Luke 20
Kòyò gwè̌ Yeshǔ a ta̤siwi̤sòwò̤ awe̤akè
(Matè̌ 21:23-27; Makǔ 11:27-33)
1Tôni̤kha, Yeshǔ ô̌ dǒ ta̤lṳhtò̌hôkû dě a sû̌ǐtòwòǐ kòyò saprṳ̂, dě a shôbǐǐ bǎ kòyò kû̌ ta̤sǎlě̤we̤kè. Dě bǎnukha, pwa̤shû̌gǎ ikǒdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ, kû̌ Yṳ̌daphû̌ saprṳ̂saphǎ ikǒlǒkò tokhlǒ hè dǒ aô̌. 2Dě a hî̌ lû̌û kû̌, “Shôbǐǐlṳ̌ bǎ kè̌ pa, na ma̤ta̤ numî̌ na cû̌phî̌ kû̌ mò̌pè a ta̤siwi̤sòwò̤ ya? Mò̌pè noma̤ naya?” 3Dě Yeshǔ hî̌shěshu asî kû̌, “Kè̌ hî̌pô̤̌nudě, he gwè̌ sî yô̤̌sǎ tômû, dě shôbǐǐ bǎ he. 4Pwa̤jushi Khûyṳ̂ha ju bǎ kòyò shi numî̌ Cǒmara ǐ yǎ ta̤siwi̤sòwò̤ ya? Mè̤̌tô̤̌dě kòyòhǎkhû̌phû̌ ǐ lû̌û ya?” 5Asî hî̌ kè̌khî lû̌û kû̌, “Pa tô hî̌shěshu ya hî̌tè? pa kè̌ hî̌ kû̌, ‘Cǒmara ǐ lû̌û’ kè̌hî̌dě, a glè̌ gwè̌ sô̌ pa kû̌, ‘kè̌hî̌pô̤̌nudě sî yṳ̌ǎ lû̌û tô̤̌ ma̤titè?’ A glè̌ hî̌ pô̤̌nu pě. 6Mè̤̌tô̤̌dě, ‘kòyòhǎkhû̌phû̌ ǐ lû̌û,’ pa kè̌ hî̌ dě kòyò saprṳ̂ lǒ̤꤮ bò bǒo tokhlǒ yṳ̌ǎ kû̌ Khûyṳ̂ha mî̌ piwi̤pèshè akhû̌akhî, asî glè̌ wîsi pa kû̌ lǒ̤ pě.” 7Pô̤̌nudě asî hî̌shěshu kû̌, “Mò̌pè ǐ Khûyṳ̂ha ta̤siwi̤sòwò̤ dǒ a glè̌ jubǎ kòyò shi nu, pa sî̌ya tô̤̌.” 8Dě Yeshǔ hî̌shěshu asî kû̌, “Kè̌hî̌pô̤̌nudě he ma̤ta̤ kû̌ mò̌pè ta̤siwi̤sòwò̤ nu he shôbǐǐlṳ̌ bǎ sî tô̤̌tô̤̌.”Hî̌ khěkhô̌ pô̤̌ kû̌ pwa̤khòǎ sîpî̌phǎ tokhlǒ awe̤akè
(Matè̌ 21:33-46; Makǔ 12:1-12)
9Dě Yeshǔ shôbǐǐlṳ bǎ kòyò saprṳ̂ kû̌ yô̤̌sǎkhěkhô̌ tômṳ̂ dě a hî̌ kû̌, “Bǎtaplǎ kòyò ô̌ tôpwa̤, dě awe̤ dǒ a shǒǎǐ kû̌ sîpî̌mṳ̌ tokhlǒnu a ô̌ talǎ̤ dě a plûkhòǎkè kû̌ pwa̤khòǎ tokhlǒ. Htodě a hǎhtò̌cû̌ ô̌yî̤kè dǒ gǎshǔshawa̤ tôgǎ. a 10Bǎ sîpî̌sǎ mi akhanu, pô̤̌khô aglè̌ nǐ̤bǎ sîpî̌sǎ dǒ a tô nǐ̤bǎ nutokhlǒdě, sîpî̌sǎ běcǎ nohè ajû̌ tôpwa̤ dǒ pwa̤khòǎ nutokhlǒ a ô̌. Bǎbǎkǎlè pwa̤khòǎnu, a ma̤shapo̤sha jû̌ nutôpwa̤ dě