Luke 14

Yeshǔ ma̤hǎmǎ kòyòshǐsha tôpwa̤.

1Bǎ Yṳ̌daphû̌ lṳmṳ̌dǔ bǎ akha tôni̤nu, Yeshǔ cû̌ dǒ Pharishè̌phû̌ ikǒdû̌ tôpwa̤ ahǐ. Bǎ a glè̌ ǎshǎ akhanu, kòyò bǎnu tokhlǒ kè̌jôhǔ yǎ. 2Dǒ Yeshǔ alô̤mô̤̌nu kòyò nǎ̤yô̌shi ô̌tôpwa̤. 3Dě Yeshǔ gwè̌ pwa̤sû̌ǐ ta̤sû̌ta̤tòwò asara tokhlǒ kû̌ Pharishè̌phû̌ tokhlǒ dě a hî̌ asî kû̌, “Dǒ pa lî̤plò̌shǐ ta̤sû̌ta̤tòwò akûnu, ma̤hǎmǎ bǎ kòyò bǎ Yṳ̌daphû̌ a lṳmṳ̌dǔ akha numî̌ anǐ̤ pwǎya? mî̌ anǐ̤ tô̤̌ ya?” 4Bǎbǎkǎlè asî hî̌shěshu lû̌û tocǒ꤮ tô̤̌. Yeshǔ bè̌htò̌ acǔde dǒ kòyò nutôpwa̤ alô̤ dě a ma̤hǎmǎ kè bǎ lû̌û, dě a plûgekè lû̌û.

5Htodě Yeshǔ hî̌ asî kû̌, “Bǎ Yṳ̌daphû̌ a lṳmṳ̌dǔ bǎ akhanu, sî phû̌khû tôpwa̤pwa̤ kè̌mè̤̌tô̤̌dě sî pṳ̂̌ tôdodo kè̌ lò̤tě̤ dǒ shiû̌kû hî̌nu, sî glè̌ cû̌phî̌htò̌ lû̌û taplǎnô̤̌ mè̤̌ ya? mè̤̌ tô̤̌ ya?” ^a 6Bǎbǎkǎlè asî hî̌shěshu lû̌û tocǒ꤮ tô̤̌.

Ta̤kaǎmô̤shǔ shitèmè̤ kû̌ ta̤shò̌lò̤sǎphlǒ

7Bǎ Pharishè̌phû̌ ikǒdû̌ tôpwa̤ kaǎhè ǎ shǐtèmè̤ tokhlǒ dî akhanu, a hènṳ̌phî̌ lô̌khô agûlǎ̤ dǒ awô̌lǒnu. Yeshǔ kè̌shǐ asî ma̤pô̤̌nudě a hî̌khô̌ bǎ asî kû̌ yô̤̌sǎkhěkhô̌ tôtô̤̌. 8“Bǎ kòyò mǎhèǎmǎhèô na dǒ kòyò tôpwa̤pwa̤ a khòmò̤̌pwè akhanu, rû̌kè̌lǎ phî̌ tǎ̤ gûlǎ̤ dǒ awô̌lǒ tǎ̤mǎ̤nî̌, ǐshakû̌ hî̌pě kòyò dǒ a htûdû̌khlo kû̌ na nu, kòyò mǎhèǎô jò hè̌. ^b 9Kè̌ kòyò mǎhè padô̌ a hî̌dě hǐběcǎ glè̌ hî̌ na kû̌, ‘dǐhǎnòò̌ mò̌ na gûlǎ̤ bǎnu nî̌,’ dě bǎnukha pě, na bǎ cû̌hǎnòò̌kè dǒ gûlǎ̤ dǒ aphǔlò̤gutṳ̌ tôkûpě dě na gǔ sòwò̤̌kè pě. 10Awô̌lǒmî̌, kè̌ kòyò mǎhè na kè̌hî̌dě cû̌hǎnòò̌ dǒ gûlǎ̤ aphǔlò̤gutṳ̌ nutôkû. Na kè̌ ma̤pô̤̌nu hî̌dě, hǐběcǎ gǔ hè hî̌ na kû̌, ‘sû̌khô, htò̌nòò̌ dǒ akhû̌ nutôkû,’ dě bǎnukhapě, na gǔ mǐ̤sǎ ô̌ dǒ kòyò pṳ̂̌tôpwa̤ alô̤mô̤̌ pě. 11Ma̤titè̌hî̌dě kòyò tôpwa̤pwa̤ dǒ a bè̌dû̌ anǎ̤nu, Cǒmara glè̌ bè̌pî̌tî̌ a pě, dě kòyò tôpwa̤pwa̤ dǒ a bè̌pî̌tî̌ anǎ̤nu, Cǒmara glè̌ bè̌dû̌ a pě.” ^c

