ta̤yṳ̌, dě sî sǎphlǒ bǎ siwi̤sîwî̤̌ tîkî̌꤮ tô̤̌. Kòyò dǒ a sǎphlǒwò̌wè̌ tokhlǒnu, asô̌sô̌kû̌ gili̤sǎ hè dě shipěpǒ dǒ shidû̌te̤we̤ akû nutokhlǒ pwǎ. 7– 8Kòyò dǒ asô̌sô̌kû̌ shipěpǒ tokhlǒnu, a gǔ nǐ̤bǎ ta̤ tôcǒcǒ dǒ Běcǎ a ô̌ pěnu, a bǎ gènè̤ tô̤̌, ma̤titèhî̌dě a ma̤ta̤ titètè̌nu, asǎphlǒ ô̌wô̤̌ dě asǎphlǒ lûhtôlûlò̤ akhû̌akhî, a nǐ̤bǎ ta̤ tôcǒ꤮ tô̤̌.

Kòyò hǎwǐ̤shèwè̤ kû̌ kòyò dû̌yò̤̌htò̌sa

9Khrǐphû̌ dǒ a hǎwǐ̤shèwè̤ tôpwa̤ nî̌ Cǒmara bè̌htò̌yô̤̌ a pě, pô̤̌nudě a bǎ sǎlě̤sǎlò̤ pě. 10Kòyò dû̌yò̤̌htò̌sa dǒ Cǒmara shò̌lò̤ a tôpwa̤nu, a tôbǎ sǎlě̤sǎlò̤ pwǎ, ma̤titèhî̌dě kòyò dû̌yò̤̌htò̌sa tokhlǒnu a lò̤tě̤sikè sô̌sô̌kû̌ mi̤sǎmi̤phô nutokhlǒ pě. ^b 11Lṳmṳ̌htò̌ dě agû̌ lû̌khwe nôkè mi̤mṳ̌ tokhlǒ akhû̌akhî, aphô tokhlǒ lò̤sukè bòpě, dě a ta̤wî̤ta̤wô̌ tokhlǒ hǎmǎkèbò pě. Pô̤̌nudě bǎ kòyò dû̌yò̤̌htò̌sa tokhlǒ cû̌ ma̤gǔma̤khè̌ǎ ta̤ akhapěnu, a sikè pô̤̌nu pě.

Ta̤ma̤kè̌kè̌ kû̌ ta̤tili̤tôlô̌

12Kòyò dǒ a khòsǎdô tokhlǒnu, htû̌꤮ a kè̌shǐ tṳ̌bǎ kû̌ ta̤pò̤̌ta̤sha ta̤tili̤tôlô̌ akhapěnu, a nǐ̤bǎ ta̤ǐshowî̤ pě. Ma̤titèhî̌dě bǎ asî ma̤pè̤̌kè hto ta̤pò̤̌ta̤sha ta̤tili̤tôlô̌ pô̤̌o akhanu, Cǒmara ǐ asî ta̤htûpwa̤ tûjû̌pwa̤ asû dǒ a olò̤ kû̌ a ǐ kòyò dǒ a mô̤ǐ lû̌û nutokhlǒ pě.

13Kòyò dǒ a kè̌shǐ tṳ̌bǎ ta̤tili̤tôlô̌ pô̤̌o tokhlǒnu, a tôbǎ hî̌ kû̌, “Ta̤hǒo numî̌ a ô̌ dǒ Cǒmara a ô̌ dě a hè pwǎ,” a bǎ hî̌ pô̤̌nu tô̤̌. Ta̤tili̤tôlô̌ phû̌mò̤̌ nî̌ a lô̌ǐ pè̤̌ Cǒmara tô̤̌. Htokhôtô̤̌ Cǒmara sanǎ̤nu, a tili̤tôlô̌ nô̌ kòyò tôpwǎ̤꤮ tô̤̌. 14Bǎbǎkǎlè bǎ kòyò pṳ̂̌꤮ tôpwa̤ kè̌shǐ tṳ̌bǎ kû̌ ta̤tili̤tôlô̌ akhanu, anǎ̤glǒ a ta̤sǎyṳ phû̌mò̤̌ nutokhlǒ cî̌nṳ̌ lû̌û pwǎ. 15Dǒnô̌kòdě bǎ kòyò nutôpwa̤ ma̤hto a ta̤sǎyṳ phû̌mò̤̌ akhanu, a dǐhtûhtò̌ lû̌û ta̤sǔ, tôplǎnô̤̌ ta̤sǔ nî̌ apǒǐ bò asǎphlǒ dě aphû̌ô̌lò̤ ta̤si tûjû̌pwa̤ hǒ.

16He pṳ̌wè̤̌ dǒ he mô̤ǐ sî, ta̤ dǒ a tôtô̤̌ tokhlǒnu, yṳ̌ǎ tǎ̤ lô̌khô tǎ̤mǎ̤ nî̌꤮. 17Lǒ̤bò sû dǒ awô̌ dě a lǒbe numî̌ Cǒmara dǒ a bô̌lò̤ lṳmṳ̌ kû̌ shǎ kû̌mî̌ la nutokhlǒ tôpwa̤ ǐlò̤ pwǎ. Cǒmara lǎ̤klô htû̌lè̌ tèplè̌khô̌kè ma̤pô̤̌ ta̤lî yô̤ǔ htû̌lè̌ khô̌kè nutô̤̌. 18Dǒ pa ganǎ̤de ta̤sǎlě̤we̤kè ta̤tě̤ta̤mè̤̌ akhû̌akhî, dě Cǒmara dǐhtûhtò̌ pa kû̌ aphû̌ pô̤̌ asǎphlǒ nuhǒ. Pô̤̌khô pa gǔ htûhtò̌ sǒsǎ dǒ asǎwǐ tokhlǒ dǒ ta̤bô̌lò̤ lǒ̤꤮ bò nutokhlǒ akla nudě, a dǐhtûhtò̌ pa kû̌ aphû̌ pwǎ.

