Luke 15

Sûphû̌ dǒ a hǎmǎ tôdo

(Matè̌ 18:12-14)

1Bǎtaplǎ pwa̤kwi ta̤kûta̤mṳ̂̌ tokhlǒ kû̌ pwa̤ma̤sǔphû̌ tokhlǒ hè ô̌plǒ te̤we̤ ganǎ̤de lô̌khô Yeshǔ a ta̤shôbǐǐlṳ̌ tokhlǒ. ^a 2Pharishè̌phû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ tûmṳ̂̌ta̤ma̤ bò Yeshǔ yô̤ kû̌, “Kòyò hǒtôpwa̤ kaǎmô̤shǔ pwa̤ma̤sǔphû̌ tokhlǒ, dě a cû̌ ǎcuôcu tǒ̤kû̌ asî ya꤮!”

3Pô̤̌nu akhû̌akhî, Yeshǔ ǐ bǎ asî yô̤̌sǎkhěkhô̌ tômû dě a hî̌ kû̌, 4“Hî̌kû̌lǎ kòyò tôpwa̤pwa̤ dǒ sîklanu, a sû̌phû̌ ô̌ ado tôya̤ dě a kè̌ hǎmǎkè bǎ lû̌û tôdo hî̌nu, a glè̌ ma̤hî̌tè? A glè̌ bè̌kè sû̌phû̌ lǐ̤sô̌tôshi kû̌ lǐ̤sô̌ tôdo nu dǒ aǎshǎgûlǎ̤ dě a gǔ cû̌kè̌lǎ a hǎmǎ nutôdo tǒ̤dǒ a kè̌shǐ sô̌ a pě mè̤̌tô̤̌ ya? 5Bǎ a kè̌shǐ hto sô̌ lû̌û akhanu, a glè̌ sǎlě̤sǎlò̤ dě a glè̌ dò̌htò̌ lû̌û dǒ plebòkhû̌ pě, 6Dě a glè̌ yò̌ge lû̌û dǒ hǐ pě. Dě a glè̌ mǎhè plǒ a khô kû̌ ahǐphòkòshǐ tokhlǒ dě a glè̌ hî̌ asî kû̌, ‘He kè̌shǐ sô̌ he sû̌phû̌ dǒ a hǎmǎ nu tôdo hǒ, dě he sǎlě̤sǎlò̤, dě hè sǎlě̤sǎlò̤ lô̌khô kû̌ he.’” 7A sô̌sô̌kû̌ gû̌ pô̤̌nuhǒ, he hî̌ sî, pwa̤ma̤sǔphû̌ tôpwa̤ yò̤lǎ̤plǎdî̌ gesô̌ asǎphlǒ akhû̌akhî, dǒ mǒkhû̌nu kòyò glè̌ sǎlě̤sǎlò̤ khlo kû̌ kòyòcǒkòyòtè̤ lǐ̤sô̌tishi kû̌ lǐ̤sô̌tôpwa̤ dǒ alṳ̂bǎ yò̤lǎ̤plǎdî̌ tô̤̌ nu tokhlǒ hǒ.

Ruyî̌ dǒ a hǎmǎ tôbǎ

8“Mè̤̌tô̤̌dě, hî̌kû̌lǎ pwa̤mǒ̤ tôpwa̤ dǒ aruyî̌ ô̌ abǎshǐ dě kè̌ ahǎmǎ kèbǎ lû̌û tôbǎ hî̌numî̌ a glè̌ ma̤hî̌tè? A glè̌ shělî mî̌, htodě a glè̌ dûbò ahǐ, dě a kè̌lǎhto kè̌lǎsô̌ tǒ̤dǒ a kè̌shǐ yahî̌꤮. 9Bǎ a kè̌shǐ hto sô̌ akhanu, a gǔ mǎhèplǒ a khô kû̌ ahǐphòkòshǐ tokhlǒ dě a glè̌ shôbǐǐlṳ̌ bǎ asî kû̌, ‘he kè̌shǐ sô̌ heruyî̌ dǒ a hǎmǎ nutôbǎ akhû̌akhî, he sǎlě̤ dě hè sǎlě̤sǎlò̤ lô̌khô gû̌ he.’” 10Pô̤̌nuhǒ, he hî̌ sî꤮, “Pwa̤ma̤sǔphû̌ tôpwa̤ yò̤lǎ̤plǎdî̌ sô̌ asǎphlǒ akhû̌akhî, Cǒmara a mǒkhû̌ tanaphû̌ tokhlǒ sǎlě̤sǎlò̤ jî̌jî̌.”

