John 13

Běcǎ Yeshǔ cǔbò bǎ akhôphijǎ tokhlǒ akhò̌lôpô̤̌

1Bǎ ta̤cû̌bò̌tûlû̌pwè bǎ khôtô̤̌ akhanu, Běcǎ Yeshǔ sî̌ganǎ̤hto kû̌ shěkhǎ dǒ a gǔ bǎ wîkè hǎkhû̌ dě a bǎ ge dǒ apha ô̌nu a hètǒ̤hǒ. Dě a mô̤nṳ̌ akhôphijǎ dǒ a ô̌ dǒ hǎkhû̌ nutokhlǒ pṳ̂̌ taplǎ a mô̤ǐ asî tǒ̤dǒ a gutṳ̌.

2Bǎnukha Běcǎ Yeshǔ kû̌ akhôphijǎ tokhlǒ ǎ lô̌khô pe dî lṳmṳ̌hǎ. Dě Khûshǐmṳ̂ Isakariyû aphû̌khû Yǔda Isakariyû tôpwa̤ nî̌ pô̤̌khô a gǔ shaǎlò̤kè Běcǎ Yeshǔ ayanu, hǎkhû̌tana Setò̤ hî̌bǎnṳ̌ hto ayô̤̌ dǒ a sǎphlǒkû hǒ. 3Běcǎ Yeshǔ sî̌ganǎ̤ kû̌ apha ǐlò̤ htobò lû̌û ta̤pô̤phǎ shû̌sho dǒ ta̤lǒ̤bò akhû̌ hǒ. A sî̌ganǎ̤ kû̌ a ô̌ dǒ Cǒmara hè ô̌ dě a gǔ getîkhî sô̌ dǒ Cǒmara a ô̌ pě. 4Pô̤̌nudě a ihtǒ dǒ asî lǎ̤ǎ dîgògǒ kòshî̌ dě a plû̌htò̌kè a jehtû htodě a coměhtò̌ a shè̌kòlô̤ kû̌ hǔphô lǎ̤htǔsû tôpṳ. 5A ma̤hto pô̤̌nudě, a tènṳ̌ shi dǒ balě taadû̌ koyo tôbǎ akû dě a sahtò̌ cǔbò bǎ akhôphijǎ tokhlǒ akhò̌lôpô̤̌. Dě a htǔsûkè bǎ asî kû̌ hǔphô dǒ a coměhtò̌ dǒ a shè̌kòlô̤ nutôpṳ.

6A cû̌tǒ̤ dǒ Khûshǐmû Petarǔ a ô̌ dě a hî̌shěshu lû̌û kû̌, “Běcǎ na glè̌ cǔbò he khò̌lôpô̤̌ ya?”

7Dě Běcǎ Yeshǔ hî̌shěshǔ lû̌û kû̌, “Ma̤titè̌ he cû̌ma̤ tǒ̤ pô̤̌onu, khònò̤̌ na sî̌ganǎ̤ nò̌khôtô̤̌ bǎbǎkǎlè tôni̤ni̤ pěnu, na sî̌ganǎ̤phlôhtò̌ tûû̌ pě.”

8“Tô̤̌, na bǎ cǔbò he khò̌lôpô̤̌ tîkî̌꤮ tô̤̌,” Khûpetarǔ hî̌shěshu lû̌û dě Běcǎ Yeshǔ hî̌ lû̌û kû̌, “He kè̌ cǔbò na tô̤̌ hî̌dě, na htûbǎ he khôphijǎ tô̤̌.”

9Dě Khûshǐmû Petarǔ hî̌ tîkhî kû̌, “Kè̌ ma̤pô̤̌nu hî̌dě, Běcǎ, cǔbò tǒ̤꤮ he khò̌lôpô̤̌ nô̤̌ tǎ̤mǎ̤. Cǔbò padô̌ bò̌bò he cǔde kû̌ he ikǒ.”

