Joh 12 | KxfSCKXF | STEP | Bǎ ta̤cû̌bò̌tûlû̌pwè bǎ nò̌khôtô̤̌ ani̤ susô̌ akhanu, Yeshǔ cû̌ dǒ Khûlasôrǔ ô̌ǐ Dobetanǐnu. Khûlasôrǔ tôpwa̤ numî̌ amè̤̌kû̌ Yeshǔ ma̤ ihtǒhtûpwa̤ getîkhî lû̌û nutôpwa̤ hǒ.

John 12

Yeshǔ ô̌ dǒ Dobetanǐ

(Matè̌ 26:6-13; Makǔ 14:3-9)

1 Bǎ ta̤cû̌bò̌tûlû̌pwè bǎ nò̌khôtô̤̌ ani̤ susô̌ akhanu, Yeshǔ cû̌ dǒ Khûlasôrǔ ô̌ǐ Dobetanǐnu. Khûlasôrǔ tôpwa̤ numî̌ amè̤̌kû̌ Yeshǔ ma̤ ihtǒhtûpwa̤ getîkhî lû̌û nutôpwa̤ hǒ. 2 Kòyò tîwî̌tòwò dǐǎdǐô Běcǎ Yeshǔ kû̌ lṳmṳ̌hǎ ta̤ǎ dě Mǒ̤matǎ dǐǎdǐô kû̌ kòyò bǎnu. Khûlasôrǔ hǎnòò̌ ô̌plǒ dǒ kòyò hǎnòò̌ ǎ lô̌khô dî bǎ dîgògǒ kòshî̌ akla nutokhlǒ. 3 Bǎnuakha Mǒ̤ma̤rǐ phî̌hènǐ̤ shinumû̌ cè̌cè̌ dǒ kòyò kaǎ kû̌ Na̤dǔ nutôpò̤̌. Shinumû̌ numî̌ apwî̤dû̌ shû̌lě dě a phǔ lò̤jwè̌ tôjî̌ gûlǎ̤. A hè lò̌lò̤ dǒ Běcǎ Yeshǔ khǎlǎlô̤ dě a htǔsûkè kû̌ akhǔlṳ. Shinumû̌nu, a numû̌ cû̌ bòkè hǐ tômè. ^a

4 – 5 Bǎbǎkǎlè, dǒ akhôphijǎ aklanu, ami̤ kû̌ Khûyǔda Isakarûnu ô̌tôpwa̤. Dǒ nô̌kò dě a shaǎkè Běcǎ nutôpwa̤ hǒ, dě a hî̌ kû̌, “Shaǎkè shinumû̌ dě a nǐ̤bǎ runu cû̌ǐ kû̌ kòyò pwa̤shèwè̤phû̌ nutokhlǒ tô̤̌ ma̤titè? Na kè̌ shaǎkè mî̌ a nǐ̤ ruyî̌ Denari sujwè̌ mè̤̌yahî̌!” 6 A gwèbǎǐ mè̤̌mî̌ca kòyò pwa̤shèwè̤phû̌ dě a hî̌ pô̤̌onu mè̤̌tô̤̌, ma̤titèhî̌dě a mî̌ a htû pwa̤ǎhǔ. A bǎ pṳ̂̌měǐ bǎ kòyò ru, sheǐbǎ kòyò rukhûkhi dě a bǒhtò̌ phî̌hǔ taga ru dě a ǎǐ tûû̌ ayapwǎ.

7 “A ô̌ tûû̌, ma̤dǐdò tǎ̤ a tǎ̤mǎ̤” Běcǎ Yeshǔ hî̌shěshǔ pô̤̌nu. “A bè̌wô̌ bǎ he shinumû̌ dǒ kòyò lǎ̤lǔǐ hepě tôni̤ ayahǒ. 8 Kòyò hǎwǐ̤shèwè̤phû̌ tokhlǒ ô̌plǒ kû̌ sî pṳ̂̌꤮ taplǎ, bǎbǎkǎlè he nî̌ he ô̌ gû̌ sî tô̤̌.” ^b

