Jam 4 | KxfSCKXF | STEP | Ta̤shěpě̤ lû̌û tokhlǒ kû̌ ta̤klî̌ lû̌û sî nî̌ a cû̌ hènṳ̌ tǒ̤ sîkla hî̌tè? A hènṳ̌ hî̌tè numî̌, dǒ sî sǎphlǒ a ta̤sǎyṳ phû̌mò̤̌ tokhlǒ shěpě̤ kè̌khî lû̌û dǒ sîkû dě ahènṳ̌ pwǎ.

James 4

Khrǐphû̌ jûlě̤phî̌ Cǒmara yô̤̌ pṳ̂̌꤮ plǎ

1 Ta̤shěpě̤ lû̌û tokhlǒ kû̌ ta̤klî̌ lû̌û sî nî̌ a cû̌ hènṳ̌ tǒ̤ sîkla hî̌tè? A hènṳ̌ hî̌tè numî̌, dǒ sî sǎphlǒ a ta̤sǎyṳ phû̌mò̤̌ tokhlǒ shěpě̤ kè̌khî lû̌û dǒ sîkû dě ahènṳ̌ pwǎ. 2 Sî sǎyṳ ta̤ dě sî nǐ̤bǎtô̤̌ akhû̌akhî, sî ma̤si kòyò. Sî sǎyṳ ta̤ dě sî nǐ̤bǎjò ta̤tocǒ tô̤̌ akhû̌akhî, sîklî̌sîhto kè̌khî lû̌û. Sî kwi Cǒmara tô̤̌ akhû̌akhî, sî sǎyṳ ta̤ tokhlǒ dě sî nǐ̤bǎ jò kû̌ kòyò tô̤̌. 3 Dě bǎ sî kwi ta̤ akha, sî nǐ̤bǎ kû̌ kòyò tôcǒ꤮ tô̤̌, ma̤titèhî̌dě sî sǎphlǒ a ta̤gènè̤nǎ sǎyṳkwi tokhlǒ nî̌, a lûsǔ lô̌khô pwǎ. Sî kwi lô̌khô pwǎ kû̌ sî sǎyṳ noǎ a kû̌ sî lǎ̤ma̤mô̤lò̤ tûû̌ sînǎ̤ ayanu pwǎ.

4 Kòyò dǒ a sǎphlǒ cǒtè̤ kû̌ Cǒmara tô̤̌ sî, sî bǒsû̌ kû̌ hǎkhû̌ a ta̤phû̌mò̤̌shǐhtô tokhlǒ numî̌ sî htûhtò̌kè pwa̤dǔdǎ Cǒmara tokhlǒhǒ numî̌ sî sî̌ganǎ̤ tô̤̌ ya? Kòyò dǒ a sǎyṳ htûhtò̌ hǎkhû̌ a ta̤phû̌mò̤̌shǐhtô nutokhlǒ a khô tôpwa̤pwa̤nu a ma̤ sǎphlǒdû̌ anǎ̤ kû̌ Cǒmara hǒ. 5 Cǒmara hî̌ ta̤ dǒ lî̤plò̌shǐkû tokhlǒnu, yô̤̌mûyô̤̌sǎ ô̌tô̤̌ bǎ gènè̤ pô̤̌nu tôpwǎ̤꤮ tô̤̌. Lî̤plò̌shǐkû hî̌ kû̌, “Cǒmara dǐô̌ ta̤htûpwa̤ dǒ pakûnu, a sǎyṳ nohtû kû̌ ata dě a sǎkhwè̌ ǐ mè̤̌mè̤̌.” ^{▼▼lî̤plò̌shǐ dǒ ashǔshawa̤ tokhlǒ hî̌ kû̌, “Pa kè̌ bè̌dû̌ pa ta̤mô̤ dǒ Cǒmara akhû̌ tô̤̌ hî̌dě, Yôla Plò̌shǐ Běcǎ dǒ Cǒmara dǐô̌ dǒ pakû tôpwa̤nu, a sǎkhwè̌ mî̌caca pě.”} 6 Bǎbǎkǎlè ta̤bwǐta̤sîrî dǒ Cǒmara ǐlò̤ panu, akhû̌aǎ shû̌ khlope pô̤̌nu akhû̌akhî, lî̤plò̌shǐkû hî̌ kû̌,

“Cǒmara ma̤tě̤tṳ̌ shěshu kòyò dǒ a bè̌htò̌lṳ̌ asǎphlǒ nutokhlǒ, bǎbǎkǎlè abwǐsîrî nî̌ a ǐlò̤ dû̌wî̤khlo kòyò dǒ a shò̌lò̤ asǎphlǒ nutokhlǒ alô̤.” ^b

7 Pô̤̌nudě shò̌lò̤ lô̌khô sî sǎphlǒ dǒ Cǒmara alǎ̤, dě shěshu hǎkhû̌tananu dě hǎkhû̌tana khlè̌ cû̌ tephekè sî lǎ̤ pě. 8 Sǒsǔ hèphǔ lô̌khô sînǎ̤ kû̌ Cǒmara dě a sǒsǔ hèphǔ anǎ̤ kû̌ sî ô̌ pě. Pwa̤ma̤sǔphû̌ sî꤮, cǔbò lô̌khô sî cǔdenu. Kòyò sǎphlǒ ô̌wô̤̌ sî꤮, ma̤mṳ̂̌plî sô̌ lô̌khô sî sǎphlǒnu. 9 Sǎplǎ̤ mò̌ lô̌khô, hǎ mò̌ lô̌khô. Sî ta̤sǎyǎ̤nu htû̌lè̌kè a kû̌ sî ta̤hǎta̤wônu, sî ta̤sǎlě̤sǎlò̤nu htû̌lè̌kè mò̌ a kû̌ sî ta̤sǎplǎ̤nu. 10 Shò̌lò̤ lô̌khô sî sǎphlǒ dǒ Běcǎ a lô̤mô̤̌ dě a bè̌htò̌yô̤̌tû̌ sî pě.

