John 7

Běcǎ Yeshǔ kû̌ a pṳ̌pwa̤khû tokhlǒ

1Běcǎ Yeshǔ hî̌hto pô̤̌o dě, a cû̌ dǒ Galilè̤̌gǎ dě, a cû̌lè tôdo hto tôdo bǎnu. Yǔdaphû̌ ikǒlǒkòdû̌ tokhlǒ kè̌lǎ ma̤si lû̌û akhû̌akhî, a sǎyṳ cû̌ dǒ Yǔda gǎkû tô̤̌. 2Bǎbǎkǎlè, bǎnukha, Yǔdaphû̌ ma̤htò̌ hǐphû̌ pwè glè̌bǎ phǔhè hǒ. ^a 3Pô̤̌nudě Běcǎ Yeshǔ a pṳ̌pwa̤khû tokhlǒ hî̌ lû̌û kû̌, “Pô̤̌khô nakhôphijǎ tokhlǒ gǔ kè̌shǐ kû̌ na ma̤ ta̤cô̌klǐcô̌sè tokhlǒ ayanudě, na tô hǎhtò̌cû̌ khô̌kè kû̌ bǒo dě cû̌ dǒ Yǔdagǎkûnu. 4Kòyò dǒ a sǎyṳ̌ mi̤lṳ̌hǔsǎ numî̌, a ma̤hǔma̤sè̌ ta̤ tôpwǎ̤꤮ tô̤̌. Na kè̌ ma̤ ta̤cô̌klǐcô̌sè pô̤̌nutokhlǒ hî̌dě dǔlè̌lṳ̌ bǎ kòyò nanǎ̤ kû̌ hǎkhû̌ tôbǎbònu kǎlè.” 5Ma̤titèhî̌dě Běcǎ a pṳ̌pwa̤khû sanǎ̤ tokhlǒnu, a yṳ̌ǎ lû̌û tô̤̌.

6A hî̌ lû̌û pô̤̌nu akhû̌akhî, Běcǎ Yeshǔ hî̌ asî kû̌, “Shěkhǎtô shěkhǎbǎnu a hètǒ̤ dǒ heya nò̌khôtô̤̌. Bǎbǎkǎlè dǒ sîyanu sîcû̌sîge bǎkhò̌tè mî̌ anǐ̤ pwǎ. 7Kòyò hǎkhû̌phû̌ tokhlǒ sǎkhî̌ jò sî tô̤̌. Bǎbǎkǎlè a sǎkhî̌ lô̌khô he, ma̤titèhî̌dě he hî̌htò̌lṳ̌ asî ma̤ ta̤phû̌mò̤̌ tokhlǒ no̤꤮. 8Cû̌tûû̌mò̌ lô̌khô dǒ pwèkû nu. He cû̌ nò̌khôtô̤̌, ma̤titèhî̌dě shěkhǎtô shěkhǎbǎ hètǒ̤ dǒ heya nò̌khôtô̤̌.” A hî̌shěshu apṳ̌ sîtokhlǒ pô̤̌nu. 9Běcǎ Yeshǔ hî̌hto pô̤̌o dě a ô̌kè bǎ Galilè̤̌gǎkûnu.

Běcǎ Yeshǔ cû̌ dǒ ma̤htò̌ hǐphû̌ pwè

10Bǎbǎkǎlè bǎ a pṳ̌pwa̤khû tokhlǒ hǎhtò̌cû̌kè hto akhanu, a hǎhtò̌ cû̌hǔcû̌sè̌ dǒ nô̌kò, a cû̌lṳ̌cû̌lîtîklî̌ tô̤̌. 11Yǔdaphû̌ ikǒlǒkòdû̌ tokhlǒnu, “Yeshǔ ô̌ bǎtè?” A kè̌lǎ gwè̌ lô̌khô lû̌û pô̤̌nu.

12Kòyò saprṳ̂saphǎ tokhlǒ hî̌hǔhî̌sè̌ dû̌wî̤ awe̤akè. Tokhlǒkhlǒnu, a hî̌ lô̌khô kû̌, “A mî̌ kòyò wô̌ pwǎ.”

Akhô ashǔshawa̤ tokhlǒ hî̌shěshu kû̌, “Awô̌ bǎtô̤̌. A cû̌ tili̤tôlô̌ kòyò pwǎ,” A hî̌ lô̌khô pô̤̌nu. 13Kòyò ǐsha lô̌khô Yǔdaphû̌ ikǒlǒkòdû̌ tokhlǒ dě kòyò hî̌lṳ̌lîtîklî̌ bǔ tôpwǎ̤꤮ tô̤̌.