Kòyò gènè̤ gǔma̤si Khûlasôrǔ

9 Yǔdaphû̌ saprṳ̂dû̌ tokhlǒ ganǎ̤de kû̌ Běcǎ Yeshǔ ô̌bǎ Dobetanǐnu dě a cû̌ lô̌khô bǎnu. Asî sǎyṳ hèkè̌shî̌ lô̌khô Běcǎ Yeshǔ numè̤̌tô̤̌, asî sǎyṳ hè kè̌shǐ kû̌ Khûlasôrǔ dǒ Běcǎ Yeshǔ ma̤htûpwa̤ getîkhî lû̌û nutôpwa̤pwa̤. 10 Pô̤̌nu akhû̌akhî pwa̤shû̌gǎ ikǒdû̌ tokhlǒ gènè̤ gǔ ma̤si Khûlasôrǔ. 11 Ma̤titèhî̌dě dǒ Khûlasôrǔ akhû̌akhî, Yǔdaphû̌ wîkè dû̌wî̤ pwa̤shû̌gǎ ikǒlǒkòdû̌ tokhlǒ dě hǎhtò̌cû̌khô̌ lô̌khô dǒ Yeshǔ ô̌ dě yṳ̌ǎ lô̌khô Běcǎ Yeshǔ akhû̌akhî, a gènè̤ gǔma̤si lû̌û pwǎ.

Yeshǔ cû̌nṳ̌ dǒ Wî̤̌yarǔshôle akû

(Matè̌ 21:1-11; Makǔ 11:1-11; Lǔka 19:28-40)

12 Dǒ nô̌kò tôni̤nu, kòyò saprṳ̂ dǒ a hè ta̤cû̌bò̌tûlû̌pwè tokhlǒ ganǎ̤de lô̌khô kû̌ Yeshǔ hè dǒ Wî̤̌yarǔshôle dǒ klè̌lô̤hǒ. 13 Pô̤̌nudě a pṳ̂̌mě lô̌khô nò̌dûlǎ tokhlǒ dě a hǎhtò̌cû̌ kè̌shuǐ lû̌û, dě a kaǎgǔ lô̌khô kû̌,

“Htû̌sò̌htò̌ lô̌khô Cǒmara!”

“Cǒmara gǔ ǐshowî̤ a dǒ a hè kû̌ Běcǎ ami̤ nutôpwa̤!” ^c

“Cǒmara ǐshowî̤ Isôrěla akhwǐ côphǎ nutôpwa̤ nî̌”

14 Běcǎ Yeshǔ phî̌nṳ̌ mǐû̌lǎ tôlôphû̌ tôdo dě a htò̌ dò̌ lû̌û. Dě hǒnumî̌ a ma̤ lǒhtò̌behtò̌ lî̤plò̌shǐkû hî̌ kû̌,

15 “Ǒ Yarǔshôle ^{▼▼dǒ Grěyô̤̌ mî̌ a hî̌ kû̌, “Sǐû a phû̌pwa̤mǒ̤”} Wî̤̌phû̌ sî! Ǐsha tǎ̤ lô̌khô tǎ̤mǎ̤ nî̌! Kè̌mò̌ lô̌khô, sî khwǐcôphǎ dò̌nǐ̤ mǐû̌lǎ tôlôphû̌ dě a hètô dǒ sîô̌ hǒ.” ^e

16 Bǎnuakha akhôphijǎ tokhlǒ sî̌ganǎ̤phlô ta̤ma̤htûhtò̌ yô̤̌mûyô̤̌sǎ nutokhlǒ khôtô̤̌. Ta̤ hǒtokhlǒ numî̌ a ma̤ lǒbehtò̌hto piwi̤pèshè a ta̤hî̌nǎ dǒwǐkha tokhlǒhǒ. Bǎbǎkǎlè, bǎ Běcǎ Yeshǔ gehtò̌ hto dǒ mǒkhû̌ akhanu, asî gènè̤htò̌nṳ̌ nô̌pwǎ kû̌ a ma̤ ta̤hǒtokhlǒnu a tôbò kû̌ piwi̤pèshè a ta̤hî̌nǎ dǒwǐkha tokhlǒ. Dě akhôphijǎ tokhlǒ gènè̤htò̌ to̤ǐbǎ kû̌ a ma̤tô bǎ bò lû̌û pô̤̌ piwi̤pèshè hî̌nǎ nutokhlǒ.

17 Kòyò saprṳ̂ dǒ a kè̌shǐ Yeshǔ kaǎhtò̌ Khûlasôrǔ dǒ lṳ̌kû dě ma̤htûpwa̤ getîkhî lû̌û tokhlǒnu, asî shôbǐǐlṳ̌ sělě bǎ pô̤̌ kòyò pô̤̌ asî kè̌shǐnu. 18 Asî ganǎ̤de lô̌khô kû̌ Běcǎ Yeshǔ ma̤ cô̌klǐcô̌sè bǎ kòyò ta̤nu akhû̌akhî, asî hǎhtò̌cû̌ kè̌plṳ̂kè̌phǎ lû̌û kû̌ ta̤we̤ta̤kè akhû̌akhî hǒ. 19 Pô̤̌nudě Pharishè̌phû̌ tokhlǒ hî̌ǐ kè̌khî lû̌û tôpwa̤ kû̌ tôpwa̤ hî̌tè hî̌dě, “Kè̌mò̌! Pa hî̌bǎ pè̤̌ pe asî tô̤̌. Hǎkhû̌ tôbǎbò gû̌bò akò hǒ!”

