Luke 16

Pwa̤kè̌ǐ ta̤kî̌ta̤krû̌ dǒ a lîmò tôpwa̤

1Yeshǔ hî̌ akhôphijǎ tokhlǒ kû̌, “Bǎtaplǎ kòyò dû̌yò̤htò̌sa ô̌ tôpwa̤. Dě a ô̌ kû̌ pwa̤kè̌ǐ a ta̤kî̌ta̤krû̌ tôpwa̤. Kòyò shôbǐǐ bǎ lû̌û kû̌ a ma̤bò kè aběcǎ ta̤kî̌ta̤krû̌ pṳ̂̌꤮ tocǒ. 2Kòyò dû̌yò̤̌ nutôpwa̤ kaǎhè a pwa̤kè̌ǐ ta̤kî̌ta̤krû̌ nutôpwa̤ dě a hî̌ lû̌û kû̌, ‘nawe̤nakè dǒ he ganǎ̤de numî̌ hî̌tè tocǒkǎ? Na bǎ bè̌htò̌lṳ̌ na ta̤wě̤nǎǐ, na kè̌ǐ he ta̤kî̌ta̤krû̌ nutokhlǒ awe̤akè, ma̤titè̌hî̌dě he no htûjò pe na kû̌ he pwa̤kè̌ǐ he ta̤kî̌ta̤krû̌ tôpwa̤ petô̤̌.’

3“Pwa̤kè̌khwè̌ǐ ta̤kî̌ta̤krû̌ nutôpwa̤ hî̌lò̤ tûû̌ anǎ̤ kû̌, ‘heběcǎ nohǎhtò̌kè he dǒ a ta̤ma̤kû dě he bǎma̤ hî̌tè̤? He glè̌ ma̤ǎma̤ô mò̌ hǔkla ta̤ma̤ hî̌dě, hekhû̌heǎ ô̌be petô̤̌tô̤̌, he gǔ kwiǎkwiô mò̌ hî̌dě, a ma̤sòwò̤̌ hehe. 4Bǎ he ta̤ma̤ ô̌ pe tô̤̌ akhanu, pô̤̌khô he ô̌ kû̌ he khô dǒ asî glè̌ kaǎmô̤shǔ he dǒ asî hǐkû pěnu dě, khònò̤̌ he tôbǎ ma̤hî̌tè nu, he sî̌ya hǒ.’”

5Pô̤̌nu akhû̌akhî, a kaǎhè kòyò lǒ̤꤮ bò dǒ ashû̌ô̌ aběcǎ alô̤ nutokhlǒ tôpwa̤ hto tôpwa̤. Dě a gwè̌bǎ ahè wǐlǒ nutôpwa̤ kû̌, Nashû̌ô̌ heběcǎ alô̤ pwî̌tè?

6A hî̌shěshu lû̌û kû̌, he shû̌ ô̌ yǎ òlǐbashi.

ajwè̌ 500.

“Dě pwa̤kè̌khwè̌ ta̤kî̌ta̤krû̌ nutôpwa̤ hî̌ lû̌û kû̌, ‘phî̌ na lî̤lǎ̤wě̤mǎnǎ nutôbǎ dě hǎnòò̌ wě̤mǎnǎ mò̌, dě wě̤nǎ pwǎ 250 nu.’

7“A gwè̌ pô̤̌ dǒ ashǔshawǎ̤ tôpwa̤ kû̌, ‘nalè꤮ nashû̌ô̌ yǎ pwî̌tè̤?’

“Dě a hî̌shěshu lû̌û kû̌, he shû̌ô̌ lû̌û bǔjû̌ apû̌ 1,500. Pwa̤kè̌pǒ̤ǐ ta̤kî̌ta̤krû̌ nutôpwa̤ hî̌ lû̌ kû̌, ‘phî̌ nǐ̤ lî̤lǎ̤wě̤mǎnǎ nutôbǎ dě wě̤nṳ̌ pwǎ apû̌ 1,200 nu.’

