John 9

Běcǎ Yeshǔ ma̤hǎmǎkè kò pwa̤khû mǐ̤sǎkhǐ dǒ amǒ̤hǐphu kû tôpwa̤

1Bǎ Běcǎ Yeshǔ cû̌ dǒ klè̌lô̤ akha, a kè̌shǐ kò pwa̤khû mǐ̤sǎkhǐ dǒ a mǒ̤hǐphukûpe nutôpwa̤. 2A khôphijǎ tokhlǒ gwè̌ lû̌û kû̌, “Sara, pwa̤khû tôpwa̤ cû̌ mǐ̤sǎkhǐ pe dǒ a mǒ̤hǐphukû mî̌, dǒ ata̤sǔ akhû̌khî ya, mè̤̌tô̤̌mî̌, dǒ amǒ̤apha ta̤sǔ akhû̌khî ya?” A khôphijǎ tokhlǒ gwè̌ lû̌û pô̤̌nu.

3Dě a hî̌shěshu kû̌, “A ta̤sǔ mè̤̌tô̤̌tô̤̌, amǒ̤apha ta̤sǔ mè̤̌tô̤̌tô̤̌. Bǎbǎkǎlè pô̤̌khô Cǒmara a ta̤pô̤ta̤phǎ gǔ ô̌lṳ̌htò̌ dǒ a ta̤ô̌htûpwa̤ akû dě a khǐ pwǎ. 4Bǎ lṳmṳ̌khǐ khôtô̤̌nu, pa bǎ ma̤ bǎ kòyò dǒ a nohè he nutôpwa̤ ata̤ma̤. Lṳmṳ̌khǐ dě kòyò ma̤jò pe tôpwǎ̤꤮ tô̤̌ shěkhǎnu, a gǔ hètǒ̤ pě. 5Bǎ he ô̌pe bǎ hǎkhû̌ akhanu, he mî̌ pwa̤ dǒ a dǐ sî̌ya kò kû̌ Cǒmara sô̌sô̌kû̌ ta̤lî dǔlṳ̌htò̌ hǎkhû̌ nu,” A hî̌ asî pô̤̌nu. ^a

6A hî̌hto pô̤̌nu dě, a htû̌plělò̤ aplěshi dǒ hǎkhû̌ dě a ma̤cô̌pèè̌ hǎkhû̌ kû̌ aplěshi dě a kî̌wî̌ dǒ pwa̤khû nutôpwa̤ a mǐ̤sǎphlǒlô̤. 7Dě a hî̌ pwa̤khû mǐ̤sǎkhǐ nutôpwa̤ kû̌, “Cû̌mò̌, cû̌ pla̤lîkè na mǐ̤sǎnu dǒ Shǐlṳ̂ shikoǒnu nî̌” (Shǐlû yô̤̌mûyô̤̌sǎ mî̌ nocû̌). Hǒtaplǎdě pwa̤khû nutôpwa̤ cû̌ pla̤lîkè hto amǐ̤sǎ, dě a ge akhanu, a mǐ̤sǎ lî hèkè.

8Dě ahǐ kòshî̌ tokhlǒ kû̌ kòyò dǒ a kè̌shǐ bǎ lû̌û kwiǎshǎ tokhlǒnu, a gwè̌ǐ kè̌khî lû̌û tôpwa̤ hto tôpwa̤ kû̌, “Pwa̤khû mǐ̤sǎkhǐ hǎnòò̌ kwiǎshǎ nutôpwa̤ mî̌ ahǒ ya?” A hî̌ lô̌khô pô̤̌nu. 9Dě tokhlǒkhlǒnu, a hî̌ lô̌khô kû̌, “A kǎ.”

Tokhlǒkhlǒ dě a hî̌ lô̌khô kû̌, “A mè̤̌tô̤̌, a sô̌sô̌ kû̌ a pwǎ,” Kòyò hî̌ lô̌khô pô̤̌nu.

Bǎbǎkǎlè anǎ̤běcǎ sanǎ̤ dě, a hî̌ shotuklǔ tû̌ anǎ̤ kû̌, “A kwiǎshǎ nutôpwa̤ mî̌ hehǒ,” Pô̤̌nu.

10“Dě na cû̌ mǐ̤sǎlî gejòsô̌ hî̌tè?” Asî gwè̌ lû̌û pô̤̌nu.