Yeshǔ hî̌pô̤nǎ wǐ ǐtû̌ ata̤si awe̤akè

20 Kòyò cû̌ lô̌khô ta̤cû̌tûlû̌pwèdû̌ dǒ a gǔ cû̌ caba Cǒmara dǒ Wî̤̌yarǔshôle nutokhlǒ aklanu, Grě khlilèphû̌ ô̌pa tokhlǒ. 21 Grě khlilèphû̌ tokhlǒnu, a cû̌tǒ̤ dǒ Khûphǐlǐpǔ a ô̌, dě a hî̌ lû̌û kû̌, “Sara, pa sǎyṳ kè̌shǐ Běcǎ Yeshǔ.” Khûphǐlǐpǔ mî̌ Wî̤̌bètôsè̌da, Galilè̤̌ gǎphû̌ tôpwa̤. 22 Khûphǐlǐpǔ cû̌ shôbǐǐ bǎ Khûîdru dě a kû̌ Khûîdru cû̌ shôbǐǐlṳ̌ bǎ Yeshǔ.

23 Dě Běcǎ Yeshǔ hî̌ kû̌, “Shěkhǎ hètǒ̤ dǒ kòyòphû̌khû gǔ nǐ̤bǎ ta̤sîrîdû̌ sîrîhtû hǒ. 24 He hî̌cǒcǒ sî, bǔjû̌ tôphlǒnu, kòyò kè̌ shǒǎlò̤ lû̌û dǒ hǎkhû̌ tô̤̌ hî̌nu, a phǎhtò̌ a sǎhtò̌ jòtô̤̌. Bǎbǎkǎlè kòyò kè̌ lǔlò̤ lû̌û hî̌nu, a gǔ phǎhtò̌ sǎhtò̌ dû̌wî̤ pě. ^{▼▼Běcǎ Yeshǔ mî̌ asô̌sô̌kû̌ bǔjû̌ tôphlǒ nuhǒ. Pô̤̌khô kòyò gǔ nǐ̤bǎ ta̤htûpwa̤ asa ayanu, a khòlṳ̌ anǎ̤ dǒ nò̌dò̌htǔlô̤ hǒ.} 25 Kòyò dǒ a mô̤ǐ tûû̌ a ta̤htûpwa̤ dǒ hǎkhû̌ tôpwa̤pwa̤nu, a nǐ̤bǎ yôla htûpwa̤ tûjû̌pwa̤ tô̤̌. Bǎbǎkǎlè kòyò dǒ a kè̌ sǎleǐ tûû̌ a ta̤htûpwa̤ dǒ hǎkhû̌ tô̤̌ tôpwa̤pwa̤nu, a gǔ nǐ̤bǎ yôla htûpwa̤ tûjû̌pwa̤ pě. ^g 26 Mòpèpè̌꤮ bǎbǎ dǒ a ma̤ he ta̤ma̤nu, a bǎgû̌ kû̌ hekò. Kè̌hî̌dě, he ô̌bǎtè tûkû bǎbǎ, a gǔ ô̌cu bǎnu pě. Hepha gǔ bè̌dû̌bè̌htò̌yô̤̌ kòyò dǒ a ma̤ he ta̤ma̤ nutôpwa̤ pě.

Yeshǔ hî̌lṳ̌ bǎ kòyò kû̌ ata̤si awe̤akè

27 “A jî̌jû̌ jî̌ he sǎphlǒ. He tôbǎ hî̌ hî̌tè? ‘Ǒ hepha nokhòbǎ tǎ̤ he kû̌ ta̤jî̌ta̤jû̌nu tǎ̤mǎ̤ nî̌’ he tôbǎ hî̌ pô̤̌nu ya? He tôbǎ hî̌ pô̤̌nu tô̤̌. He hèlò̤ kû̌ dǒ ta̤hǒonu ayahǒ. 28 Ǒ pha, na ta̤bwǐdû̌sîrîhtû pwǐ꤮ tènu, dǔlè̌lṳ̌ bǎ kòyò nî̌.”