14Bǎ kòyò pwè phǔ klǎma akhanu, Běcǎ Yeshǔ cû̌htò̌nṳ̌ dǒ ta̤lṳhtò̌hôkû dě a sahtò̌ sû̌ǐtòwòǐ kòyò bǎnu. 15Yǔdaphû̌ ikǒlǒkòdû̌ tokhlǒ ǒò̌ dě a hî̌ lô̌khô kû̌, “A htò̌bǎnô̌ gû̌ kòyò dǒ Yǔdaphû̌ sû̌lî̤hô a saradû̌ tokhlǒ a cǔde tô̤̌, bǎbǎkǎlè a cû̌ sî̌ganǎ̤ dû̌wî̤ pwǐo numî̌ a cû̌ sû̌ǐnǐ̤ bǎtèya?”

16Dě Běcǎ Yeshǔ hî̌shěshu asî kû̌, “He sû̌ǐ kòyò hǒtokhlǒ numî̌ he ta̤sû̌ǐtòwòǐ tûû̌ mè̤̌bǎtô̤̌. Ta̤sû̌ǐ hǒtokhlǒ numî̌ a ô̌ dǒ Cǒmara dǒ a nohè he tôpwa̤ a ô̌. 17Kòyò tôpwa̤pwa̤, kè̌ sǎyṳ ma̤tô Cǒmara asǎphlǒ hî̌dě, ta̤sû̌ǐtòwòǐ hǒtokhlǒ numî̌ a ô̌ dǒ Cǒmara a ô̌ dě a hè ya? Mè̤̌tô̤̌dě he hî̌bǎ sanǎ̤ kû̌ he ta̤siwi̤sòwò̤ yanu abǎ sî̌ganǎ̤ pwǎ. 18Kòyò dǒ a hî̌bǎ tû̌ kû̌ a ta̤siwi̤sòwò̤ tôpwa̤pwa̤nu, a sǎyṳ nohtû̌sò̌htò̌ kòyò kû̌ anǎ̤ pwǎ. Bǎbǎkǎlè kòyò dǒ a sǎyṳ nohtû̌sò̌ǐ anǎ̤ kòyò nukû̌ kòyò dǒ a nohè lû̌û tôpwa̤pwa̤nu, a hî̌bǎcǒ pwǎ, a lòhǎlòhô kòyò bǎtô̤̌. 19Khûmṳ̂shě ǐhto sî ta̤sû̌ta̤tòwò yahě? Bǎbǎkǎlè sî gû̌ma̤ kû̌ ta̤sû̌ta̤tòwò tôpwa̤꤮ tô̤̌. Sî kè̌lǎ ma̤si he ma̤titè?”

20“Khînǎ ma̤bǎ na hǒ. Mò̌pè tôpwa̤ kè̌lǎ ma̤si na ya?” Kòyò saprṳ̂saphǎ hî̌shěshu lû̌û pô̤̌nu.

21Dě Yeshǔ hî̌shěshu asî kû̌, “Dǒ Yǔdaphû̌ a lṳmṳ̌dǔ akhanu, he ma̤ bǎ sî ta̤cǒklǐ tôcǒ dě sî ǒò̌ bò pṳ̂̌꤮ tôpwa̤ yahě! 22Khûmṳ̂shě mǎnǎ sî kû̌, lǒ̤bò sî phû̌pwa̤khû tokhlǒnu sî bǎ dǔtṳ̌ abě a hî̌ dě sî dǔtṳ̌ lô̌khô abě bǎ lṳmṳ̌dǔ nutini̤. ^b Kè̌ hî̌ dě pwa̤ dǒ a ma̤ wǐ numî̌, Khûmṳ̂shě mè̤̌tô̤̌. Sîphisîphu dǒ awǐnu tokhlǒ sahtò̌ ma̤wǐ pwǎ. ^c 23Pô̤̌nudě pô̤̌khô sî gǔ khatûlû̌cû̌tûlû̌ Khûmṳ̂shě a ta̤sû̌ta̤tòwò tô̤̌nu, sî kè̌ tô dǔtṳ̌ lô̌khô sî phû̌pwa̤khû tokhlǒ aběkhi bǎ lṳmṳ̌dǔ akhanu, kè̌hî̌dě sî dǔtṳ̌ lô̌khô pwǎ. Pô̤̌nudě bǎ he ma̤hǎmǎ kòyòsha dǒ lṳmṳ̌dǔ akha dě sî cû̌ sǎphlǒdû̌ he ma̤titè? ^d 24Bè̌ tǎ̤ kòyò ta̤sǔ pô̤̌ sî kè̌shǐ kòyò dǒ akhlo nutokhlǒ tǎ̤mǎ̤ nî̌. Mè̤̌mè̤̌tôkhônu, bè̌lò̤cǒtè̤ lô̌khô sî sǎphlǒ dǒ sî gǔ cî̌htò̌tôbǎ kòyò nunî̌.”

