John 18

Kòyò shaǎlò̤kè Běcǎ Yeshǔ dě kòyò pṳ̂̌ yǎ

(Matè̌ 26:47-56; Makǔ 14:43-50; Lǔka 22:47-53)

1A kwicaba htodě a kû̌ akhôphijǎ tokhlǒ hǎhtò̌cû̌bò̌ Geda lô̤̌yô̤̌sǐ nutôlô̤̌. Dǒ lô̤̌bò̌nu, Òlǐba phǎ ô̌tôphǎ. Dě a kû̌ akhôphijǎ tokhlǒ cû̌nṳ̌ lô̌khô bǎnu.

2Běcǎ Yeshǔ kû̌ akhôphijǎ tokhlǒ cû̌ kè̌shǐ shěshu taga kè̌khî lû̌û bǎ gûlǎ̤ nutôkû akhû̌akhî, Khûyǔda dǒ a shaǎlò̤kè Běcǎ Yeshǔ tôpwa̤ nî̌ gûlǎ̤ bǎnutôkû mî̌ a sî̌ganǎ̤ pwǎ. 3Pô̤̌nudě, Khûyǔda cû̌ dǒ we̤nu tôwe̤khû̌. Dě pwa̤shû̌gǎ ikǒlǒkòdû̌ tokhlǒ kû̌ Pharishè̌phû̌ tokhlǒ nohè kû̌ Rṳ̂̌me̤ kliphû̌ tokhlǒ kû̌ kliphû̌ dǒ a ô̌pǒ̤ ta̤lṳhtò̌hô nutokhlǒ kû̌ Khûyǔda. Asî phî̌hèǐ mî̌tè̌ko sîtokhlǒ, mî̌bô ▼

▼Picture of torches

tokhlǒ kû̌ ta̤wè̤̌ta̤htò tokhlǒ.

4Ta̤ glè̌ htûhtò̌ anǎ̤ kû̌ Yeshǔ hî̌tènu, a sî̌ganǎ̤ bò akhû̌akhî a hètô dǒ asî ô̌ dě a gwè̌ asî kû̌, “sî kè̌lǎ mò̌pè?”

5Asî hî̌shěshu lû̌û kû̌, “Pa kè̌lǎ Wî̤̌na̤sôrè̤̌phû̌ Yeshǔ.”

A hî̌ dě Yeshǔ hî̌shěshu asî kû̌, “He mî̌ ahǒ.” Dě Khûyǔda dǒ a shaǎlò̤kè lû̌û nutôpwa̤ ihtǒ kû̌ asî bǎnu. 6Bǎ Běcǎ Yeshǔ hî̌ asî kû̌, “He mî̌ ahǒ,” ahî̌ akhanu, asî sǒ getîkhî dě a lò̤khǔpo̤ bò dǒ hǎkhû̌.

7Hǒtôplǎdě Běcǎ Yeshǔ gwè̌ sô̌ asî kû̌, “Sî kè̌lǎ mò̌pè?”

Dě asî hî̌shěshu kû̌, “Pa kè̌lǎ Wî̤̌na̤sôrè̤̌phû̌ Yeshǔ,” A hî̌shěshu lô̌khô pô̤̌nu.

8“He hî̌hto sî kû̌ he mî̌ ahǒ. Sî kè̌ kè̌lǎ mî̌ca he hî̌dě plûgekè kòyò dǒ ashǔshawa̤ nutokhlǒ,” A hî̌shěshu asî pô̤̌nu. 9Ta̤hî̌bǎ hǒtômû, a ma̤ lǒbehtò̌ ayô̤̌ dǒ a hî̌hto kû̌, “Kòyò dǒ na ǐ he tokhlǒnu, a bǎ hǎmǎkè tôpwǎ̤꤮ tô̤̌,” nuhǒ.