Pè̤̌wǎ̤ tǎ̤ ta̤sǔ kû̌ hî̌phû̌mò̤̌ tǎ̤ ta̤dòkûphû̌ nutokhlǒ tǎ̤mǎ̤

11 He pṳ̌wè̤̌ sî, hî̌phû̌mò̤̌ kè̌khî tǎ̤ lû̌û tôpwa̤ kû̌ tôpwa̤ tǎ̤mǎ̤ nî̌꤮. Mò̌pèpè̌ bǎbǎ dǒ a hî̌phû̌mò̤̌ kòyò dǒ a yṳ̌ǎ Khrǐ tôpwa̤pwa̤ mè̤̌tô̤̌mî̌ a pè̤̌wǎ̤ kòyò ta̤sǔ dǒ a yṳ̌ǎ Khrǐ tôpwa̤pwa̤ numî̌ a hî̌bǎ phû̌mò̤̌ ta̤sû̌ta̤tòwò dě a pè̤̌wǎ̤ ta̤sû̌ta̤tòwò ta̤sǔ nuhǒ. Sî kè̌ bè̌ ta̤sû̌ta̤tòwònu ta̤sǔ hî̌dě, sî mî̌ kòyò dǒ a jûlě̤phî̌ ta̤sû̌ta̤tòwò yô̤̌ mè̤̌tô̤̌. Mè̤̌pwǎ kòyò dǒ a bè̌ ta̤sû̌ta̤tòwò ta̤sǔ pwǎ. 12 Pwa̤ dǒ a ǐlò̤ ta̤sû̌ta̤tòwò dě a bǎ cî̌htò̌ ta̤ numî̌ tǒ̤pwǎ Cǒmara tôpwa̤ nô̤̌pwǎ. Pwa̤ dǒ a ma̤hǎplǎjò ta̤ dě a ma̤pî̌jò ta̤ numî̌ tǒ̤pwǎ Cǒmara tôpwa̤ nô̤̌pwǎ. Bǎbǎkǎlè sî dě, sî cû̌bè̌ tǒ̤ kòyò ta̤sǔ dě mî̌ sî gènè̤tû̌ sînǎ̤ kû̌ kòyò hî̌tè tôpwa̤ ya?.

Bè̌dû̌bè̌pwǎ̤ tǎ̤ sî nǎ̤ tǎ̤mǎ̤

13 Khònò̤̌ ganǎ̤de lô̌khô, dǒ sîkla tokhlǒkhlǒnu a hî̌ lô̌khô kû̌, “Khò̌tôni̤ tô̤̌mî̌ htû̌ pe̤wô̤pěnu, pa cû̌ dǒ wî̤̌tôwî̤̌ pě dě pa gǔ cû̌ ô̌ bǎnu tôně pě. Dě pa cû̌ ma̤gǔma̤khè̌ǎ dě ma̤gǔ dû̌htò̌ pô̤̌ kû̌ amǒ̤ nupě.” ^c 14 Pe̤wô̤pě sî ta̤ô̌htûpwa̤ glè̌ ma̤hî̌tè pěnu, sî sî̌ganǎ̤ tô̤̌. Sî ta̤ô̌htûpwa̤ numî̌ asô̌sô̌kû̌ mǐtitè? Asô̌sô̌kû̌ ta̤khǔhtò̌ dǒ a ô̌lṳ̌ tashò̌phû̌nô̤̌ dě a hǎmǎkèsô̌ nupwǎ. 15 Sî tô hî̌ lô̌khô hî̌tè hî̌dě, “Běcǎ kè̌ sǎphlǒô̌ kû̌ pa ô̌htûpwa̤ pě hî̌dě pa ma̤ pô̤̌nu pě,” ahî̌ lô̌khô pô̤̌nu. 16 Bǎbǎkǎlè khònò̤̌ sî bè̌htò̌lṳ̌ lô̌khô sî sǎphlǒ dě sî hî̌bǎ khucawa tûû̌ lô̌khô sînǎ̤. Lǒ̤bò ta̤bè̌dû̌bè̌pwǎ̤ nǎ̤ pô̤̌nu tokhlǒmî̌ ta̤phû̌mò̤̌shǐhtô pwǎ. 17 Pô̤̌nudě kòyò dǒ a sî̌ganǎ̤ kû̌ a tô ma̤ ta̤wô̌ bǎbǎkǎlè a kè̌ ma̤tô̤̌ tokhlǒnu, a ma̤ ta̤sǔhǒ.