A mî̌ Me̤shǐya ya?

25Yarǔshôle phû̌ tokhlǒkhlǒ hî̌ kû̌, “Yǔdaphû̌ ikǒlǒkòdû̌ kè̌lǎ ma̤si lû̌û numî̌ a hǒ ya? 26Kè̌mò̌, a hî̌bǎcǒtè̤ dǒ kòyò tôprṳ̂tôphǎ alô̤mô̤̌nu, kòyò hî̌ tě̤tṳ yǎ tôpwǎ̤꤮ tô̤̌. Khònò̤̌ mî̌ pa ikǒlǒkòdû̌ tokhlǒ sî̌ganǎ̤ tě̤tě̤mè̤̌mè̤̌ hè kû̌ a mî̌ Me̤shǐya tôpwa̤ hǒ, pô̤̌nu ya? 27Kòyò hî̌ kû̌ Khrǐ gǔ hèlò̤pěnu, kòyò sî̌ganǎ̤ adoashô̌ tôpwa̤ tô̤̌, kòyò hî̌ bǎtô̤̌ya, bǎbǎkǎlè a dě a ô̌ do bǎtènu pa sî̌ganǎ̤ pwǎlè.” Asî hî̌ lô̌khô pô̤̌nu.

28Bǎ Běcǎ Yeshǔ sû̌ǐlò̤bǎ kòyò dǒ ta̤lṳhtò̌hôkû akhanu, a yî̤̌kǒhtò̌ kû̌, “Sî sî̌ganǎ̤ he numî̌ amè̤̌kǎ. He ô̌ tô bǎtè hè numî̌ sî sî̌ganǎ̤ mè̤̌mî̌ca pwǎ sînî. He hè jû̌ tû̌ he sǎphlǒ mè̤̌bǎtô̤̌. Kòyò dǒ a nohè he tôpwa̤ numî̌, sî sî̌ganǎ̤ bǎyǎ tô̤̌. A mî̌ kòyò dǒ acǒ tôpwa̤. 29Bǎbǎkǎlè he sî̌ganǎ̤ yǎ, ma̤titèhî̌dě he ô̌ dǒ a ô̌ hè pwǎ no̤꤮. Pwa̤ nohè he mî̌ a pwǎ no̤꤮.”

30A hî̌hto pô̤̌nudě asî kè̌lǎpṳ̂̌ Běcǎ Yeshǔ. Bǎbǎkǎlè shěkhǎ dǒ kòyò gǔ kè̌lǎ ma̤si lû̌û ayanu, a hètǒ̤ khôtô̤̌ akhû̌akhî, kòyò pṳ̂̌yǎ tôpwa̤ khôtô̤̌. 31Bǎbǎkǎlè kòyò yṳ̌ǎwô̤̌ yṳ̌ǎdû̌ pe lû̌û pwǎ. Asî hî̌ lô̌khô kû̌, “Htû̌꤮ Khrǐ, dǒ kòyò hî̌ nutôpwa̤ hèlò̤pě akhanu, a gǔ ma̤ dû̌wî̤ khlope ta̤cô̌klǐcô̌sè kû̌ hǒtôpwa̤ pě ya?” A hî̌ lô̌khô pô̤̌nu.

Yǔdaphû̌ ikǒlǒkòdû̌ tokhlǒ no pṳ̂̌ kòyò kû̌ Yeshǔ

32Asî hî̌bǎhǔ hî̌bǎsè̌ kè̌khî lû̌û kû̌ Běcǎ Yeshǔ Khrǐ awe̤akè pô̤̌o akhanu, Pharishè̌phû̌ tokhlǒ ganǎ̤de dě asî kû̌ pwa̤shû̌gǎ ikǒlǒkòdû̌ tokhlǒ nocû̌pṳ̂̌ Běcǎ Yeshǔ kû̌ kliphû̌ dǒ a ô̌pǒ̤ ta̤lṳhtò̌hô nutokhlǒ.

