James 2

1He pṳ̌wè̤̌ sî꤮, sî mî̌ kòyò dǒ a yṳ̌nǐ̤nǎ̤nǐ̤ Běcǎ Yeshǔ Khrǐ dǒ a ô̌ kû̌ ta̤bwǐdû̌sîrîhtû tôpwa̤ nutokhlǒ. Pô̤̌nu akhû̌akhî, sî tôbǎ kè̌dû̌kè̌pî̌tî̌ kòyò tôpwǎ̤꤮ tô̤̌. 2Hî̌kûmṳ̂̌ mò̌ bǎ sî hè cubucaba plǒ lû̌û akha, kòyò sò̌ginǐ̤ kè̌ hènṳ̌ dǒ sîkla, dě tôpwa̤ dě a kûsô̌ jejû dǒ alě̤dû̌pwî̤htû, a plû̌nṳ̌ ruhta tokhlǒ, ashǔshawa̤ tôpwa̤ dě a hǎwǐ̤shèwè̤ dě a kûsô̌nṳ̌ pwǎ je ayò̤̌ pwǎ. 3Kòyò dû̌yò̤̌ tôpwa̤ dě sî kaǎshǔ bè̌dubè̌nǎ̤ yǎ, kǎtô̤̌ dǒ sîkla tôpwa̤nu a hî̌ lû̌û kû̌, “Hǎnòò̌ dǒ gògǒhtò̌yô̤̌ akhû̌nu” dě a hî̌ kòyò hǎwǐ̤shèwè̤ nutôpwa̤ kû̌, “Ihtǒ ô̌ bǎnu,” tô̤̌mî̌ “Hǎnòò̌ bǎ jûkhû̌ bǎ he khò̌lôpô̤̌ kòshî̌ bǒo,” A hî̌ pô̤̌nu. 4Sî ma̤kwè̌ mî̌titè numî̌ sî sî̌ganǎ̤ ǐtû̌ tô̤̌ ya? Kòyò dǒ sîkla tokhlǒnu, sî kè̌shǐ khô̌ asî dě sî htûhtò̌ pwa̤cî̌htò̌ kòyò dǒ a ô̌ kû̌ ta̤gènè̤ phû̌mò̤̌ sîtokhlǒ hǒ.

5Pṳ̌wè̤̌ sî꤮, dò̌ lô̌khô sî nò̌ku. Kòyò dǒ a hǎwǐ̤shèwè̤ dǒ hǎkhû̌ tokhlǒ numî̌, pô̤̌khô asî ta̤yṳ̌ta̤nǎ̤ gǔshû̌htò̌ gǔshohtò̌ dě asî gǔ ma̤nṳ̌ shigǎ dǒ Cǒmara olò̤ nǎ bǎ kòyò dǒ a mô̤nṳ̌ lû̌ nutokhlǒ ayanudě, Cǒmara rû̌htò̌ asî numî̌ sî sî̌ganǎ̤ tě̤tě̤mè̤̌mè̤̌ hǒ. 6Bǎbǎkǎlè kòyò pwa̤hǎwǐ̤shèwè̤phû̌ tokhlǒ nî̌ sî bè̌dubè̌nǎ̤ asî tô̤̌. Kòyò dǒ a pè̤̌ǎpè̤̌ô ma̤jî̌ma̤jû̌ sî numî̌ kòyò dû̌yò̤̌htò̌saphû̌ tokhlǒ pwǎ. Kòyò dǒ a cî̌hè sî dǒ pwa̤cî̌htò̌ta̤phû̌ tokhlǒ a lô̤mô̤̌ numî̌ asî nutokhlǒ hǒ. 7Kòyò dǒ a pî̤jî̌pèshè̌ bò Khrǐ mi̤wî̤mi̤wô̌ numî̌ asî nutokhlǒ hǒ.

