Joh 15 | KxfSCKXF | STEP | “He mî̌ sîpî̌mṳ̌ dǒ a mè̤̌mî̌ca tômṳ̌, hepha mî̌ pwa̤kè̌ǐ we̤běcǎ.

John 15

Yeshǔ mî̌ sîpî̌mṳ̌ a mè̤̌mî̌ca tômṳ̌

1 “He mî̌ sîpî̌mṳ̌ dǒ a mè̤̌mî̌ca tômṳ̌, hepha mî̌ pwa̤kè̌ǐ we̤běcǎ. 2 Sîpî̌phò dǒ a icu kû̌ he dě asǎaphô htò̌ tô̤̌ tokhlǒnu, a gǔ pě̤tṳ̌kè bò pě. Aphò dǒ asǎaphôhtò̌ tokhlǒnu bǎbǎ, pô̤̌khô a gǔ sǎhtò̌ dû̌wî̤pô̤̌ ayanu, a pě̤lî ma̤bò aphò tokhlǒ. 3 Sî ma̤plîma̤mṳ̂̌ kû̌ helě̤heyô̤̌ dǒ he hî̌ bǎ sînu akhû̌akhî pwǎ. 4 Ô̌měô̌gle lô̌khô kû̌ he tôcǒnô̤̌, dě he gǔ ô̌měô̌gle kû̌ sî tôcǒnô̤̌ pě. Sîpî̌phò tôphòphò dǒ a ô̌sho iměcu kû̌ he tô̤̌nu, a sǎhtò̌ jò tû̌ anǎ̤ tôphò̌꤮ tô̤̌. Pô̤̌nudě sî kè̌ ô̌měô̌gle kû̌ he tôcǒnô̤̌ tô̤̌ hî̌dě, sî sǎhtò̌bò̌ jò sǒsǎ dǒ a mè̤̌ kû̌ ma̤ta̤wô̌nu tôpwǎ̤꤮ tô̤̌.

5 “He mî̌ sîpî̌mṳ̌, sî mî̌ aphò tokhlǒ. Kòyò dǒ a ô̌měô̌gle kû̌ he tôcǒnô̤̌, dě he ô̌měô̌gle kû̌ asî tôcǒnô̤̌ tokhlǒnu, asî gǔ sǎhtò̌phôhtò̌ dû̌wî̤ pě. Ma̤titèhî̌dě sî kè̌ ô̌ ô̌měô̌gle kû̌ he tô̤̌ hî̌nu, sî ma̤jò ta̤ tôcǒ꤮ tô̤̌. 6 Kòyò tôpwa̤pwa̤ dǒ a ô̌měô̌gle kû̌ he tôcǒnô̤̌ tô̤̌nu, asô̌sô̌kû̌ sǒphò dǒ kòyò wîhǎhtò̌kè a dǒ akhlo, dě a nôkèkhwekè tokhlǒ nupwǎ. Sǒphò pô̤̌nu tokhlǒnu, kòyò htǔplǒ a dě kòyò wînṳ̌kè lû̌û dǒ mî̌kû dě kòyò shû̌ukè a pwǎ. 7 Sî kè̌ ô̌měô̌gle kû̌ he tôcǒnô̤̌, dě helě̤heyô̤̌ kè̌ ô̌mětegle kû̌ sî tôcǒnô̤̌ kè̌hî̌dě sî sǎyṳkwi titètè̌꤮ bǎbǎnu, he gǔ ǐ sî pě. 8 Dǒ sî sǎhtò̌phôhtò̌ dû̌wî̤ sǒsǎ dǒ amè̤̌kû̌ ma̤ta̤wô̌ tokhlǒ akhû̌akhî, he pha a ta̤bwǐdû̌sîrîhtû gǔ ô̌ lṳ̌htò̌ pě. Dǒ sî sǎhtò̌dû̌ pô̤̌nu akhû̌akhî, sî dǔlè̌lṳ̌hto kû̌ sî htû he khôphijǎ tokhlǒ hǒ.