a plûge koyoklǐkè lû̌û pwǎ. 11Pô̤̌nu akhû̌akhî, a nohè taplè̌kè ajû̌ dǒ ashǔshawa̤ tôpwa̤ bǎbǎkǎlè pwa̤khòǎ tokhlǒ po̤sha pô̤̌ lû̌û, a ma̤sòwò̤̌kè hto lû̌û dě a plûge koyoklǐ pô̤̌ lû̌û. 12Htodě a plûhè pô̤̌ ajû̌ supwa̤ tôpwa̤, dě pwa̤khòǎ sîpî̌phǎ nu, a po̤plèsha pô̤̌lû̌û, ma̤jî̌ma̤jû̌shû̌ bò lû̌û dě wîhtò̌kè lû̌û dǒ we̤khlo. 13“Dě sîpî̌phǎ běcǎ hî̌ kû̌, he tôbǎ ma̤hî̌tè? ‘He glè̌ nohè kû̌ he phû̌pwa̤khû dǒ he mô̤ǐ gutṳ̌ tôpwa̤ numî̌ asî glè̌ bè̌dubè̌nǎ̤ khlo lû̌û pě kǎlè,’ ahî̌ pô̤̌nu. 14“Bǎbǎkǎlè bǎ pwa̤khòǎ kè̌shǐ lû̌û phû̌pwa̤khû hè akhanu, asî hî̌ kè̌khî lû̌û kû̌, ‘hǒtôpwa̤ mî̌ we̤běcǎ aphû̌khû dǒ a tônǐ̤bǎ û̌cata̤bî̌ nutôpwa̤ hǒ. Cû̌! cû̌ma̤sikè yǎ tǎ꤮! dě a û̌cata̤bî̌ nu a glè̌ htû bò pata pě!’ 15Pô̤̌nu akhû̌akhî, asî cî̌cûgrû̌ htò̌kè lû̌û dǒ we̤khlo dě ma̤sikè lû̌û. “Kè̌ ma̤pô̤̌nudě we̤běcǎ glè̌ ma̤ pwa̤khòǎ hî̌tè pě? 16A glè̌ hè ma̤sikè kòyò lǒ̤꤮ bò nutokhlǒ dě a glè̌ plûkhòǎ tèplè̌kè sîpî̌phǎnu kû̌ kòyò dǒ ashǔshawa̤ tokhlǒ pě.” Bǎ kòyò saprṳ̂ ganǎ̤de ta̤hî̌bǎnu akha, asî hî̌ lô̌khô kû̌, “Pa sǎyṳ nohtûhtò̌ a pô̤̌nu tô̤̌!” 17Yeshǔ kè̌cû̌tô asî dě a gwè̌ asî kû̌, “Kè̌hî̌pô̤̌nu dě lî̤plò̌shǐ hî̌nǎ hewe̤hekè kû̌, ‘Kòyò ma̤htò̌ hǐ dě lǒ̤ dǒ asî wîkè lǒ̤ nutômènu, a htûhtò̌ bò dǒ a htû̌mějò hǐtômè hǒ,’ b a hî̌ pô̤̌nu dě amṳ̂asǎ mî̌ titè?” A gwè̌ kòyò pô̤̌nu. 18“Kòyò lǒ̤꤮ bò dǒ a lò̤tě̤ dǒ lǒ̤ nutômè akhû̌nu, akhwǐ glè̌ la̤gǎ pwǎ pě, bǎbǎkǎlè lǒ̤ nutômè glè̌ lò̤tě̤ dǒ asî akhû̌ pě bǎbǎ, ayô̤agî̌ glè̌ mǔsîpwî̌ bò pě.” 19Pwa̤sû̌ǐ ta̤sû̌ta̤tòwò asara tokhlǒ kû̌ pwa̤shû̌gǎ ikǒlǒkò tokhlǒ sî̌ya kû̌ Yeshǔ hî̌khěkhô̌ asî akhû̌khî, taplǎnô̤̌ a sǎyṳ pṳ̂̌ Yeshǔ bǎ nu. Bǎbǎkǎlè asî ǐsha kòyò saprṳ̂ nutokhlǒ alǎ̤.Kòyò gwè̌ Yeshǔ kû̌ tô ǐ Rûme̤khwǐ ta̤kûta̤mṳ̂̌ ya? Mè̤̌ tô ya?