Ganǎ̤de kû̌ ta̤jûlě̤phǐyô̤̌

19He pṳ̌wè̤̌ dǒ he mô̤ǐ sî, to̤ǐ lô̌khô lě̤yô̤̌ hǒtômû nî̌. Kòyò pṳ̂̌꤮ tôpwa̤ bǎ ganǎ̤de tě̤tě̤mè̤̌mè̤̌, a bǎ gènè̤hî̌bǎ lô̌khô dě a bǎ sǎphlǒdû̌ phwè tô̤̌. 20Ma̤titèhî̌dě, kòyò dǒ sǎphlǒdû̌ tokhlǒnu, a dǐhtûhtò̌ jò ta̤ô̌htûpwa̤ acǒatè̤ dǒ Cǒmara sǎyṳnu tôkhò̌꤮ tô̤̌. 21Pô̤̌nudě wîkè bò ta̤sǎyṳsǎbǎ dǒ sî ma̤ sǎla̤la̤ a nutokhlǒ kû̌ lǒ̤꤮ bò sî lǎ̤klô ma̤ a phû̌mò̤̌ nutokhlǒ. Dě shò̌lò̤ lô̌khô sî sǎphlǒ dě ganǎ̤de yṳ̌ǎ lô̌khô Cǒmara alě̤ayô̤̌ dǒ a shǒlò̤ dǒ sî sǎphlǒkû nutokhlǒ. Alě̤ayô̤̌ numî̌ a ma̤hǎplǎge bò̌jò sî.

22Sî ganǎ̤de pwǎtǒ̤ Cǒmara alě̤ayô̤̌ dě sî kè̌ jûǎ gû̌ma̤ pô̤̌ a hî̌nutô̤̌ mî̌ sî lô̌lò̤ tû̌ sînǎ̤ hǒ. Sî tô ganǎ̤de gû̌ma̤ pô̤̌ Cǒmara alě̤ayô̤̌ hî̌nu. 23Kòyò dǒ a ganǎ̤de còcè̌ pwǎ Cǒmara ayô̤̌ dě a gû̌ma̤ kû̌ kòyò tô̤̌ tokhlǒ numî̌ asô̌sô̌kû̌ kòyò dǒ a kè̌ǐ amǐ̤sǎ kû̌ mǐ̤dǔ nutokhlǒ pwǎ. 24A kè̌ǐ hto anǎ̤ kû̌ mǐ̤dǔ dě a hǎhtò̌cû̌ tephekè akha, lǒ̤bò a kè̌shǐ dǒ mǐ̤dǔkû nutokhlǒ nî̌ tôplǎnô̤̌ a shôpe̤nǎ pwǎ. 25Ta̤sǎlě̤we̤kè mî̌ Cǒmara a ta̤sû̌ta̤tòwò dǒ alǒabe dě a ma̤hǎplǎge kòyò dǒ ta̤sǔta̤phû̌mò̤̌ akû. Kòyò tôpwa̤pwa̤ dǒ a kè̌lǎ sî̌ya tě̤tě̤mè̤̌mè̤̌ ta̤sû̌ta̤tòwònu dě a shôpe̤shônǎbò ta̤sû̌ta̤tòwò tô̤̌ nutokhlǒ, htokhôtô̤̌ a ganǎ̤de gû̌ma̤ ta̤sû̌ta̤tòwò tôpwa̤nu, Cǒmara gǔ ǐshowî̤ ata̤ma̤ nupě.

26Kòyò tôpwa̤pwa̤ dǒ a gènè̤lò̤ anǎ̤ kû̌ a mî̌ kòyò cubucaba wô̌ mè̤mè̤̌ ta̤ tôpwa̤ bǎbǎkǎlè a kè̌ sè̌rè̌ a ta̤hî̌bǎ tô̤̌ hî̌nu, a cubucaba wô̌ ta̤nu, alě̤apwî̤ ô̌ pe tôcǒ꤮ tô̤̌, dě a htû pwǎ kòyò dǒ a lô̌lò̤ ǐtû̌ anǎ̤ tôpwa̤ pwǎ. 27Ta̤cubucaba dǒ pha Cǒmara bè̌ kû̌ ta̤ dǒ a mṳ̂̌plî lǒlǒbebe tokhlǒ numî̌ ta̤kè̌ǐma̤ǐ phû̌khwè̌ tokhlǒ kû̌ pwa̤mǒ̤khwè̌ dǒ a tṳ̌bǎ kû̌ ta̤pò̤̌ta̤sha tokhlǒ, kǎtô̤̌ kòyò dǒ a tṳ̌bǎbò̌ anǎ̤ dě a ô̌tepheyî̤bò̌ kû̌ hǎkhû̌ a ta̤phû̌mò̤̌shǐhtô sî nutokhlǒ hǒ.