Hǒtaplǎdě ayô̤̌ ô̌ dǒ mǒkhû̌ hî̌bǎhtò̌ kû̌, “He dǔlè̌lṳ̌ hto he ta̤bwǐdû̌sîrîhtû hǒ, he gǔ dǔlè̌lṳ̌ sô̌ pě.” 29 Kòyò saprṳ̂ ô̌ lô̌khô bǎnu tokhlǒ ganǎ̤de lô̌khô apwe̤nu dě tokhlǒkhlǒ nu a hî̌ lô̌khô kû̌, mǒgǒ pwe̤nǎ̤sǎgô̌, tokhlǒkhlǒ dě a hî̌ kû̌, mǒkhû̌ tanaphû̌ hî̌bǎlò̤ lû̌û.

30 “Alě̤pwe̤htò̌ numî̌ sî lǎ̤nǐ̤bwǐ nǐ̤sîrî ayapwǎ, heya mè̤̌tô̤̌,” A hî̌ asî pô̤̌nu. 31 “Khònò̤̌dě shěkhǎ hètǒ̤ dǒ kòyò gǔ cî̌htò̌ Kòyòphû̌khû hǒ. Khònò̤̌dě shěkhǎ hètǒ̤ dǒ kòyò gǔ wṳ̂̌hǎhtò̌kè hǎkhû̌tana Setò̤ dǒ a pǒǐ kòyò dǒ a yṳ̌ǎtô̤̌ tokhlǒnu tôdo hǒ. 32 Bǎbǎkǎlè htǔ kòyò po̤sihtò̌ he dǒ nò̌dò̌htǔlô̤ akhapěnu, he gǔ kaǎ bò kòyò pṳ̂̌꤮ tôpwa̤ dǒ heô̌ pě.” 33 A hî̌ pô̤̌o numî̌ a sǎyṳ dǔlè̌lṳ̌ sî̌ganǎ̤ bǎ kòyò kû̌ a gǔ si hî̌tè pě nupwǎ.

34 Kòyò saprṳ̂ hî̌shěshu kû̌, “Pa ganǎ̤de ta̤sû̌ta̤tòwò hî̌ kû̌ Khrǐnu a bǎ ô̌htûpwa̤ tûjû̌pwa̤ lè, dě na cû̌ hî̌tǒ̤ kû̌, ‘kòyò bǎ ma̤sihtò̌ Kòyòphû̌khûnu dǒ nò̌dò̌htǔlô̤’ hî̌tè? ‘Kòyò aphû̌khû’ mî̌ mò̌pè?” A hî̌ lô̌khô pô̤̌nu. ^h

35 Hǒtaplǎdě Běcǎ Yeshǔ hî̌lò̤ǐ tûû̌ anǎ̤ kû̌, “Ta̤lî nî̌ a ô̌ pô̤̌ kû̌ sî tashò̌phû̌nô̤̌ pepwǎ. Bǎ ta̤lî ô̌ pe kû̌ sî akhanu, tûlû̌ cû̌selě lô̌khô. Ta̤khǐ gǔ hètǒ̤ sô̌ sî ô̌ pě. Kòyò cû̌ dǒ ta̤khǐkla tôpwa̤nu, a cû̌tǒ̤ bǎtènu, a sî̌ganǎ̤ ǐtûû̌ anǎ̤ tô̤̌. 36 Pô̤̌khô sî gǔ htûhtò̌ ta̤lîphû̌ tokhlǒnu, bǎ ta̤lî ô̌gû̌pe kû̌ sî akhanu, yṳ̌ǎ lô̌khô a nî̌.” A hî̌bǎ hto pô̤̌nu dě a hǎhtò̌cû̌ tephekè kû̌ asî.

Kòyò shôdô ta̤yṳ̌ta̤nǎ̤

37 Běcǎ Yeshǔ dǔlè̌lṳ̌ bǎ asî lǒ̤bò ta̤ma̤ cô̌klǐcô̌sè tokhlǒ dǒ asî lô̤mô̤̌ bǎbǎkǎlè a yṳ̌ǎ bǎ lû̌û tô̤̌tô̤̌. 38 Dǒ a yṳ̌ǎ pô̤̌o tô̤̌ akhû̌akhî, atô bòkè piwi̤pèshè Khûyashǎya lǎ̤hî̌nǎ ayô̤̌ kû̌,

“Ǒ pha, mò̌pè yṳ̌ǎhto pa shôbǐǐlṳ̌ bǎ kòyònu tokhlǒ ya? Na dǔlè̌lṳ̌ hto na ta̤pô̤ta̤phǎnu kû̌ mò̌pèya?” ⁱ Piwi̤pèshè Khûyashǎya ahî̌pô̤̌nu.

