John 20

Lṳ̌kû ô̌koyokè

(Matè̌ 28:1-10; Makǔ 16:1-8; Lǔka 24:1-12)

1Yǔdaphû̌ a lṳmṳ̌dǔ hto nô̌kò tôwô̤ lṳmṳ̌lî wî̤sò lṳmṳ̌khǐpe akhanu, Magadalǎ dokûphû̌ Mǒ̤ma̤rǐ hè dǒ lṳ̌kû dě a kè̌shǐ kû̌ lǒ̤bědû̌ dǒ kòyò htǔbǐ lû̌û kû̌ lṳ̌kû nutômènu kòyò shò̌tephe cû̌kè lû̌û. 2Dě a khlè̌ge dǒ Khûshǐmû Petarǔ kû̌ Yeshǔ akhôphijǎ dǒ a mô̤ǐ lû̌û dǒ ashǔshawa̤ tôpwa̤ a ô̌ dě a shôbǐǐ bǎ asî kû̌, “Asî phî̌htò̌cû̌ hǎmǎkè Běcǎnu dǒ lṳ̌kû hǒ. Asî cû̌bè̌ lû̌û bǎtènu pa sî̌ganǎ̤ tô̤̌.”

3Hǒtôplǎdě Khûpetarǔ kû̌ Běcǎ akhôphijǎ dǒ ashǔshawa̤ tôpwa̤ khlè̌hè lô̌khô dǒ lṳ̌kû. 4Asî khlè̌hè plǒ lû̌û pwǎ bǎbǎkǎlè Běcǎ akhôphijǎ dǒ ashǔshawa̤ nutôpwa̤ khlè̌phwèkhlo kû̌ Khûpetarǔ akhû̌akhî, a khlè̌hè tǒ̤wǐkhlo yǎ dǒ lṳ̌kû. 5A hè û̌lò̤kè̌cônṳ̌ dǒ lṳ̌kû dě a kè̌shǐ hugò̌pwǐ plî ô̌kè bǎnu, bǎbǎkǎlè a hènṳ̌ dǒ akû tô̤̌. 6Hǒtôplǎdě Khûshǐmû Petarǔ dǒ a khlè̌hè lò̤ dǒ akò nutôpwa̤ hètǒ̤ dě a hènṳ̌ dǒ lṳ̌kû. Dě a kè̌shǐ hugò̌pwǐ plî nutôpṳ ô̌kè bǎnu. 7Htodě a kè̌shǐ padô̌ khǔphô dǒ kòyò bô̌bǐ bǎ kû̌ Běcǎ Yeshǔ a ikǒ nutôpṳ. A khǔphô tôpṳnu a ô̌plǒ kû̌ hugò̌pwǐ plî nutôpṳ tô̤̌. A ô̌ tûlû khô̌tû̌kè tôkû. 8Dǒ nô̌kò dě akhôphijǎ dǒ a khlè̌hè tǒ̤wǐ dǒ lṳ̌kû nutôpwa̤ hènṳ̌ dǒ akû. A hè kè̌shǐ dě a yṳ̌ǎ kû̌ Yeshǔ htûpwa̤ gesô̌ hǒ. 9Pô̤̌ lî̤plò̌shǐ hî̌nǎ kèhto kû̌, Běcǎ Yeshǔ gǔ si ihtǒhtûpwa̤sô̌ pě, tǒ̤lò̤ a si ihtǒhtûpwa̤sô̌ khôtô̤̌nu akhôphijǎ tokhlǒ sî̌yaphlô nò̌khôtô̤̌.

10Htodě asî nusò̌ginǐ̤ getîkhîsô̌ lô̌khô dǒ ahǐ.

Běcǎ Yeshǔ ô̌lṳ̌htò̌ bǎ Magadalǎ dokûphû̌ Mǒ̤marǐ

(Makǔ 16:9-11)

11Bǎbǎkǎlè Mǒ̤ma̤rǐ dě a ihtǒ ô̌kè bǎ lṳ̌kû dě a hǎ. Bǎ a hǎ akha, a û̌lò̤kè̌cônṳ̌ dǒ lṳ̌kû. 12Dě a kè̌shǐ mǒkhû̌ tanaphû̌ sô̌nṳ̌ jebû sò̌ginǐ̤ hǎnòò̌ dǒ Yeshǔ lṳ̌tṳ̂̌ lǎ̤ô̌nu. Tôpwa̤ dě a ô̌ dǒ a ikǒkhû̌ tôkhô, tôpwa̤ dě a ô̌ dǒ a khò̌yô̤̌ tôkhô.

13Dě asî gwè̌ Mǒ̤ma̤rǐ kû̌, “Pwa̤mǒ̤, na hǎ ma̤titè?”