9 “He mô̤nṳ̌ sî pô̤̌ hepha mô̤nṳ̌ henu, khònò̤̌dě ô̌měô̌gle lô̌khô dǒ he ta̤mô̤nṳ̌ akû nunî̌꤮. 10 Sî kè̌ ganǎ̤de jûlě̤phî̌ he ta̤mǎlò̤ tokhlǒ numî̌ sî ô̌měô̌gle dǒ he ta̤mô̤nṳ̌ akû hǒ. Sî kè̌ ma̤ pô̤̌o numî̌ a sô̌sô̌ kû̌ he ganǎ̤de hepha ayô̤̌ dě he ô̌měô̌gle dǒ a ta̤mô̤nṳ̌ akû nuhǒ. 11 Pô̤̌khô sî gǔ sǎlě̤sǎlò̤ sô̌sô̌kû̌ pô̤̌ he sǎlě̤sǎlò̤ ayanu, he shôbǐǐlṳ̌ bǎ sî hǒ. 12 Mô̤nṳ̌ lû̌û tôpwa̤ kû̌ tôpwa̤ pô̤̌ he mô̤nṳ̌ sî nunî̌, Hǒomî̌ amè̤̌kû̌ he ta̤mǎlò̤ hǒ. ^a 13 Ta̤mô̤nṳ̌ dǒ adû̌lǒ mî̌ kòyò tôpwa̤pwa̤ dǒ a tṳ̌sikhòsikè anǎ̤ dǒ a khô tokhlǒ ayanu a ô̌ pe tô̤̌ hǒ. 14 Sî kè̌ ma̤ pô̤̌ he mǎnǎ sî ta̤hî̌bǎ numî̌, sî htûhto he khô hǒ. 15 He kaǎ pe sî kû̌ jû̌ tô̤̌, ma̤titèhî̌dě jû̌ numî̌ a sî̌ganǎ̤ǐ tûû̌ aběcǎ ta̤ma̤ awe̤akè tô̤̌. He gǔ kaǎ sî kû̌ sî mî̌ he khô tokhlǒ hǒ, ma̤titèhî̌dě lǒ̤꤮ bò he ganǎ̤de ta̤ dǒ hepha a ô̌ tokhlǒnu, he shôbǐǐlṳ̌ bǎbòhto sî hǒ. 16 Sî rû̌htò̌ he mè̤̌tô̤̌. He rû̌htò̌ sî dě he bè̌htò̌ sî pô̤̌khô sî gǔ hǎhtò̌cû̌ lô̌khô dě cû̌ sǎhtò̌phôhtò̌ dû̌wî̤ lô̌khô. He bè̌htò̌ sî kû̌ sî gǔ sǎicuměgle lô̌khô tǒ̤dǒ agutṳ̌. Sî kè̌ ma̤pô̤̌nu mî̌ sî kwi caba titètè̌꤮ bǎbǎ, sî kè̌ kwi kû̌ hemi̤ hî̌nu, pha gǔ ǐ sî pě. 17 He ta̤mǎlò̤ yô̤̌sǎ numî̌ amè̤̌kû̌ mô̤nṳ̌ lû̌û tôpwa̤ kû̌ tôpwa̤ nuhǒ.”

Kòyò hǎkhû̌phû̌ gǔ sǎkhě Běcǎ Yeshǔ akhôphijǎ tokhlǒ pě.