Phû̌khû dǒ a hǎmǎ tôpwa̤

11Yeshǔ hî̌ pô̤̌ kû̌, Bǎtaplǎ kòyò ô̌tôpwa̤, a phû̌pwa̤khû ô̌ sò̌ginǐ̤. 12Apṳ̌ tôpwa̤ ge hî̌ apha kû̌, pha꤮, û̌cata̤bî̌ dǒ he tô nǐ̤bǎ a tokhlǒnu, ǐmò̌ he khònò̤̌. Pô̤̌nu akhû̌akhî apha bèpè̤̌ kèbǎ aphû̌ nusò̌ginǐ̤ û̌cata̤bî̌ tokhlǒnu.

13Yî̤khôtô̤̌ dě apṳ̌ nutôpwa̤ nî̌, a phî̌nṳ̌ bò̌꤮ bò a û̌cata̤bî̌ dǒ apha ǐ nutokhlǒ dě a hǎhtò̌cû̌kè dǒ gǎyî̤ tôgǎ. Dě a cû̌ ma̤bòkè aru kû̌ a ǎmṳôkè, ati̤li̤ pwa̤mǒ̤sèmè tokhlǒ. 14Bǎ a ma̤bòkè hto aruhta dǒ a ô̌ kû̌ a tokhlǒ akhanu, ta̤ô̌ti̤wǐ̤ô̌kè ô̌htò̌ dǒ gǎ bǎnutôgǎ akû, dě ata ô̌pe tocǒ꤮ tô̤̌. 15Pô̤̌nu akhû̌akhî a cû̌kwi ma̤ta̤ dǒ shiphû̌gǎphû̌ bǎnu tôpwa̤ a ô̌ dě a nocû̌kè̌ lû̌û htô̌ bǎ htô̌ lǎ̤ǎshǎkhû̌ tôkû. 16Hǒtaplǎdě a lò̤dô̌ sǎǎsǎô dě a sǎyṳ ǎ jî̌ kè kîbîsǎ dǒ htô̌ ǎ nu bǎbǎkǎlè kòyò dǐǎ bǎ a lǎ̤ǎ tôpwǎ̤꤮ tô̤̌.

17Dǒnô̌kònu, a sǎganǎ̤lò̤ sô̌ tûû̌ anǎ̤ dě ahî̌ kû̌, lǒ̤꤮ bò pwa̤ma̤ta̤phû̌ dǒ hepha ahǐkû nutokhlǒmî̌, a ǎkǒôbe bò lô̌khô, htodě a ô̌lǒ dû̌wî̤kè, he dě he glè̌ cû̌ ô̌ti̤wǐ̤ sikè bǒo hǒ. 18He tô ihtǒ getîkhî sô̌ dǒ hepha ô̌ dě he tôbǎ ge hî̌ hepha kû̌, “Pha꤮ he ma̤sǔkè Cǒmara kû̌ na hǒ. 19Kòyò glè̌ kaǎ he kû̌ naphû̌pwa̤khû tôpwa̤nu a gwǎ pe tô̤̌. Bè̌ he pô̤̌ na pwa̤ma̤ta̤phû̌ dǒ a hè dakǎǎ aklanu tôpwa̤ nî̌.” 20Pô̤̌nudě a ihtǒge sô̌ dǒ apha ô̌.

Bǎ apha kè̌shǐcû̌lṳ̌ a phû̌pwa̤khû ô̌ dǒ ayî̤ ge akhanu, a gwèbǎǐ mî̌ca lû̌û dě a khlè̌cû̌ phô̌gômô̤ aphû̌.

21Aphû̌ pwa̤khû hî̌shěshu lû̌û kû̌, pha꤮ he ma̤sǔkè Cǒmara kû̌ na hǒ, kòyò gǔ kaǎ he kû̌ naphû̌pwa̤khû tôpwa̤ nu a gwǎ pe tô̤̌.

