Luke 11

Yeshǔ sû̌ǐbǎ ta̤kwicaba awe̤akè

(Matè̌ 6:9-13, 7:7-11)

1Tôni̤kha Yeshǔ kwicaba dǒ gûlǎ̤ tûkû. Bǎ a kwicaba hto akha, dǒ a khôphija tokhlǒ akla tôpwa̤nu a hî̌ lû̌û kû̌, “Běcǎ, sû̌ǐ bǎ pa ta̤kwicaba pô̤̌ Khûyṳ̂ha sû̌ǐ bǎ akhôphijǎ tokhlǒnu.”

2Yeshǔ hî̌ asî kû̌, “Bǎ sî kwicaba akhanu, kwi lô̌khô pô̤̌o nî̌.

O꤮ pha꤮ kòyò bè̌dû̌bè̌htû bè̌dubè̌nǎ̤ pû nami̤ plò̌shǐ nî̌꤮. Na gǔ hèma̤ tûû̌ pû nashinagǎ nî̌꤮.

3Ǐlò̤ pû pa lǎ̤ǎlǎ̤ô dǒ pa lṳ̂bǎ a tôni̤ kû̌ tôni̤ aya nutokhlǒ nî̌꤮.

4Plûkè pû pa ta̤sǔ tokhlǒ nî̌꤮. Ma̤titè̤̌hî̌dě pa plûkè hto kòyò ta̤ma̤sǔ dǒ kòyò ma̤sǔ pa nutokhlǒ hǒ. Nocû̌nṳ̌ tǎ̤ pa dǒ ta̤tili̤tôlô̌ aklanu tǎ̤mǎ̤ nî̌꤮.”

5Htodě Yeshǔ hî̌ akhôphijǎ tokhlǒ kû̌, “Hî̌kû̌lǎmò̌ dǒ sîkla tôpwa̤pwa̤nu a kè̌ cû̌ dǒ a khô tôpwa̤ ahǐ bǎ lṳmṳ̌na̤ akha dě a kè̌ cû̌hî̌ lû̌û kû̌, ‘sû̌khô dǐlô̤̌ gûmṳ̂̌ he na mû̌ suphlǒ. 6He khô tôpwa̤ a cû̌klè̌ dě a hètǒ̤ kû̌ he dě he lǎ̤dǐǎshǔ a shǎǎshǎô ô̌ pe tocǒ꤮ tô̤̌.’

7“Dě a khô ô̌ dǒ hǐdǒkû nutôpwa̤ hî̌shěshu lû̌û kû̌, ‘ma̤shûshǎ pe tǎ̤ he tǎ̤mǎ̤. He ma̤ mě he takha hǒ, dě he kû̌ hephû̌ tokhlǒ pa hǎmôô̌ bò hǒ. He ihtǒ ǐjò pe na tô̤̌.’ 8Pô̤̌nudě he hî̌ sî, dǒnô̌kò dě akhô nutôpwa̤ ihtǒ ǐpè̤̌ lû̌û mû̌, bǎbǎkǎlè dǒ asî mô̤nǐ̤ kè̌khî lû̌û akhû̌akhî mè̤̌tô̤̌. A lě̤ kwikudǔdǔ lû̌û akhû̌akhî, a ǐ pè̤̌ jò lû̌û, lǒ̤bò ta̤ dǒ a lṳ̂ nutokhlǒ pwǎ.

9“Pô̤̌nu akhû̌akhî he hî̌ sî, Kwi mò̌ lô̌khô, sî gǔ nǐ̤bǎ pě! Kè̌lǎ mò̌ lô̌khô, sî gǔ kè̌shǐ pě. Tôglô̌mò̌ lô̌khô takha, Cǒmara gǔ bǔmô bǎ sî pě. 10Ma̤titè̌hî̌dě kòyò lǒ̤꤮ bò dǒ a kwita̤ tokhlǒnu, a gǔ nǐ̤bǎ pě, dě kòyò lǒ̤꤮ bò dǒ a kè̌lǎ ta̤ tokhlǒnu, a gǔ kè̌shǐ pě, dě kòyò lǒ̤꤮ bò dǒ a tôglô̌ takha tokhlǒnu, Cǒmara gǔ bǔmô bǎ lû̌û pě.