8“Pwa̤kè̌pǒ̤ǐ ta̤kî̌ta̤krû̌ dǒ acǒatè̤ tô̤̌ tôpwa̤nu, aběcǎ htû̌sò̌ ǐ yǎ, ma̤titè̌hî̌dě a ma̤lîmò ta̤. Kòyòhǎkhû̌phû̌ tokhlǒnu a lîmò lòhǎlòhô tûû̌ sô̌ lû̌û, dě a lîmò khlo pe kû̌ kòyò dǒ agû̌ kû̌ Cǒmara kò nutokhlǒ.” 9Htodě Yeshǔ hî̌ kû̌, “Pô̤̌nu akhû̌akhî he hî̌ sî, pô̤̌khô na glè̌ nǐ̤bǎ jûgrû nasû̌nakhô tokhlǒ dǒ a glè̌ htû nata nu, noǎ nahǎkhû̌ ta̤dû̌yò̤̌htò̌sa dǒ acǒatè̤ tô̤̌ tokhlǒnu. Pô̤̌nudě bǎ na ta̤dû̌yò̤̌htò̌sa bòkè pěnu, kòyò glè̌ kaǎ dô̌ na dǒ ta̤htûpwa̤ tûjû̌pwa̤ dǒ mǒkhû̌ ashiagǎkû nu pě.

10“Kòyò dǒ kò yṳ̌ǎ jò a dǒ ta̤pî̌tî̌phû̌ pwǎ akû tôpwa̤nu, ta̤dû̌mi̤ti̤ akûnu mî̌ kòyò glè̌ yṳ̌ǎ jò a pě. Bǎbǎkǎlè kòyò dǒ kò yṳ̌ǎ jò yǎ dǒ ta̤pî̌tî̌ akû tô̤̌ tôpwa̤ nu, ta̤dû̌mi̤ti̤ akûnu mî̌ kòyò yṳ̌ǎ jò yǎ tô̤̌tô̤̌. 11Kè̌ ma̤pô̤̌nu hî̌dě, kò kè̌ yṳ̌ǎ sî kû̌ ta̤kè̌pǒ̤ hǎkhû̌ ta̤dû̌yò̤̌htò̌sa tô̤̌ hî̌ dě, mò̌pè tôpwa̤ gǔ yṳ̌ǎ jò sî kû̌ mǒkhû̌ ta̤dû̌yò̤̌htò̌sa mè̤̌mî̌ca nu pě? 12Dě sî kè̌ cǒtè̤ kû̌ kòyò ta̤kî̌ta̤krû̌ tô̤̌ kè̌hî̌dě mò̌pè tôpwa̤ gǔ ǐsî ta̤kî̌tǎ̤kû̌ dǒ a glè̌ htû na ta nu pě.

13“Jû̌ tôpwa̤ ma̤bò̌ ta̤ma̤ dǒ běcǎ sò̌ginǐ̤ ata̤ noǎ alǎ̤nu aô̌ tôpwǎ̤꤮ tô̤̌. A glè̌ sǎkhî̌kè tôpwa̤ pě, dě a glè̌ mô̤ǐ tôpwa̤ pě. Mè̤̌tô̤̌dě a glè̌ sǎphlǒ tô tôpwa̤ pě, dě a glè̌ ma̤takhû̌takǎ tôpwa̤ pě. Sî ma̤ bǎ Cǒmara ayaya, ruhta ayaya ginǐ̤cǒ nu, anǐ̤ tô̤̌.” ^a

Yeshǔ hî̌bǎ yô̤̌sǎkhěkhô̌ tokhlǒ

(Matè̌ 11:12-13, 5:31-32; Makǔ 10:11-12)

14Pharishè̌phû̌ dǒ a mô̤ǐ ruhta nutokhlǒ ganǎ̤de yô̤̌sǎ akhanu, a sǎyǎ̤ lô̌khô Yeshǔ. 15Yeshǔ hî̌ asî kû̌, “Sî mî̌ kòyò dǒ a jî̌cǒjî̌tè̤ pwǎ anǎ̤ dǒ kòyò a lô̤mô̤̌ nutokhlǒ pwǎ, bǎbǎkǎlè Cǒmara sî̌ya bò hto sî sǎphlǒkû hǒ. Ma̤titè̌hî̌dě, ta̤ dǒ kòyò gènè̤ kû̌ alě̤dû̌pwî̤htû gutṳ̌ tokhlǒnu, dǒ Cǒmara alô̤mô̤̌ numî̌ ta̤phǔmò̤̌shǐhtô pwǎ dě kòyò ma̤yǒ̤sǐpi̤wô̤̌ a nutokhlǒ pwǎ.

