James 5
Ta̤dǐsè̌rè̌ nǎ kòyò dû̌yò̤̌ tokhlǒ
1Kòyòdû̌yò̤̌ sî, khònò̤̌dě ganǎ̤de lô̌khô ta̤ dǒ he glè̌ shôbǐǐ bǎ sînu. Ta̤jî̌ta̤jû̌ glè̌ hèbǎ sî akhû̌akhî, hǎ tobonǎ mò̌ lô̌khô. 2Sî ta̤dû̌yò̤̌htò̌sa tokhlǒnu a nusonuû bò hǒ. Sîjehǐyò̤̌ tokhlǒnu agwǎ ǎbò hǒ. a 3Sîrusîhta tokhlǒnu a htǎǐhtǎkrô̌ bòkè hǒ. Ta̤htǎǐhtǎkrô̌ numî̌ a gǔ khòlṳ̌bǎ sî ta̤sǔ ô̌ pě dě a ǎkè sîphěsîyî̌ pô̤̌ mî̌ukè sînu pě. Sî ta̤dû̌yò̤̌htò̌sa tokhlǒnu, sî bè̌plǒ bòkè lṳmṳ̌ni̤ dǒ gutṳ̌kò nutokhlǒ aya hǒ. 4Kòyò ma̤ bǎ sî hǔkla dě sî ǐ kòyò akhû̌akǎ tô̤̌. Ganǎ̤de mò̌ lô̌khô, asî akhû̌akǎ kaǎgǔhtò̌ shěshǔ sî hǒ. Htodě pwa̤kǎplǒ bǎ sî bǔshò̌ tokhlǒ tûmṳ̂̌ta̤ma̤ sînu a htò̌tǒ̤ dǒ ta̤pô̤ta̤phǎ a Běcǎ Cǒmara a ô̌ hǒ, dě a ganǎ̤de asî ata̤mṳ̂̌ta̤ma̤ tokhlǒnu hǒ. b 5Bǎ sî ô̌htûpwa̤ dǒ hǎkhû̌ akhanu, sî ma̤mô̤ lǒbetû̌ sî sǎphlǒ kû̌ hǎkhû̌ ata̤mô̤ tokhlǒ hǒ. Sî ma̤bû̌suklǔtû̌ sînǎ̤ sô̌sô̌kû̌ ta̤phû̌ta̤wè̤ nuhǒ, bǎbǎkǎlè ta̤phû̌ta̤wè̤ nî̌ kòyò gǔ ma̤si asî htû̌ ta̤ma̤si alṳmṳ̌ni̤ nutôni̤ pěnu a sî̌ganǎ̤tû̌ lô̌khô anǎ̤tô̤̌. 6Kòyò ta̤sǔ ô̌tô̤̌ bǎbǎkǎlè sî cî̌htò̌ ma̤sikè kòyò, bǎbǎkǎlè asî ma̤tě̤tṳ̌ geshěshubò̌ sî tôcǒ꤮ tô̤̌.Ta̤khòsǎdô kû̌ ta̤kwicaba
7Pô̤̌nudě pṳ̌wè̤̌ sî, khòsǎdô lô̌khô tǒ̤dǒ Běcǎ hè sô̌ pě tôplǎnu nî̌꤮. Gènè̤kè̌ mò̌ lô̌khô pwa̤ma̤ǎ hǔklaphû̌ tôpwa̤ ô̌pǒ̤kè̌shuǐ tûû̌ a ta̤sǎta̤phô dǒ alě̤dû̌pwî̤htû tokhlǒnu. A bǎ sahtò̌ sǎphlǒhtû ô̌pǒ̤ǐ gǎju lò̤wǐnu dǒ a ma̤dô̌htò̌ bǎ lû̌û ta̤khlita̤lè tokhlǒnu, htodě a bǎ ô̌pǒ̤ tǒ̤dǒ gǎju lò̤ dǒ nô̌kò bǎ a ma̤pwǎ̤ma̤mi bǎ lû̌û ta̤sǎta̤phô nutokhlǒ. 8Sî bǎbǎ sî tô khòsǎdô pô̤̌nu. Tûlû̌ bè̌měgle lô̌khô sî ta̤kè̌shuǐnu, ma̤titèhî̌dě Běcǎ hè sô̌ pě alṳmṳ̌ni̤nu, aphǔhǒ. 9Pṳ̌wè̤̌ sî꤮, pô̤̌khô sî gǔ khòbǎ ta̤cî̌htò̌ tô̤̌nu, tûmṳ̂̌ta̤ma̤ tǎ̤ lû̌û tôpwa̤ kû̌ tôpwa̤ tǎ̤mǎ̤. Pwa̤cî̌htò̌ ta̤ tôpwa̤ hè ô̌ tǒ̤ phǔtinǐ̤ dǒ takha kòshî̌ hǒ. 10He pṳ̌wè̤̌ sî꤮, gènè̤htò̌sô̌ lô̌khô piwi̤pèshè dǒ a hî̌bǎ dǒ Běcǎ ami̤ akû nutokhlǒ nî̌꤮. Bǎ sî kè̌shǐ tṳ̌bǎ kû̌ ta̤jî̌ta̤jû̌ akhanu, kè̌lû̌mò̌mṳ asî khòsǎdôbò̌ ta̤jî̌ta̤jû̌ nutokhlǒ nî̌꤮. 