22“Bǎbǎkǎlè apha hî̌ ajû̌ tokhlǒ kû̌, ‘ma̤phwèphwè, phî̌hè jejû dǒ awô̌lǒ nutôpṳ, dě sô̌htò̌ lô̌khô bǎ yǎ, dě tûplû̌nṳ̌ bǎ a cǔtûplû̌ tômè dǒ a cǔmṳ̌lô̤nu, dě dǐ dò̌pè̤̌ a khò̌phě. 23Htodě cû̌cî̌ge pṳ̂̌phû̌ dǒ abû̌suklǔlǒ tôdo dě ma̤si a nu. Pa glè̌ ma̤pwèma̤lû, dě ma̤ǎma̤ô plǒbò lû̌û pě꤮. 24Ma̤titè̌hî̌dě a mî̌ asô̌sô̌kû̌ hephû̌khû dǒ a sihto tôpwa̤hǒ, dě a htûpwa̤ gesô̌ khò̌tôni̤ tôpwa̤nu hǒ. A mî̌ asôsôkû̌ hephû̌khû dǒ a hǎmǎ dě kè̌shǐ gesô̌ a khò̌tôni̤ tôpwa̤ nuhǒ.’ Pô̤̌nudě asî sahtò̌ ma̤pwèma̤lû ma̤ǎma̤ô plǒbò lû̌û.

25“Bǎnukha a phû̌pwa̤khû dǒ adû̌ tôpwa̤ ô̌ dǒ hǔklakhû̌. Dě bǎ a gephǔ kû̌ hǐ akhanu, a ganǎ̤de kòyò dǒhtodǒmô̤ dě pě̤ kalǐ pwe̤rupwe̤tè̌ dǒ hǐ. 26Pô̤̌nudě a kaǎhè jû̌ akla tôpwa̤ dǒ a ô̌ dě a gwè̌ lû̌û kû̌, ‘ma̤titèdě kòyò cû̌ma̤ pwe̤nǎ̤sǎgǎ bò pô̤̌nu ma̤titè̤?’ 27Dě ajû̌ hî̌shěshu lû̌û kû̌, ‘na pṳ̌pwa̤khû getǒ̤mô̤ getǒ̤wô̌ sô̌ dǒ hǐ akhû̌akhî, napha ma̤si pè̤̌ a pṳ̂̌phû̌ dǒ pa bǔǐ abû̌gutṳ̌ tû̌ a nu tôdo pwǎ.’

28“Hǒtaplǎdě a wè̤̌pwa̤khûdû̌ nutôpwa̤ sǎphlǒdû̌ dě a genṳ̌ pe dǒ hǐkû tô̤̌. De apha hǎhtò̌ ma̤lè genṳ̌ lû̌û dǒ hǐdokû. 29Bǎbǎkǎlè a hî̌shěshu apha kû̌, ‘pha꤮ na kè̌mò̌, heǎ hewè̤ bǎ na pô̤̌ jû̌ tôpwa̤nu dǒ aněně dǒ alala kû, he htè̌ he hî̌shěshu nô̌ nayô̤̌ tômṳ̂̌꤮ tô̤̌. Na ǐ bǎ he mî̌titè? Pô̤̌khô he glè̌ ma̤pwè, he glè̌ ǎplǒôplǒ kû̌ he khô tokhlǒ ayanu, bǎ pè̤̌phû̌ tôdo pwǎ nu na ǐpè̤̌ he taplǎ꤮ tô̤̌. 30Bǎbǎkǎlè bǎ naphû̌khû hǒtôpwa̤ cû̌ ma̤bò kè na û̌cata̤bî̌, cû̌lṳ̂ pwa̤mǒ̤sèmè getǒ̤ sô̌ dě, na ma̤si bǎ a pṳ̂̌phû̌ abû̌lǒ tôdo dǒ pa bǔǐ yǎ nu!’

31“Dě apha hî̌shěshu lû̌û kû̌, ‘Phû̌khû꤮, na ô̌ dǒ he khò̌lôpô̤̌ kòshî̌ pṳ̂̌꤮ taplǎ dě he ta lǒ̤꤮ bò tokhlǒ numî̌ nata pwǎ. 32Bǎbǎkǎlè na pṳ̌pwa̤khû nî̌ asô̌sô̌kû̌ a sihtohǒ dě khònò̤̌ a htûpwa̤ gesô̌ hǒ, a sô̌sô̌ kû̌ ahǎmǎkè dě kè̌shǐ tîkhîsô̌ a khò̌tôni̤ hǒ akhû̌akhî, pa tôbǎ ma̤pwèma̤lû bǎ yǎ, dě pa tô sǎlě̤sǎlò̤ ǎplǒôplǒ bǎ yǎ.’”