8Lî̤plò̌shǐkû hî̌ kû̌, “Mô̤ǐ kòyò pô̤̌ na mô̤ǐlò̤ tûû̌ nanǎ̤nu,” a hî̌ pô̤̌nu. ^a Sî kè̌ jûǎ mè̤̌mî̌ca Cǒmara ashigǎ a ta̤sû̌ta̤tòwò numî̌ sî ma̤tô ta̤ hǒ. 9Bǎbǎkǎlè sî kè̌ kè̌dû̌kè̌pî̌tî̌ kòyò numî̌, sî ma̤ ta̤sǔ hǒ dě ta̤sû̌ta̤tòwò cî̌htò̌ sî pô̤̌ kòyò ma̤sǔ ta̤sû̌ta̤tòwò tôpwa̤nu hǒ. 10Mò̌pèpè̌ bǎbǎ a kè̌ ma̤sǔ ta̤sû̌ta̤tòwò tômû hî̌nu, a ma̤sǔ bòkè ta̤sû̌ta̤tòwò lǒ̤꤮ bò hǒ. 11Cǒmara hî̌ kû̌, “Cû̌sǔnṳ̌plěnṳ̌ tǎ̤ pwa̤mǒ̤pwa̤khû tǎ̤mǎ̤” a hî̌ pô̤̌nu. Htodě a hî̌ pô̤̌ kû̌, “Ma̤si tǎ̤ kòyò tǎ̤mǎ̤” a hî̌ pô̤̌ pô̤̌nu. ^b Pô̤̌nudě sî kè̌ cû̌sǔnṳ̌plěnṳ̌ pwa̤mǒ̤pwa̤khû tô̤̌ bǎbǎkǎlè sî kè̌ ma̤si kòyò hî̌nu, sî htû kòyò dǒ a ma̤sǔ ta̤sû̌ta̤tòwò tôpwa̤ hǒ. ^c

12Sè̌rè̌sama lô̌khô sî ta̤hî̌bǎ kû̌ sî ta̤ma̤ tokhlǒnu ma̤titèhî̌dě ta̤sû̌ta̤tòwò dǒ a ǐ kòyò ta̤pi̤li̤ nî̌ a cî̌htò̌ sî pě. 13Ma̤titèhî̌dě kòyò tôpwa̤pwa̤ dǒ a sǎyṳgwèbǎǐ kòyò tô̤̌nu, htû̌꤮ Cǒmara cî̌htò̌ kòyò nutôpwa̤ akhapěnu, a sǎyṳgwèbǎǐ lû̌tô̤̌ pě. Ta̤sǎyṳgwèbǎǐ kòyònu a ma̤pè̤̌ ta̤cî̌htò̌.

Ta̤yṳ̌ta̤nǎ̤ kû̌ ta̤ma̤

14He pṳ̌wè̤̌ sî꤮, kòyò tôpwa̤pwa̤ kè̌ hî̌ kû̌ he ta̤yṳ̌ta̤nǎ̤ ô̌ a hî̌ bǎbǎkǎlè a kè̌ dǔlè̌lṳ̌ a ta̤yṳ̌nu kû̌ a ma̤ ta̤wô̌ tokhlǒ tô̤̌ hî̌nu, abwǐsîrî ô̌ tôcǒ꤮ tô̤̌. A ta̤yṳ̌ta̤nǎ̤nu a ma̤hǎplǎjò lû̌û tô̤̌. 15Mè̤mè̤̌tôkhô sî pṳ̌wè̤̌ pwa̤khû tô̤̌mî̌ sî pṳ̌wè̤̌ pwa̤mǒ̤ tôpwa̤pwa̤ nî̌ a lǎ̤kûlǎ̤sô̌, a lǎ̤ǎlǎ̤ô tôni̤ kû̌ tôni̤ aya kè̌ ô̌lǒô̌be tô̤̌ hî̌mò̌mî̌, 16dě dǒ sîkla tôpwa̤pwa̤ nî̌ a kè̌ hî̌ lû̌û kû̌, “Gemô̤mô̤ gewô̌wô̌ nî̌꤮, Cǒmara ô̌kû̌ tûû̌ na pě, ma̤la̤wô̌ nanǎ̤ nî̌, dě ǎkǒôbe tû̌ lô̌khô nî̌꤮,” a hî̌ pô̤̌nu bǎbǎkǎlè sî kè̌ ǐ asî lǎ̤kûlǎ̤sô̌, lǎ̤ǎlǎ̤ô tôcǒ tô̤̌ hî̌nu, abwǐsîrî ô̌ tôcǒ tô̤̌꤮. 17Ta̤yṳ̌ta̤nǎ̤ numî̌ a ma̤ pô̤̌khônu hǒ. A kè̌ ô̌pwǎtǒ̤ ta̤yṳ̌ tocǒ, ta̤ma̤ kè̌ ô̌lṳ̌ tô̤̌ numî̌ amè̤̌pwǎ ta̤yṳ̌ dǒ a si pwǎ.