11“Sî dǒ a htû pha tokhlonu, sîphû̌ kè̌ kwiǎ sî tò̤̌phû̌ dě, sî dǐǎ asî kû̌ wṳ̂̌ nu a ô̌ tôpwa̤pwa̤ ya? 12Mè̤̌tô̤̌dě sîphû̌ kè̌ kwiǎ sî shîdǐ dě sî dǐǎ a kû̌ dènè̤ ya? 13Sî mî̌ kòyò dǒ a phû̌mò̤̌ tokhlǒ pwǎ bǎbǎkǎlè sî sî̌ganǎ̤ dǐǎ sîphû̌sîli̤ tokhlǒ kû̌ ta̤dǒ awô̌ tokhlǒ kè̌hî̌dě, gènè̤kè̌mò̌ lô̌khô sîpha dǒ mǒkhû̌ tôpwa̤nu, a gǔ ǐ mè̤̌mî̌ca kòyò dǒ a kwihtò̌ Yôla Plò̌shǐ Běcǎ nupě.”

Yeshǔ kû̌ Belǎsebulǎ

(Matè̌ 12:22-30; Makǔ 3:20-27)

14Yeshǔ wṳ̂̌htò̌kè khînǎ dǒ a dò̌ kòyò nutôdo. Bǎ khînǎ hǎhtò̌cû̌kè hto akhanu, kòyòpha nutôpwa̤ hî̌bǎ jò getîkhîsô̌ dě kòyò saprṳ̂saphǎ tokhlǒ ǒò̌ kiti̤kaa kè. 15Bǎbǎkǎlè kòyò tokhlǒkhlǒ dě a hî̌ kû̌, “A wṳ̂̌hǎhtò̌bò̌ khînǎkhîno nutokhlǒ mî̌ khînǎkhîno a ikǒlǒkòdû̌ Belǎsebulǎ ǐ yǎ ta̤siwi̤sòwò̤ pwǎ.” ^a 16Kòyò dǒ ashǔshawa̤ tokhlǒ hèkwikhô̌ Yeshǔ kû̌ a gǔ dǔlè̌lṳ̌ bǎ asî ta̤cô̌klǐcô̌sè dǒ a ô̌ dǒ mǒkhû̌ hè tocǒcǒ. ^b

17Bǎbǎkǎlè Běcǎ Yeshǔ sî̌ya asî ta̤gènè̤ tokhlǒ dě a hî̌ asî kû̌, “Gǎtôgǎ akûnu akòyò tokhlǒ gǔshěgǔpě̤ kè̌khîmò̌ lû̌û tôpwa̤ kû̌ tôpwa̤ kè̌hî̌dě a lò̤prî̌lò̤prû̌kè pě. Hǐphû̌phòphû̌ tômṳ̌ dǒ a gǔkla kè̌khî lû̌û dě aglè̌klǐ kè̌khî lû̌û kè̌hî̌dě, a gǔ lò̤prî̌lò̤prû̌kè bò pě. 18Pô̤̌nu akhû̌akhî, hǎkhû̌tana kè̌ shěpě̤ tûû̌ sô̌mò̌ anǎ̤ dě ashiagǎ tokhlǒnu, a ô̌měô̌gle jòtô̤̌. Ma̤titè̌ he hî̌ pô̤̌o numî̌, sî hî̌ kû̌ he wṳ̂̌htò̌kè khînǎ tokhlǒ nu, amè̤̌kû̌ Belǎsebulǎ ǐ he ta̤shû̌ta̤sho akhû̌akhî pwǎ, sî hî̌ lô̌khô pô̤̌nu. 19Kè̌ he wṳ̂̌htò̌kè khînǎkhîno sî kû̌ Belǎsebulǎ a ta̤siwi̤sòwò̤ kè̌hî̌dě, sî khôphijǎ tokhlǒ wṳ̂̌htò̌kè khînǎkhîno kû̌ mò̌pè a ta̤pô̤ta̤phǎ pě? Sî hî̌bǎ asǔ pwǎnu, sî khôphijǎ tokhlǒ gǔ cî̌htò̌ sî pě. 20Bǎbǎkǎlè, he kè̌ wṳ̂̌hǎhtò̌kè khînǎkhîno sî kû̌ Cǒmara a ta̤pô̤ta̤phǎ kè̌hî̌dě, hǒnumî̌ a nè̌lṳ̌ kû̌ Cǒmara gǔ hè pǒshipǒgǎnu a hètǒ̤ dǒ sî ô̌ hǒ.