(Matè̌ 22:15-22; Makǔ 12:13-17)
20Pô̤̌nu akhû̌akhî, pô̤̌khô̌ asî glè̌ pṳ̂̌nǐ̤ Yeshǔ ta̤hî̌bǎsǔyô̤̌sǎ tokhlǒ, htotô̤̌ pô̤̌khô asî glè̌ pṳ̂̌sûcû̌kè lû̌û dǒ Rûme̤khwǐ dǒ a ô̌ kû̌ a ta̤siwi̤sòwò̤ kû̌ a ta̤pô̤ta̤phǎ nutôpwa̤ a cǔdekû ayanu, asî ô̌pǒ̤kè̌ shěkhǎ lò̤tôlò̤bǎ dě a nocû̌ pwa̤gwè̌kè̌kè̌ tokhlǒ glè̌ cû̌ma̤khô̌ anǎ̤ pô̤̌ kòyòjî̌cǒ tokhlǒnu dě asî glè̌ gwè̌ khô̌ lô̌khô Yeshǔ yô̤̌sǎ tokhlǒ. 21Kòyò pwa̤gwè̌kè̌kè̌ gwè̌ Yeshǔ kû̌, “Sara꤮, pa sî̌ya kû̌ na ta̤hî̌bǎ tokhlǒ kû̌ na ta̤mǎlò̤ tokhlǒ numî̌ acǒatè̤, htotô̤̌ na kè̌dû̌kè̌pǐtǐ gû̌ kòyò tô̤̌. Na sû̌ǐtòwòǐ kòyò pô̤̌ atô kû̌ Cǒmara aklè̌aklò a ta̤tě̤ta̤mè̤̌ nutokhlǒ pwǎ. 22Pô̤̌nudě shôbǐǐpô̤̌ pa, mî̌ pa tôbǎ ǐ Rûme̤khwǐ ta̤kûta̤mṳ̂̌ ya? Mè̤̌ tô̤̌ ya?” 23Bǎbǎkǎlè Yeshǔ sî̌ya kû̌ asî pṳ̂̌ lû̌û ta̤hî̌bǎsǔ akhû̌akhî, a hî̌shěshu asî kû̌, 24“Dǔlṳ̌ bǎ kè̌ he sîruyî̌ tôbǎ. Dǒ ruyî̌lô̤ numî̌ mò̌pè iko ayô̤ kû̌ mò̌pè mi̤ ô̌pa?” 25Dě asî hî̌shěshu lû̌û kû̌, “Rṳ̂̌me̤ khwǐ Kè̌sa ayô̤ kû̌ ami̤ ô̌.” Dě a hî̌shěshu asî kû̌, “Kè̌ ma̤pô̤̌nudě, khwǐdû̌ Kè̌sa ata hî̌dě ǐ kû̌ khwǐdû̌nu, Cǒmara ata kè̌hî̌dě ǐ kû̌ Cǒmara nu.” 26Dě asî pṳ̂̌nṳ̌ lû̌û ta̤hî̌bǎsǔ dǒ kòyò saprṳ̂ alô̤mô̤̌ tômṳ̂̌꤮ tô̤̌. Yeshǔ hî̌shěshu asî pô̤̌o akhû̌akhî, a htò̌shôpe̤ bò asî dě a ô̌ sǔtukǔkè bò pwǎ.Kòyò gwè̌ Yeshǔ kû̌ ta̤si ihtǒhtûpwa̤tîkhî awe̤akè
(Matè̌ 22:23-33; Makǔ 12:18-27)
