Luke 13

Sî kè̌ yò̤lǎ̤plǎdî̌ lô̤̌khô sînǎ̤ tô̤̌mî̌ sîsi pě

1Bǎnukha kòyò tokhlǒ hè shôbǐǐlṳ̌ Yeshǔ kû̌ bǎ Galilè̤̌phû̌ tokhlǒ lṳhtò̌ta̤ akhanu, Khwǐ Pǐlǎ akliphû̌ tokhlǒ ma̤si asî. 2Dě Yeshǔ hî̌shěshu asî kû̌, “Kòyò ma̤si Galilè̤̌phû̌ tokhlǒnu dě sî gènè̤ asî mî̌ a ta̤sǔta̤plě kû̌ Galilè̤̌phû̌ dǒ ashǔshawa̤ tokhlǒ pô̤̌nu ya? 3He hî̌ sî, asî dû̌khlo kû̌ sî mè̤̌tô̤̌. Sî bǎbǎ, sî kè̌ yò̤lǎ̤plǎdî̌ lô̌khô sînǎ̤ tô̤̌ hî̌dě, sî glè̌ si bò pṳ̂̌꤮ tôpwa̤ pě. 4Bǎ Shǐlû hǐphû̌htò̌yô̤̌ nutômè lò̤tě̤pro̤ si kòyò shǐlǐ̤sô̌ akhanu, sî gènè̤ kû̌ asî mî̌ a ta̤sǔ dû̌khlo kû̌ kòyò lǒ̤꤮ bò ashǔshawa̤ dǒ a ô̌ lô̌khô dǒ Wî̤̌yarǔshôle akû nutokhlǒ ya?. 5Amè̤tô̤̌, he hî̌ sî, sî hǒtokhlǒ bǎbǎ, sî kè̌ yò̤lǎ̤plǎdî̌ lô̌khô sîsǎphlǒ tô̤̌ hî̌dě, sî glè̌ sikèbò pṳ̂̌꤮ tôpwa̤ pě.”

Ta̤shôbǐǐ khěkhô̌ dǐshimṳ̌ dǒ asǎ kû̌ kòtô̤̌ tômṳ̌ awe̤akè

6Htodě Yeshǔ hî̌ asî yô̤̌sǎkhěkhô̌ tôtô̤̌ dě a hî̌ kû̌, “Bǎtaplǎ, kòyò ô̌ tôpwa̤, dě dǒ a sǒsǎphǎ khû̌nu, a shǒnǎ a dǐshimṳ̌ tômṳ̌. Dě a cû̌ kè̌lǎ běǎ a dǐshisǎ, bǎbǎkǎlè a kè̌shǐ asǎ tômè̌꤮ tô̤̌. 7Dě, a hî̌ pwa̤kè̌pǒ̤ǐ sǒsǎphǎ nu kû̌, ‘He hè kè̌lǎ běǎ dǐshimṳ̌ nutôsǒ asǎnu a be suně hǒ bǎbǎ he kè̌shǐ asǎ tômè̌ tô̤̌. Gû̌gǎ kè a nu, a ô̌ dǐkhû̌dǐdò tônô̤ pwǎ hǎkhû̌ pwǎ.’

8“Bǎbǎkǎlè pwa̤kè̌ǐ sǒsǎphǎ nutôpwa̤ hî̌shěshu lû̌û kû̌, ‘běcǎ꤮, kè̌pǒ̤ kû̌lǎ pwǎ hǒtôně nô̤̌pwǎ. He photewe̤bò akhòshǐ pě dě he bè̌nṳ̌ pô̤̌ ashǎ pě. 9Něbǎpě mî̌ a glè̌ sǎwô̤̌ tûû̌ pě. A kè̌ sǎtô̤̌ hî̌dě he gû̌gǎkè tûû̌ a pě.’”