21“Bǎ kòyò khû̌ǎshû̌sho tôpwa̤ a ô̌pṳ̂̌bò kû̌ ata̤wè̤̌ta̤htò dě a ô̌ pǒ̤kè̌ǐ ahǐ akhanu, a ta̤khî̌ta̤khû̌ tokhlǒ hǎmǎ jò tô̤̌. 22Bǎbǎkǎlè, bǎ kòyò khû̌ǎshû̌shokhlo kû̌ a tôpwa̤ hèshěpè̤̌kè a akhanu, a gǔ phî̌pè̤̌kè bò ta̤wè̤̌ta̤htò dǒ a ǎnǎ̤ǐ lû̌û nudě a ta̤khî̌ta̤khû̌ nu, a gǔ ǐpè̤̌bò kû̌ akhô̌sî tokhlǒ pě.

23“Kòyò tôpwa̤pwa̤ dǒ a ô̌kû̌ hekû tô̤̌ numî̌ kòyò dǒ a htè̌bî̌kè he hǒ. Kòyò tôpwa̤pwa̤ dǒ a htǔplǒ kû̌ he tô̤̌ numî̌ kòyò dǒ a ma̤ lò̤prî̌lò̤prû̌ ta̤ hǒ. ^c

Khînǎkhîno a ge genṳ̌ ma̤bǎ kòyò

(Matè̌ 12:43-45)

24“Bǎ khînǎkhîno tôdo hǎhtò̌cû̌kè hto dǒ kòyò tôpwa̤ akû akhanu, a hǎhtò̌cû̌ dǒ gûlǎ̤khwe dǎtrè̌ tûkû dě a cû̌ kè̌lǎ gûlǎ̤ lǎ̤ô̌kǔ tòshò̌phû̌ dě a kè̌ kè̌shǐ agûlǎ̤ tôkû̌꤮ tô̤̌ kè̌hî̌dě, a hî̌lò̤ tûû̌ anǎ̤ kû̌, ‘he gǔ getîkhî sô̌ dǒ hehǐ dǒ he lǎ̤hǎhtò̌cû̌ a nutèmè꤮,’ a hî̌ pô̤̌nu. 25Dě bǎ a getǒ̤ sô̌ dǒ kòyò nutôpwa̤ a ô̌ akhanu, a gekè̌shǐ dǒ agûlǎ̤ li̤ nu, aplîamṳ̂̌ wô̌, a ô̌tôô̌bǎbò pṳ̂̌tocǒ. 26Dě a hǎhtò̌cû̌ kaǎnṳ̌ pô̤̌ akhô dǒ a jî̌khlo kû̌ anu susô̌tôdo dě asî genṳ̌ ô̌ lô̌khô bǎnu. Dě kòyò nutôpwa̤ gǔ jî̌jû̌ khlo a gûlǎ̤li̤nu pě.”