27Sadukè̌phû̌ dǒ yṳ̌ǎ kòyòsi ihtǒhtûpwa̤ gesô̌ tô̤̌ nutokhlǒ hè dǒ Yeshǔ ô̌ dě hègwè̌ lû̌û yô̤̌sǎ tômû kû̌, c 28“Saradû̌꤮, Khûmṳ̂shě wě̤nǎ ta̤mǎlò̤ tômû dǒ paya dě a hî̌ kû̌, kòyò tôpwa̤pwa̤ kè̌ sikè amalǎ̤ dě aphû̌ kè̌ ô̌kè tôpwǎ̤꤮ tô̤̌ hî̌nu, pô̤̌khô akhlialè glè̌ ô̌kè nudě, a pṳ̌pwa̤khû bǎ phî̌ akhi ô̌kènu, a hî̌ pô̤̌nu. d 29Khònò̤̌dě pṳ̌wè̤̌ pwa̤khû ô̌ susô̌tôpwa̤. A wè̤̌pwǎ̤lǒ tôpwa̤ phî̌ ama dě nô̌kònu asikè ama lǎ̤, dě aphû̌ ô̌kè tôpwǎ̤꤮ tô̤̌ akhû̌akhî, apṳ̌ hǒlǎ̤ tôpwa̤ bǎphî̌ akhi ô̌kè nutôpwa̤. 30Dě a pṳ̌pwa̤khû ginǐ̤pwa̤tôpwa̤ phî̌ sô̌ akhinu. 31Htodě apṳ̌pwa̤khû supwa̤ tôpwa̤ tǒ̤dǒ susô̌tôpwa̤ nî̌ a sikè sô̌kû̌ pô̤̌nu, dě a phû̌ ô̌kè lô̌khô tôpwǎ̤꤮ tô̤̌. 32Dǒnô̌kò dě pwa̤mǒ̤ nutôpwa̤ gû̌ sikè. 33Pô̤̌nudě bǎ꤮ si ihtǒhtûpwa̤sô̌ alṳmṳ̌ni̤ pě tôni̤nu, pwa̤mǒ̤ nutôpwa̤ glè̌ htû bǎtè tôpwa̤ ama pě? Ma̤titè̌hî̌dě asî pṳ̌wè̤̌ susô̌tôpwa̤ nǐ̤cubò lû̌û pwa̤mǒ̤ nutôpwa̤ cǎkǎ nǒ̤꤮.” 34Yeshǔ hîshǔ asî kû̌, “Hǒtôhtu nî̌, kòyò phî̌phû̌phî̌ma lô̌khô. 35Bǎbǎkǎlè kòyò dǒ Cǒmara bè̌ asî kû̌ a gwǎ kû̌ a glè̌ si ihtǒhtûpwa̤tîkhî bǎ nô̌kò tôhtu pě tokhlǒnu, ta̤phî̌phû̌phî̌ma ô̌ pe tô̤̌. 36Asî glè̌ sô̌sô̌ kû̌ mǒkhû̌ tanaphû̌ nutokhlǒ pě dě a si jò pe tô̤̌. A sî ihtǒhtûpwa̤ getîkhî dǒ ta̤si pě akhû̌akhî, asî mî̌ Cǒmara aphû̌mǒ̤phû̌khû tokhlǒ hǒ. 37Dě Khûmṳ̂shě khò lîtîklî̌ hto asǎphlǒ kû̌ kòyò dǒ a sihto tokhlǒnu, a glè̌ ihtǒ htûpwa̤ge sô̌ pě, ma̤titè̌dě pha Abraha kû̌ PhaIsè̌ kû̌ Phaya̤kû nu, a sihto yî̤̌kèhǒ, bǎbǎkǎlè lî̤plò̌shǐkû hî̌ nǎ tôtô̤̌ kû̌ bǎ mî̌gè̌htò̌ jôjǔ tôkû akhanu, Khûmûshě kaǎ Běcǎ nu kû̌, ‘PhaAbraha a Cǒmara, phaIsè̌ a Cǒmara, kû̌ Phaya̤kò a Cǒmara,’ e pô̤̌nu. 38Kòyò pṳ̂̌꤮ tôpwa̤ ô̌htûpwa̤ bò tûjû̌pwa̤ dǒ Cǒmara alô̤mô̤̌ akhû̌akhî, a mî̌ kòyòsi tokhlǒ a Cǒmara mè̤̌tô̤̌, kòyò htûpwa̤ tokhlǒ a Cǒmara.” 39Pwa̤sû̌ǐ ta̤sû̌ta̤tòwò asara tokhlǒ hî̌ pô̤̌ a kû̌, “Sara꤮ na hî̌shěshu jò̌꤮ lî.” 40Dě asî gwè̌ hèpô̤̌ bǔ lû̌û tocǒ꤮ tô̤̌.Kòyò gwè̌ Khrǐ awe̤akè