Yeshǔ ma̤hǎmǎ pwa̤mǒ̤jukǔ tôpwa̤ bǎ Yṳ̌daphû̌ lṳ̌mṳ̌dǔ akha

10Bǎ Yṳ̌daphû̌ lṳmṳ̌dǔ bǎ tôni̤khanu, Yeshǔ sû̌ǐtòwòǐlò̤ kòyò dǒ ta̤cabahǐ tômè akû. 11Bǎ ta̤cabahǐkû nu, pwa̤mǒ̤ dǒ khînǎ dò̌ yǎ dě asha jukǔ ô̌ tôpwa̤. A khòbǎ pô̤̌onu ayî̤ ně shǐlǐ̤sô̌ hǒ. 12Bǎ Yeshǔ kè̌shǐ lû̌û akha a kaǎhè lû̌û dǒ lô̤mô̤̌ dě a hî̌ lû̌û kû̌, “Pwa̤mǒ̤꤮, na ta̤sha hǎmǎ hǒ.” 13Dě Yeshǔ dò̌htò̌ acǔde dǒ alô̤ dě taplǎnô̤̌ ashèkò wô̌ getîkhî sô̌ dě a htû̌sò̌htò̌ Cǒmara.

14Bǎbǎkǎlè Yeshǔ ma̤hǎmǎ bǎ kòyò ta̤shǐta̤sha dǒ Yṳ̌daphû̌ a lṳmṳ̌dǔ akhû̌akhî, ta̤cabahǐ ikǒlǒkòdû̌ tôpwa̤ sǎphlǒdû̌, dě a hî̌ kòyò saprṳ̂ tokhlǒ kû̌, “Lṳmṳ̌ni̤ lṳmṳ̌sa dǒ pa tôma̤ ta̤phǐta̤ma̤nu, a ô̌ ni̤susô̌. Hè ma̤hǎmǎ lô̌khô sî ta̤shǐ bǎ mǒ̤ni̤ susô̌hǒo akûnu, lṳmṳ̌dǔ dě hèdǔlè̌lṳ̌ lô̌khô sînǎ̤ tǎ̤mǎ̤.” ^a

15Dě Běcǎ hî̌shěshu sô̌ lû̌û kû̌, “Pwa̤ jî̌cǒjî̌tè̤ anǎ̤ sî꤮, sî pṳ̂̌꤮ tôpwa̤ bôphlǔ lô̌khô sî pṳ̂̌pli̤ tô̤̌mî̌ sî tîsî̌pli̤ dǒ apô̤kû dě sî cî̌hǎhtò̌cû̌ dǐô ashi dǒ Yṳ̌daphû̌ lṳmṳ̌dǔ akhanu mè̤̌tô̤̌ ya? 16Pwa̤mǒ̤ hǒtôpwa̤ mî̌ PhaAbraha akhlilè. Khònò̤̌dě hǎkhû̌tana nocomě khînǎkhîno kû̌ pwa̤mǒ̤ nutôpwa̤ nî̌ a yî̤ něshǐlǐ̤sô̌ hǒ. Dě he bôphlǔ hǎplǎkè bǎ a kû̌ hǎkhû̌tana comě lû̌û bǎ Yṳ̌daphû̌ a lṳmṳ̌dǔ numî̌, a tô tô̤̌ ya?”

17Bǎ Yeshǔ hî̌shěshu yô̤̌sǎ hǒtômṳ̂ akhanu, kòyò lǒ̤꤮ bò dǒ a bè̌ lû̌û ta̤sǔ nutokhlǒ sòwò̤̌lò̤ tûû̌ bò anǎ̤. Bǎbǎkǎlè Yeshǔ ma̤ ta̤cô̌klǐcô̌sè lǒ̤bò akhû̌akhî, kòyò saprṳ̂ sǎphlǒmô̤ bò pṳ̂̌꤮ tôpwa̤.