10Hǒtôplǎdě Khûshǐmû Petarǔ dǒ a phî̌hèǐ nò̌she tôbǎ tôpwa̤ phî̌htò̌ anò̌she dě a pè̤̌tṳ̌kè pwa̤shû̌gǎ ikǒdû̌lǒ ajû̌ tôpwa̤ a nò̌ku dǒ cǔtômû tôkhô. Kòyò nutôpwa̤ ami̤ kû̌ Khûmalakhǔ.

11Dě Běcǎ Yeshǔ hî̌ Khûpetarǔ kû̌, “Wô̤̌nṳ̌ kè na nò̌she dǒ aklô̌kû nu. Ta̤jî̌ta̤jû̌ abalě dǒ hepha noô he numî̌, he tô ô yǎ tô̤̌ ya?” ^b

Kòyò kaǎ Běcǎ Yeshǔ dǒ Phaanǎ alô̤mô̤̌

(Matè̌ 26:57,58; Makǔ 14:53,54; Lǔka 22:54)

12Htodě Rṳ̂̌me̤ kliphû̌ kû̌ asî kli ikǒdû̌ tôpwa̤ kû̌ Yǔda kliphû̌ dǒ a ô̌pǒ̤ ta̤lṳhtò̌hô tokhlǒ pṳ̂̌ comě bò Yeshǔ. 13Dě a kaǎ cû̌ wǐlǒ lû̌û dǒ Phaanǎ ahǐ. A mî̌ pha Kayaphǎ ami̤pwǎ̤. Phakayaphǎ mî̌ bǎnu tôněkû a htû pwa̤shû̌gǎ ikǒdû̌lǒ tôpwa̤hǒ. 14Phakayaphǎ mî̌ kòyò tôpwa̤ dǒ a dǐ sî̌ganǎ̤jè̌ bǎ Yǔdaphû̌ ikǒlǒkòdû̌ tokhlǒ kû̌, “Kòyò hǒtôpwa̤ gǔ sikè dǒ Yǔdaphû̌ tokhlǒ ayanu awô̌khlo.” A hî̌ pô̤̌nu. ^c

Khûpetarǔ htè̌bǐ kû̌ he sî̌ganǎ̤bǎnô̌ Yeshǔ tô̤̌.

(Matè̌ 26:69-70; Makǔ 14:66-68; Lǔka 22:55-57)

15Khûshǐmû Petarǔ kû̌ Yeshǔ akhôphijǎ dǒ ashǔshawa̤ tôpwa̤nu, a gû̌ cû̌kû̌ Běcǎ akò. A khôphijǎ dǒ ashǔshawa̤ tôpwa̤nu, pwa̤shû̌gǎ ikǒdû̌lǒ tôpwa̤ sî̌ganǎ̤ tě̤tě̤mè̤̌mè̤̌ lû̌û akhû̌akhî, a cû̌nṳ̌ kû̌ Běcǎ Yeshǔ dǒ pwa̤shû̌gǎ ikǒdû̌lǒ nutôpwa̤ ahǐ we̤kû. 16Bǎbǎkǎlè Khûpetarǔ ihtǒ ô̌kè dǒ we̤takhadû̌ akhlo pwǎ. A khôphijǎ dǒ ashǔshawa̤ dǒ pwa̤shû̌gǎ ikǒdû̌lǒ sî̌ganǎ̤ lû̌û tôpwa̤nu, a hǎhtò̌ hî̌ tîkhî kû̌ pwa̤ô̌pǒ̤ takha pwa̤mǒ̤phû̌ nutôpwa̤ dě a kaǎnṳ̌ Khûpetarǔnu dǒ hǐwe̤kû.

17Pwa̤mǒ̤phû̌ ô̌pǒ̤ takha nutôpwa̤ hî̌ Khûpetarǔ kû̌, “Na mî̌ na ô̌plǒ dǒ Yeshǔ nutôpwa̤ akhôphijǎ nutokhlǒ akla tôpwa̤, yahě?” Dě a hî̌shěshu lû̌û kû̌, “He mè̤̌tô̤̌.”