18Bǎbǎ kòyò tôpwa̤ kè̌ hî̌ kû̌, “Kòyò tokhlǒkhlǒnu a ô̌ kû̌ ta̤yṳ̌, tokhlǒkhlǒ dě a ô̌ kû̌ ta̤ma̤wô̌ ta̤.” Kè̌ hî̌ dě he gǔ hî̌shěshu a kû̌, dǔlè̌lṳ̌ bǎ he na ta̤yṳ̌ dǒ a shôdô kû̌ ta̤ma̤nu, dě he dǔlè̌lṳ̌ bǎ sô̌ na kû̌ he ta̤yṳ̌ dǒ a ô̌ kû̌ ta̤ma̤nu pě he gǔ hî̌shěshu a pô̤̌nu. 19Na yṳ̌ǎ kû̌ Běcǎ Cǒmara ô̌ tôpwa̤ nô̤̌. Awô̌hǒ. Khînǎkhîno tokhlǒnu a yṳ̌ǎ sô̌sô̌ pô̤̌nu, htokhôtô̤̌ asî yṳ̌ǎ dě a ǐsha gònò̤̌gòglè.

20Kòyò ô̌lǒô̌khlo, ta̤yṳ̌ta̤nǎ̤ dǒ a ô̌ kû̌ ta̤ma̤ tô̤̌ tokhlǒ numî̌ a tṳ̌dè pwǎ numî̌, na sǎyṳ kè̌shǐ yahî̌? 21Papha PhaAbraha dǒ awǐnu tôpwa̤ nî̌ Cǒmara bè̌cǒbè̌tè̤ a hî̌tè? A ganǎ̤de Cǒmara ayô̤̌ dě bǎ a lṳhtò̌ aphû̌khû KhûIsè̌ dǒ ta̤lṳhtò̌wǎ̤ akhanu, Cǒmara bè̌cǒbè̌tè̤ lû̌û kû̌ a ta̤ma̤nu akhû̌khî pwǎ. ^d 22Na kè̌shǐ ata̤yṳ̌ kû̌ a ta̤ma̤nu ma̤wô̤̌wô̤̌lû̌ ta̤. A ta̤ma̤ nî̌ a ma̤ lǒbe hto lû̌û ta̤yṳ̌ hǒ. 23Dě lî̤plò̌shǐ hî̌nǎnu a lǒbehè dě a hî̌ kû̌, “PhaAbraha yṳ̌ǎ Cǒmara dě dǒ ata̤yṳ̌ akhû̌akhî, Cǒmara bè̌ a pô̤̌ kòyòcǒkòyòtè̤ tôpwa̤ nuhǒ,” ^e a hî̌ pô̤̌nu. Pô̤̌nudě PhaAbraha nî̌ kòyò kaǎ lû̌û kû̌ Cǒmara a khô. ^f 24Pô̤̌nudě, sî kè̌shǐ kû̌ Cǒmara bè̌cǒbè̌tè̤ kòyò tôpwa̤pwa̤nu, a bè̌cǒbè̌tè̤ tǒ̤pwǎ lû̌û kû̌ a ta̤yṳ̌ta̤nǎ̤ tôcǒ pwǎnu mè̤̌tô̤̌. A bè̌cǒbè̌tè̤ lû̌ kû̌ ata̤ma̤ dǒ a dǔlè̌lṳ̌ kû̌ a ô̌ kû̌ a ta̤yṳ̌ta̤nǎ̤nu pwǎ.

25Pwa̤mǒ̤shǎǎnǎ̤ Mǒ̤rakhǎ numî̌ a sô̌sô̌ pô̤̌nu hǒ. Pô̤̌khô Isôrělaphû̌ dǒ a nṳ̌ kè̌ǐ hǔ ta̤ nutokhlǒ gǔ cû̌htò̌hǎplǎ bò̌kè kû̌ klè̌ dǒ ashǔshawa̤ tôbô ayanu, a kaǎmô̤shǔ asî dě a ma̤jè̌ bǎ asî akhû̌akhî, Cǒmara bè̌cǒbè̌tè̤ lû̌û kû̌ a ta̤phǐta̤ma̤ akhû̌khîhǒ. ^g 26Pô̤̌nudě, ta̤yṳ̌ dǒ a ô̌ kû̌ ta̤ma̤ tô̤̌nu, asô̌sô̌kû̌ nǎ̤glǒ dǒ ta̤htûpwa̤ ô̌ dǒ akû tô̤̌ dě a sikè nuhǒ.