Ta̤dô̌nè khěkhô̌ kû̌ saplǎphlǒ awe̤akè

(Matè̌ 13:31-33; Makǔ 4:30-32)

18Htodě Yeshǔ hî̌ kû̌, “Cǒmara shilǎ̤gǎkû numî̌ asô̌sô̌kû̌ mî̌titè? He gǔ dô̌nè dǔlṳ̌ kè̌lû̌mò̌mṳ bǎ sî kû̌ mî̌titè? 19Cǒmara shilǎ̤gǎkû numî̌ asô̌sô̌kû̌ kòyò tôpwa̤ wǐ̤lò̤ saplǎphlǒ tôphlǒ dǒ ahǔklakhû̌ nuhǒ, a phǎhtò̌ dě adû̌htò̌htûhtò̌ sô̌sô̌kû̌ sǒmṳ̌nu, dě htû̌phû̌ yṳ̌phû̌ tokhlǒ hèma̤ lô̌khô api̤ dǒ aphò tokhlǒ alô̤.”

Ta̤dô̌nè khěkhô̌ kû̌ ta̤bû awe̤akè

20Dě Yeshǔ hî̌ pô̤̌ kû̌, “Cǒmara shilǎ̤gǎkû numî̌ he gǔ dô̌nè dǔlṳ̌ kè̌bǎ sî kû̌ mî̌titè? 21Cǒmara shilǎ̤gǎkû numî̌ asô̌sô̌kû̌ pwa̤mǒ̤ tôpwa̤ phî̌nṳ̌ ta̤bû dě a cemǔ lû̌û dě a ti̤li̤ nṳ̌ bǎ dîphǎ kla dě a kôphô̌htò̌bò dîphǎ pô̤̌ nuhǒ.”

Takha î̌nî̌

(Matè̌ 7:13, 14, 21-23)

22Bǎ Yeshǔ cû̌ dǒ Wî̤̌yarǔshôle akha, a sû̌ǐtòwòǐ cû̌ wô̤̌ kòyò dǒ klè̌lô̤, tôwî̤̌ hto tôwî̤̌, tôdo hto tôdo. 23Htodě kòyò tôpwa̤ gwè̌ yǎ kû̌, “Běcǎ꤮ kòyò dǒ a nǐ̤bǎ ta̤ma̤hǎplǎge tokhlǒnumî̌, a ô̌ pî̌tî̌pwǎ ya?”

Dě Yeshǔ hî̌shěshu asî kû̌, 24“Jî̌pwî̤̌ cû̌kè̌lǎnṳ̌ lô̌khô dǒ takha î̌nî̌ nutûkû, ma̤titè̌hî̌dě, kòyò tokhlǒ jî̌pwî̤̌ cû̌nṳ̌ jûgrû bǎbǎkǎlè anṳ̌bò̌ lô̌khô̌ tô̤̌. 25Hǐběcǎ gǔ ihtǒ ma̤bǐlǎ kèbǎ sî takha taplǎplǎ pě. Bǎnukha pě sî glè̌ ihtǒ ô̌ dǒ akhlo pě dě sî gǔ tôglô̌ takha pě. Dě sî gǔ hî̌ kû̌, ‘Běcǎ ma̤mô mò̌꤮ bǎ pa takha.’

“Dě a glè̌ hî̌shěshu sî kû̌, sî mî̌ kòyò bǎtè nu, ‘he sî̌ganǎ̤bǎnô̌ sî tôkhò̌꤮ tô̤̌.’

26“Bǎnukha, sî gǔ hî̌shěshu a kû̌, ‘pa ǎô hto kû̌ na hǒ, na sû̌ǐtòwòǐ hto pa dǒ pa wî̤̌kû nu lè.’

27“Bǎbǎkǎlè a gǔ hî̌shěshu pô̤̌ sî kû̌, ‘sî mî̌ kòyò bǎtè nu he sî̌yabǎnô̌ sî tô̤̌. Sî lǒ̤꤮ bò tokhlǒ numî̌ kòyò dǒ a ma̤ ta̤phǔmò̤̌shǐhtô nutokhlǒ pwǎ, hǎhtò̌cû̌ tôphe yî̤kè lô̌khô kû̌ he nu.’ ^b

