John 16

1“Pô̤̌khô sî gǔ wîkè sî ta̤yṳ̌ta̤nǎ̤ tô̤̌nu, he shôbǐǐlṳ̌ bòbǎ hto sî ta̤nutokhlǒ hǒ. 2Kòyò gǔ wṳ̂̌hǎhtò̌kè sî dǒ ta̤cabahǐ tokhlǒ akhlo pě. Kòyò dǒ a ma̤si sî tokhlǒnu a gènè̤ tûû̌ anǎ̤ kû̌, ‘pa ma̤ Cǒmara ata̤ma̤ hǒ,’ shěkhǎ pô̤̌onu, a gǔ hètǒ̤ pě. 3A cû̌ ma̤tǒ̤ lô̌khô pô̤̌o ma̤titèhî̌dě asî sî̌ganǎ̤bǎnô̌ pha tôkhò̌꤮ tô̤̌, htodě a sî̌ganǎ̤bǎnô̌ he tôkhò̌꤮ tô̤̌. 4Htû̌꤮ ta̤shěta̤khǎ hètǒ̤ pě akhanu, sî gǔ khòbǎ ta̤jî̌ta̤jû̌ tokhlǒ pě. Pô̤̌khô sî gǔ gènè̤htò̌sô̌ ta̤ dǒ he dǔlè̌lṳ̌ nǎ sî ta̤hǒotokhlǒ ayanudě, he shôbǐǐlṳ̌ nǎ bǎ sî khònò̤̌ hǒ. Dǒ akòshî̌kha numî̌ he ô̌cu kû̌ sî akhû̌akhî, he shôbǐǐlṳ̌bǎ sî tô̤̌.”

Yôla Plò̌shǐ Běcǎ ata̤ma̤

5“Khònò̤̌dě, he gǔ ge dǒ kòyò nohè he nutôpwa̤ a ô̌ hǒ. ‘Na glè̌ cû̌bǎtè tôkûya pěnu,’ sî gwè̌ he tôpwǎ̤꤮ tô̤̌. 6He hî̌lṳ̌ bǎ sî pô̤̌o dě sî sǎplǎ̤nǎ̤bǎ bò. 7Kè̌ hî̌ bò̌꤮ bò yô̤̌sǎ mî̌, he cû̌kè sîlǎ̤ mî̌ awô̌ khlo dǒ sîya, ma̤titèhî̌dě he kè̌ cû̌ tô̤̌ hî̌nu, pwa̤ma̤jè̌ a mè̤̌mî̌ca kû̌ Yôla Plò̌shǐ Běcǎ tôpwa̤ hè dǒ sîô̌ tô̤̌. Bǎbǎkǎlè he kè̌ cû̌ hî̌nu, he gǔ nohèlò̤ a dǒ sîô̌ pě. 8Bǎ Yôla Plò̌shǐ Běcǎ hètǒ̤ pě akhanu, a gǔ dǐsî̌ganǎ̤ bǎ kòyò hǎkhû̌phû̌ tokhlǒ kû̌ asî ma̤ ta̤sǔ pě, htodě a gǔ dǐsî̌ganǎ̤ bǎ pô̤̌ asî kû̌ ta̤tě̤ta̤mè̤̌ aklè̌ pě. Htokhôtô̤̌, a gǔ dǐsî̌ganǎ̤ bǎpô̤̌ asî kû̌ Cǒmara gǔ cî̌htò̌ asî pě. 9Dǒ asî yṳ̌ǎ he tô̤̌ akhû̌akhî, a dǐsî̌ganǎ̤hto asî kû̌ asî ta̤sǔ ô̌ hǒ. 10Ma̤titèhî̌dě, he gǔ ge dǒ pha a ô̌ pě dě sî kè̌shǐ pe he tô̤̌ akhû̌akhî, Yôla Plò̌shǐ Běcǎ gǔ dǐsî̌ganǎ̤phlô bǎ asî kû̌ ta̤tě̤ta̤mè̤̌ aklè̌aklò pě. 11Cǒmara cî̌htò̌hto hǎkhû̌tana Setò̤ dǒ a pǒ hǎkhû̌ nutôdo hǒ akhû̌akhî, a dǐ sî̌yaphlô hto kòyò hǎkhû̌phû̌ tokhlǒ kû̌ Cǒmara gǔ cî̌htò̌ asî pě hǒ.