39 Ma̤titèhî̌dě asî yṳ̌ǎbò̌ tô̤̌ hî̌nu, piwi̤pèshè Khûyashǎya hî̌pe kû̌,

40 “Pô̤̌khô asî gǔ getîkhîtô lô̌khô dǒ Běcǎ ô̌ tô̤̌, htokhôtô̤̌ pô̤̌khô asî noma̤hǎmǎ lô̌khô anǎ̤ kû̌ Běcǎ tô̤̌ nudě, Běcǎ ma̤khǐ asî mǐ̤sǎ, Běcǎ ma̤pwǐ̤ asî sǎphlǒ akhû̌khî, asî kè̌shǐ jò kû̌ amǐ̤sǎ tô̤̌, asî gènè̤phlô lô̌khô kû̌ asǎphlǒ tô̤̌.” ^j A hî̌ pô̤̌nu.

41 Piwi̤pèshè Khûyashǎya hî̌pô̤̌o ma̤titèhî̌dě a kè̌shǐ bǎ Běcǎ Yeshǔ a ta̤bwǐdû̌sîrîhtû htodě a hî̌ ta̤we̤ta̤kè pô̤̌o pwǎ.

42 Bǎbǎkǎlè bǎnukha kòyò yṳ̌ǎ dû̌wî̤bǎ Běcǎ Yeshǔ. Yǔdaphû̌ ikǒlǒkòdû̌ kûshû̌htû akla tokhlǒnu a yṳ̌ǎgû̌ lû̌û bǎbǎkǎlè ǐsha kû̌ Pharishè̌phû̌ tokhlǒ wṳ̂̌hǎhtò̌kè asî dǒ ta̤cabahǐkhlo dě, asî shôbǐǐhtò̌ lṳ̌bǔ bǎ kòyò kû̌ ata̤yṳ̌ tô̤̌. 43 Ma̤titèhî̌dě, asî sǎyṳ nohtû̌sò̌htò̌ lô̌khô anǎ̤ kû̌ kòyò hǎkhû̌phû̌nu adû̌ khlo kû̌ a sǎyṳ nohtû̌sò̌htò̌ anǎ̤ kû̌ Cǒmara.

Běcǎ Yeshǔ alě̤ayô̤̌ gǔ cî̌htò̌ kòyò pě

44 Hǒtaplǎdě Běcǎ Yeshǔ yî̤̌kǒhtò̌ kû̌, “Bǎ kòyò tôpwa̤pwa̤ yṳ̌ǎ he akhanu, a yṳ̌ǎ he mè̤̌tô̤̌, a yṳ̌ǎ kòyò dǒ a nohèlò̤ he tôpwa̤ hǒ. 45 Kòyò dǒ a kè̌shǐ he nu, a kè̌shǐ kòyò dǒ a nolò̤ he tôpwa̤ hǒ. 46 Pô̤̌khô kòyò lǒ̤bò dǒ a yṳ̌ǎ he tokhlǒ gǔ ô̌pe dǒ ta̤khǐkla tô̤̌nu, he hè lîrakhahtò̌ pô̤̌ ta̤lî tômè dǒ hǎkhû̌ nuhǒ.

47 “Kòyò tôpwa̤pwa̤ kè̌ ganǎ̤de helě̤heyô̤̌ dě a yṳ̌ǎtô̤̌ hî̌nu, he cî̌htò̌ lû̌û tô̤̌. Ma̤titèhî̌dě, he hèlò̤ dǒ hǎkhû̌ numî̌, he gǔ hè cî̌htò̌ kòyò ayanu mè̤̌tô̤̌, he gǔ hè ma̤hǎplǎge kòyò ayapwǎ. 48 Kòyò dǒ a htè̌shěshu he dě a phî̌shěshu helě̤heyô̤̌ tô̤̌ tokhlǒnu, pwa̤cî̌htò̌ asî a ô̌tôpwa̤. Lṳmṳ̌ni̤ lṳmṳ̌sa dǒnô̌kòlǒ tôni̤nu, yô̤̌ dǒ he hî̌bǎ tokhlǒ gǔ htû asî pwa̤cî̌htò̌ ta̤ pě. 49 Ma̤titèhî̌dě, he hî̌bǎnu, he hî̌bǎ kû̌ he ta̤siwi̤sòwò̤ tû̌nu mè̤̌tô̤̌. Mè̤̌takhônu he hî̌bǎ pô̤̌ hepha dǒ a nohè he tôpwa̤ nohî̌bǎ he nupwǎ. 50 He sî̌ganǎ̤ kû̌ hepha a ta̤mǎlò̤nu a sûcû̌ kòyò dǒ yôla htûpwa̤ tûjû̌pwa̤. Pô̤̌nudě he hî̌ pô̤̌ hepha nohî̌ he nutokhlǒ pwǎ.”