12Htodě Yeshǔ hî̌ sô̌ hǐběcǎ kû̌, “Bǎ na tîwî̌tòwò lṳmṳ̌htǔ shǎǎshǎô akha bǎbǎ, kè̌mè̤̌tô̤̌dě lṳmṳ̌hǎ akhanu bǎbǎ, na khô sî bǎbǎ, napṳ̌nawè̤̌ sî bǎbǎ, nakhlinalè sî bǎbǎ, nahǐphòkòshǐ dǒ a dû̌yò̤̌htò̌sa sî bǎbǎ, kaǎtǎ̤ asî tǎ̤mǎ̤. Na kè̌ kaǎ ǎ asî pô̤̌nu hî̌dě asî gǔ kaǎ ǎ geshěshǔ na pě dě sî ma̤le̤ma̤ge tûû̌ lû̌pwǎ. 13Bǎbǎkǎlè bǎ na ma̤pwè akhanu, tîwî̌tòwò shǎǎshǎô dě kaǎ pè̤̌ kòyò dǒ hǎwǐ̤shèwè̤ nutokhlǒ, kòyòtṳ̂rû nutokhlǒ, kòyò khò̌lôpô̤̌dě nutokhlǒ kû̌ kòyò mǐ̤sǎkhǐ nutokhlǒ nî̌꤮. 14Dě na kè̌ kaǎ ǎ kòyò pô̤̌o tokhlǒ hî̌nu, na glè̌ nǐ̤bǎ ta̤ǐshowî̤ pě, ma̤titè̌hî̌dě asî kaǎ ǎ gebò̌sô̌ na tocǒ꤮ tô̤̌. Bǎ kòyòcǒtè̤ tokhlǒ ihtǒhtûpwa̤ gesô̌ dǒ ta̤si akha pěnu, Cǒmara gǔ ǐsô̌ na ta̤bwǐta̤sîrî pě.”

Ta̤dô̌nè khěkhô̌ kû̌ pwèǎôdû̌

(Matè̌ 22:1-10)

15Kòyò hǎnòò̌ kû̌ Yeshǔ bǎ lǎ̤ǎ dîjowǎ̤ kòshǐ nutokhlǒ akla tôpwa̤nu, a ganǎ̤de ta̤hî̌bǎnu dě a hî̌ Yeshǔ kû̌, “Kòyò dǒ a hǎnòò̌ ǎô bǎ dǒ Cǒmara ashiagǎkû pě tokhlǒnu, a gǔ nǐ̤bǎ mè̤̌mî̌ca ta̤ǐshowî̤ pě.”

16Dě Yeshǔ hî̌ a kû̌, “Bǎtaplǎ, kòyò tôpwa̤ ma̤pwèdû̌ dě a bǔǎbǔô kòyò, dě a mǎhèǎ mǎhèô wô̤̌ kòyò. 17Bǎ pwèǎô ashěkhǎ hètǒ̤ akhanu, a nocû̌hî̌ ajû̌ tôpwa̤ kû̌ kòyò dǒ a mǎhèǎhèô hto lû̌û nutokhlǒ, dě a jû̌ cû̌hî̌ kû̌, ‘hèǎhèô lô̌khô mò̌ bǒo, kòyò tîwî̌tòwò nǎ bò hǒ.’

18“Bǎbǎkǎlè tôpwa̤ tocǒcǒ a hî̌htôhî̌lò̤ bò kû̌ alǎ tô̤̌, awǐlǒ tôpwa̤ dě a hî̌ jû̌nu kû̌, ‘he pwe̤ lè̤̌ tôlè̤̌ dě he bǎ cû̌kè̌ yǎ, dě khòsǎdô pû he nî̌꤮.’

19“Ashǔshawa̤ tôpwa̤ dě a hî̌ kû̌, ‘he pwe̤ pṳ̂̌ yè̤̌lô̤ dě he bǎ cû̌ noma̤kè̌kè̌yǎ khònò̤̌. Dě khòsǎdô he nî̌꤮.’

20“Dǒ ashǔshawa̤ tôpwa̤ dě ahî̌ kû̌, ‘he khòmò̤̌htosa mô̤̌pepwǎ dě he hè bò̌ tô̤̌.’

21“Jû̌ nutôpwa̤ getîkhî sô̌ dě a geshôbǐǐ bǎ aběcǎ kû̌ ta̤we̤ta̤kè lǒ̤꤮ bò. Dě hǐběcǎ nutôpwa̤ sǎphlǒdû̌ dě a hî̌ ajû̌ kû̌, ‘hǎhtòcû̌phwè dǒ klè̌dû̌ kû̌ klè̌phû̌nu tokhlǒ akû, dě kaǎge lô̌khô pwa̤hǎwě̤shèwè̤phû̌, kòyòtṳ̂rû sî, kòyòmǐ̤sǎkhǐ, kû̌ kòyòjî̌ sî, kû̌ kòyò khò̌lôpô̤̌dě sî nunî̌꤮.’

22“A jû̌ getǒ̤ tîkhîsô̌ dě a hî̌ aběcǎ kû̌, ‘běcǎ꤮ he cû̌kaǎhto bò pô̤̌ na hî̌lò̤ nayô̤̌sǎ nutokhlǒ hǒ, bǎbǎkǎlè gûlǎ̤ ô̌sô̌kwa pe pe.’