12“Ta̤ dǒ he sǎyṳ hî̌ bǎ pô̤̌ sî tokhlǒnu a ô̌ dû̌wî̤pe, bǎbǎkǎlè sî sî̌yaphlô bò̌bò nò̌khôtô̤̌. 13Bǎ Yôla Plò̌shǐ Běcǎ dǒ a dǔlè̌lṳ̌ ta̤tě̤ta̤mè̤̌ hèlò̤pě akhanu, a gǔ nè̌klè̌nè̌klò bǎ sî kû̌ lǒ̤bò ta̤tě̤ta̤mè̤̌ nutokhlǒ pě. A gǔ shôbǐǐlṳ̌ bǎ sî kû̌ a ta̤gènè̤ tûû̌nu mè̤̌tô̤̌. A gǔ shôbǐǐlṳ̌ bǎ sî pô̤̌ a ganǎ̤de hè dǒ Cǒmara a ô̌ nutokhlǒ pě. A gǔ dǔlè̌lṳ̌ bǎ sî kû̌ ta̤ dǒ a htûhtò̌ khôtô̤̌ nutokhlǒ pě. 14Dǒ a hè shôbǐǐlṳ̌ bǎ sî kû̌ lǒ̤bò a ganǎ̤de ta̤ dǒ heô̌ nutokhlǒ akhû̌akhî, a gǔ ma̤bwǐdû̌ma̤sîrîhtû he pě. 15Lǒ̤꤮ bò ta̤ dǒ a ô̌ kû̌ pha tokhlǒ numî̌ heta lǒ̤bò hǒ. Htodě he hî̌ bǎ sî kû̌ Yôla Plò̌shǐ Běcǎ gǔ hè shôbǐǐlṳ̌ bǎ sî lǒ̤bò a ganǎ̤de ta̤ dǒ heô̌ nutokhlǒ pě, pô̤̌nu.”

Ta̤sǎplǎ̤ htûhtò̌ ta̤sǎlě̤sǎlò̤

16“Yî̤khôtô̤̌ hî̌pě sî kè̌shǐnô̌ pe he tô̤̌, Bǎbǎkǎlè yî̤khôtô̤̌ hî̌pě sî kè̌shǐ sô̌ he pě.”

17A khôphijǎ tokhlǒkhlǒnu, a gwè̌ kè̌khî lû̌û tôpwa̤ kû̌ tôpwa̤ dě a hî̌ lô̌khô kû̌, “A cû̌ hî̌ tǒ̤ kû̌, ‘yî̤khôtô̤̌ hî̌pě sî kè̌shǐnô̌ pe he tô̤̌, bǎbǎkǎlè yî̤khôtô̤̌ hî̌pě sî kè̌shǐ sô̌ he pě’ a hî̌ pô̤̌numî̌ a sǎyṳhî̌ yô̤̌mûyô̤̌sǎ hî̌tè?” Htodě asî hî̌ lô̌khô kû̌, “‘Ma̤titèhî̌dě he glè̌ cû̌ dǒ pha a ô̌,’ a hî̌ pô̤̌numî̌ a sǎyṳ hî̌ yô̤̌mûyô̤̌sǎ hî̌tè?” 18Dě asî gwè̌ kè̌khî pe lû̌û kû̌, “‘Yî̤khôtô̤̌ hî̌pě,’ a hî̌ nutômû mî̌ a sǎyṳhî̌ mî̌titè? A sǎyṳ hî̌ ma̤hî̌tènu, pa sî̌yaphlô htûpetô̤̌.”

19Běcǎ Yeshǔ sî̌ganǎ̤ dǒ asî sǎyṳ gwè̌ lû̌û ta̤we̤ta̤kè hǒo akhû̌akhî, dě a hî̌ asî kû̌, “He hî̌ bǎ sî kû̌, ‘Yî̤khôtô̤̌ hî̌pě sî kè̌shǐnô̌ pe he tô̤̌, bǎbǎkǎlè yî̤khôtô̤̌ hî̌pě sî kè̌shǐ sô̌ he pě,’ nu he sǎyṳ hî̌ yô̤̌mûyô̤̌sǎ titènu sî gwè̌ kè̌khîlû̌û tôpwa̤ kû̌ tôpwa̤ yahě? 20He hî̌cǒcǒ sî, bǎ kòyòhǎkhû̌phû̌ tokhlǒ gǔ sǎlě̤sǎlò̤ mè̤̌mè̤̌pě akhanu, sî gǔhǎgǔwô lô̌khô pě. Dǒ he khòbǎ ta̤jî̌ta̤jû̌ akhû̌akhî, sî gǔ sǎplǎ̤ jî̌ pě, bǎbǎkǎlè sî nǐ̤bǎ ta̤sǎplǎ̤nu a gǔ htûhtò̌ tèplè̌ bǎ sî kû̌ sî sǎlě̤sǎlò̤ mè̤̌mè̤̌pě. 21Asô̌sô̌kû̌ pwa̤mǒ̤ phû̌ô̌ hǐphusha nupě. Bǎ a hǐphusha akha, a khòbǎ ta̤pò̤̌ta̤sha bǎbǎkǎlè bǎ aphû̌ô̌hto akhanu, a shôpe̤nǎkè a ta̤pò̤̌ta̤sha tokhlǒ, ma̤titèhî̌dě aphû̌ô̌htò̌ phijǎphû̌ tôpwa̤ dǒ hǎkhû̌nu akhû̌akhî, a sǎlě̤sǎlò̤ hèpě. 22Ta̤ gǔ htûhtò̌ sô̌sô̌ kû̌ sî pô̤̌o nupě. Khònò̤̌dě sî gǔ sǎplǎ̤ pě, bǎbǎkǎlè he gǔ kè̌shǐ sô̌ sî pě dě sî gǔ sǎlě̤sǎlò̤ pě. Htokhôtô̤̌ kòyò phî̌ge jò pe sî ta̤sǎlě̤sǎlò̤ tôpwǎ̤꤮ tô̤̌ pě. 23Bǎnutini̤ pěnu, sî gwè̌ pe he tôcǒ tô̤̌ pě. He hî̌cǒcǒ sî, sî gǔ kwi hepha titètè̌꤮ bǎbǎ, sî kè̌ kwi kû̌ hemi̤ hî̌nu, hepha gǔ ǐ sî pě. 24Tǒ̤lò̤khònò̤̌nu, sî kwi kû̌ hemi̤ tôcǒ tô̤̌. Kwi mò̌ lô̌khô, sî gǔ nǐ̤bǎ pě. Dě sî gǔ nǐ̤bǎ lǒbe ta̤sǎlě̤sǎlò̤ pě.