10Dě Běcǎ Yeshǔ hî̌shěshu getîkhî lû̌û kû̌, “Kòyò dǒ a ushò̌ hto shi tôpwa̤nu, anǎ̤ plîbò tôpwa̤bò hǒ, a lǎ̤lṳ̂ cǔbò pwǎtǒ̤ akhò̌lôpô̤̌ nô̤̌pwǎ. Sî sǎphlǒ ma̤mṳ̂̌plî bòkè htohǒ lè, bǎbǎkǎlè a ma̤mṳ̂̌plî bò pṳ̂̌꤮ tôpwa̤ tô̤̌.” 11Ma̤titèhî̌dě a sî̌ganǎ̤ kû̌ kòyò glè̌ shaǎlò̤kè lû̌û tôpwa̤ pě, htodě a hî̌ kû̌ sî mṳ̂̌plî bò pṳ̂̌꤮ tôpwa̤ tô̤̌, a hî̌ pô̤̌nu pwǎ.

12Bǎ a cǔbò hto asî khò̌lôpô̤̌ akhanu, a sô̌htò̌ sô̌ ajekhlo dě a ge hǎnòò̌ tîkhî sô̌ dǒ agûlǎ̤. Dě a gwè̌ asî kû̌, “He ma̤ bǎ sî pô̤̌o numî̌ sî sî̌yaphlô lô̌khô ya?” A hî̌ pô̤̌nu. ^a 13“‘Sara,’ mè̤̌tô̤̌mî̌, ‘Běcǎ,’ sî kaǎ lô̌khô he pô̤̌numî̌ atô pwǎ, ma̤titèhî̌dě he htû mè̤̌mî̌ca pô̤̌ sî kaǎ henu. 14Pô̤̌nudě khònò̤̌ he htû sî Běcǎ, sî sara dě he kè̌ cǔbò bǎ sî khò̌lôpô̤̌ kè̌hî̌dě sî tô cǔbò kè̌khî bǎ lû̌û khò̌lôpô̤̌ tôpwa̤ kû̌ tôpwa̤ nî̌꤮. 15He ma̤lṳ̌bǎ sî ta̤kè̌lû̌mò̌mṳ tocǒ hǒ. Sî tô gû̌ma̤kû̌ lô̌khô pô̤̌ he ma̤ bǎ sînu. 16He hî̌cǒcǒ sî, jû̌ dû̌khlo aběcǎ tôpwǎ̤꤮ tô̤̌. Kòyò dǒ a no lû̌û tôpwa̤nu adû̌khlo kû̌ a no lû̌û nutôpwa̤ a ô̌ tôpwǎ̤꤮ tô̤̌. ^b 17Khònò̤̌dě sî sî̌ganǎ̤ lô̌khô ta̤nutokhlǒ hǒ. Sî kè̌ ô̌htûpwa̤ gû̌ma̤ ta̤nu tokhlǒ hî̌nu, sî gǔ nǐ̤bǎ ta̤ǐshowî̤.

Běcǎ Yeshǔ hî̌pô̤nǎ wǐ dǒ kòyò gǔ shaǎlò̤kè lû̌û pě

(Matè̌ 26:20-25; Makǔ 14:17-21; Lǔka 22:21-23)

18“He sǎyṳ̌ hî̌ bò sî pṳ̂̌꤮ tôpwa̤ pô̤̌nu mè̤̌tô̤̌. Lǒ̤bò sî dǒ he rû̌htò̌ tokhlǒ numî̌ he sî̌ganǎ̤ ǐtû̌ bò sî pṳ̂̌꤮ tôpwa̤. Bǎbǎkǎlè pô̤̌khô lî̤plò̌shǐkû hî̌nǎ glè̌ lǒhtò̌behtò̌ ayanu, ‘kòyò dǒ a ǎcuôcu ta̤ kû̌ he tôpwa̤ sǎkhe he dě a gǔ shaǎlò̤kè he hǒ.’ ^c