23“Pô̤̌nu akhû̌akhî běcǎ hî̌ ajû̌ kû̌, ‘cû̌ pô̤̌ dǒ dophû̌shô̌phû̌ nutokhlǒ akû dě no hè ô̌be bò dǒ he hǐdǒkû bǒo. 24He hî̌ sî, kòyò dǒ he mǎhè a tokhlǒnu, a hè ǎ gû̌ he pwèǎôdû̌ pô̤̌o tôpwa̤꤮ tô̤̌.’”

Htû a khôphijǎ tôpwa̤ akhû̌akǎ

(Matè̌ 10:37-38)

25Tôni̤ akhanu, kòyò cû̌wô̤̌ kû̌ Yeshǔ dě a lèti̤wǐ̤ kè̌tîkhî asî dě a hî̌ kû̌, 26“Kòyò dǒ a sǎyṳ htû he khôphijǎ tôpwa̤pwa̤nu, amǒ̤apha bǎbǎ, aphû̌ama bǎbǎ, apṳ̌awè̤̌ kû̌ anǎ̤běcǎ sanǎ̤ bǎbǎ, a kè̌ mô̤ǐ khlo kû̌ a mô̤ he numî̌ a htûhtò̌ jò he khôphijǎ tô̤̌. ^d 27Mò̌pèpè̌ bǎbǎ, a yò̌ tûû̌ a nò̌dò̌htǔ tô̤̌tô̤̌, a gû̌ kû̌ hekò tô̤̌tô̤̌, a gû̌ kû̌ he kò tô̤̌tô̤̌ numî̌ ahtû jò he khôphijǎ tô̤̌. ^e

28“Hî̌kû̌lǎ, dǒ sîkla tôpwa̤pwa̤ nu, a kè̌ gènè̤nǎhto kû̌ a glè̌ ma̤htò̌ hǐphû̌htò̌yô̤̌ tômè kè̌hî̌dě, a glè̌ hǎlǒ̤ pwǐtè pěnu a bǎ hǎnòò̌ dô̌nǎ wǐ, tǒ̤dǒ a ma̤htoma̤pô̌ bò hǐ nutômè mî̌, aru glè̌ pô̌ pě ya mî̌ a pô̌ tô̤̌ya nu a bǎ sî̌ya wǐ. 29A kè̌ ma̤wǐ pô̤̌nutô̤̌, dě a kè̌ ma̤htò̌wǐ ahǐ kòkho, dě a kè̌ ma̤htò̌ htophlǔ bò ahǐ nutô̤̌ kè̌hǐdě, kòyò dǒ a kè̌shǐbò a ma̤htò̌ kô̌kǔkô̌ke ahǐ nu, a glè̌ sǎyǎ̤ǐ lû̌û pě. 30Asî glè̌ hî̌ lôkhô kû̌, ‘kòyò hǒtôpwa̤ ma̤htò̌ tûû̌ ahǐ dě a ma̤phlǔma̤htobò̌ tô̤̌.’

31“Kè̌mè̤̌tô̤̌dě, hî̌kû̌lǎ, khwǐcôphǎ tôpwa̤ kè̌ hǎhtò̌cû̌ kû̌ akliphû̌ apwa̤ tôsò̌, dě a glè̌ cû̌shěshǔ kû̌ khwǐcôphǎ dǒ ashǔshawa̤ tôpwa̤ dǒ a ô̌ kû̌ akliphû̌ apwa̤ ginǐ̤sò̌ tôpwa̤ nu, a kè̌ shěshǔ kû̌ khwǐcôphǎ hǒtôpwa̤ numî̌, a pè̤̌ pě ya, mî̌ a pè̤̌ tô̤̌ pě ya nu, a bǎ hǎnòò̌ gènè̤ kè̌ kûmṳ̂̌. 32Kè̌ awô̌ pè̤̌ pě tô̤̌ kè̌hî̌dě, bǎ a ô̌yî̤ pe kû̌ lû̌û akhanu, a bǎ nocû̌ wǐ akòyò tokhlǒ dǒ a cû̌ hî̌bǎpè̤̌dû wǐ. 33Pô̤̌nu akhû̌akhî, lǒ̤꤮ bò ta̤ dǒ a ô̌ kû̌ sî bò̌꤮ bò tokhlǒnu, sî kè̌ bè̌kè tô̤̌ kè̌hî̌dě, sî htûhtò̌ jò he khôphijǎ tôpwǎ̤꤮ tô̤̌.

Îsǎ dǒ a shôdôpwî̤

(Matè̌ 5:13; Makǔ 9:50)

34“Îsǎ numî̌ awô̌ pwǎ mî̌tadě îsǎ a ta̤shukaha nu a kè̌ hǎmǎkè hî̌dě, kòyò cû̌ ma̤shuha gesô̌ jò pe a hî̌tè? 35Îsǎ dǒ ashukaha petô̤̌nu, dǒ hǎkhû̌ aya bǎbǎ, dǒ sǒmṳ̌ khû̌ǎ aya bǎbǎ, abwǐsîrî ô̌ pe tocǒ꤮ tô̤̌. Dě kòyò wîkè pwǎ a pwǎ.”

“Kòyò dǒ a ô̌ kû̌ anò̌ku tokhlǒnu, no ganǎ̤de lô̌khô asî.”