18 “Kòyò hǎkhû̌phû̌ tokhlǒ kè̌ sǎkhě sî hî̌dě gènè̤htò̌ to̤ǐbǎ lô̌khô kû̌ a sǎkhě wǐhto he nunî̌꤮. 19 Sî kè̌ sô̌sô̌kû̌ kòyò hǎkhû̌phû̌ tokhlǒ hî̌nu, a gǔ mô̤nṳ̌ sî pô̤̌ asî kòyò tûû̌ nutokhlǒ pě. Bǎbǎkǎlè sî dě, sî khô̌ kû̌ asî hǒ. He rû̌htò̌ khô̌hto sî dǒ kòyòhǎkhû̌phû̌ tokhlǒ akla hǒ. Asî sǎkhě sî akòshî̌gutṳ̌ mî̌ amè̤̌kû̌ dǒ sî khô̌ kû̌ asî hǒ. Htokhôtô̤̌ he rû̌htò̌ khô̌kè sî kû̌ asînu akhû̌akhî, dě asî sǎphlǒdû̌ sî hǒ. 20 Gènè̤htò̌sô̌ lô̌khô yô̤̌sǎ dǒ he pwe̤ǐ bǎ sî kû̌, ‘jû̌ dû̌khlo aběcǎnu a ô̌ tôpwǎ̤ tô̤̌,’ nunî̌. Asî ma̤jî̌ma̤jû̌ hto he hǒ akhû̌akhî, a gǔ ma̤jî̌ma̤jû̌ dô̌ sî pě. Asî kè̌ ganǎ̤de jûlě̤phî̌ hto heyô̤̌ hî̌nu, a gǔ ganǎ̤de jûlě̤phî̌ dô̌ sîyô̤̌ pě. ^b 21 Sî htû he khôphijǎ akhû̌akhî, kòyò hǎkhû̌phû̌ tokhlǒ gǔ ma̤jî̌ma̤pò̤̌ sî pě, ma̤titèhî̌dě asî sî̌ganǎ̤ lô̌khô pha dǒ a nohè he nutôpwa̤ tô̤̌. 22 He kè̌ hè shôbǐǐlṳ̌ bǎ asî tô̤̌ hî̌nu, Cǒmara bè̌ asî ta̤sǔ tô̤̌. Bǎbǎkǎlè khònò̤̌ he hè shôbǐǐlṳ̌ bǎ asî akhû̌akhî, alǎ̤hî̌ hǎplǎ tûû̌ ayô̤̌ kû̌ ata̤sǔ ayanu, a ô̌pe tômṳ̂̌꤮ tô̤̌. 23 Kòyò dǒ a sǎkhě he nu a sǎkhě padô̌ hepha hǒ. 24 Ta̤ma̤ cô̌klǐcô̌sè dǒ kòyò ma̤jò tôpwǎ̤꤮ tô̤̌ tokhlǒnu, he kè̌ dǔlè̌lṳ̌ mò̌ asî akla tô̤̌ hî̌nu, asî ta̤sǔ ô̌ tôkhò̌꤮ tô̤̌. Bǎbǎkǎlè, khònò̤̌, asî kè̌shǐ ta̤ma̤ cô̌klǐcô̌sè tokhlǒ dě a sǎkhě lǒ̤bò he kû̌ hepha hǒ. 25 Bǎbǎkǎlè hǒnumî̌, asî ma̤lǒhtò̌behtò̌ pô̤̌ lî̤plò̌shǐ hî̌ hto kû̌, ‘he ma̤ sǎkhěkhû̌khwè asî kû̌ henǎ̤ tôcǒ꤮ tô̤̌, bǎbǎkǎlè asî sǎkhě he.’ ^c

26 “He gǔ nohè pwa̤ma̤jè̌ta̤ dǒ a ô̌ dǒ phanu tôpwa̤ dǒ sî ô̌ pě. A mî̌ ta̤tě̤ta̤mè̤̌ a Yôla Plò̌shǐ Běcǎ dǒ a ô̌ dǒ pha a ô̌ hè. Htû̌꤮ a hètǒ̤ pěnu, a gǔ shôbǐǐlṳ̌ bǎ sî kû̌ hewe̤hekè pě. 27 Sî ô̌plǒ kû̌ he dǒ akòshî̌kha pe akhû̌akhî, sî shôbǐǐ padô̌ kòyò kû̌ hewe̤hekè nî̌꤮.”