28“Dǒ Cǒmara shilǎ̤gǎkûnu, sî kè̌shǐ kû̌ PhaAbraha, PhaIsè̌, Phaya̤kò kû̌ piwi̤pèshè lǒ̤꤮ bò nutokhlǒ hè nṳ̌lò̤ bǎnu pô̤̌khô sî nǎ̤sanǎ̤ dě kòyò gǔ wṳ̂̌htò̌kè sî dǒ akhlo pě. Ta̤lǎ̤ bǎ sî glè̌ cû̌ ô̌ hǒtûkû pěnu, sî glè̌ cû̌ hǎsihǎô̌ dě sî gǔ ěsekwe bò sî khû̌khi pě. ^c 29Kòyò ô̌ dǒ lṳmṳ̌htò̌, lṳmṳ̌nṳ̌, gǎcôcî̌, gǎcômû tokhlǒ gǔ hè pě dě asî glè̌ hènṳ̌ hǎnòò̌phî̌ lô̌khô agûlǎ̤ dǒ Cǒmara ashiagǎkû nu pě. 30Bǎnu akhapě nu, kòyò ô̌ dǒnô̌kò tokhlǒ glè̌ hètǒ̤ wǐ dǒ alômô̤̌ pě, dě kòyò ô̌ dǒ alô̤mô̤̌ tokhlǒnu, a glè̌ hè tǒ̤ dǒ jokò pě.” ^d

Yeshǔ mô̤ǐ Wî̤̌yarǔshôlephû̌ tokhlǒ

(Matè̌ 23:37-39)

31Bǎnukha, Pharishè̌phû̌ tokhlǒ hè dǒ Yeshǔ ô̌ dě a hè hî̌ lû̌û kû̌, “Na tôhǎhtò̌cû̌ taphekè dǒ ashǔshawa̤ tûkû, ma̤titè̌hî̌dě Khwǐherû sǎyṳ ma̤si na.”

32Dě Yeshǔ hî̌shěshu asî kû̌, “Cû̌shôbǐǐshǔ bǎ htwǐmi̤nu, ‘khò̌tôni̤ kû̌ pe̤wô̤ pěnu, he glè̌ wṳ̂̌htò̌kè khînǎkhîno tokhlǒ pě, htodě he gǔ ma̤hǎmǎ ta̤shǐta̤sha tokhlǒ pě. Suni̤tôni̤ pěnu, he gǔ ma̤htokè he ta̤phǐta̤ma̤ pě.’ 33Bǎbǎkǎlè khò̌tini̤ kû̌ pe̤wô̤ kû̌ shôwǐ pěnu, he tôbǎ hǎhtò̌cû̌ sělě klè̌. Cǒmara a piwi̤pèshè mî̌ he bǎ cû̌si dǒ Wî̤̌yarǔshôle akûnu pě, ma̤titè̌hî̌dě gûlǎ̤ bǎnutûkû mî̌ gûlǎ̤ dǒ kòyò lǎ̤ma̤si Cǒmara a piwi̤pèshè tokhlǒ hǒ.

34“Ǒ꤮ Wî̤̌yarǔshôle, Wî̤̌yarǔshôle꤮ piwi̤pèshè dǒ kòyò nohè asî dǒ naô̌ tokhlǒnu, tokhlǒkhlǒdě na ma̤sikè asî, tokhlǒkhlǒdě na wî yǎ kû̌ lǒ̤. Bǎ shîmǒ̤ tôgô̌takabǐ tûû̌ aphû̌ dǒ adî̌gelǎ̤nu, he jî̌pwǐ̤ tôgô̌takabǐ na bǎbǎkǎlè na sǎyṳ notakabǐǐ he kû̌ nanǎ̤ tô̤̌. 35Kè̌mò̌ lô̌khô꤮ Cǒmara gǔ dǐô̌kè tûû̌ sî kû̌ ta̤lṳhtò̌hônu pě. Dě he hî̌ sî, sî gǔ kè̌shǐ gutṳ̌ he bǎ sî hî̌ kû̌, ‘kòyò dǒ a hè dǒ Cǒmara ami̤kû tôpwa̤nu, a gǔ nǐ̤bǎ pû ta̤ǐshowî̤ nî̌꤮.’ Sî hî̌hto pô̤̌nupě dě sî gǔ kè̌shǐ sô̌ he pě.” ^e