Jam 3 | KxfSCKXF | STEP | He pṳ̌wè̤̌ sî, sî tô htû jûgrû sara tô̤̌, ma̤titèhî̌dě pô̤̌ sî sî̌ganǎ̤ hto kû̌, pa dǒ a htû sara tokhlǒnu, Cǒmara cî̌htò̌ shû̌khlo pa kû̌ kòyò dǒ ashǔshawa̤ nutokhlǒ pě.

James 3

Plî̤ awe̤akè

1 He pṳ̌wè̤̌ sî, sî tô htû jûgrû sara tô̤̌, ma̤titèhî̌dě pô̤̌ sî sî̌ganǎ̤ hto kû̌, pa dǒ a htû sara tokhlǒnu, Cǒmara cî̌htò̌ shû̌khlo pa kû̌ kòyò dǒ ashǔshawa̤ nutokhlǒ pě. 2 Pa ma̤sǔ kè̌khî bò ta̤ pṳ̂̌tôpwa̤ hǒ. Bǎbǎkǎlè kòyò dǒ a hî̌bǎsǔ gû̌ kòyò tôkhò̌꤮ tô̤̌ tôpwa̤nu, a mè̤̌kû̌ kòyò dǒ alǒabe tôpwa̤ dě akè̌ǐpè̤̌tû̌ anǎ̤nu hǒ.

3 Pô̤̌khô tîsî̌ gǔ jûǎ payô̤̌nu dě, pa tṳ̌mě tîsî̌ kû̌ tě̤htò̌pli̤, dě pa htû̌tǐwǐ̤cû̌bò̌ bò sado tîsî̌pě. 4 Kè̌mè̤̌tô̤̌dě gènè̤kè̌kè̌ lô̌khô sǒkhlidû̌ tôbǎ awe̤akènu. Sǒkhlidû̌ nî̌ adû̌môti̤ dě gili̤sǎdû̌ htû̌lûcû̌ lû̌û, bǎbǎkǎlè ta̤ dǒ a bô htû̌tǐwǐ̤cû̌bò̌ lû̌û numî̌ sǒkhlilǎ̤wǎ̤ pî̌tî̌phû̌ tôbǎ pwǎ. Dě pwa̤wǎ̤ sǒkhlidû̌ dǒ anô̌kò nutôpwa̤ sǎyṳ cû̌bǎtè tôkûkû̌nu, sǒkhlilǎ̤wǎ̤phû̌ nutôbǎ sûcû̌ lû̌û pwǎ. 5 Kòyò plî̤ numî̌ a sô̌sô̌ pô̤̌nu hǒ. A pî̌tî̌phû̌ pwǎ bǎbǎkǎlè a hî̌bǎhtû̌sò̌ tûû̌ ata̤ma̤ awe̤akè tokhlǒ. Gènè̤kè̌mò̌, gǎpwa̤gono̤ dû̌ pwǐtè bǎbǎ, mî̌plô̤̌phû̌ tôshǎ pwǎnu a gè̌bò̌ bò pwǎ. 6 Kòyò plî̤nu asô̌sô̌kû̌ mî̌ nuhǒ. Dǒ nǎ̤glǒ ayô̤agî̌ aklanu, plî̤ mî̌ asô̌sô̌kû̌ hǎkhû̌ dǒ a lǒbe kû̌ ta̤phû̌mò̤̌shǐhtô nutôbǎ hǒ. A ma̤so bòkè kòyò anǎ̤glǒ tôpwabò hǒ. Plî̤ nî̌ a shû̌u mǔtîglî bò pa ta̤ô̌htûpwa̤ kû̌ mî̌ nuhǒ dě mî̌ numî̌ a ô̌ dǒ lara akû hè hǒ.

7 Kòyò hǎkhû̌phû̌ ma̤na̤jòbò ta̤phû̌ta̤wè̤ pṳ̂̌꤮ tocǒ, a ma̤pè̤̌jòbò ta̤mi̤ta̤mò̤̌ sî, htû̌patǐ sî, wṳ̂̌ sî kû̌ tò̤̌phû̌ sîtokhlǒ bò̌꤮ bò. 8 Bǎbǎkǎlè kòyò dǒ a ma̤lèjò kòyò plî̤nu a ô̌ tôpwǎ̤꤮ tô̤̌. Kòyò plî̤ nî̌ a lǒbe kû̌ ta̤phû̌mò̤̌shǐhtô tokhlǒ dě kòyò pǒǐ pè̤̌jò atô̤̌, a ô̌be kû̌ ata̤wè̤̌mè̌tîklî̌ dǒ a ma̤sima̤hǎmǎ mî̌ca kòyò tokhlǒ.