16“Khûmṳ̂shě ta̤sû̌ta̤tòwò kû̌ piwi̤pèshè a ta̤wě̤nǎ tokhlǒnu, kòyò shôbǐǐlṳ̌ tǒ̤htû̌ pwa̤jushi Khûyṳ̂ha a htukha nuhǒ. Dǒnô̌kò, he shôbǐǐlṳ̌ bǎ kòyò kû̌ Cǒmara shilǎ̤gǎkû ta̤sǎlě̤we̤kè awe̤akè dě kòyò jî̌pwî̤̌ nṳ̌sigwǐ bò lû̌û pṳ̂̌꤮ tôpwa̤. ^b 17Bǎbǎkǎlè, mǒkhû̌ kû̌ hǎkhû̌ gǔ hǎpî̌ kè bǎbǎ, Cǒmara a ta̤sû̌ta̤tòwò dǒ a pî̌tî̌lǒ tôphlǒ glè̌ hǎpî̌kè nô̌tô̤̌. ^c

18“Pwa̤khû tôpwa̤pwa̤ kè̌ bè̌kè ama dě a kè̌ cû̌phî̌ tèplè̌ kû̌ pwa̤mǒ̤ dǒ ashǔshawa̤ tôpwa̤pwa̤ kè̌hî̌dě a cû̌sǔnṳ̌kè kû̌ pwa̤mǒ̤ nutôpwa̤ hǒ. Dě pwa̤khû tôpwa̤pwa̤ dǒ a phî̌ pwa̤mǒ̤ dǒ a wṳ̂ bè̌kè lû̌û tôpwa̤ numî̌ a cû̌sǔnṳ̌kè kû̌ pwa̤mǒ̤ nutôpwa̤ hǒ. ^d

Kòyò dû̌yò̤̌htò̌sa tôpwa̤ kû̌ Khûlasarǔ

19“Bǎtaplǎnu, kòyò dû̌yò̤̌htò̌sa ô̌tôpwa̤. Akûasô̌ còcè̌ jejû dǒ alě̤dû̌pwî̤htû tokhlǒ, dě a ǎwǐôshu, ma̤mô̤ tûû̌ anǎ̤ pṳ̂̌꤮ tôni̤. 20Kòyò hǎwǐ̤shèwè̤ ô̌tôpwa̤. Dě ami̤ kû̌ Khûlasarǔ. Awe htò̌bò lû̌û nǎ̤tôpwa̤. Dě kòyò johè dǐhǎmôô̌lò̤ yǎ bǎ kòyò dû̌yò̤̌htò̌sa nutôpwa̤ a we̤takha kòshî̌nu. 21A ô̌pǒ̤ kè̌shukè̌pǒ̤ ǎ pwǎ kòyòdû̌yò̤̌ nutôpwa̤ ashǎǎ dǒ ǎô hto dě a kashǎ ô̌ kè nukû̌ a gǔ wîkè lû̌û nutokhlǒ pwǎ. Htokhôtô̤̌ htwǐ tokhlǒ hèlî̌bò lû̌û awe nutokhlǒ.

22“Bǎ kòyò hǎwǐ̤shèwè̤phû̌ nutôpwa̤ si akhanu, mǒkhû̌ tanaphû̌ tokhlǒ johtò̌ a dǒ PhaAbraha akòshǐ. Kòyò dû̌yò̤̌htò̌sa nutôpwa̤ mî̌mî̌ a si dě kòyò cû̌ lǔkè yǎ. 23Bǎ a khòbǎ ta̤jî̌jû̌ dǒ larakû akhanu, a kè̌htò̌ dǒ mǒkhû̌ dě a kè̌shǐ htò̌cû̌lṳ̌ PhaAbraha, dě Khûlasarǔ ô̌ bǎ akòshî̌. 24Dě a kaǎgǔhtò̌ kû̌, ‘ǒ꤮ PhaAbraha꤮! gwèbǎǐ mò̌ he nî̌꤮, nojunṳ̌ Khûlasarǔ a cǔmṳ̌khi dǒ shikû dě nomèlò̤tě̤ gûjû̌ mò̌ he plî̤nu nî̌꤮, ma̤titè̤̌hî̌dě he khòbǎ ta̤dǒ mî̌kû nu ajî̌ajû̌ mî̌ca he hǒ.’