11“Yeshǔ nutôpwa̤ ma̤cô̌pèè̌ hǎkumṳ̌ dě a kî̌wî̌ dǒ he mǐ̤sǎphlǒlô̤. Dě a nocû̌ pla̤lîkè he dǒ Shǐlṳ̂ shikoǒ. He cû̌ pla̤lîkè hto dě he ge akhanu, a lîhtò̌ bǎ he,” A hî̌ bǎ asî pô̤̌nu.

12“Khònò̤̌dě kòyò nutôpwa̤ ô̌bǎtè?” Asî gwè̌ lû̌û dě.

“He sî̌ganǎ̤tô̤̌,” A hî̌shěshu asî pô̤̌nu.

Pharishè̌phû̌ tokhlǒ gwè̌ pwa̤khû mǐ̤sǎlî getîkhî sô̌ nutôpwa̤.

13Asî kaǎcû̌ pwa̤khû mǐ̤sǎkhǐbǎ taplǎ nutôpwa̤ dǒ Pharishè̌phû̌ tokhlǒ a ô̌. 14Bǎ Běcǎ Yeshǔ ma̤cô̌pèè̌ hǎkumṳ̌ dě a ma̤lîge pwa̤khû mǐ̤sǎkhǐ nutôpwa̤ mî̌ a lò̤bǎtô kû̌ lṳmṳ̌dǔ nutôni̤ akhû̌akhî. 15Dě Pharishè̌phû̌ tokhlǒ cû̌ gwè̌ lô̌khô a kû̌ a cû̌ mǐ̤sǎlî ge hî̌tènu awe̤akè. Dě a hî̌ bǎ Pharishè̌phû̌ tokhlǒ kû̌, “A kî̌wî̌ hǎpèè̌ dǒ he mǐ̤sǎphlǒlô̤ dě bǎ he cû̌ pla̤lîkè htonu he mǐ̤sǎlî getîkhî,” A hî̌ pô̤̌nu.

16Pharishè̌phû̌ tokhlǒ hî̌ kû̌, “A mî̌ a ô̌ dǒ Cǒmara a ô̌ hè mè̤̌tô̤̌, ma̤titèhî̌dě a dǔ kû̌ kòyò lṳmṳ̌dǔ tô̤̌.”

Bǎbǎkǎlè tokhlǒkhlǒnu a hî̌ lô̌khô kû̌, “Ta̤sǔphû̌ tôpwa̤ cû̌ma̤ jò tǒ̤ ta̤cô̌klǐcô̌sè pô̤̌o tokhlǒ hî̌tè?” Pô̤̌nudě asî sǎphlǒ lûkhô̌kè bòsô̌ tôprṳ̂ kû̌ tôprṳ̂.

17Dǒ nô̌kò dě asî gwè̌ sô̌ pwa̤khû mǐ̤sǎkhǐbǎ taplǎ nutôpwa̤ kû̌, “A ma̤ lî kèhto namǐ̤sǎ hǒ, pô̤̌nudě na gǔ hî̌ a kû̌ a mî̌ a htû kòyò hî̌tè tôpwa̤ ya?”

Dě a hî̌shěshu asî kû̌, “A mî̌ piwi̤pèshè tôpwa̤,” A hî̌shěshu pô̤̌nu.

18A mî̌ mǐ̤sǎkhǐ bǎ hto taplǎ dě khònò̤̌ a lî getîkhînu, Pharishè̌phû̌ tokhlǒ yṳ̌ǎ lû̌û nò̌khôtô̤̌tô̤̌, dě a nocû̌ kaǎ kòyò kû̌ amǒ̤apha. 19Dě asî gwè̌ amǒ̤apha kû̌, “Hǒomî̌ sîphû̌ dǒ sî hî̌ a kû̌ a mǐ̤sǎkhǐ pe dǒ mǒ̤hǐphukû nutôpwa̤ ya? Khònò̤̌dě a cû̌ mǐ̤sǎlî getîkhî jò hî̌tè?” A gwè̌ amǒ̤apha pô̤̌nu.