19“Htû̌꤮ a htûhtò̌kè pěnu, pô̤̌khô sî gǔ yṳ̌nǐ̤nǎ̤nǐ̤ kû̌ he mî̌ Me̤shǐyanu tôpwa̤hǒ nudě, he shôbǐǐlṳ̌ bǎ sî khònò̤̌ hǒ. 20He hî̌cǒcǒ sî, kòyò tôpwa̤pwa̤ dǒ a kaǎmô̤shǔ kòyò dǒ he nohè a tôpwa̤ numî̌, a kaǎmô̤shǔ he hǒ. Kòyò tôpwa̤pwa̤ dǒ a kaǎmô̤shǔ he numî̌ a kaǎmô̤shǔ kòyò dǒ a nohè he nutôpwa̤ hǒ.” ^d

21A hî̌hto pô̤̌nudě, a shèwè̤ jî̌ lû̌sǎphlǒ dě a hî̌hǎhtò̌ lṳ̌lî bǎ asî kû̌, “He hî̌cǒcǒ sî, dǒ sîklanu kòyò dǒ a gǔ shaǎlò̤kè he pěnu a ô̌ tôpwa̤,” A hî̌lîtîklî̌kè asî pô̤̌nu.

22A khôphijǎ tokhlǒ kè̌ǐ kè̌khîbò lû̌û tôpwa̤ kû̌ tôpwa̤ dě a sǎyṳ hî̌ bǎtè tôpwa̤nu, a gènè̤phlô lô̌khô tô̤̌, a sû̌bǐsò̌bǐ bòkè asî. 23Dǒ akhôphijǎ akla dǒ a mô̤ǐ jî̌ lû̌û tôpwa̤nu, a hǎnòò̌ ô̌ phǔ bǎ Běcǎ Yeshǔ kòshî̌ tôkhô. 24Khûshǐmû Petarǔ nǒcû̌ a ikǒ dǒ a hǎnòò̌ ô̌ phǔ lû̌û kòshî̌ nutôpwa̤ dě a hî̌ lû̌û kû̌, “Gwè̌ a nu, a sǎyṳ hî̌ mò̌pè?” A hî̌hǔ cû̌ lû̌û pô̤̌nu.

25A gètè̤wǎ̤ Běcǎ Yeshǔ dě a hî̌ lû̌û kû̌, “Běcǎ, na hî̌ nutôpwa̤ nî̌ mò̌pè?” A gwè̌ lû̌û pô̤̌nu.

26Běcǎ Yeshǔ hî̌ lû̌û kû̌, “He tû̌nṳ̌ mû̌ tôkô̌kî dǒ hǎsǐbalěkû dě he ǐ yǎ nutôpwa̤ mî̌ ahǒ.” A hî̌hto pô̤̌nu dě a phî̌ mû̌ tôkô̌kî dě tû̌nṳ̌ dǒ hǎsǐbalěkû dě a ǐcû̌ kû̌ phashǐmṳ̂ aphû̌khû Khûyǔda Isakariyû. 27Khûyǔda phî̌hto mû̌ kû̌, hǎkhû̌tana hènṳ̌ dǒ akû.

“Na glè̌ ma̤ titènu, cû̌ ma̤phwèmò̌,” Běcǎ Yeshǔ hî̌ lû̌û pô̤̌nu. 28Ma̤titè̌hî̌dě Běcǎ Yeshǔ cû̌ hî̌tǒ̤ lû̌û pô̤̌o numî̌, asî ô̌ bǎ dîgògǒ kòshî̌ nutokhlǒ sî̌ganǎ̤ tôpwǎ̤꤮ tô̤̌. 29Khûyǔda pṳ̂̌ǐ bǎ asî rukhûkhi, asî tokhlǒkhlǒ nu, a gènè̤ lô̌khô pwǎ kû̌ Běcǎ Yeshǔ nocû̌ pwî̤ lû̌û kû̌ ta̤ dǒ a lǎ̤lṳ̂ kû̌ pwèdû̌ ayanu mè̤̌tô̤̌mî̌ a nocû̌ ǐ lû̌û kû̌ kòyò shèphǔshèwè̤phû̌ tokhlǒ ta̤tocǒcǒ pwǎ, a gènè̤ lô̌khô pô̤̌nu. 30Khûyǔda phî̌hto mû̌ kû̌, a hǎhtò̌cû̌. Bǎnukha mî̌ lṳmṳ̌khǐ hǒ.