18Gǎwô̤̌ shû̌lě dě pwa̤ma̤ta̤phû̌ tokhlǒ kû̌ kliphû̌ dǒ a ô̌pǒ̤ ta̤lṳhtò̌hô tokhlǒ ihtǒ ushǔ te̤we̤ bò mî̌. Dě Khûpetarǔ ihtǒ ushǔ kû̌ asî mî̌.

Pwa̤shû̌gǎ ikǒdû̌lǒ tôpwa̤ gwè̌kè̌kè̌ Yeshǔ

(Matè̌ 26:59-66; Makǔ 14:55-64; Lǔka 22:66-71)

19Pwa̤shû̌gǎ ikǒdû̌lǒ nutôpwa̤ gwè̌kè̌kè̌ Yeshǔ kû̌ akhôphijǎ tokhlǒ awe̤akè kû̌ a ta̤sû̌ǐtòwòǐ tokhlǒ awe̤akè.

20Běcǎ Yeshǔ hî̌shěshu lû̌û kû̌, “He sû̌ǐhǔsè̌ bǎ nǒ kòyò tô̤̌, he sû̌ǐlîtòplò̌ kòyò dǒ kòyò pṳ̂̌tôpwa̤ alô̤mô̤̌ pwǎ. Lǒ̤bò Yǔdaphû̌ tokhlǒ lǎ̤hè kè̌shǐ shěshu lû̌û agûlǎ̤ dǒ ta̤cabahǐkûnu bǎbǎ, dǒ ta̤lṳhtò̌hôkûnu bǎbǎ he sû̌ǐ kòyò pṳ̂̌꤮ taplǎ. 21Pô̤̌nudě na cû̌ gwè̌tǒ̤ he ma̤titè? Gwè̌ kòyò dǒ a ganǎ̤de he ta̤shôbǐǐ nutokhlǒ, he shôbǐǐ bǎ asî kwè̌ mî̌titènu, a sî̌ganǎ̤ bò pwǎ,” Běcǎ Yeshǔ hî̌shěshǔ asî pô̤̌nu.

22Bǎ Běcǎ Yeshǔ hî̌ pô̤̌o akhanu, kliphû̌ ô̌pǒ̤ ta̤lṳhtò̌hô dǒ a ô̌phǔ lû̌kòshǐ nutôpwa̤ plǎ̤ lû̌û nò̌shî̌ dě a hî̌ lû̌û kû̌, “Na cû̌ hî̌shěshutǒ̤ pwa̤shû̌gǎ ikǒdû̌lǒ nutôpwa̤ pô̤̌nu ma̤titè?” A hî̌ lû̌û pô̤̌nu.

23Běcǎ Yeshǔ hî̌shěshu lû̌û kû̌, “He kè̌ hî̌ sǔ hî̌dě a sǔkwè̌ titènu, nè̌lṳ̌ kè̌kè̌mò̌ he, a kè̌ tô hî̌dě ma̤titèdě na cû̌ plǎ̤tǒ̤ he nò̌shî̌ ma̤titè?” A hî̌shěshu lû̌û pô̤̌nu. 24Htodě Phaanǎ comě pepwǎ lû̌û dě a nosûcû̌ kòyò kû̌ Yeshǔ dǒ pwa̤shû̌gǎ ikǒdû̌lǒ Phakayaphǎ hî̌ nutôpwa̤ a ô̌.

Khûpetarǔ htè̌bǐkèsô̌ Yeshǔ

(Matè̌ 26:71-75; Makǔ 14:69-72; Lǔka 22:58-62)

25Khûshǐmû Petarǔ ushǔla̤ pe mî̌ bǎnu. Dě kòyò dǒ ashǔshawa̤ tôpwa̤ hî̌ lû̌û kû̌, “Na mî̌ akhôphijǎ yahě?” A gwè̌ lû̌û dě.

A hî̌ geshěshu kû̌, “tô̤̌, he mè̤̌bǎtô̤̌.”