20“A mî̌ paphû̌ mè̤̌mî̌ca kǎ. A mǐ̤sǎkhǐ mè̤̌mî̌ca pe dǒ mǒ̤hǐphukû kǎ. 21Bǎbǎkǎlè khònò̤̌, a mǐ̤sǎ lîtîkhîsô̌ hî̌tè, mò̌pè ma̤lî getîkhî bǎ yǎnu pa sî̌ganǎ̤tô̤̌. Gwè̌ kè̌ tûû̌ anu. A wè̤̌pwǎ̤ hǒ. A shôbǐǐphlô shôbǐǐphǎ jò tû̌ anǎ̤hǒ,” Asî hî̌shěshu pô̤̌nu. 22Bǎnuakhanu, Yǔdaphû̌ ikǒlǒkòdû̌ tokhlǒ sǎphlǒ jû kû̌ bò lû̌û kû̌, kòyò tôpwa̤pwa̤ hî̌ kû̌ Yeshǔ mî̌ Me̤shǐya kè̌hî̌mî̌, asî wṳ̂̌hǎhtò̌kè kòyò dǒ a hî̌ pô̤̌nu tôpwa̤ dǒ ta̤cabahǐkhlo akhû̌akhî, amǒ̤apha tokhlǒ ǐsha Yǔdaphû̌ ikǒlǒkòdû̌ tokhlǒ alǎ̤ dě, a hî̌ lô̌khô kû̌ pa sî̌ganǎ̤gû̌ tô̤̌, a hî̌ pô̤̌nu pwǎ. 23Ma̤hî̌nudě amǒ̤apha hî̌ kû̌, “Gwè̌ tû̌ yǎ, a wè̤̌pwǎ̤ hǒ,” A hî̌ pô̤̌numî̌ dǒ ta̤we̤ta̤kènu akhû̌akhî hǒ.

24Pharishè̌phû̌ tokhlǒ kaǎ sô̌ kòyò mǐ̤sǎkhǐ nutôpwa̤ dě asî hî̌ lû̌û kû̌, “Olò̤cǒcǒ dǒ Cǒmara alô̤mô̤̌nu, pa sî̌ganǎ̤ kû̌ kòyò ma̤lîge na mǐ̤sǎ nutôpwa̤ mî̌ pwa̤ma̤ta̤sǔphû̌ pwǎ,” A hî̌ lû̌û pô̤̌nu.

25Dě a hî̌shěshu asî kû̌, “Pwa̤ma̤sǔphû̌ ya, mî̌ amè̤̌tô̤̌yanu he sî̌ganǎ̤ tô̤̌. He sî̌ganǎ̤ pwǎtǒ̤ dǒ awǐkha he mǐ̤sǎkhǐ, khònò̤̌dě he mǐ̤sǎlî nupwǎ.” 26Htodě “A ma̤kwè̌ bǎ na hî̌tè? A ma̤ lîkè bǎ na hî̌tè?” Asî gwè̌ sô̌ lû̌û pô̤̌nu.

27“He hî̌ hto sî dě sî ganǎ̤de tô̤̌. Sî sǎyṳ ganǎ̤de sô̌ ma̤titè? Sî sǎyṳ htû kû̌ akhôphijǎ ya?” A gwè̌ shěshǔ asî pô̤̌nu.

28Hǒtaplǎdě, asî sǎphlǒdû̌, hî̌ takǎ lû̌û kû̌, “Na mî̌ akhôphijǎ. Pa mî̌ Khûmṳ̂shě akhôphijǎ pwǎ,” A hî̌ lû̌û pô̤̌nu. 29“Cǒmara hî̌bǎ kû̌ Khûmṳ̂shě dǒ awǐkha numî̌ pa sî̌ganǎ̤. Bǎbǎkǎlè kòyò hǒtôpwa̤, a ô̌ bǎtèhènu pa sî̌ganǎ̤bǎ tîkî̌꤮ tô̤̌.”

30Pwa̤khû hǒtôpwa̤ hî̌shěshu getîkhî pô̤̌ asî kû̌, “Kòyò hǒtôpwa̤ a ma̤lî getîkhî jò he mǐ̤sǎphlǒ dě, a ô̌ bǎtèhènu pa sî̌ganǎ̤tô̤̌ sî cû̌hî̌ ta̤tûkûnu, a ǒò̌ kiti̤kaakè he. 31Pwa̤ma̤sǔphû̌ kwi ta̤ma̤jè̌nu, Cǒmara ganǎ̤de tô̤̌ numî̌ pa sî̌ganǎ̤. A ganǎ̤depwǎ tǒ̤ kòyò dǒ a yṳ̌ǎ lû̌û dě a ma̤tô lû̌û sǎphlǒ nutokhlǒ nô̤̌pwǎ. 32Kòyò ma̤lî ge jò kò mǐ̤sǎkhǐ dǒ mǒ̤hǐphukûnu dǒ hǎkhû̌htûlû̌ mǒkhû̌htûsa tǒ̤ khònò̤̌nu pa ganǎ̤de bǎ tôpwǎ̤꤮ tô̤̌. 33Kòyò hǒtôpwa̤ a ô̌dǒ Cǒmara a hè kè̌mè̤̌tô̤̌ numî̌, a ma̤jò tocǒ꤮ tô̤̌,” A hî̌ geshěshu asî pô̤̌nu.