Ta̤ǐshowî̤shôwô̌ mè̤̌mî̌ca

27Bǎ Yeshǔ hî̌bǎhto yô̤̌sǎ pô̤̌o akhanu, pwa̤mǒ̤ tôpwa̤ ô̌ dǒ kòyò ô̌wô̤̌ô̌plṳ̂ akla dě a kaǎgǔcû̌ Yeshǔ kû̌, “Pwa̤mǒ̤ dǒ a phû̌ô̌ na dě a dǐônû̌ na tôpwa̤ numî̌ pwa̤mǒ̤ dǒ a nǐ̤bǎ ta̤ǐshowî̤ hǒ.”

28Bǎbǎkǎlè Yeshǔ hî̌shěshu lû̌û kû̌, “Kòyò dǒ a nǐ̤bǎ mè̤̌ca ta̤ǐshowî̤ numî̌ kòyò dǒ a ganǎ̤de Cǒmara alě̤ayô̤̌ dě a yṳ̌ǎ nutokhlǒ pwǎ.”

Kòyò kwikè̌ ta̤cô̌klî̌cô̌cè tocǒ

(Matè̌ 12:38-42; Makǔ 8:12)

29Bǎ kòyò saprṳ̂ sǔ꤮ sǔ ahè wô̤̌ dǒ Yeshǔ ô̌ akhanu, Yeshǔ hî̌ asî kû̌, “Kòyò hǒtôhtu awô̌tô̤̌ tokhlǒnu. Asî cû̌kwikè̌ tǒ̤ he ta̤ma̤ cô̌klǐcô̌sè tocǒ bǎbǎkǎlè he gǔ dǔlè̌lṳ̌bǎ pwǎ asî ta̤cǒklî̌ tocǒ dǒ asô̌sô̌kû̌ piwi̤pèshè Yṳ̂nǎ nupě. ^d 30Pô̤̌ Khûyṳ̂nǎ htûhtò̌ ta̤ma̤mǎnǎ dǒ wî̤̌ni̤na̤wě̤phû̌ tokhlǒ ayanu, Kòyòphû̌khû mî̌he nî̌ a gǔ ma̤ gutṳ̌ ta̤ma̤mǎnǎ tocǒ dǒ kòyò khònò̤̌kha tôhtu tokhlǒ aya pě. ^e 31Ta̤cî̌htò̌ alṳmṳ̌ni̤ pě tôni̤nu, gǎ dǒ gǎcômû tôgǎ a khwǐmǒ̤ Mǒ̤shebǎ gǔ ihtǒ kû̌ kò dǒ a htûpwa̤ khònò̤̌ tôhtu tokhlǒ pě dě a pè̤̌wǎ̤ ta̤sǔ dǒ asîlô̤ pě, ma̤titè̌hî̌dě pô̤̌khô a ganǎ̤de gû̌ Khwǐshò̌lômû a ta̤sû̌ǐtòwòǐ dǒ a lǒbe kû̌ ta̤sî̌jò̌ tokhlǒ ayanudě, a ô̌ dǒ gǎyî̤ dǒ ashǔshawa̤ tôgǎ bǎbǎ a hètǒ̤. Dě he hî̌ sî, kòyò dǒ adû̌khlo kû̌ Khwǐshò̌lômûnu a ô̌ bǒo tôpwa̤. ^f 32Bǎ ta̤cî̌htò̌ alṳmṳ̌ni̤ pě tôni̤nu, Wî̤̌ni̤na̤wě̤phû̌ tokhlǒ gǔ ihtǒ dě bè̌ta̤sǔ dǒ kòyò khònò̤̌ tôhtu tokhlǒ alô̤ pě, ma̤titè̌hî̌dě bǎ asî ganǎ̤debǎ Khûyṳ̂nǎ shôbǐǐlṳ̌wǐ asî akhanu, asî yò̤lǎ̤plǎdî̌ getîkhî lô̌khô asǎphlǒ. Dě he hî̌ sî, kòyò dǒ adû̌khlo kû̌ Khûyṳ̂nǎnu, a ô̌ bǒo tôpwa̤. ^g