26Pwa̤shû̌gǎ ikǒdû̌lǒ ajû̌ dǒ sapṳ̌wè̤̌ kû̌ Khûpetarǔ pě̤tṳ̌ lû̌û nò̌ku nutôpwa̤ gwè̌ lû̌û kû̌, “He kè̌shǐbǎ na dǒ òlǐbaphǎ nudě na ô̌plǒ kû̌ Yeshǔ yahě?” A gwè̌ lû̌û pô̤̌nu. 27Khûpetarǔ htè̌shěshu bǐkè sô̌ kû̌ he mè̤̌tô̤̌ a hî̌hto kû̌ shîpha û̌htò̌.

Kòyò kaǎcû̌ Běcǎ Yeshǔ dǒ Khwǐpǐlǎ lô̤mô̤̌

(Matè̌ 27:1-2, 11:14; Makǔ 15:1-5; Lǔka 23:1-5)

28Hǒtôplǎdě Yǔdaphû̌ tokhlǒ ô̌ dǒ Phakayaphǎ hǐ dě a kaǎcû̌ lô̌khô Běcǎ Yeshǔ dǒ Rṳ̂̌me̤ Khwǐpǐlǎ hôkû. Asî kaǎcû̌ lû̌û bǎ lṳmṳ̌lî wî̤sò akhanu. Yǔdaphû̌ tokhlǒ sǎyṳ ô̌ ma̤mṳ̂̌plî lô̌khô anǎ̤ pô̤̌ asî ta̤caba lǎ̤bû̌lǎ̤klô ô̌nu. Pô̤̌nudě asî nṳ̌ lô̌khô dǒ Khwǐpǐlǎ hôkû tô̤̌, ma̤titèhî̌dě asî kè̌ nṳ̌ hî̌nu, kòyò dǐǎ asî ta̤cû̌bò̌tûlû̌pwè ashǎǎ lṳmṳ̌hǎ nutô̤̌. 29Pô̤̌nu akhû̌akhî, Khwǐpǐlǎ hǎhtò̌ dǒ hôkhlo dě a kè̌shǐ hî̌bǎshěshu kû̌ asî dě a gwè̌ asî kû̌, “Sî cû̌ bè̌ lû̌û ta̤sǔ kû̌ mî̌titè akhû̌akhî ya?”

30Asî hî̌shěshu kû̌, “A kè̌ ma̤sǔ ta̤ tô̤̌ dě pa kaǎ lû̌û dǒ naô̌ tôkhò̌꤮ tô̤̌,” A hî̌shěshu lû̌û pô̤̌nu.

31Khwǐpǐlǎ hî̌shěshu asî kû̌, “Kaǎ cû̌ tûû̌ lô̌khô dě cî̌htò̌ tûû̌ lô̌khô pô̤̌ sî ta̤sû̌ta̤tòwò ô̌nu.”

Bǎbǎkǎlè Yǔdaphû̌ tokhlǒ hî̌shěshu lû̌û kû̌, “Pa siwi̤sòwò̤ dǒ pa bǎ cî̌htò̌ sikè kòyònu, aô̌tô̤̌,” A hî̌shěshu pô̤̌nu. 32A hî̌ lô̌khô pô̤̌o mî̌ pô̤̌khô a gǔ lǒbehtò̌ pô̤̌ Běcǎ Yeshǔ hî̌nǎ kû̌ a glè̌ si hî̌tè tôcǒ pěnu. ^d

33Pô̤̌nudě Khwǐpǐlǎ nṳ̌ dǒ ahôkû dě a nokaǎnṳ̌ kòyò kû̌ Běcǎ Yeshǔ dě a gwè̌ lû̌û kû̌, “Na mî̌ Yǔdaphû̌ akhwǐ tôpwa̤ mè̤̌mî̌ca ya?” Pô̤̌nu.

34Běcǎ Yeshǔ hî̌shěshu lû̌û kû̌, “Hǒomî̌ na ta̤gènè̤ hî̌hǎhtò̌ tûû̌ ya? Mè̤̌tô̤̌dě kòyò tôpwa̤pwa̤ hèhî̌bǎ na kû̌ hewe̤kè ya?” A gwè̌ geshěshu lû̌û pô̤̌nu.