25“Bǎbǎkǎlè PhaAbraha hî̌shěshu lû̌û kû̌, ‘hephû̌khû꤮ gènè̤htò̌bǎ sô̌ bǎ na ô̌htûpwa̤ pe ashěkhǎnu, nasǎyṳ titètè̌ nanǐ̤bǎ bò, bǎbǎkǎlè Khûlasarǔ nu, a nǐ̤bǎbò ta̤jî̌ta̤jû̌ tokhlǒ, pô̤̌nudě khònò̤̌, a nǐ̤bǎ sô̌ ta̤ô̌mô̤ô̌bǎ gûlǎ̤ bǒo hǒ, dě na dě na khòbǎ tîkhîsô̌ ta̤jî̌ta̤jû̌ hǒ. 26Htodě, pa kû̌ sî ajokû nu, gòpò̤̌lô̤dû̌ ô̌ tě̤tṳ pa dě kòyò dǒ a ô̌ bǒo tokhlǒnu, a sǎyṳ cû̌ dǒ sî ô̌ bǎbǎ acû̌ jò tô̤̌, htodě kòyò dǒ a ô̌ sî ô̌ tokhlǒnu, a sǎyṳ hè dǒ pa ô̌ bǎbǎ ahè jò tô̤̌.’

27“Dě kòyò dû̌yò̤̌htò̌sa nutôpwa̤ hî̌shěshu kû̌, ‘kè̌ ma̤pô̤̌nu hî̌dě, PhaAbraha꤮, he kwisǎyṳ na, noge mò̌ Khûlasarǔ dǒ hepha ahǐ. 28He pṳ̌ pwa̤khûsî ô̌kè pe sò̌yè̤̌, pô̤̌khô asî glè̌ hètǒ̤ tǎ̤ bǎ ta̤jî̌ta̤jû̌ agûlǎ̤ hǒtôkû tǎ̤mǎ̤ nu, plûge bǎ he Khûlasarǔ nudě asî gǔ yò̤lǎ̤plǎdî̌ ayanu noge dǐ ô̌ sè̌rè̌ asî nî̌.’

29“PhaAbraha hî̌shěshu lû̌û kû̌, ‘Khûmṳ̂shě kû̌ piwi̤pèshè tokhlǒ ô̌nǎ dǒ a glè̌ dǐ sè̌rè̌ bǎ na pṳ̌ pwa̤khû nutokhlǒ hǒ. Na pṳ̌ sò̌yè̤̌ tô ganǎ̤de tûû̌ asî yô̤̌sǎ pě.’

30“Dě kòyò dû̌yò̤̌htò̌sa nutôpwa̤ hî̌shěshu kû̌, ‘PhaAbraha꤮ tǒ̤hǒonô̤̌ nudě a lǒbe nò̌khôtô̤̌. Kòyòsi tôpwa̤ kè̌ ihtǒhtûpwa̤ gesô̌, dě a kè̌ ge shôbǐǐ sô̌ bǎ asî dě a yò̤lǎ̤plǎdî̌ ge nô̌pwǎ asǎphlǒ pě.’

31“Bǎbǎkǎlè PhaAbraha hî̌shěshu lû̌û kû̌, ‘asî kè̌ ganǎ̤de pô̤̌ Khûmṳ̂shě kû̌ piwi̤pèshè wě̤nǎ nutokhlǒ tô̤̌ hî̌dě, kòyò tôpwa̤pwa̤ kè̌ ihtǒhtûpwa̤ gesô̌ bǎ asî bǎbǎmî̌, a yṳ̌ǎ bǎ nô̌ na tô̤̌.’”