Nǎ̤glǒ ata̤lî

(Matè̌ 5:15, 6:22-23)

33“Kòyò dǎlîhtò̌ mî̌ dě kòyò toglǒbǐ yǎ tôkhò̌꤮ tô̤̌, kè̌mè̤̌tô̤̌dě kòyò bè̌ yǎ dǒ dòjolǎ̤ tôkhò̌tô̤̌. Pô̤̌khô a gǔ lîbǎ kòyò dǒ a hènṳ̌ tokhlǒ aya dě, kòyò dǎhtò̌ a dǒ mî̌tè̌kowǎ̤khû̌. ^h 34Sî mǐ̤sǎphlǒ numî̌ asô̌sô̌kû̌ mî̌tè̌ko tômè dǒ nǎ̤glǒ ayahǒ. Sî mǐ̤sǎphlǒ kè̌ lîwô̌bǎ hî̌dě, sî nǎ̤glǒ tôpwa̤bò lṳ̌lîtî̌klî̌ wô̌bò pě, bǎbǎkǎlè sî mǐ̤sǎ kè̌ khǐ hî̌dě, sî nǎ̤glǒ sapwa̤ khǐbò hǒ. 35Ma̤pô̤̌nudě ta̤lî ô̌dǒ sîkûnu, pô̤̌khô a gǔ htû ta̤khǐta̤lo̤ tô̤̌nu, ô̌sè̌rè̌ lô̌khô sînǎ̤ nî̌. 36Pô̤̌nudě sî nǎ̤glǒ sapwa̤bò kè̌ lǒbe kû̌ ta̤lî, dě a kè̌ ô̌ dǒ ta̤khǐta̤lo̤ akû tô̤̌ hî̌nu, a gǔ lîtîklî̌ wô̌bò sî nǎ̤sapwa̤ sô̌sô̌kû̌ mî̌tè̌ko tômè lîtîklî̌wô̌bǎ dǒ sîyanu pě.”

Yeshǔ bè̌ta̤sǔ dǒ Pharishè̌phû̌ kû̌ pwa̤sû̌ǐ ta̤sû̌ta̤tòwò asara tokhlǒ alô̤

(Matè̌ 23:1-36; Makǔ 12:38-40; Lǔka 20:45-47)

37Bǎ Yeshǔ hî̌bǎhto akhanu, Pharishè̌phû̌ tôpwa̤ kaǎ ǎ lû̌û dî dě a gû̌ cû̌kû̌ lû̌û dǒ ahǐ. Asî glè̌ ǎ lô̌khô dî dě a cû̌ hǎnòò̌ lô̌khô dǒ dîjowǎ̤ kòshî̌. 38Yeshǔ glè̌ ǎshǎǎ akhanu, a shǔbò gû̌kòyò acǔde tô̤̌ dě Pharishè̌phû̌ dǒ a kè̌cô lû̌û nutôpwa̤ nî̌, a ǒò̌ kiti̤kaa kè, ma̤titè̌hî̌dě Yṳdaphû̌ alǎ̤klô ô̌ kû̌ bǎ kòyò ǎ shǎǎ khôtô̤̌nu kòyò tôbǎ cǔbòwǐ cǔde.