Ta̤ma̤pè̤̌ hǎkhû̌běkhû̌ a ta̤siwi̤sòwò̤

25“He pwe̤ǐ bǎ sî ta̤hǒo tokhlǒ kû̌ yô̤̌sǎkhěkhô̌ tokhlǒ. Bǎbǎkǎlè shěkhǎ dǒ he lǎ̤lṳ̂ hî̌bǎ pe kû̌ yô̤̌sǎkhěkhô̌ tô̤̌nu, a gǔ hètǒ̤ pě. He gǔ pwe̤ǐlṳ̌ bǎ bò sî kû̌ hepha awe̤akè pě. 26Bǎnutini̤ pěnu, sî kwicabahtò̌ lô̌khô kû̌ hemi̤ pě. Dě he lǎ̤lṳ̂kwi bǎ pe dǒ sîya tô̤̌. 27Ma̤titèhî̌dě hepha mô̤nṳ̌ sî kû̌ anǎ̤ sanǎ̤. Dǒ sî mô̤nṳ̌ he, sî yṳ̌ǎ he kû̌ he ô̌ dǒ pha ô̌ dě hehè akhû̌akhî, a mô̤nṳ̌ sî hǒ. 28He ô̌ dǒ pha hè dě he hèlò̤ dǒ hǎkhû̌ hǒo. Khònò̤̌dě he gǔ hǎhtò̌gekè dǒ hǎkhû̌ hǒo dě he gǔ getîkhî sô̌ dǒ hepha a ô̌.”

29Hǒtôplǎdě akhôphijǎ tokhlǒ hî̌ lû̌û kû̌, “Khònò̤̌ dě na hî̌bǎ pe kû̌ yô̤̌sǎkhěkhô̌ tô̤̌ dě a phlôwô̌kèhǒ. 30Pa gwè̌ na tôcǒ nò̌khôtô̤̌, bǎbǎkǎlè na sî̌ganǎ̤ bòwǐhto tûû̌ ta̤ dǒ pa glè̌ gwè̌ na nutokhlǒ hǒ. Pô̤̌nudě khònò̤̌ pa sî̌ganǎ̤ kû̌ na sî̌ganǎ̤ bò ta̤pṳ̂̌꤮ tocǒ. Dǒ na sî̌ganǎ̤ pô̤̌o akhû̌akhî, pa yṳ̌ǎ kû̌ na ô̌ dǒ Cǒmara a ô̌ hèlò̤ mè̤̌caca hǒ.”

31Dě Běcǎ Yeshǔ gwè̌ asî kû̌, “Khònò̤̌dě sî yṳ̌ǎ mè̤̌mî̌ca kǎ hǒ? 32Bǎbǎkǎlè shěkhǎ dǒ sî gǔ khlè̌cû̌peshe bò pě, dě sî gǔ gekè lô̌khô dǒ sîhǐ pṳ̂̌dǐpṳ̂̌pwa̤nu, a gǔ hètǒ̤ pě. Hî̌tě̤tě̤ mî̌ a hètǒ̤ kèhtohǒ. Sî pṳ̂̌꤮ tôpwa̤ gǔ dǐô̌kè tûû̌ he pě. Bǎbǎkǎlè he ô̌ tûû̌ mè̤̌tô̤̌, ma̤titèhî̌dě hepha ô̌cu kû̌ he.

33“Pô̤̌khô sî gǔ nǐ̤bǎ ta̤sǎphlǒ gûjû̌kabǎ ayanu, he hî̌ hto bò sî lǒ̤꤮ bò tokhlǒ hǒ. Dǒ sî htûhtò̌kè kû̌ he tôcǒnô̤̌ akhû̌akhî, sî nǐ̤bǎ sǎphlǒ a ta̤gûjû̌kabǎ hǒ. Dǒ hǎkhû̌nu, sî gǔ kè̌shǐbǎ kû̌ ta̤pò̤̌ta̤sha ta̤jî̌ta̤jû̌ pě, bǎbǎkǎlè bè̌shû̌bè̌sho lô̌khô sî sǎphlǒ nî̌꤮. He ma̤pè̤̌ hto hǎkhû̌běkhû̌ a ta̤siwi̤sòwò̤ nutokhlǒ hǒ.”