35Dě Khwǐpǐlǎ hî̌ lû̌û kû̌, “Na gènè̤ he kû̌ Yǔdaphû̌ hò̌? Pwa̤ dǒ a sûhè na dǒ heô̌ tokhlǒ numî̌ na khlilèphû̌ tûû̌ kû̌ na pwa̤shû̌gǎ ikǒlǒkòdû̌ tûû̌ nutokhlǒ pwǎ. Na cû̌ma̤sǔ kwè̌ titèya?” Khwǐpǐlǎ gwè̌ lû̌û pô̤̌nu.

36Běcǎ Yeshǔ hî̌shěshu lû̌û kû̌, “Heshihegǎ mî̌ bǎ hǎkhû̌nu mè̤̌tô̤̌. Kè̌ a mè̤̌ bǎ hǎkhû̌ hî̌nu, pô̤̌khô he gǔ tǒ̤dǒ Yǔdaphû̌ a ikǒlǒkòdû̌ tokhlǒ a cǔdekû tô̤̌nu, hekhô dǒ a gû̌ kû̌ he tokhlǒ gǔ shěshǔshu hto asî hǒ. Pô̤̌nudě heshihegǎ mè̤̌bǎ hǎkhû̌nu tô̤̌.” A hî̌ pô̤̌nu.

37Khwǐpǐlǎ hî̌ lû̌û kû̌, “Kè̌ ahî̌pô̤̌nu hî̌dě ma̤nṳ̌ na htûkǎ khwǐ tôpwa̤?” A gwè̌ lû̌û pô̤̌nu.

Běcǎ Yeshǔ hî̌shěshu lû̌û kû̌, “He mî̌ khwǐ tôpwa̤ mè̤̌mî̌ca pô̤̌ na hî̌ nuhǒ. Pô̤̌khô he gǔ shôbǐǐ kòyò kû̌ ta̤tě̤ta̤mè̤̌ nudě, he hè ô̌phijǎlò̤ dǒ hǎkhû̌hǒo hǒ. Lǒ̤bò kòyò ô̌cu dǒ ta̤tě̤ta̤mè̤̌ tôkhô tokhlǒnu a gǔ ganǎ̤de heyô̤̌ pě.” A hî̌ pô̤̌nu.

(Matè̌ 27:15-31; Makǔ 15:6-20; Lǔka 23:13-25)

38Khwǐpǐlǎ gwè̌ lû̌û kû̌, “Ta̤tě̤ta̤mè̤̌ mî̌ titèya?” Pô̤̌nu. Dě Khwǐpǐlǎ hǎhtò̌ sô̌ dǒ Yǔdaphû̌ tokhlǒ a ô̌ dě a hî̌ asî kû̌, “He glè̌ cî̌htò̌ ayanu he kè̌shǐ ata̤sǔ tôcǒ꤮ tô̤̌.” A hî̌ asî pô̤̌nu. 39“Bǎbǎkǎlè pô̤̌ sî ta̤caba alǎ̤klô ô̌ kû̌ bǎ sî ma̤hto ta̤cû̌bò̌tûlû̌pwè akhanu, he plûhǎhtò̌ bǎ sî kòyò lò̤tě̤ dǒ apô̤kû tôpwa̤ pṳ̂̌꤮ taplǎ. Pô̤̌nudě mî̌ sî sǎyṳ plûhǎhtò̌kè ‘Yǔdaphû̌ akhwǐdû̌ tôpwa̤’ ya?” A gwè̌ asî pô̤̌nu.

40Dě asî yî̤̌kǒhtò̌ lô̌khô kû̌, “Plûhǎhtò̌ tô̤̌. Plûhǎhtò̌ dǒ Khûbarabǎnu,” A hî̌ lô̌khô pô̤̌nu. Khûbarabǎ mî̌ pwa̤pṳ̂̌sigwǐ yǒsaphǎ kòyòta tôpwa̤.