39Pô̤̌nu akhû̌akhî Běcǎ Yeshǔ hî̌shěshu lû̌û kû̌, “Pharishè̌phû̌ sî, sî cǔbò wô̌ balěkhlo kû̌ dîba dǒ akhlo nutôkhô. Bǎbǎkǎlè dǒ sî sǎphlǒkûnu, a lǒbe kû̌ ta̤sǎyṳ̌ nǐ̤bǎdû̌ tûû̌ aya kû̌ ta̤phǔmò̤̌shǐhtô sîtokhlǒ. 40Kòyò ô̌lǒô̌kè sî, Cǒmara bô̌lò̤ ta̤ dǒ akhlonu, akû numî̌ a bô̌lò̤lò̤ pwǎ mè̤̌tô̤̌ ya? 41Ta̤ dǒ a ô̌ dǒ sî balěkû kû̌ sî dîbakû nutokhlǒ nî̌, ǐkè kû̌ kòyò hǎwě̤shèwè̤phû̌ nu hî̌mò̌mî̌ ta̤lǒ̤bò gǔ mṳ̂̌plî bò dǒ sîya pwǎ.

42“Pharishè̌phû̌ sî ta̤cî̌htò̌ gǔ bǎ mè̤̌ca sî pě, ma̤titè̌hî̌dě sî phî̌ kòyò kaǎ hedusômû dǒ asô̌sô̌kû̌ wě̤wò̤lǎ, pekana alǎ dǒ a sô̌sô̌kû̌ phôkhǎ kû̌ lǒ̤bò ta̤sǎta̤phô nudě sî lṳhtò̌ kû̌ Cǒmara plǎshǐ taplǎ. Bǎbǎkǎlè sî kè̌ bè̌khô̌ tephekè ta̤tě̤ta̤mè̤̌ kû̌ ta̤mô̤ǐ Cǒmara tokhlǒ hǒ. Sî ǐ pû̌shǐtôpû̌ numî̌ amè̤̌ hǒ. Tǒ̤hǒonu mè̤̌tô̤̌, sî tôbǎ bè̌kè ta̤tě̤ta̤mè̤̌ kû̌ ta̤mô̤ǐ Cǒmara nutokhlǒ tô̤̌. ⁱ

43“Pharishè̌phû̌ sî, ta̤cî̌htò̌ gǔ bǎ mè̤̌ca sî pě, matitè̌hî̌de sî sǎyṳ hǎnòò̌ lô̌khô gûlǎ̤ htò̌yô̤̌ dǒ kòyò bè̌dubè̌nǎ̤ a dǒ ta̤cabahǐkû nutokhlǒ, htodě dǒ klǎkû nubǎbǎ sî sǎyṳ nohî̌bǎ bè̌dubè̌nǎ̤ kòyò kû̌ sînǎ̤.

44“Ta̤cî̌htò̌ gǔ bǎ mè̤̌ca sî pě, ma̤titè̌hî̌dě sî sô̌sô̌kû̌ lṳ̌kû dǒ kòyò ma̤dònǎ yǎ tô̤̌ tokhlǒ, dě kòyò tokhlǒ cû̌ dǒ akhû̌ bǎbǎ kòyò sî̌ya kû̌ lṳ̌kû tô̤̌.”

45Pwa̤sû̌ǐ ta̤sû̌ta̤tòwò asara tôpwa̤ hî̌ Běcǎ kû̌, “Sara꤮, na hî̌ yô̤̌sǎ hǒtômû numî̌ na hî̌ phǔmò̤̌shǐhtô takǎkǎ pwǎ pa ya.”

46Dě Yeshǔ hî̌shěshu a kû̌, “Pwa̤sû̌ǐ ta̤sû̌ta̤tòwò asara sî꤮, ta̤cî̌htò̌ gǔ bǎ mè̤̌ca sî pě. Ma̤titè̌hî̌dě sî dò̌htò̌ ta̤mǎlò̤ dǒ kòyòlô̤ dǒ asô̌sô̌kû̌ ta̤wǐta̤ò̌ dǒ kòwǐkòò̌ bò̌ tô̤̌ tokhlǒ, bǎbǎkǎlè sî dě, sî gǔ jojè̌ kû̌ kòyò ta̤wǐta̤ò̌ tokhlǒ ayanu, sî gǔ johtò̌jè̌ pwǎ kû̌ sî cǔmṳ̌ tômè pwǎnô̤̌nu, sî hètô̌bǎ tô̤̌.