9 Sî sî̌ganǎ̤ kû̌ pa noǎ pa plî̤nu kû̌ lǎ̤htû̌sò̌htò̌ papha Běcǎ Cǒmara, htokhôtô̤̌ pa noǎ pô̤̌ a kû̌ pa lǎ̤ǐsho kòyò dǒ Cǒmara bô̌lò̤ a pô̤̌ anǎ̤glǒ nutokhlǒ. ^a 10 Dǒ gô̌kû tôkû pwǎ akûnu ta̤htû̌sò̌htò̌ mî̌ a hǎhtò̌htò̌, ta̤ǐsho sî mî̌ a hǎhtò̌htò̌. He pṳ̌wè̤̌ sî꤮, a tô hǎhtò̌ pô̤̌nu tô̤̌. 11 Shihtǎpo̤ akû tôkû pwǎnu, shikabǎ mî̌ ahǎhtò̌htò̌, shikhǎ mî̌ ahǎhtò̌htò̌, a pǒ̤htò̌ culû̌û pô̤̌numî̌ anǐ̤ ya? 12 He pṳ̌wè̤̌ sî꤮, dǐshimṳ̌ sǎhtò̌jò òlǐbasǎ tô̤̌. Sîpî̌mṳ̌ sǎhtò̌jò dǐshisǎ tô̤̌, pô̤̌nudě shihtǎpo̤ dǒ akhǎ tôkûnu, a pǒ̤htò̌ jò shikabǎ tô̤̌.

Ta̤sî̌khû̌sî̌ya ô̌ dǒ mǒkhû̌ hè

13 Kòyò dǒ sîkla tôpwa̤pwa̤ dǒ a ô̌ kû̌ a ta̤sî̌khû̌sî̌ya dě a sî̌ganǎ̤ phlô numî̌ mò̌pè? A tôbǎ dǔlè̌lṳ̌ ata̤sî̌khû̌sî̌ya tokhlǒnu kû̌ a ta̤ô̌htûpwa̤ dǒ awô̌, htokhôtô̤̌ a tôbǎ dǔlè̌lṳ̌ a ma̤ta̤nu kû̌ dǒ ta̤shò̌lò̤ sǎphlǒ. Ta̤shò̌lò̤ numî̌ a hè tutṳ̌ dǒ ta̤sî̌khû̌sî̌yanu a ô̌ pwǎ. 14 Bǎbǎkǎlè dǒ sî sǎphlǒkûnu, sî kè̌ sǎkhěkhû̌khwè lû̌û, sî mô̤ǐlò̤ tûû̌ sînǎ̤ dě sî kè̌dû̌lò̤ǐ tû̌ sînǎ̤ tokhlǒ kè̌ ô̌ hî̌nu, hî̌bǎ htû̌sò̌ tûû̌ tǎ̤ sînǎ̤ kû̌ sî ô̌ kû̌ ta̤sî̌khû̌sî̌ya pô̤̌nu tǎ̤mǎ̤, dě ma̤takǎshǔ tǎ̤ ta̤tě̤ta̤mè̤̌nu tǎ̤mǎ̤. 15 Ta̤sî̌khû̌sî̌ya pô̤̌nu tokhlǒ mî̌ a ô̌ dǒ mǒkhû̌ hè mè̤̌tô̤̌, hǎkhû̌běkhû̌ a ta̤sî̌khû̌sî̌ya nutokhlǒpwǎ. Ta̤sî̌khû̌sî̌ya pô̤̌nu tokhlǒ mî̌ a ô̌ dǒ Yôla Plò̌shǐ Běcǎ a ô̌ hè mè̤̌tô̤̌, a ô̌ dǒ khînǎkhîno a ô̌ hè pwǎ. 16 Ma̤titèhî̌dě bǎ ta̤sǎkhěkhû̌khwè lû̌û kû̌ ta̤mô̤lò̤ ǐtû̌ nǎ̤ sî ô̌ akhanu, a dǐ ô̌ htûhtò̌ ta̤shû̌shushû̌shǎ kû̌ ta̤phû̌mò̤̌shǐhtô nupě.

17 Bǎbǎkǎlè ta̤sî̌khû̌sî̌ya dǒ a ô̌ dǒ mǒkhû̌ hè numî̌ a mṳ̂̌plî wǐ pě, htopědě a dǐ ô̌htò̌ ta̤mô̤ta̤bǎ, ta̤gènè̤ jòbǎ kòyòya, sǎphlǒô̌ ganǎ̤de kòyò ta̤hî̌bǎ, lǒbe kû̌ ta̤sǎyṳ kû̌ ma̤wô̌ta̤ tokhlǒ, kè̌dû̌ kè̌pî̌tî̌ kòyò tô̤̌, htodě ta̤ jî̌ ma̤khěma̤khô̌ sî ô̌ tô̤̌. 18 Kòyò dǒ a dǐô̌htò̌ ta̤mô̤ta̤bǎnu, a shǒlò̤ ta̤mô̤ǐ akhlialè dě htû̌꤮ kòyò kǎgewô̌ akhapěnu, a nǐ̤bǎ ta̤tě̤ta̤mè̤̌ asǎ pě.