John 10
Yô̤̌sǎkhěkhô̌ pwa̤kè̌sû̌phû̌ awe̤akè
1Běcǎ Yeshǔ hî̌khô̌ayô̤̌ kû̌, “He hî̌cǒcǒ sî, kòyò dǒ a hènṳ̌tô dǒ sû̌phû̌apô̤ a takhakû tô̤̌ tôpwa̤pwa̤, dě a kè̌ hèhtò̌ nṳ̌bò̌ dǒ ashǔshawa̤ tôkûkû numî̌, pwa̤ǎhǔ, pwa̤phî̌sigwǐ yǒsaphǎ pwǎ. 2Bǎbǎkǎlè kòyò dǒ a hè nṳ̌tô dǒ takhakû tôpwa̤pwa̤ numî̌ pwa̤kè̌sû̌phû̌ hǒ. 3Pwa̤ô̌pǒ̤ takhakû tôpwa̤nu, a gǔ bǔmôshěshu bǎ pwa̤kè̌sû̌phû̌ nutôpwa̤ takhade pě. Sû̌phû̌ tokhlǒ ganǎ̤de sî̌ganǎ̤ lû̌ûyô̤̌. Dě a kaǎhtò̌ ǐtûû̌ asû̌phû̌ sî tôdo ami̤ tocǒ, tôdo ami̤ tocǒ dǒ apô̤khlo dě asû̌phû̌ tokhlǒ gû̌bò lû̌ûkò. 4Asû̌phû̌ tokhlǒ to̤ǐ lû̌yô̤̌ akhû̌akhî, bǎ a kaǎhtò̌ htobò asû̌phû̌ tokhlǒ dǒ apô̤khlo akhanu, a dě a cû̌ wǐ dǒ alô̤mô̤̌, asû̌phû̌ tokhlǒ dě a gû̌bò lû̌kò. 5Sû̌phû̌ nutokhlǒ nî̌, a gû̌ kû̌ kòyò dǒ ashǔshawa̤ tokhlǒ akòtô̤̌, ma̤titèhî̌dě asî ganǎ̤de lû̌ûyô̤̌ tô̤̌, a sî̌ganǎ̤bǎ lû̌û tô̤̌ akhû̌akhî, a khlè̌ tephekè bò kòyò dǒ ashǔshawa̤ tokhlǒ alǎ̤ pwǎ.” 6Běcǎ Yeshǔ hî̌ǐ bǎ asî yô̤̌sǎkhěkhô̌ hǒtôtô̤̌ bǎbǎkǎlè asî sî̌yaphlô lô̌khô yô̤̌mûyô̤̌sǎ tô̤̌. 7Pô̤̌nu akhû̌akhî, Yeshǔ hî̌ sô̌ kû̌, “He hî̌cǒcǒ sî, he mî̌ sû̌phû̌pô̤ a takhadekû hǒ. 8Kòyò lǒ̤bò dǒ a hè wǐ dǒ helô̤mô̤̌ nutokhlǒ mî̌, pwa̤ǎhǔ, kòyò phî̌sigwǐyǒsaphǎ tokhlǒ pwǎ. Dě sû̌phû̌ tokhlǒ ganǎ̤de asîyô̤̌ tô̤̌. 9He mî̌ takhakû hǒ. Kòyò lǒ̤bò dǒ a hènṳ̌ tutṳ̌ kû̌ he dǒ a mî̌ takhakû tokhlǒnu, a gǔ nǐ̤bǎ ta̤ma̤hǎplǎge pě. A gǔ hènṳ̌ hǎhtò̌ dě a gǔ kè̌shǐ a lǎ̤ǎshǎ agûlǎ̤ pě. 10Pwa̤ǎhǔ nî̌ a hèma̤titè numî̌, pô̤̌khô a gǔ hè ǎhǔǎhî̌, ma̤siǐ kòyò, ma̤pî̌ma̤kè kòyò ayapwǎ. He dě pô̤̌khô kòyò gǔ nǐ̤ ta̤htûpwa̤ htokhôtô̤̌ pô̤̌khô kòyò ta̤ô̌htûpwa̤ gǔ lǒbe htò̌sa aya nudě he hè pwǎ. 11“He mî̌ pwa̤kè̌sû̌phû̌ dǒ awô̌ tôpwa̤. Pwa̤kè̌sû̌phû̌ dǒ awô̌ tôpwa̤nu a ǐlò̤kè ata̤htûpwa̤ dǒ sû̌phû̌ tokhlǒ aya hǒ. 12Kè̌ dakǎǎ sû̌phû̌ kû̌ kòyò numî̌, sû̌phû̌ nutokhlǒ nî̌ ata mè̤̌tô̤̌ akhû̌akhî, bǎ a kè̌shǐ shǐmi̤ hè akha, a bè̌kè sû̌phû̌ dě a khlè̌kè pwǎ. Dě shǐmi̤ gǔ hè pṳ̂̌ǎ ěsikè sû̌phû̌ pě, dě a hè ma̤ khlè̌ pushǔpeshe bò sû̌phû̌ pě. 13Pwa̤ dakǎǎ sû̌phû̌ tôpwa̤nu, a hǎhtò̌khlè̌ tephekè pě, ma̤titèhî̌dě a mô̤ǐ sû̌phû̌ nutokhlǒ tô̤̌. 14“He mî̌ pwa̤kè̌sû̌phû̌ dǒ awô̌ tôpwa̤. He sî̌ganǎ̤ he sû̌phû̌ dě he sû̌phû̌ sî̌ganǎ̤ he. a 15Asô̌sô̌kû̌ hǒohǒ, hepha sî̌ganǎ̤ he dě he sî̌ganǎ̤ hepha, dě he ǐlò̤kè he sǎphlǒ dǒ he sû̌phû̌ tokhlǒ aya hǒ. 16He sû̌phû̌ dǒ ashǔshawa̤ dǒ a ô̌ bǎ apô̤kû tô̤̌nu a ô̌pe tokhlǒ. He bǎ kaǎge asî pě. Asî gǔ ganǎ̤de heyô̤̌ pě, dě asî gǔ ge htûbò sû̌phû̌ tômṳ̌ pě, pwa̤kè̌sû̌phû̌ a Běcǎ tôpwa̤ nô̤̌ pě. 17Hepha mô̤ǐ he ma̤titèhî̌dě pô̤̌khô he gǔ htûpwa̤ getîkhî sô̌nu, he ǐlò̤kè he ta̤htûpwa̤ hǒ. 18He kè̌ noma̤si kòyò kû̌ henǎ̤ tô̤̌ hî̌nu, kòyò ma̤si jò he tôpwǎ̤꤮ tô̤̌. He ǐlò̤kè he sǎphlǒ numî̌, kòyò noshû̌ he tôpwǎ̤꤮ tô̤̌, he sǎphlǒ kû̌ he nǎ̤ ǐlò̤ tûû̌ pwǎ. He ô̌ kû̌ he ta̤pô̤ta̤phǎ dǒ he sǎyṳ ǐlò̤kè hesǎphlǒ mî̌ anǐ̤nǐ̤, he sǎyṳ phî̌gesô̌ a mî̌ anǐ̤nǐ̤ pwǎ. Hepha mǎhè heyô̤̌ kû̌ he bǎma̤ pô̤̌o,” A hî̌ bǎ asî pô̤̌nu. 19Dǒ a hî̌bǎ pô̤̌nu akhû̌akhî, Yǔdaphû̌ tokhlǒ ô̌peshe khô̌kè sô̌ lû̌û ginǐ̤prṳ̂. 20Kòyò saprṳ̂ hî̌ kû̌, “A mî̌ khînǎ ma̤bǎ lû̌û dě a kimi pwǎ. Cû̌ ganǎ̤de cǎ ayô̤̌ ma̤titè?” 21Bǎbǎkǎlè dǒ ashǔshawa̤ tokhlǒnu a hî̌ sô̌ kû̌, “Khînǎ ma̤bǎ kòyònu a hî̌bǎ ma̤pô̤̌nu tô̤̌. Khînǎ ma̤lîge jò cǎ kòyòmǐ̤sǎ ya?” A hî̌ lô̌khô pô̤̌nu tokhlǒ.Yǔdaphû̌ tokhlǒ yṳ̌ǎ Yeshǔ tô̤̌