33Běcǎ Yeshǔ hî̌ kû̌, “He ô̌plǒ yî̤kû̌pe sî tô̤̌. Yî̤khôtô̤̌, hî̌pě he gǔ getîkhî sô̌ dǒ pwa̤nohè he nutôpwa̤ a ô̌ pě. 34Sî hè kè̌lǎsǔ lô̌khô he pě, bǎbǎkǎlè sî kè̌shǐ he tô̤̌. Dǒ he lǎ̤ô̌ agûlǎ̤nu, sî cû̌ jò kû̌ he tôpwǎ̤꤮ tô̤̌.”

35Yǔdaphû̌ ikǒlǒkòdû̌ tokhlǒ hî̌ ǐtûû̌ kè̌khî lû̌û tôpwa̤ kû̌ tôpwa̤ dě a hî̌ lô̌khô kû̌, “Pa kè̌shǐ jò a tô̤̌ a hî̌ numî̌, a glè̌ cû̌ bǎtè ya? Mî̌ a glè̌ cû̌ dǒ pa Yǔdaphû̌ cû̌ô̌ kû̌ kòyò dǒ Grěphû̌ nutokhlǒ akla dě a glè̌ cû̌ sû̌ǐ Grěphû̌ bǎnutokhlǒ ya? 36Htodě a hî̌ kû̌, ‘sî gǔ kè̌lǎ he pě bǎbǎkǎlè sî kè̌shǐ he tô̤̌,’ a hî̌ pô̤̌nu htodě, a hî̌ pô̤̌ kû̌, ‘dǒ he lǎ̤ô̌ agûlǎ̤nu, sî cû̌ jò kû̌ he tô̤̌,’ a hî̌ pô̤̌numî̌ a sǎyṳ hî̌ mî̌titè ya?” A hî̌ kè̌khî lû̌û tôpwa̤ kû̌ tôpwa̤ pô̤̌nu.

Shi dǒ a ǐkòyò ta̤htûpwa̤

37Bǎ pwèdû̌lǒ dǒ nô̌kò gutṳ̌ tôni̤ akhanu, Běcǎ Yeshǔ ihtǒ kaǎgǔ kû̌, “Lǒ̤bò kòyò dǒ a sǎô shi tokhlǒnu, nohè phî̌ô lô̌khô shi dǒ heô̌ bǒo. ^e 38Mò̌pèpè̌꤮ bǎbǎ, dǒ a yṳ̌nǐ̤nǎ̤nǐ̤ henu, pô̤̌ lî̤plò̌shǐkû hî̌ kû̌, shi dǒ a ǐkò ta̤htûpwa̤ ashilô̤̌nu, a gǔ hǎhtò̌ dǒ lû̌kû pě.” ^f 39Shi a ǐ kòyò ta̤htûpwa̤ dǒ Běcǎ Yeshǔ hî̌ numî̌ Yôla Plò̌shǐ Běcǎ pwǎ. Mò̌pèpè̌꤮ bǎbǎ dǒ a yṳ̌ǎ lû̌û tokhlǒnu, a gǔ nǐ̤bǎ pě. Běcǎ Yeshǔ nǐ̤bǎ ta̤bwǐdû̌sîrîhtû nò̌khôtô̤̌, ma̤titèhî̌dě a si ihtǒhtûpwa̤sô̌ dě a gehtò̌ dǒ mǒkhû̌ khôtô̤̌. Pô̤̌nudě Cǒmara a Yôla Plò̌shǐ hènṳ̌ô̌ dǒ asî sǎphlǒkû tôpwǎ̤ khôtô̤̌.

40Bǎ kòyò saprṳ̂ ganǎ̤de Běcǎ Yeshǔ kaǎgǔ hî̌ pô̤̌o akhanu, tokhlǒkhlǒ dě a hî̌ kû̌, “A mî̌ piwi̤pèshè dǒ pa ô̌pǒ̤kè̌shǔ lû̌û nutôpwa̤ mè̤̌mî̌ca hǒ.” A hî̌ lô̌khô pô̤̌nu.