Dě Mǒ̤ma̤rǐ hî̌ shěshu asî kû̌, “Asî phî̌cû̌kè he Běcǎ hǒ, asî cû̌bè̌ lû̌û bǎtènu he sî̌ganǎ̤tô̤̌,” A hî̌shěshu pô̤̌nu. 14Bǎ a tiwǐ tîkhî akhanu, a kè̌shǐ Běcǎ Yeshǔ ihtǒô̌ dǒ a nô̌kò bǎbǎkǎlè a sî̌ganǎ̤ kû̌ Běcǎ Yeshǔ tô̤̌.

15“Pwa̤mǒ̤, na hǎ ma̤titè? Na kè̌lǎ mò̌pè?” A gwè̌ lû̌û pô̤̌nu.

Mǒ̤marǐ shò̌tò̤̌ Běcǎ Yeshǔ kû̌ pwa̤ô̌pǒ̤ we̤ dě a hî̌ lû̌û kû̌, “Wè̤̌, na kè̌ phǐcû̌ yǎ hî̌dě na cû̌bè̌ lû̌û bǎtè tôkû, shôbiǐlṳ̌ he dě he cû̌phî̌gesô̌ mò̌ a,” A hî̌ lû̌û pô̤̌nu.

16“Mǒ̤ma̤rǐ,” Běcǎ Yeshǔ hî̌ lû̌û pô̤̌nu.

Dě a htû̌tiwǐ anǎ̤ dǒ lû̌û ô̌ dě a hî̌shěshu lû̌û kû̌ Hebrǔyô̤̌ dě a hî̌ kû̌, “Rabanǐ.” (Yô̤̌sǎyô̤̌mû mî̌ sara.)

17Dě Běcǎ Yeshǔ hî̌ lû̌û kû̌, “Pṳ̂̌bǎ tǎ̤ he mǎ̤, ma̤titèhî̌dě he ge dǒ hepha ô̌ nò̌khôtô̤̌. Cû̌ dǒ he pṳ̌wè̤̌ nutokhlǒ a ô̌ dě cû̌hî̌ bǎ asî kû̌, ‘he gǔ gehtò̌ dǒ hepha ô̌mî̌ amè̤̌, asî pha mî̌ amè̤̌mè̤̌, he Cǒmara mî̌ amè̤̌mè̤̌, asî Cǒmara mî̌ amè̤̌mè̤̌ nutôpwa̤ a ô̌pě’” A hî̌ lû̌û pô̤̌nu.

18Magadalǎ dokûphû̌ Mǒ̤ma̤rǐnu cû̌ shôbǐǐ akhôphijǎ tokhlǒ kû̌ ta̤we̤ta̤kè hǒo dě a hî̌ bǎ asî kû̌, “He kè̌shǐ Běcǎ hǒ!” Dě a hî̌lṳ̌ bǎ asî kû̌ Běcǎ hî̌ bǎ lû̌û nutokhlǒ.

Běcǎ Yeshǔ ô̌lṳ̌htò̌ bǎ akhôphijǎ tokhlǒ

(Matè̌ 28:16-20; Makǔ 16:14-18; Lǔka 24:36-49)

19Bǎ mô̤gètè̤ hto nô̌kò tôwô̤ lṳmṳ̌khǐpôlô̤̌ akhanu, akhôphijǎ tokhlǒ ǐsha lô̌khô Yǔdaphû̌ a ikǒlǒkòdû̌ tokhlǒ alǎ̤ dě a ma̤mě lô̌khô takha, dě bǎ asî ô̌plǒcu lû̌û dǒ hǐdǒkû akhanu, Běcǎ Yeshǔ hè ihtǒ ô̌lṳ̌ sumṳ̌htò̌khǐ bǎ asî klǎmakû dě a hî̌ asî kû̌, “Sǎphlǒ ta̤gûjû̌kabǎ ô̌ pû kû̌ sî nî̌,” A hî̌ asî pô̤̌nu. 20A hî̌hto bǎ asî pô̤̌nudě a dǔlè̌lṳ̌ bǎ asî kû̌ acǔde kû̌ awî̤̌lǎ̤. Bǎ akhôphijǎ tokhlǒ kè̌shǐ lû̌û akhanu, a sǎlě̤sǎlò̤ sû̌pi̤sò̌pǐ̤ lô̌khô.