11Kòyò dǒ a sǎphlǒhtû bò̌nu, pa hî̌ a kû̌ kòyò dǒ a nǐ̤bǎ ta̤ǐshowî̤. c Sî ganǎ̤de hto Phayṳ̂bǎ a ta̤khòsǎdô awe̤akè hǒ dě dǒ nô̌kò gutṳ̌ dě Běcǎ ta̤yè̤lò̤nǎ kû̌ a gǔ ǐshowî̤ lû̌û hî̌tè awe̤akènu, sî sî̌ganǎ̤ hǒ. Ma̤titèhî̌dě Běcǎ a ta̤sǎyṳgwèbǎǐnu alǒabe mî̌ca. d 12Pṳ̌wè̤̌ sî꤮, dǒ ta̤lǒ̤ bò aklanu, ta̤ dǒ a lṳ̂dû̌lǒ꤮ tôcǒmî̌ bǎ sî olò̤ ta̤tôcǒcǒ akhanu, wṳ̂̌dòglòtṳ̌ tǎ̤ sînǎ̤ kû̌ mǒkhû̌, tô̤̌mî̌ hǎkhû̌, tô̤̌mî̌ dǒ ta̤ ashǔshawa̤ tôcǒcǒ a lô̤mô̤̌ pô̤̌nu tǎ̤mǎ̤ nî̌꤮. Pô̤̌khô sî gǔ hǎplǎ kû̌ ta̤cî̌htò̌ ayanu, a kè̌ mè̤̌ dě “Amè̤̌,” hî̌ pô̤̌nu, a kè̌ mè̤̌tô̤̌ hî̌dě “Amè̤̌tô̤̌,” hî̌ pô̤̌nu pwǎ nî̌꤮. e 13Dǒ sîklanu, kòyò bǎpò̤̌bǎsha ô̌ tôpwa̤pwa̤ ya? A kè̌ ô̌ hî̌dě, a tô kwicaba ta̤. A sǎlě̤sǎlò̤ ô̌ tôpwa̤pwa̤ ya? A kè̌ ô̌ hî̌dě, a tô sǎwǐ htû̌sò̌htò̌ Cǒmara. 14Dǒ sîklanu, kòyòshǐ kòyòsha ô̌ tôpwa̤pwa̤ ya? A kè̌ ô̌ hî̌dě, a tô kaǎ ta̤dòkû mǒ̤khumǒ̤pwǎ̤ dǒ a htû ikǒlǒkòdû̌ tokhlǒ dě mǒ̤khumǒ̤pwǎ̤ tokhlǒ plṳ̌bǎ lû̌û kû̌ htǒshi dǒ Běcǎ ami̤ akû dě asî tô kwicaba bǎ aya. f 15Ta̤yṳ̌ta̤nǎ̤ a ta̤kwicaba nî̌ a ma̤hǎmǎkè kòyòsha nutôpwa̤ pě. Běcǎ ma̤hǎmǎ getîkhî sô̌ lû̌û pě dě a kè̌ ma̤sǔ ta̤ hî̌dě Běcǎ plûkè sô̌ a ta̤sǔ pě. 16Pô̤̌nudě, tôpwa̤ kû̌ tôpwa̤ olò̤wǎ̤lò̤ lô̌khô sî ta̤sǔ tokhlǒ, dě pô̤̌khô sî gǔ ô̌shû̌ô̌mô̤ getîkhî ayanu, kwicaba kè̌khî bǎ lû̌û tôpwa̤ kû̌ tôpwa̤ nî̌. Kòyòcǒkòyòtè̤ tôpwa̤ a ta̤kwicaba nî̌ a ô̌ kû̌ a ta̤siwi̤sòwò̤ dě a ma̤jè̌bò̌ dû̌wî̤ ta̤nutokhlǒ hǒ. 17Piwi̤pèshè Khûělǐya mî̌ kòyò tôpwa̤ dǒ a sô̌sô̌pwǎ pô̤̌ he kû̌ na pwǎ. Dě pô̤̌khô gǎ glè̌ julò̤ tô̤̌ ayanu, a kwicaba lǒ̤sû̌lǒ̤sò̌ akhû̌akhî, gǎgakè suně kû̌ lasusô̌. g 18A kwicaba nô̌kò tôplǎ dě gǎju lò̤sô̌, dě sǒmṳ̌wṳ̂̌bô tokhlǒ sǎhtò̌phôhtò̌ tîkhî sô̌. h 19He pṳ̌wè̤̌ sî꤮, dǒ sîklanu kòyò tôpwa̤pwa̤ a kè̌ cû̌ tò̤̌kè kû̌ ta̤tě̤ta̤mè̤̌ hî̌dě kòyò dǒ ashǔshawa̤ kè̌ cû̌ kaǎge sô̌ lû̌û dǒ klè̌tô hî̌nu, 20gènè̤htò̌sô̌ lô̌khô kû̌, kòyò tôpwa̤pwa̤ dǒ a cû̌ kaǎge sô̌ pwa̤ma̤sǔphû̌ dǒ a cû̌sǔ klè̌ tôpwa̤pwa̤ numî̌ amè̤̌kû̌ a ma̤hǎplǎge kòyò nutôpwa̤ a yôla htûpwa̤ dǒ ta̤si hǒ. Htokhôtô̤̌ pô̤̌khô Cǒmara gǔ plûkè kòyò nutôpwa̤ ata̤sǔ ô̌dû̌wî̤ ayanu, a ma̤jè̌ hto lû̌û hǒ. i
Copyright information for
KxfSCKXF