41Tokhlǒkhlǒ dě a hî̌ kû̌, “Me̤shǐya mè̤̌mî̌ca hǒ,” Bǎbǎkǎlè tokhlǒkhlǒnu a hî̌ kû̌, “Me̤shǐya ô̌ dǒ Galilè̤̌gǎ dě a gǔ hè pě mè̤̌tô̤̌. 42Lî̤plò̌shǐkû hî̌ kû̌, Me̤shǐya gǔ hè ô̌htò̌ dǒ khwǐdawi̤ akhlialè pě, a gǔ hè ô̌phijǎlò̤ dǒ khwǐdawi̤ ô̌ ǐ yǎ Wî̤̌bè̌telehe akûnu pě, yahě?” A hî̌ lô̌khô pô̤̌nu. ^g 43Dǒ Khrǐ akhû̌akhî, dě kòyò saprṳ̂ tokhlǒ gènè̤ cû̌khô̌kè tôprṳ̂ kû̌ tôprṳ̂. 44Tokhlǒkhlǒnu a sǎyṳ pṳ̂̌ lû̌û, bǎbǎkǎlè kòyò pṳ̂̌ lû̌û tôpwǎ̤ tô̤̌.

Yǔdaphû̌ ikǒlǒkòdû̌ tokhlǒ yṳ̌ǎ Yeshǔ tô̤̌

45Bǎ kliphû̌ ô̌pǒ̤ ta̤lṳhtò̌hô tokhlǒ getîkhî sô̌ dǒ pwa̤shû̌gǎ ikǒlǒkòdû̌ tokhlǒ kû̌ Pharishè̌phû̌ tokhlǒ a ô̌ akhanu, a gwè̌ asî kû̌, “Sî pṳ̂̌ge a tô̤̌ ma̤titè?” A hî̌ asî pô̤̌nu.

46Kliphû̌ ô̌pǒ̤ ta̤lṳhtò̌hô tokhlǒ hî̌shěshu asî kû̌, “Kòyò hî̌bǎ sô̌sô̌kû̌ anî̌ a ô̌ tôpwǎ̤꤮ tô̤̌.”

47Dě Pharishè̌phû̌ tokhlǒ hî̌takǎshěshu asî kû̌, “A lô̌nṳ̌ padô̌ sî hò̌? 48Pa dǒ a htû ta̤cubucaba a ikǒlǒkòdû̌ akla tokhlǒnu bǎbǎ, Pharishè̌phû̌ akla tokhlǒ nubǎbǎ, a yṳ̌ǎ kû̌ lû̌û numî̌ a ô̌ tôpwa̤pwa̤ ya? 49A ô̌ tôpwa̤ tô̤̌. Kòyò saprṳ̂ nutokhlǒ mî̌ a sî̌ganǎ̤ gû̌ kòyò Khûmṳ̂shě a ta̤sû̌ta̤tòwò tocǒ tô̤̌ akhû̌akhî, a cû̌ yṳ̌ǎ phô̌phô̌ lô̌khô pwǎ. Cǒmara gǔ cî̌htò̌ asî pě,” Pharishè̌phû̌ tokhlǒ hî̌takǎshěshu asî pô̤̌nu.

50Kòyòmi̤ kû̌ Khûnǐkôdemǔ ô̌ tôpwa̤. A mî̌ a ô̌plǒô̌cu kû̌ Pharishè̌phû̌ aprṳ̂kû tôpwa̤. Dǒ awǐkha numî̌ a hè bǎ dǒ Běcǎ Yeshǔ a ô̌. Dě Khûnǐkôdemǔ gwè̌ asî kû̌, ^h 51“Kòyò tôpwa̤ ma̤ kwè̌ mî̌titènu pa kè̌ ganǎ̤de a hî̌ tô̤̌, pa kè̌ kè̌shǐ ata̤ma̤ tokhlǒ nò̌khôtô̤̌nu, pa bǎ cî̌htò̌ a tô̤̌, pa ta̤sû̌ta̤tòwò ô̌ pô̤̌nu, yahě?” A gwè̌ asî pô̤̌nu.

52Asî hî̌shěshu lû̌û kû̌, “Na mî̌ Galilè̤̌gǎphû̌ pwǎ. Kè̌lǎ sô̌ mò̌ lî̤plò̌shǐ, na gǔ kè̌shǐ kû̌ piwi̤pèshè nutôpwa̤ ô̌htò̌ dǒ Galilè̤̌gǎkû pě mè̤̌tô̤̌.”

53Htodě kòyò gebòkè dǒ ahǐ pṳ̂̌꤮ tôpwa̤.