47“Sî bǎbǎ, Cǒmara gǔ cî̌htò̌ mè̤̌mî̌ca sî pě, ma̤titè̌hî̌dě sî bô̌ bǎ piwi̤pèshè dǒ sîphisîphu ma̤si asî dǒ꤮ wǐkha nutokhlǒ alṳ̌kû kû̌ lǒ̤ nu. 48Pô̤̌nude sî ǐlò̤ lîtîklî̌ sînǎ̤ kû̌ sîsǎphlǒ icu kû̌, sî sǎphlǒ sô̌sô̌kû̌ sîphisîphu dǒ꤮ wǐkhanu tokhlǒ ma̤ta̤sǔ nutokhlǒ hǒ. Ma̤titè̌hî̌dě sîphisîphu tokhlǒ dě a nè̤̌ ma̤si piwi̤pèshè nutokhlǒ, sî dě sî nè̤̌ bô̌ bǎ piwi̤pèshè nutokhlǒ alṳ̌kû a nè̤̌ ma̤pô̤̌onu. 49Dǒ ta̤we̤ta̤kè hǒtocǒ akhû̌akhî, Cǒmara ô̌ kû̌ a ta̤sî̌jò̌ dě a hî̌ kû̌, ‘he gǔ nohè bǎ asî piwi̤pèshè tokhlǒ, kû̌ pwa̤nophû̌ tokhlǒ pě, dě asî gǔ ma̤sikè tokhlǒkhlǒ pě, tokhlǒkhlǒdě asî gǔ ma̤jî̌ma̤jû̌ lû̌û pě.’ 50Pô̤̌nu akhû̌akhî sahtò̌ dǒ mǒhtûlû̌hǎhtûsa akha, kòyò lǒ̤꤮ bò a ta̤sǔ dǒ a ma̤si piwi̤pèshè tokhlǒnu, Cǒmara gǔ cî̌htò̌ bǎ kòyò hǒtôhtu pě. 51He hî̌ sî꤮, sahtò̌ bǎ Phaada aphû̌ ma̤si tûû̌ apṳ̌ Khûabelǎ ^j hènè tǒ̤dǒ kòyò ma̤si Khûshakhrǐya dǒ ta̤lṳhtò̌ agûlǎ̤ kû̌ ta̤gûlǎ̤plò̌shǐ aplǎkûnu, Cǒmara gǔ cî̌htò̌ mè̤̌ca sî hǒtôhtu tokhlǒ pě. ^k

52“Pwa̤sû̌ǐ ta̤sû̌ta̤tòwò asara sî꤮, ta̤cî̌htò̌ gǔ bǎ mè̤̌mî̌ca sî pě, ma̤titè̌dě sò̌shî̌ dǒ kòyò lǎ̤bǔmô ta̤sî̌jò̌ ahǐ takha nu, sî phî̌cû̌kè. Sînṳ̌ tûû̌ kû̌ sînǎ̤ tô̤̌tô̤̌, kòyò dǒ a sǎyṳ cû̌nṳ̌ tokhlǒ dě sî ma̤tě̤tṳ asî sî.”

53Bǎ Yeshǔ hǎhtò̌cû̌kè hto asîlǎ̤ akhanu, pwa̤sû̌ǐ ta̤sû̌ta̤tòwò asara tokhlǒ kû̌ Pharishè̌phû̌ tokhlǒnu, a ma̤takǎ lû̌û dě gwè̌htôgwè̌lò̤ jûgrû lû̌û yô̤̌sǎ tokhlǒ. 54Pô̤̌khô asî gǔ pṳ̂̌nǐ̤ a ta̤hî̌bǎsǔ tokhlǒnudě, asî ô̌pǒ̤ ganǎ̤de lû̌û ta̤hî̌bǎ tokhlǒ.