21Běcǎ Yeshǔ hî̌ sô̌ asî kû̌, “Sǎphlǒ ta̤gûjû̌kabǎ ô̌ pû kû̌ sî nî̌! Dě pô̤̌ hepha nohè henu, he nocû̌ sî.” 22A hî̌hto pô̤̌nudě a uphǔcû̌ dǒ asîkhû̌ dě a hî̌ asî kû̌, “Phî̌shěshu lô̌khô Yôla Plò̌shǐ Běcǎnu. 23Sî kè̌ plûkè kòyò ta̤sǔ tokhlǒ hî̌dě, Cǒmara plûkè sî ta̤sǔ pě. Sî kè̌ plûkè kòyò ta̤sǔ tô̤̌ hî̌dě, Cǒmara gǔ plûkè asî ta̤sǔ tô̤̌.” ^a

Běcǎ Yeshǔ ô̌lṳ̌htò̌ bǎ Khûtû̌mǎ

24Bǎ Yeshǔ cû̌nṳ̌ ô̌lṳ̌ bǎ akhôphijǎ dǒ hǐkû akhanu, Khûtû̌mǎ dǒ kòyò kaǎpô̤̌ lû̌mi̤ kû̌ Khûdǐdimǔ tôpwa̤ ô̌cu kû̌ asî bǎnu tô̤̌. 25A khôphijǎ tokhlǒ hî̌ Khûtû̌mǎ kû̌, “Pa kè̌shǐ Běcǎ hǒ,” A hî̌ bǎ lû̌û pô̤̌nu.

Bǎbǎkǎlè a hî̌shěshu asî kû̌, “He kè̌ kè̌shǐ tě̤htò̌phwǐ agûlǎ̤ cè̌wè̌ô̌kè dǒ a cǔdekû tô̤̌, htodě he kè̌ cîwînṳ̌bǎ tě̤htò̌phwǐ cè̌wè̌ gûlǎ̤ kû̌ he cǔmṳ̌ tô̤̌, he kè̌ sûphûbǎ awî̤̌lǎ̤ cè̌wè̌ kû̌ he cǔde tô̤̌nu, he yṳ̌ǎtô̤̌.”

26Dǒ nô̌kò susô̌tini̤htonu, Běcǎ Yeshǔ akhôphijǎ tokhlǒ ô̌plǒ sô̌ lû̌û dǒ hǐnu tômè akû. Bǎnuakha Khûtû̌mǎ ô̌plǒ kû̌ asî bǎnu. Asî ma̤mě takha bǎbǎkǎlè Běcǎ Yeshǔ hènṳ̌ ihtǒô̌ dǒ asî klǎmakû dě a hî̌ asî kû̌, “Sǎphlǒ ta̤gûjû̌kabǎ ô̌cu pû kû̌ sî nî̌” Pô̤̌nu. 27Hǒtôplǎdě a hî̌ Khûtû̌mǎ kû̌, “Hèkè̌mò̌ he cudekûnu, hè dě cîwîkè̌ tûû̌ kû̌ na cǔmṳ̌ nu. Yṳ̂̌hè na cǔgô̌nu dě sûphû he wî̤̌lǎ̤ acè̌wè̌nu. Sǎphlǒ wò̌wè̌ tǎ̤mǎ̤. Tûlû̌ yṳ̌ǎnu.” A hî̌ lû̌û pô̤̌nu.

28“He Běcǎ, he Cǒmara,” Khûtû̌mǎ hî̌shěshu lû̌û pô̤̌nu.

29Htodě Běcǎ Yeshǔ hî̌ lû̌û kû̌, “Na kè̌shǐ he akhû̌akhî, dě na yṳ̌ǎ pwǎ. Kòyò dǒ a kè̌shǐ he tô̤̌ dě a yṳ̌ǎ tokhlǒnu a gǔ nǐ̤bǎ ta̤ǐshowî̤,” A hî̌ lû̌û pô̤̌nu.

Kòyò wě̤ lî̤ hǒtôbǎ a ta̤yè̤lò̤ kè̌shuǐ tokhlǒ

30Běcǎ Yeshǔ dǔlṳ̌ bǎ ta̤ma̤ cô̌klǐcô̌sè dǒ akhôphijǎ tokhlǒ alô̤mô̤̌ dǒ kòyò wě̤mǎnǎnṳ̌ bǎ lî̤ hǒtôbǎ akû tô̤̌ tokhlǒnu a ô̌dû̌wî̤pe. 31Bǎbǎkǎlè kòyò wě̤ lî̤ hǒtôbǎ mî̌ pô̤̌khô sî gǔ yṳ̌ǎ kû̌ Yeshǔ mî̌ Me̤shǐya, a mî̌ Cǒmara aphû̌khû tôpwa̤, dě dǒ sî yṳ̌ǎ lû̌û akhû̌akhî, dě sî gǔ nǐ̤bǎ yôla htûpwa̤ ayanu, kòyò wě̤ bǎ sî pwǎ.