22Bǎnukha, dǒ Wî̤̌yarǔshôle akûnu, a tôkû̌ Yǔdaphû̌ sîtokhlǒ ma̤ pwè tôpwè dǒ kòyò kaǎ kû̌ ta̤gènè̤htò̌ getîkhî ta̤bè̌ plò̌shǐ ta̤lṳhtò̌hô dǒwǐkhanu, a ô̌ tôpwè. ▼▼bǎ Khrǐ hèlò̤ nò̌khôtô̤̌ aně 164 akhanu, Shǔrǐgǎphû̌ tokhlǒ hènṳ̌ ma̤tě̤pro̤ phǔmò̤̌wî̤̌ ta̤lṳhtò̌hônu suně htodě Yǔdaphû̌ tokhlǒ ma̤plîma̤mṳ̂̌ gesô̌ dě a bǎ plò̌shǐ tèplè̌ getîkhî ta̤lṳhtò̌hô nudě apwèǐ lô̌khô.
23Bǎnukha a tôkû̌ gǎwô̤̌kha dě Yeshǔ ô̌ bǎ ta̤lṳhtò̌hôkûnu dě a cû̌ bǎ ta̤lǎ̤ tûkû dǒ kòyò kaǎ kû̌ khwǐ Shò̌lômû hǐdòkû̌ nutûkû alǎ̤. 24Yǔdaphû̌ tokhlǒ hè ô̌plǒ te̤we̤bò lû̌û dě a hî̌ lû̌û kû̌, “Na mî̌ mò̌pè na shôbǐǐlṳ̌bǎ pa tôkhò̌꤮ tô̤̌, na no ô̌pǒ̤ kè̌shuǐ yî̤pô̤̌ pe pa pwǐ꤮ tè pě, na kè̌ mè̤̌mî̌ca Khrǐ hî̌dě shôbǐǐlṳ̌ bǎ pa,” A hî̌ lû̌û pô̤̌nu. 25“He hî̌hto bǎ sî hǒ dě sî yṳ̌tô̤̌. Ta̤cô̌klǐcô̌sè dǒ he ma̤ kû̌ hepha ami̤ tokhlǒnu, a hî̌bǎ hto dǒ heya hǒ. 26Bǎbǎkǎlè sî htû he sû̌phû̌ mè̤̌tô̤̌ akhû̌akhî, sî yṳ̌ǎ he tô̤̌. 27He sû̌phû̌ tokhlǒ numî̌ a ganǎ̤de heyô̤̌. He sî̌ganǎ̤ asî, dě asî gû̌ hekò. 28He ǐ asî yôla htûpwa̤ tûjû̌pwa̤. A gǔ si pe tôkhò̌꤮ tô̤̌. Kòyò hè cî̌hǎhtò̌ jò pe asî dǒ he takhakû tôpwǎ̤꤮ tô̤̌. 29Hepha nu adû̌khlo kû̌ kòyò pṳ̂̌꤮ tôpwa̤. Sû̌phû̌ tokhlǒ numî̌ a ǐ he dě kòyò hè cî̌htò̌kè jò pe asî dǒ hepha a cǔdekû tôpwǎ̤꤮ tô̤̌. 