(Matè̌ 22:41-46; Makǔ 12:35-37)
41Yeshǔ gwè̌ asî kû̌, “Kòyò cû̌ hî̌tǒ̤ kû̌ Khrǐ mî̌ Khûdawi̤ akhlialè mî̌hî̌tè? 42Ma̤titè̤̌hî̌dě bǎ lî̤ htû̌sò̌htò̌ akûnu, Khûdawi̤ anǎ̤běcǎ sanǎ̤ cû̌ wě̤tǒ̤ kû̌, ‘Běcǎ hî̌ he Běcǎ kû̌, “Hǎnòò̌ô̌ dǒ he khǎlǎ cǔtômû nutôkhô. f ▼▼hǎnòò̌ô̌ dǒ khǎlǎ cǔtûmû tôkhô amṳ̂asǎ mî̌ kòyò dǒ kò bè̌dubè̌nǎ̤ a dě a ô̌ kû̌ a ta̤siwi̤sòwò̤ tôpwa̤.
43Hǎnòò̌ô̌ kudǔdǔ tǒ̤htû̌ he ma̤pè̤̌kè bòlîtîklǐ bò kòyò dǒ a sǎkhě na nutokhlǒ pěnî̌꤮. He glè̌ nohtû kòyò dǒ a sǎkhě na nutokhlǒ sô̌sô̌kû̌ na khǎlǎ lǎ̤yî̤̌ dǒ na hǎnòò̌ô̌ dě na yî̤̌lò̤ ǐyǎ nupě.”’ h 44Khwǐdawi̤ kaǎ Khrǐ kû̌, ‘Běcǎ’ akhû̌akhî, a cû̌ htû jò Khwǐdawi̤ aphû̌khû hî̌tè?” Yeshǔ hî̌ kòyò kû̌ sè̌rè̌ lô̌khô pwa̤sû̌ǐ ta̤sû̌ta̤tòwò asara tokhlǒ
(Matè̌ 23:1-36; Makǔ 12:38-40; Lǔka 11:37-54)
45Bǎ kòyò saprṳ̂ ganǎ̤de Yeshǔ a ta̤hî̌bǎ akhanu, a hî̌ akhôphijǎ tokhlǒ kû̌, 46“Sè̌rè̌ lô̌khô sînǎ̤ kû̌ pwa̤sû̌ǐ ta̤sû̌ta̤tòwò asara nutokhlǒ nî̌꤮. Asî nutokhlǒ mî̌ a sǎyṳ sô̌ lô̌khô jejû gòpwè̤htû dě a cû̌gecû̌hè dǒ klǎkû dě a sǎyṳ no hî̌bǎ bè̌dubè̌nǎ̤ kòyò kû̌ anǎ̤. Dǒ ta̤cabahǐkû nubǎbǎ, dǒ pwèkû nubǎbǎ, asî sǎyṳ hǎnòò̌ lô̌khô gûlǎ̤ dǒ kòyò bè̌dû̌bè̌htû a nutokhlǒ pwǎ. 47Asî cû̌lòhôǎ lòhôô bò pwa̤mǒ̤ô̌khwè̌ ta̤ pṳ̂̌꤮ tocǒ. Pô̤̌khô kòyò glè̌ gènè̤nṳ̌ asî kû̌ asî mî̌ kòyòplò̌shǐ tokhlǒ nudě, asî kwicaba htûgipi̤ bǎ kòyò. Kòyò pô̤̌nu tokhlǒnu, ta̤cî̌htò̌ glè̌ bǎ jî̌ khlo kû̌ kòyò shǔshawa̤ tokhlǒ pě.”
Copyright information for
KxfSCKXF