Běcǎ Yeshǔ hî̌pô̤nǎ wǐ Khûpetarǔ kû̌ a gǔ htè̌bǐ lû̌û pě

(Matè̌ 26:31-35; Makǔ 14:27-31; Lǔka 22:31-34)

31Khûyǔda hǎhtò̌cû̌ hto akhanu, Běcǎ Yeshǔ hî̌ asî kû̌, “Khònò̤̌ shěkhǎ hètǒ̤ dǒ Kòyòphû̌khû mî̌ he gǔ nǐ̤bǎ ta̤bwǐdû̌sîrîhtû hǒ. Cǒmara gǔ nǐ̤bǎ tutṳ̌ ta̤bwǐdû̌sîrîhtû dǒ Kòyòphû̌khû a ô̌ hǒ. 32Cǒmara kè̌ nǐ̤bǎ tutṳ̌ a ta̤bwǐdû̌sîrîhtû dǒ a ô̌ kè̌hî̌dě Cǒmara gǔ ǐ aphû̌khûnu ta̤bwǐdû̌sîrîhtû kû̌ anǎ̤ tûû̌ pě. A gǔ ǐ lû̌û ta̤bwǐdû̌sîrîhtû khònò̤̌.

33“Hephû̌heli̤ sî, he ô̌plǒ yî̤gû̌pe nô̌ sî tô̤̌. Sî gǔ kè̌lǎsǔ he pě. Pô̤̌ he hî̌hto Yǔdaphû̌ ikǒlǒkòdû̌ tokhlǒnu, he gǔ hî̌ pô̤̌ sî khònò̤̌ kû̌ gûlǎ̤ dǒ he glè̌ cû̌nu, sî cû̌jòtô̤̌. ^e

34“Pô̤̌nudě khònò̤̌ he gǔ mǎnǎ sî yô̤̌sǎ asa tômû. Mô̤nṳ̌ lô̌khô lû̌û tôpwa̤ kû̌ tôpwa̤ nî̌꤮. Pô̤̌ he mô̤nṳ̌ sînu, sî bǎ mô̤nṳ̌ lû̌û tôpwa̤ kû̌ tôpwa̤. ^f 35Sî kè̌ mô̤nṳ̌ lû̌û tôpwa̤ kû̌ tôpwa̤ hî̌dě, kòyò pṳ̂̌꤮ tôpwa̤ gǔ sî̌ganǎ̤ kû̌ sî htû he khôphijǎ pě.”

36“Běcǎ, na glè̌ cû̌ bǎtè tûkû pě?” Khûshǐmû Petarǔ gwè̌ lû̌û pô̤̌nu.

Dě Běcǎ Yeshǔ hî̌shěshu lû̌û kû̌, “Gûlǎ̤ dǒ he glè̌ cû̌ nutûkûmî̌, khònò̤̌dě na gû̌ cû̌ jò kû̌ he tô̤̌. Bǎbǎkǎlè na gû̌ cû̌ jò nô̌ kû̌ he dǒ nô̌kò pě.”

37“Běcǎ, he gǔ cû̌kû̌ na khònò̤̌dě a cû̌ jòcǎtô̤̌mî̌ ma̤titè? He ô̌ tîwî̌tòwò nǎhto henǎ̤ kû̌ he gǔ si dǒ naya hǒlè.” A gwè̌ lû̌û pô̤̌nu.

38Hǒtaplǎdě Běcǎ Yeshǔ hî̌shěshu lû̌û kû̌, “Na ô̌ tîwî̌tòwò nǎ nanǎ̤ kû̌ na gǔ si dǒ heya mè̤̌mî̌ca hǒ ya? He hî̌cǒcǒ na, bǎ shîpha û̌ htò̌ nò̌khôtô̤̌ nu, na gǔ htè̌bǐshěshu ▼

▼tokhlǒkhlǒ nu a hî̌ kû̌ sumṳ̌ǐ mè̤̌tô̤̌mî̌ la̤lò̤kè

kòyò kû̌ he sî̌ganǎ̤bǎnô̌ a tô̤̌ suplǎ pě,” A hî̌ lû̌û pô̤̌nu.