34Pharishè̌phû̌ tokhlǒ hî̌shěshu getîkhî lû̌û kû̌, “Na ta̤sǔta̤plě dû̌ pe dǒ na ô̌phijǎlò̤ akha dě na cû̌ sû̌ǐ getîkhî bǎ pa hî̌tè?” A hî̌ lû̌û pô̤̌nudě a wṳ̂̌hǎhtò̌kè lû̌û dǒ ta̤cabahǐkhlo.

Kòyò mǐ̤sǎkhǐ dǒsû̌dǒsò̌ tokhlǒ

35Bǎ Yeshǔ ganǎ̤de kû̌ kòyò wṳ̂̌hǎhtò̌kè mǐ̤sǎkhǐ nutôpwa̤ akhanu, Běcǎ Yeshǔ cû̌kè̌lǎ kè̌shǐ lû̌û dě a hî̌ lû̌û kû̌, “Na yṳ̌ǎ Kòyòphû̌khû ya?”

36Dě a hî̌shěshu Yeshǔ kû̌, “Sara, a mî̌ mò̌pè? Pô̤̌khô he gǔ yṳ̌ǎ a dě shôbǐǐlṳ̌ bǎ he,” A hî̌ lû̌û pô̤̌nu.

37Běcǎ Yeshǔ hî̌ lû̌û kû̌, “Na kè̌shǐ hto a hǒ. Na hî̌bǎ lû̌û khònò̤̌ tôpwa̤ numî̌ a hǒ.”

38Dě kòyò nutôpwa̤ hî̌ lû̌û kû̌, “Běcǎ, he yṳ̌ǎ hǒ,” A hî̌ dě a dô̌gînî̤lò̤ cabahtò̌ Běcǎ Yeshǔ.

39Dě Běcǎ Yeshǔ hî̌ lû̌û kû̌, “Pô̤̌khô kòyò hǎkhû̌phû̌ tokhlǒ gǔ kè̌shǐ lò̤ǐ tûû̌ ata̤sǔ ayanudě, he hèlò̤ dǒ hǎkhû̌ hǒ. Kòyò dǒ asô̌sô̌kû̌ kòyò mǐ̤sǎkhǐ dě a sî̌ganǎ̤ kû̌ Cǒmara a ta̤tě̤ta̤mè̤̌ tô̤̌ tokhlǒnu, he gǔ ma̤lî ge asî mǐ̤sǎ pě. Bǎbǎkǎlè kòyò dǒ a hî̌ lò̤tû̌ anǎ̤ kû̌ he sî̌ganǎ̤ hto Cǒmara a ta̤tě̤ta̤mè̤̌ tokhlǒnu, a gǔ htû sô̌sô̌kû̌ kòyò mǐ̤sǎkhǐ nutokhlǒ pě.”

40Pharishè̌phû̌ dǒ a ô̌ lô̌khô bǎnu tokhlǒ ganǎ̤de a hî̌ pô̤̌o dě a gwè̌ Yeshǔ kû̌, “Na sǎyṳ hî̌ pa kû̌ pa mǐ̤sǎkhǐ pô̤̌nu ya?”

41Dě Běcǎ Yeshǔ hî̌ asî kû̌, “Sî mǐ̤sǎkhǐ kè̌hî̌dě sî sî̌ganǎ̤ shapwǎ̤ ta̤tě̤ta̤mè̤̌ tô̤̌ akhû̌akhî, sî ta̤sǔ ô̌tô̤̌. Bǎbǎkǎlè khònò̤̌ sî hî̌ kû̌ sî mǐ̤sǎlî akhû̌akhî, sî ta̤sǔô̌,” A hî̌ asî pô̤̌nu.