30He kû̌ hepha mî̌ tôpwa̤ nô̤̌ pwǎ.” 31Yǔdaphû̌ tokhlǒ htǔlò̤ lô̌khô sô̌ lǒ̤ dě glè̌ wîsi lû̌û. 32Bǎbǎkǎlè Běcǎ Yeshǔ hî̌ asî kû̌, “Ta̤ma̤wô̌ dǒ hepha noma̤ he tokhlǒnu, he dǔlè̌lṳ̌ dû̌wî̤ bǎ sî hǒ. Bǎbǎkǎlè sî glè̌ wîtǒ̤ he kû̌ lǒ̤ mî̌ he ma̤ ta̤wô̌ tokhlǒ bǎtè tocǒya?” A hî̌ asî pô̤̌nu. 33“Dǒ na ta̤ma̤wô̌ nutokhlǒ akhû̌akhî, dě pa glè̌ wî na kû̌ lǒ̤ mè̤̌tô̤̌. Na hî̌bǎsǔ cǎkǎ Cǒmara nǒ̤, ma̤titèhî̌dě na htû pwǎ kòyò hǎkhû̌phû̌ tôpwa̤pwa̤ dě na cû̌ dǒkôǐlò̤ tû̌ nanǎ̤ kû̌ Cǒmara,” Asî hî̌ lû̌û pô̤̌nu. c 34Dě Běcǎ Yeshǔ hî̌shěshu asî kû̌, “Dǒ sî ta̤sû̌ta̤tòwò akûnu, a wě̤nǎ tômè kû̌, ‘he hî̌ kû̌ sî mî̌ Cǒmara tokhlǒ,’ d a hî̌ pô̤̌nu yahě? 35Cǒmara alě̤ayô̤̌ numî̌ atôabǎ tûjû̌pwa̤. Kòyò htû̌lè̌ tèplè̌ jò lû̌û tôpwǎ̤꤮ tô̤̌. 36Pô̤̌nudě pha rû̌htò̌ he dě a nohèlò̤ he dǒ hǎkhû̌nu. Dě bǎ he hî̌ kû̌, ‘he mî̌ Cǒmara aphû̌khû tôpwa̤’ akhanu, sî cû̌ hî̌tǒ̤ he kû̌ he hî̌sǔ Cǒmara hî̌tè? 37He kè̌ ma̤tô pô̤̌ hepha ma̤nu tô̤̌ hî̌dě yṳ̌ǎ tǎ̤ he tǎ̤mǎ̤. 38Bǎbǎkǎlè kè̌ he ma̤ pô̤̌ hepha ma̤nu hî̌dě sî kè̌ yṳ̌ǎ lô̌khô tîkî̌ tô̤̌ hî̌nu, pî̌tî̌gutṳ̌ mî̌ sî tô yṳ̌ǎ lô̌khô ta̤ dǒ he ma̤ cô̌klǐcô̌sè nutokhlǒ. Sî kè̌ yṳ̌ǎ he ta̤ma̤ tokhlǒ hî̌dě sî gǔ sî̌ganǎ̤hè kû̌ pha ô̌ dǒ hekû dě he ô̌dǒ akû pě,” A hî̌ asî pô̤̌nu. 39Asî sǎyṳ pṳ̂̌ lû̌û bǎbǎkǎlè a hǎhtò̌cû̌ tephekè asîlǎ̤. 40Běcǎ Yeshǔ getîkhî sô̌ dǒ Jòda shilô̤̌mǒ̤ lô̤̌bò̌ tôkhô, bǎ Khûyṳ̂ha lǎ̤ju wǐlǒ kòyò shi agûlǎ̤ nutûkû, dě a geô̌ bǎnu. e 41Kòyò hèprṳ̂ dǒ lû̌ô̌. Dě asî hî̌ ǐtûû̌ kè̌khîlû̌û tôpwa̤ hto tôpwa̤ kû̌, “Khûyṳ̂ha ma̤lṳ̌ ta̤cô̌klǐcô̌sè tocǒ tô̤̌ bǎbǎkǎlè lǒ̤bò a hî̌ kòyò nutôpwa̤ awe̤akènu, atô bò,” A hî̌ lô̌khô pô̤̌nu. 42Kòyò bǎnutokhlǒ yṳ̌nṳ̌nǎ̤nṳ̌ jûgrûkè Yeshǔ.
Copyright information for
KxfSCKXF